Chʌn ajñen bajcheʼ i yamigo Jehová

1, 2. ¿Baqui miʼ mejlel lac taj laj cʌntʌntel ti ili ora?

ÑAʼTANCU chaʼan woliyet (choncolet) ti xʌmbal ti calle i ti ora miʼ mʌjquel jiñi panchan. Wen an chajc i miʼ tilel tsʌts bʌ jaʼal. Jin chaʼan, maʼ sʌclan baqui miʼ mejlel a ñusan. Wen tijicña maʼ wubin cheʼ bʌ maʼ taj jumpʼejl ajñibʌl baqui maʼ coltan a bʌ.

² Ili ora, lʌcʼʌ cheʼʌch añonla. Ili pañimil woli (yʌquel) ti ñumen asiyel. Tajol maʼ cʼajtiben a bʌ: «¿Baqui miʼ mejlel c taj j cʌntʌntel?». Juntiquil xtsʼijbaya Biblia tsiʼ yʌlʌ: «Mi caj c sub: Lajalʌch lac Yum bajcheʼ tsʼajquibil bʌ otot baʼ mic putsʼel. C Diosʌch, woli bʌ c ñop» (Salmo 91:2). Jehová miʼ mejlel i coltañonla ti lac wocol tac yicʼot miʼ yʌqʼueñonla utsʼatax bʌ lac pijtaya chaʼan jiñi talto bʌ qʼuin.

 3. ¿Chuqui yom mi lac mel chaʼan miʼ coltañonla Jehová?

³ ¿Bajcheʼ tac miʼ cʌntañonla Jehová? Miʼ coltañonla lac lʌtʼ baqui jach bʌ wocol. Cheʼ jaʼel, ñumen pʼʌtʌl bajcheʼ majqui jach bʌ quixtañu muʼ bʌ i ñop i ticʼlañonla. Anquese mi lac ñusan wocol, miʼ mejlel lac ñop chaʼan Jehová mi caj i tojʼesan. Jiñi Biblia miʼ subeñonla yom bʌ mi lac mel: «Chʌn ajñenla tiʼ cʼuxbiya Dios» (Judas 21). Chaʼan Jehová miʼ coltañonla, yom lʌcʼʌl añonla tiʼ tojlel.

4, 5. ¿Bajcheʼ an i pʌsbeyonla Jehová chaʼan mucʼʌch i cʼuxbiñonla?

⁴ Chaʼan mi lac chʌn ajñel bajcheʼ i yamigo Jehová, yom mi lac ñaʼtan chaʼan mucʼʌch i wen cʼuxbiñonla. Ñaʼtancu pejtelel melbil bʌ i chaʼan ti lac tojlel. Tsiʼ yʌqʼueyonla ili Pañimil, jumpʼejl utsʼatax bʌ ajñibʌl baqui wen an teʼ yicʼot añimal tac. An i yʌqʼueyonla sumuc bʌ bʌlñʌcʼʌl yicʼot cabʌl jaʼ. Cheʼ jaʼel, Jehová tsiʼ pʌsbeyonla yaʼ ti Biblia chuqui i cʼabaʼ yicʼot bajcheʼ yilal. Pero tsiʼ ñumen pʌsʌ i cʼuxbiya cheʼ bʌ tsiʼ choco tilel i Yalobil chaʼan miʼ chʌmel (sajtel) ti laj caj (Juan 3:16). Wocolix i yʌlʌ iliyi, añix wen utsʼatax bʌ lac pijtaya.

⁵ Jehová tsaʼix i waʼchoco i Yumʌntel jiñi Mesías yaʼ ti panchan. Tsʼitaʼ jachix yom chaʼan ili Yumʌntel miʼ jisan jiñi wocol tac yicʼot miʼ sujtesan ti paraíso ili Pañimil, baqui mi caj lac taj ñʌchʼtʌlel yicʼot tijicñʌyel (Salmo 37:29). Jehová an i pʌsbeyonla jaʼel chaʼan mucʼʌch i cʼuxbiñonla cheʼ bʌ miʼ cʌntesañonla bajcheʼ yom mi lac chumtʌl. Cheʼ jaʼel, miʼ subeñonla chaʼan mi lac pejcan yicʼot yomʌch i ñʌchʼtañonla. Cheʼ bajcheʼ mi laj qʼuel, Jehová mucʼʌch i cʼuxbiñonla tiʼ sujm.

