‹¿Bajcheʼ mi caj i tejchelob chʼojyel jini chʌmeñoʼ bʌ?›

1, 2. ¿Chucoch ñucʌch i cʼʌjñibal i chaʼan jiñi xñoptʼañob chaʼan miʼ cʌñob chaʼan bʌ jiñi i chaʼ chʼojyel jiñi muʼ bʌ caj i majlelob ti panchan?

PEJTELEL jiñi i wiñicob Jehová yom i ñumen ñaʼtañob chaʼan jiñi i chaʼ chʼojyel muʼ bʌ caj i majlelob ti panchan. Jiñi yajcʌbiloʼ bʌ, cʌylemobto bʌ ila ti Lum, yomʌch i ñaʼtañob come yaʼʌch ti panchan mi caj i chumtʌlob. I jiñi yonlel woli (choncol) bʌ i pijtañob chumtʌl ila ti Lum yomobʌch i ñaʼtañob jaʼel come mi caj i tajob cabʌl bendición wocolix i yʌlʌ jiñi i chaʼ chʼojyel jiñi yajcʌbiloʼ bʌ.

² Dios tsiʼ cʼʌñʌ jiñi xcʌntʼañob i chaʼan Jesús chaʼan miʼ tsʼijbuñob chaʼan jiñi i chaʼ chʼojyel jiñi muʼ bʌ caj i majlelob ti panchan. Jiñi apóstol Juan tiʼ tsictesa: «I yalobiloñixla Dios, pero maxto tsictiyemic ti chuqui mi caj lac sujtel. La cujil chaʼan cheʼ baʼ ora miʼ pʌs i bʌ lajal mi caj lac sujtel cheʼ bajcheʼ yilal Dios» (1 Jn. 3:2, TNM). Jin chaʼan, jiñi yajcʌbiloʼ bʌ mach yujilobic bajcheʼ yilal chumtʌl yaʼ ti panchan yicʼot cheʼ bʌ espíritujobix. Pero yujilobʌch chaʼan mi caj i qʼuelob Jehová cheʼ bʌ yaʼix mi caj i yajñelob ti panchan. Jiñi Biblia maʼañic miʼ tsictesan tiʼ pejtelel chaʼan jiñi chaʼ chʼojyel ti panchan, pero mucʼʌch i tsʼitaʼ tsictesan. Jumpʼejl ejemplo, jiñi apóstol Pablo tsiʼ yʌlʌ chaʼan jiñi yajcʌbiloʼ bʌ mi caj i yajñelob yicʼot Cristo cheʼ bʌ miʼ jisan jiñi i «yumʌntel yicʼot i pʼʌtʌlel pejtelel i contrajob» yicʼot cheʼ bʌ miʼ jisan jiñi chʌmel, «jini cojix bʌ laj contra». Cheʼ jiñi, Jesús yicʼot jiñi muʼ bʌ caj i chaʼleñob yumʌntel yicʼot, mi caj i yʌcʼob i bʌ tiʼ wenta Dios. I cheʼ jaʼel, Jesús yicʼot jiñi muʼ bʌ caj i chaʼleñob yumʌntel yicʼot, mi caj i yʌqʼueñob tiʼ wenta Jehová pejtelel chuqui tac an (1 Co. 15:24-28). ¡Wen utsʼatax chuqui mi caj i yujtel ti jimbʌ ora!b

 3. Cheʼ bajcheʼ miʼ yʌl 1 Corintios 15:30-32 (TNM), ¿chuqui tsaʼ mejli i mel Pablo come an i ñopoñel ti jiñi chaʼ chʼojyel?

