Romanos

10 Hermanojob, jiñi com bʌ tiʼ pejtelel c pusicʼal yicʼot mij cʼajtiben Dios ti wocol tʼan jin chaʼan miʼ coltʌntelob. 2 Come miʼ mejlel c sub chaʼan miʼ wen chaʼleñob wersa i melbeñob i yeʼtel Dios, pero mach wen i cʌñʌyobic Dios. 3 Mach i cʌñʌyobic chuqui jiñi toj bʌ miʼ yʌl Dios, i tiʼ caj iliyi jin jach miʼ melob chuqui toj miʼ ñaʼtañob, maʼañic tsiʼ yʌcʼʌyob i bʌ ti chuqui jiñi toj bʌ miʼ yʌl Dios. 4 Come Cristo tsiʼ jisa jiñi Mandar chaʼan pejtelel muʼ bʌ i pʌs i ñopoñel miʼ qʼuejlel ti toj.

5 Moisés tsiʼ yʌlʌ chaʼan juntiquil wiñic muʼ bʌ i mel chuqui toj cheʼ bajcheʼ miʼ yʌl jiñi Mandar cuxul mi caj i yajñel. 6 Pero tiʼ tojlel jiñi muʼ bʌ i mel chuqui toj cheʼ bajcheʼ an jiñi i ñopoñel, tsaʼ ajli: «Mach a wʌl ti a pusicʼal ‹¿Majqui mi caj i letsel majlel ti panchan?›. Ili yom i yʌl chaʼan miʼ pʌy jubel Cristo. 7 Cheʼ jaʼel mach a wʌl ‹¿Majqui mi caj i jubel majlel yaʼ ti abismo?›.* Ili yom i yʌl chaʼan miʼ pʌy loqʼuel Cristo yaʼ baqui an chʌmeñoʼ bʌ». 8 Pero ¿chuqui miʼ yʌl? «Jiñi tʼan lʌcʼʌl an ti a tojlel, ti a wej yicʼot ti a pusicʼal», com cʌl, «jiñi tʼan» chaʼan bʌ ñopoñel, jiñi muʼ bʌ lac sub. 9 Come mi ti a wej maʼ jamʌ sub tiʼ tojlel lac piʼʌlob chaʼan Jesús jiñʌch lac Yum i ti a pusicʼal maʼ pʌs chaʼan mucʼʌch a ñop chaʼan Dios tsiʼ chʼojyesa* yaʼ baqui an chʌmeñoʼ bʌ, mucʼʌch caj a coltʌntel. 10 Come cheʼ mi lac pʌs lac ñopoñel loqʼuem bʌ ti lac pusicʼal miʼ yʌcʼ chaʼan mi laj qʼuejlel ti toj, pero cheʼ mi lac sub jiñi ñopol bʌ lac chaʼan miʼ yʌqʼueñonla lac taj laj coltʌntel.

11 Come yaʼ ti Tsʼijbujel an jumpʼejl parte muʼ bʌ i yʌl: «Mi juntiquilic muʼ bʌ i yʌcʼ i ñopoñel tiʼ tojlel mi caj i chaʼ ñaʼtan i bʌ».* 12 Come mach yʌñʌlic jiñi judío yicʼot jiñi griego. Juntiquilob jach i Yum, jiñi muʼ bʌ i yʌqʼuen bendición pejtelel jiñi muʼ bʌ i cʼajtibeñob i coltaya. 13 Come «majqui jach miʼ cʼajtin coltaya tiʼ cʼabaʼ Jehová* mi caj i coltʌntel». 14 Pero ¿bajcheʼ mi caj i cʼajtibeñob i coltaya mi maxto i yʌcʼʌyob i ñopoñel tiʼ tojlel? ¿I bajcheʼ mi caj i yʌcʼob i ñopoñel mi maʼañic baʼ ubibil i chaʼañob tiʼ tojlel? ¿I bajcheʼ mi caj i yubiñob mi maʼañic majqui miʼ subeñob? 15 ¿Bajcheʼ miʼ cajelob ti subtʼan mi maʼañic tsaʼ chojquiyob majlel? Cheʼ bajcheʼ tsʼijbubil: «¡Wen utsʼatob jax i yoc jiñi muʼ bʌ i subob jiñi wen tʼan!».

16 Pero mach tiʼ pejtelelobic tsiʼ jacʼʌyob jiñi wen tʼan, come Isaías miʼ yʌl: «Jehová,* ¿majqui tsiʼ ñopo jiñi tsaʼ bʌ lon c subu?». 17 Jin chaʼan, jiñi lac piʼʌl cojach miʼ yʌcʼ i ñopoñel cheʼ bʌ tsaʼix i yubi jiñi tʼan. I jiñi tʼan miʼ yubintel cheʼ bʌ an majqui miʼ sub chaʼan bʌ jiñi Cristo. 18 Pero joñon mij cʼajtin: ¿Mach ba añic tsaʼ laʼ wubi? Tsaʼʌch, come «tiʼ petol pañimil tsaʼ ubinti, cʼʌlʌl baqui jaxʌl an jiñi pañimil tsaʼ ubinti jiñi i tʼan». 19 Pero joñon mij cʼajtin: ¿Mach ba añic tsiʼ ñaʼta jiñi Israel? Weno, Moisés miʼ yʌl: «Mi caj c techbeñob i michʼajel cheʼ bʌ mij cʼʌn jiñi mach bʌ jumpʼejlobic tejclum. Mi caj c wen acʼob ti michʼ cheʼ bʌ mij cʼʌn jumpʼejl tejclum mach bʌ añic i ñaʼtʌbal». 20 Pero Isaías tsiʼ taja i chʼejlel* i miʼ yʌl: «Jiñi mach bʌ añic woliʼ lon sʌclañoñob tsiʼ tajayoñob. Jiñi maʼañic bʌ woliʼ lon cʼajtiñob tic tojlel tsiʼ cʌñʌyoñob». 21 Pero tiʼ tojlel Israel miʼ yʌl: «Jumpʼejl qʼuin tsaʼ c tichʼi j cʼʌb tiʼ tojlel jumpʼejl tejclum xñusatʼan bʌ yicʼot tsʌts bʌ i pusicʼal».