 6. ¿Bajcheʼ miʼ mejlel a pʌs chaʼan mucʼʌch a wʌqʼuen wocolix i yʌlʌ Jehová chaʼan i cʼuxbiya?

⁶ ¿Bajcheʼ miʼ mejlel a pʌs chaʼan mucʼʌch a wʌqʼuen wocolix i yʌlʌ Jehová chaʼan i cʼuxbiya? Qʼuele ti ñuc pejtelel melbil (chaʼlebil) bʌ i chaʼan ti a tojlel. Chʼijiyemtic jax pero ili pañimil butʼul ti wiñicob xʼixicob (quixtañujob) mach bʌ añix miʼ yʌcʼob wocolix i yʌlʌ. Cheʼʌch tsaʼ ujti jaʼel tiʼ yorajlel Jesús. Ti jumpʼejl bʌ qʼuin, tsiʼ lajmesa lujuntiquil wiñicob añoʼ bʌ leco bʌ i tsoy, pero cojach juntiquil tsiʼ yʌqʼue wocolix i yʌlʌ (Lucas 17:12-17). Joñonla com lac mel bajcheʼ jiñi wiñic i com lac pʌsben Jehová chaʼan mucʼʌch la cʌqʼuen wocolix i yʌlʌ.

 7. ¿Bajcheʼ yom mi laj cʼuxbin Jehová?

⁷ Yom mi lac pʌs chaʼan mucʼʌch laj cʼuxbin Jehová. Jesús tiʼ sube jiñi xcʌntʼañob chaʼan yom miʼ cʼuxbiñob Dios tiʼ pejtelel i pusicʼal, i cuxtʌlel yicʼot i ñaʼtʌbal (pejcan Mateo 22:37). ¿Chuqui yom i yʌl jiñi?

8, 9. ¿Bajcheʼ mi lac pʌsben Jehová chaʼan mi laj cʼuxbin?

⁸ ¿Jasʌl ba yom mi la cʌl chaʼan mi laj cʼuxbin Jehová? Maʼañic. Mi mucʼʌch laj cʼuxbin tiʼ pejtelel lac pusicʼal, laj cuxtʌlel yicʼot lac ñaʼtʌbal mi caj lac pʌs ti lac melbal (Mateo 7:16-20). Jiñi Biblia jamʌl tsiquil miʼ pʌs chaʼan mi mucʼʌch laj cʼuxbin Dios mi caj lac jacʼben i mandar tac. ¿Wocol ba ti melol jiñi? Maʼañic, come i mandar tac Jehová mach wocolic ti jacʼol (pejcan 1 Juan 5:3).

⁹ Cheʼ bʌ mi lac jacʼben i tʼan Jehová, tijicña mi la cajñel i mi lac tajben i sujmlel laj cuxtʌlel (Isaías 48:17, 18). Pero ¿chuqui mi caj i coltañonla chaʼan mi lac chʌn ajñel bajcheʼ i yamigo? Laʼ laj qʼuel.

10. ¿Chucoch yomʌch maʼ bej cʌn Jehová?

¹⁰ ¿Bajcheʼ tsaʼ sujtiyet tiʼ yamigo Jehová? Cheʼ bʌ tsaʼ caji a pejcan jiñi Biblia, tsaʼ ñumen cʌñʌ Jehová yicʼot tsaʼ caji a lʌcʼtesan a bʌ tiʼ tojlel. Ili lajalʌch bajcheʼ cʼajc, chaʼan chʌn cuxul miʼ yajñel yomʌch maʼ wotsʌben i siʼil. Ili yom i yʌl chaʼan maʼ bej cʌn Jehová chaʼan chʌn lʌcʼʌl maʼ wajñel a wicʼot (Proverbios 2:1-5).

11. ¿Bajcheʼ yubil mi caj a wubin a bʌ chaʼan jiñi muʼ bʌ a cʌn ti Biblia?