³ Come añʌch i ñopoñel Pablo ti jiñi chaʼ chʼojyel tsiʼ colta i lʌtʼ jiñi wocol tac (pejcan 1 Corintios 15:30-32, TNM).c Tiʼ sube jiñi corintiojob: «Bʌbʌqʼuen mic chʌmel ti jujumpʼejl qʼuin». I tsiʼ bej alʌ: «Tsaʼ c chaʼle jatsʼ quicʼot jontol bʌ añimal tac yaʼ ti Éfeso». Ili tajol yom i yʌl chaʼan tsiʼ chaʼle jatsʼ yicʼot añimal tac yaʼ ti circo am bʌ ti jiñi tejclum Éfeso (2 Co. 1:8; 4:10; 11:23). O tajol yom i yʌl jiñi contrajintel tsaʼ bʌ i ñusa tiʼ tojlel jiñi judíojob yicʼot yambʌ i contrajob lajaloʼ bʌ bajcheʼ «jontol bʌ añimal tac» (Hch. 19:26-34; 1 Co. 16:9). Pablo tsiʼ ñusa cabʌl wocol, pero tsiʼ chʌn ñopo chaʼan tijicña mi caj i ñusan ti jiñi talto bʌ qʼuin (2 Co. 4:16-18).

 4. ¿Bajcheʼ miʼ wen coltañob jiñi pijtaya chaʼan chaʼ chʼojyel jiñi xñoptʼañob ili ora? (Qʼuele jiñi foto am bʌ tiʼ tejchibal).

⁴ Ili ora jaʼel mi lac ñusan cabʌl wocol tac. An hermanojob am bʌ melbentiyob mach bʌ tojic. An chumuloʼ bʌ baqui wen bʌbʌqʼuen tiʼ caj guerra tac. I an chumuloʼ bʌ baqui maʼañic miʼ mejlelob i tempañob i bʌ o mʌctʌbil jiñi subtʼan, i jiñi la quermañujob woli (yʌquel) i melbeñob i yeʼtel (troñel) Jehová i maʼañic miʼ bʌcʼñañob chaʼan miʼ yotsʌntelob ti cárcel o chaʼan miʼ tsʌnsʌntelob. Ili hermanojob woliʼ chʌn chʼujutesañob Jehová i miʼ pʌsbeñoñobla wem bʌ ejemplo. Maʼañic miʼ bʌcʼñañon chʌmel (sajtel) come yujilob chaʼan Jehová mi caj i yʌqʼueñob chuqui ñumen wem bʌ.

 5. ¿Baqui bʌ ñaʼtʌbalʌl miʼ mejlel i cʼunʼesan lac ñopoñel ti jiñi chaʼ chʼojyel?

⁵ Pablo tiʼ sube jiñi hermanojob chaʼan an yambʌ hermanojob mach bʌ weñic chuqui woliʼ ñaʼtañob: «Mi maʼañic mi caj i chʼojyesʌntelob jiñi chʌmeñoʼ bʌ, ‹laʼ laj cʼux lac waj yicʼot laʼ lac jap chuqui mi lac jap come ijcʼʌl mi caj lac chʌmel›». Ili pensar mach tsijibic ti jimbʌ ora come cheʼ bʌ Pablo tiʼ subeyob iliyi, tajol woliʼ taj ti tʼan Isaías 22:13 baqui miʼ yʌl chaʼan jiñi israelitajob cojach tsaʼ caji i melob (chaʼleñob) muʼ bʌ i mulañob i maʼañic tsaʼ caji i melob yom bʌ Dios. Lajal bajcheʼ jiñi wiñicob xʼixicob ili ora, jiñi israelitajob tiʼ subeyob i bʌ: «Mele chuqui a wom a mel come mach la cujilic jala miʼ cajel lac chʌmel». Pero la cujilix chuqui tsiʼ chaʼleyob jiñi israelitajob tiʼ caj i ñusatʼañob (2 Cr. 36:15-20).