¹¹ Cheʼ maʼ chʌn pejcan jiñi Biblia, cabʌl chuqui mi caj a cʌn muʼ bʌ i cʼotel ti a pusicʼal. Qʼuele bajcheʼ yubil tsiʼ yubiyob i bʌ chaʼtiquil xcʌntʼañob cheʼ bʌ Jesús tiʼ tsictesʌbeyob i sujmlel chaʼpʼejl uxpʼejl profecía. Tsiʼ yʌlʌyob: «¿Mach ba utsʼatic jax lac pusicʼal tsaʼ la cubi cheʼ bʌ tsiʼ pejcayonla Jesús ti bij, cheʼ bʌ tsiʼ subeyonla i sujmlel i Tsʼijbujel Dios?» (Lucas 24:32).

12, 13. a) ¿Chuqui miʼ mejlel i chaʼlen jiñi laj cʼuxbiya ti Dios? b) ¿Chuqui miʼ mejlel lac mel chaʼan chʌn cuxul miʼ yajñel jiñi laj cʼuxbiya?

¹² Tsaʼ bʌ i pʌsbe Jesús jiñi chaʼtiquil xcʌntʼañob tsaʼʌch cʼotiyob tiʼ pusicʼal. Tajol jatet jaʼel tijicña tsaʼ wubi cheʼ bʌ tsaʼ caji a chʼʌmben i sujm jiñi Biblia. Wocolix i yʌlʌ jiñi, tsaʼ mejli a cʌn Jehová i tsaʼ cʼoti a cʼuxbin. Tiʼ sujm mach a wom chaʼan miʼ jilel jiñi a cʼuxbiya (Mateo 24:12).

¹³ Waʼli, cheʼ tsaʼix sujtiyet tiʼ yamigo Dios, yom maʼ chaʼlen wersa chaʼan chʌn pʼʌtʌl maʼ wajñel a wicʼot. Jin chaʼan, yom maʼ bej cʌn Jehová yicʼot Jesús. Cheʼ jaʼel, yom maʼ wen ñaʼtan jiñi woli bʌ a cʌn yicʼot bajcheʼ mi caj a cʼʌn (Juan 17:3). Cheʼ maʼ pejcan jiñi Biblia, wen ñaʼtan chuqui tsaʼ cʌñʌ tiʼ tojlel Dios yicʼot bajcheʼ mi caj i coltañet a ñumen cʼuxbin (1 Timoteo 4:15).

14. ¿Bajcheʼ miʼ coltañonla jiñi oración chaʼan chʌn pʼʌtʌl laj cʼuxbiya ti Jehová?

¹⁴ Mi an juntiquil wem bʌ a wamigo, tajol maʼ wen chaʼlenla tʼan. Jiñi miʼ ñumen lʌcʼtesañetla. Cheʼʌch tiʼ tojlel Jehová jaʼel, cheʼ jujumpʼejl qʼuin mi lac pejcan miʼ pʼʌtʼan laj cʼuxbiya tiʼ tojlel (pejcan 1 Tesalonicenses 5:17). Jiñi oración jiñʌch utsʼatax bʌ lac majtan tilem bʌ ti lac Tat am bʌ ti panchan. Yomʌch loqʼuem ti lac pusicʼal muʼ bʌ lac suben (Salmo 62:8). Mach junsujm jach yom bʌ mi la cʌl, yomʌch mi la cubin ti lac pusicʼal. Mi mucʼʌch lac chʌn pejcan jiñi Biblia yicʼot mi lac chʌn chaʼlen oración, jiñi laj cʼuxbiya ti Jehová pʼʌtʌl mi caj i yajñel.

15, 16. ¿Chuqui maʼ ñaʼtan jatet chaʼan jiñi subtʼan?