 6. Mi añʌch lac ñopoñel ti jiñi chaʼ chʼojyel, ¿bajcheʼ mi caj i coltañonla cheʼ bʌ mi caj lac yajcan la camigojob?

⁶ Mi añʌch lac ñopoñel ti jiñi chaʼ chʼojyel yom miʼ coltañonla cheʼ mi caj lac yajcan la camigojob. Jiñi xñoptʼañob ti Corinto mach yomic miʼ ñochtañob jiñi maʼañic bʌ miʼ ñopob chaʼan mi caj i yujtel chaʼ chʼojyel. ¿Chuqui miʼ cʌntesañonla iliyi? Chaʼan maʼañic mi caj i wis coltañonla mi tsaʼ lac ñochtayob jiñi an jach bʌ ti pensarob i melob chuqui yomob. Miʼ mejlel i yʌqʼueñoñobla lac sʌt jiñi wem bʌ principio tac yicʼot jiñi wem bʌ lac melbal. I cheʼto jaʼel, miʼ mejlel i cʼotel lac mel muʼ bʌ i tsʼaʼlen Dios. Jin chaʼan Pablo tsiʼ yʌcʼʌ ili ticʼojel: «Yom yʌxʌl laʼ wo bajcheʼ yom. Mach laʼ chaʼlen mulil» (1 Co. 15:33, 34).

 7. Cheʼ bajcheʼ miʼ yʌl 1 Corintios 15:35-38, ¿chuqui ti cʼajtiya miʼ mejlel i melob jiñi mach bʌ yomobic chaʼan miʼ ñojpel jiñi chaʼ chʼojyel?

⁷ (Pejcan 1 Corintios 15:35-38). Juntiquil mach bʌ yomic chaʼan miʼ ñojpel jiñi chaʼ chʼojyel miʼ mejlel i suben iliyi jiñi yambʌlob: ‹¿Bajcheʼ mi caj i tejchelob chʼojyel jini chʌmeñoʼ bʌ? ¿Bajcheʼ yilal i cuctal?›. Yomʌch mi lac wen ñaʼtan bajcheʼ yilal tsiʼ jacʼʌ Pablo ili cʼajtiya come yonlel wiñicob xʼixicob añʌch chuqui miʼ bajñel ñaʼtañob chaʼan chuqui miʼ yujtel cheʼ bʌ an majqui miʼ chʌmel. Pero ¿chuqui miʼ yʌl jiñi Biblia?

 8. ¿Chuqui ti ejemplo miʼ coltañonla lac ñumen chʼʌmben i sujm jiñi chaʼ chʼojyel ti panchan?

⁸ Cheʼ bʌ an majqui miʼ chʌmel miʼ yocʼmʌn (pʌcʼman) i bʌcʼtal. Pero Jehová jiñʌch tsaʼ bʌ i mele jiñi universo cheʼ bʌ maxto añic chuqui an, jin chaʼan mucʼʌch mejlel i chaʼ chʼojyesan juntiquil lac piʼʌl yicʼot miʼ mejlel i yʌqʼuen i bʌcʼtal yom bʌ (Gn. 1:1; 2:7). Pablo tsiʼ cʼʌñʌ jumpʼejl ejemplo chaʼan miʼ tsictesan chaʼan Dios miʼ mejlel i yʌqʼuen jujuntiquil i bʌcʼtal cheʼ bajcheʼ yom. Tsiʼ taja ti tʼan jumpʼejl «pacʼ» muʼ bʌ i pʌjqʼuel ti lum i miʼ sujtel ti juntejc alʌ teʼ. Yʌñʌlix jiñi muʼ bʌ i pʌjqʼuel come muqʼuix i sujtel ti alʌ teʼ.

 9. ¿Bajcheʼ miʼ tsictesan 1 Corintios 15:39-41 cheʼ bʌ mach junlajalic bʌcʼtalʌl an?