¹⁵ Chaʼan chʌn i yamigojonla Jehová, yom mi lac suben yambʌ quixtañujob jaʼel jiñi ñopol bʌ lac chaʼan. Jumpʼejlʌch ñuc bʌ lac majtan cheʼ mi lac jiñi (Lucas 1:74). Cheʼ jaʼel, jiñʌch jumpʼejl mandar tsaʼ bʌ i yʌqʼue Jesús pejtelel jiñi i sujm bʌ xñoptʼañob. Jin chaʼan, ti lac pejtelel yom mi lac sub jiñi wen tʼan chaʼan i Yumʌntel Dios. ¿Woli baʼ mel jatet? (Mateo 24:14; 28:19, 20).

¹⁶ Jiñi apóstol Pablo tsiʼ wen qʼuele ti ñuc jiñi subtʼan i tsiʼ yʌlʌ bajcheʼ «cʼax letsem tac bʌ i tojol» (2 Corintios 4:7). Cheʼ maʼ suben yambʌlob i chaʼan bʌ Jehová yicʼot chuqui ñaʼtʌbil i chaʼan jiñʌch ñumen ñuc bʌ miʼ mejlel a mel. Jiñi subtʼan yaʼʌch ochem tiʼ melol i yeʼtel Dios i miʼ wen qʼuel ti ñuc muʼ bʌ a mel tiʼ tojlel (Hebreos 6:10). Cheʼ bʌ maʼ chaʼlen subtʼan, maʼ coltan yambʌlob chaʼan miʼ sujtelob tiʼ yamigo Dios yicʼot miʼ pʼʌtʼesan bajcheʼ añet a wicʼot. Wocolix i yʌlʌ jiñi subtʼan, miʼ mejlel a taj a cuxtʌlel mach bʌ añic i jilibal i cheʼʌch jaʼel muʼ bʌ i ñʌchʼtañetob (pejcan 1 Corintios 15:58). Maʼañic yambʌ eʼtel muʼ bʌ i ñumen aqʼueñonla lac tijicñʌyel.

17. ¿Chucoch yomʌch miʼ mejlel ti ora jiñi subtʼan?

¹⁷ Jiñi subtʼan yomʌch miʼ mejlel ti ora. Jiñi Biblia miʼ yʌl: «Subu jini wen tʼan. Yom chajpʌbilet tiʼ yorajlel subtʼan yicʼot cheʼ mach i yorajlelic» (2 Timoteo 4:2). Jiñi quixtañujob yomʌch miʼ ñʌchʼtañob jiñi wen tʼan tac chaʼan i Yumʌntel Dios. Cheʼ jaʼel, jiñi Biblia miʼ yʌl chaʼan «lʌcʼʌlix jini bʌbʌqʼuen bʌ qʼuin» yicʼot woliʼ lʌcʼtesan i bʌ ti ora. I jilibal jontol bʌ pañimil (mulawil) «mi caj i bʌcʼ tilel cheʼ tiʼ yorajlel» (Sofonías 1:14; Habacuc 2:3). Tsʼitaʼ jachix yom chaʼan Jehová miʼ jisan i pañimil Satanás. Jin chaʼan, yom mi lac wʌn suben jiñi quixtañujob chaʼan miʼ mejlel i yajcañob i melben i yeʼtel (troñel) Jehová.

18. ¿Chucoch jiñi i sujm bʌ xñoptʼañonbʌla yomʌch mi lac tempan lac bʌ chaʼan mi lac chʼujutesan Jehová?

¹⁸ Jehová yom chaʼan jiñi i sujm bʌ xñoptʼañonbʌla mi lac tempan lac bʌ chaʼan mi lac chʼujutesan. Jiñi Biblia miʼ yʌl: «Laʼ laj coltan lac bʌ tiʼ pejtelel chuqui wen, chaʼan mi laj cʼuxbin lac bʌ bajcheʼ yom yicʼot wen bʌ lac melbal. Mach yomic mi laj cʌy lac tempan lac bʌ cheʼ bajcheʼ miʼ bixel melob lamital. Laʼ lac chʼejlʼesan lac bʌ. Cojcoj wʌle cheʼ woli ti lʌcʼtiyel jini cojix bʌ qʼuin cheʼ bajcheʼ woli laʼ qʼuel» (Hebreos 10:24, 25). Yom mi lac chaʼlen wersa chaʼan mi lac majlel ti tempa bʌ tac. Yaʼi miʼ mejlel lac pʼʌtʼesan yicʼot lac ñuqʼuesʌben lac bʌ lac pusicʼal.