⁹ (Pejcan 1 Corintios 15:39-41). Pablo tsiʼ yʌlʌ chaʼan Dios mach junlajalic tsiʼ melbe i bʌcʼtal jiñi cuxul tac bʌ. Jumpʼejl ejemplo, jiñi i bʌcʼtal wacax, xmateʼmut yicʼot chʌy wen qʼuexel tacʌch. Cheʼ jaʼel, tsiʼ yʌlʌ chaʼan jiñi Qʼuin yicʼot jiñi Luna qʼuexelʌch yicʼot chaʼan «i ñuclel jumpʼejl ecʼ mach lajalic bajcheʼ i ñuclel yambʌ ecʼ». Anquese maʼañic mi lac taj laj qʼuel, jiñi científicojob miʼ yʌlob chaʼan an yʌñʌl tac bʌ ecʼ, an colem bʌ, an mach bʌ wen colemic, an chʌchʌc bʌ, an sʌsʌc bʌ yicʼot cʼʌncʼʌn bʌ cheʼ bajcheʼ jiñi Qʼuin. Pablo tsiʼ yʌlʌ jaʼel chaʼan «junchajp i bʌcʼtal jini añoʼ bʌ ti panchan, yambʌ i bʌcʼtal jini añoʼ bʌ ti pañimil». ¿Chuqui yom bʌ i yʌl Pablo? Chaʼan jiñi chumulonbʌla ila ti Pañimil an lac bʌcʼtal yicʼot lac chʼichʼel, pero jiñi chumuloʼ bʌ ti panchan mach cheʼiqui come espíritujob, jumpʼejl ejemplo jiñi ángelob.

10. ¿Bajcheʼ yilal i bʌcʼtal miʼ cajelob jiñi muʼ bʌ caj i chaʼ chʼojyelob ti panchan?

¹⁰ Pablo tsiʼ bej alʌ: «Cheʼʌch jaʼel cheʼ miʼ chaʼ chʼojyelob jini chʌmeñoʼ bʌ. Jini muʼ bʌ i mujquel miʼ yocʼmʌl. Jini muʼ bʌ i chaʼ chʼojyel mach yujilic ocʼmʌl». Cheʼ bʌ an majqui miʼ chʌmel miʼ yocʼmʌn i bʌcʼtal i miʼ chaʼ sujtel ti tsʼubejn (Gn. 3:19). Jin chaʼan, ¿bajcheʼ miʼ mejlel i chaʼ chʼojyel juntiquil lac piʼʌl cheʼ bʌ ‹mach yujilix ocʼmʌl› i bʌcʼtal? Pablo mach jiñic woliʼ taj ti tʼan juntiquil quixtañu muʼ bʌ i chaʼ chʼojyel ila ti Pañimil, cheʼ bajcheʼ jiñi quixtañujob tsaʼ bʌ i chaʼ chʼojyesayob Elías, Eliseo yicʼot Jesús. Woli bʌ i taj ti tʼan Pablo jiñʌch muʼ bʌ caj i chaʼ chʼojyelob ti panchan bajcheʼ «Espíritu» (1 Co. 15:42-44).

11, 12. ¿Bajcheʼ yilal tsaʼ chaʼ chʼojyi Jesús, i chuqui mi caj i chaʼlen i bʌcʼtal jiñi yajcʌbiloʼ bʌ?

¹¹ Cheʼ bʌ Jesús tsajñi ila ti Pañimil, cheʼ i bʌcʼtal bajcheʼ joñonla. Pero, cheʼ tsaʼix chaʼ chʼojyi, «tsaʼ sujti ti espíritu muʼ bʌ yʌcʼ cuxtʌlel» i tsaʼ chaʼ majli ti panchan. Lajalʌch jaʼel, jiñi yajcʌbiloʼ bʌ mi caj i chaʼ chʼojyelob ti panchan bajcheʼ espíritujob. Pablo tsiʼ yʌlʌ: «Wʌle lajalonla ti qʼuelol bajcheʼ Adán. Pero lajal mi caj la cajñel cheʼ bajcheʼ Cristo» (1 Co. 15:45, TNM; 15:46-49).

¹² Wen ñucʌch i cʼʌjñibal cheʼ bʌ mi laj cʼajtesan chaʼan cheʼ bʌ Jesús tsaʼ chaʼ chʼojyi espíritujix. Cheʼ bʌ Pablo muqʼuix caj i taj ti tʼan jiñi ñumen ñuc bʌ i cʼʌjñibal chaʼan bʌ jiñi chaʼ chʼojyel tsiʼ yʌlʌ chucoch jiñi «lac bʌcʼtal yicʼot lac chʼichʼel yujil bʌ ocʼmʌl mach ochic tiʼ yumʌntel Dios» yaʼ ti panchan (1 Co. 15:50). Jiñi apóstolob yicʼot jiñi yambʌ yajcʌbiloʼ bʌ maʼañic mi caj i majlelob ti panchan yicʼot i bʌcʼtalob yujil bʌ ocʼmʌn. Jin chaʼan, ¿jalaqui mi caj i chaʼ chʼojyelob? Jiñi i chaʼ chʼojyel yajcʌbiloʼ bʌ Pablo tsiʼ yʌlʌ chaʼan mi caj i yujtel ti jiñi talto bʌ qʼuin, maʼañic mi caj i chaʼ chʼojyelob cheʼ bʌ ujtel jaxto tsaʼ chʌmiyob. Cheʼ bʌ Pablo tiʼ tsʼijbu 1 Corintios, an xcʌntʼañob ‹tsaʼix chʌmiyob› cheʼ bajcheʼ Santiago, i jiñi yambʌ apóstolob yicʼot yambʌ yajcʌbiloʼ bʌ ti wiʼilto mi caj i chʼojyelob (1 Co. 15:6; Hch. 12:1, 2).

13. ¿Chuqui tsaʼ ajli chaʼan mi caj i yujtel cheʼ bʌ woliʼ pʌs i bʌ Jesús?

¹³ Jesús yicʼot Pablo tsiʼ tajayob ti tʼan cheʼ bʌ miʼ pʌs i bʌ Cristo, jiñʌch cheʼ baʼ ora mi caj i yujtel guerra tac, yujquel lum, miʼ cajel cʼamʌjel tac yicʼot mi caj i yujtel yan tac bʌ wocol tiʼ pejtelel pañimil. Ti ili profecía, woli bʌ laj qʼuel chaʼan woli tsʼʌctiyel tilel cʼʌlʌl ti 1914, an chuqui ñuc bʌ woliʼ mejlel. Jesús tsiʼ yʌlʌ chaʼan mi caj i sujbel jiñi wen tʼan chaʼan i Yumʌntel Dios «tiʼ pejtelel pañimil. Ti jimbʌ ora mi caj i tilel i jilibal» (Mt. 24:3, 7-14). Pablo tsiʼ yʌlʌ chaʼan cheʼ bʌ woliʼ pʌs i bʌ lac Yum jiñi xñoptʼañob yajcʌbiloʼ bʌ tsaʼix bʌ «chʌmiyob» mi caj i chaʼ chʼojyelob ti panchan (1 Ts. 4:14-16; 1 Co. 15:23, TNM).

14. ¿Chuqui miʼ chaʼleñob jiñi yajcʌbiloʼ bʌ cheʼ bʌ woliʼ pʌs i bʌ Cristo?

¹⁴ Ti ili ora, jiñi xñoptʼañob yajcʌbiloʼ bʌ muʼ bʌ i chʌmelob ila ti Pañimil ti ora miʼ chaʼ chʼojyelob ti panchan. ¿Bajcheʼ la cujil? Come jiñʌch muʼ bʌ i yʌqʼueñonla lac ñaʼtan tsaʼ bʌ i yʌlʌ Pablo ti 1 Corintios 15:51, 52: «Mach ti pejtelonicla mi caj lac chʌmel, pero ti pejtelonla mi caj lac yʌjñel. Cheʼ miʼ wustʌl jini cojix bʌ trompeta, ti ora jach mi caj lac yʌjñel cheʼ bajcheʼ ora jach miʼ mujtsʼel miʼ cajñel lac wut». Ili tʼan tac wolix i tsʼʌctiyel ili ora. Cheʼ bʌ miʼ chaʼ chʼojyelob ili i yermañujob Cristo ñumen tijicña mi caj i yubiñob i bʌ come mi caj i yajñelob tiʼ pejtelel ora yicʼot «lac Yum» (1 Ts. 4:17).

15. ¿Chuqui mi caj i melob cheʼ bʌ yaʼix añob ti panchan jiñi muʼ bʌ caj i yʌjñelob ti ora «cheʼ bajcheʼ ora jach miʼ mujtsʼel miʼ cajñel lac wut»?

¹⁵ Jiñi Biblia miʼ tsictesan chuqui mi caj i melob ti panchan jiñi muʼ bʌ caj i yʌjñelob ti ora «cheʼ bajcheʼ ora jach miʼ mujtsʼel miʼ cajñel lac wut». Jesús tiʼ subeyob: «Jini muʼ bʌ i mʌjlel i chaʼan yicʼot jini muʼ bʌ i melbeñon queʼtel cʼʌlʌl tiʼ jilibal mi caj cotsañob tiʼ yum colem tejclumob. Tsʌts mi caj i chaʼleñob yumʌl, chucul i chaʼañob vara melbil bʌ ti tsucul taqʼuin. Mi caj i jisañob jini xñusa tʼañob cheʼ bajcheʼ miʼ bicʼti tojpʼel pʼejt. Cheʼʌch i pʼʌtʌlel bajcheʼ c pʼʌtʌlel tsaʼ bʌ i yʌqʼueyon c Tat» (Ap. 2:26, 27). Jiñi yajcʌbiloʼ bʌ mi caj i tsʌcleñob majlel Jesús i chucul i «chaʼañob vara melbil bʌ ti tsucul taqʼuin» cheʼ bʌ mi caj i melob i yeʼtel ti tejclum tac (Ap. 19:11-15).

16. ¿Bajcheʼ mi caj i mʌlbeñob jiñi chʌmel yonlel wiñicob xʼixicob?

¹⁶ Jiñi yajcʌbiloʼ bʌ mi caj i mʌlbeñob (jotbeñob) jiñi chʌmel (1 Co. 15:54-57). Come miʼ chaʼ chʼojyelob mi caj i yʌcʼob i coltaya chaʼan miʼ jisañob jiñi jontolil am bʌ ila ti Pañimil ti jiñi Armagedón woli bʌ i lʌcʼtiyel tilel. Cabʌl xñoptʼañob cuxul mi caj i ñumelob ti jiñi Ñuc bʌ wocol muʼ bʌ caj i yujtel i mi caj i yochelob ti jiñi tsijiʼ bʌ pañimil (Ap. 7:14). Ili wiñicob xʼixicob mi caj i qʼuelob bajcheʼ yambʌ mi caj i mʌlbentel jiñi chʌmel: Jiñʌch cheʼ bʌ mi caj i chaʼ chʼojyelob yonlel wiñicob xʼixicob (quixtañujob) tsaʼ bʌ chʌmiyob ti wajali. ¡Ti jimbʌ ora wen tijicña mi caj i yubiñob i bʌ! (Hch. 24:15). I pejtelel jiñi xucʼuloʼ bʌ miʼ yajñelob ti Jehová mi caj i mʌlbeñob jiñi chʌmel tsaʼ bʌ ochi tiʼ caj Adán i tiʼ pejtelel ora mi caj i chumtʌlob.

17. Cheʼ bajcheʼ miʼ yʌl 1 Corintios 15:58, ¿chuqui yom mi lac mel?

¹⁷ Pejtelel jiñi xñoptʼañonbʌla ili ora mi laj qʼuel ti ñuc jiñi tʼan tac chaʼan jiñi chaʼ chʼojyel tsaʼ bʌ i tsʼijbube Pablo jiñi Corintiojob. Jin chaʼan, la comʌch lac jacʼ tsaʼ bʌ i yʌlʌ Pablo cheʼ bʌ mi lac wen «chaʼliben i yeʼtel lac Yum» (pejcan 1 Corintios 15:58). Mi mucʼʌch lac chʌn pʌs lac xucʼtʌlel i mi lac chaʼlen wersa lac mel i yeʼtel, ñumen tijicña mi caj lac chumtʌl cheʼ bajcheʼ mach ñaʼtʌbilic lac chaʼan. I cheʼ jiñi, mi caj laj qʼuel chaʼan mach lolomic jach jiñi eʼtel tsaʼ bʌ lac melbe jiñi lac Yum.