19. ¿Chuqui mi caj i coltañonla chaʼan mi lac ñumen cʼuxbin la quermañojob?

¹⁹ Yaʼ ti tempa bʌ tac mi caj a taj wem bʌ a wamigojob. Mi caj i coltañetob a melben i yeʼtel Jehová. Mi caj a cʌn hermanojob yʌñʌl tac bajcheʼ yilalob yicʼot bajcheʼ tsaʼ coliyob. Pero cheʼ bajcheʼ jatet, xmulilob yicʼot miʼ tajob i sajtemal jaʼel. Cheʼ bʌ miʼ yujtel wocol tac, chaʼlen wersa a ñusʌbeñob i mul (pejcan Efesios 4:32). Ti bele ora yom maʼ qʼuelbeñob wem bʌ i melbalob. Ili mi caj i coltañet a ñumen cʼuxbiñob yicʼot a ñumen pʼʌtʼesan bajcheʼ añet a wicʼot Jehová.

20, 21. ¿Chuquiyes jiñi i sujm bʌ laj cuxtʌlel?

²⁰ Jehová yom chaʼan jiñi i yamigojob wem miʼ yajñelob. Jiñi Biblia miʼ cʌntesañonla chaʼan ti talto bʌ qʼuin mach cheʼic miʼ cajel jiñi cuxtʌlel bajcheʼ ili ora.

²¹ Ti talto bʌ qʼuin, mi caj lac chumtʌl tiʼ pejtelel ora, mach cojach 70 u 80 jab. Mi caj lac taj laj i sujm bʌ laj cuxtʌlel ti utsʼatax bʌ paraíso, baqui maʼañix miʼ cajel cʼamʌjel, mi caj lac taj lac ñʌchʼtʌlel yicʼot lac tijicñʌyel. Ili jiñʌch muʼ bʌ i cʌjñel ti Biblia bajcheʼ «cuxtʌlel mach bʌ yujilic jilel». Jehová miʼ yʌqʼueñonla i tʼan chaʼan mucʼʌch caj i yʌqʼueñonla iliyi, pero yomʌch mi lac wen chaʼlen wersa chaʼan mi lac taj (1 Timoteo 6:12, 19).

22. a) ¿Bajcheʼ miʼ mejlel lac taj jiñi «cuxtʌlel mach bʌ yujilic jilel»? b) ¿Chucoch mach i wentʌlelic mi la cʌqʼuentel?

²² ¿Bajcheʼ miʼ mejlel lac taj jiñi «cuxtʌlel mach bʌ yujilic jilel»? Yom mi lac mel «chuqui utsʼat» (1 Timoteo 6:18). Ili yom i yʌl chaʼan mi lac mel chuqui tac mi laj cʌn ti Biblia. Pero jiñi cuxtʌlel mach bʌ añic miʼ jilel mach ti bajñel lac pʼʌtʌlel mi lac taj. Anquese mi lac wen chaʼlen wersa, mach i wentʌlelic mi la cʌqʼuentel. Jumpʼejlʌch majtan muʼ bʌ i yʌqʼuen Jehová jiñi xucʼul bʌ i wiñicob baqui miʼ pʌs «i yutslel i pusicʼal» (Romanos 5:15). Jiñi lac Tat am bʌ ti panchan ti jumpʼejl i pusicʼal yom i yʌqʼuen i wiñicob ili utsʼatax bʌ majtañʌl.

23. ¿Chucoch yom maʼ yajcan a mel chuqui tac wen ti ili ora?

²³ Cʼajtiben a bʌ: «Ixcu joñon, ¿muʼ ba c chʼujutesan Dios cheʼ bajcheʼ miʼ mulan?». Mi maʼ qʼuel chaʼan an chuqui tac yom maʼ qʼuextan, mele ti ora. Cheʼ mi lac ñop ti Jehová yicʼot mi lac chaʼlen wersa lac jacʼben i tʼan, miʼ sujtel ti lac putsʼib. Jehová mi caj i cʌntan jiñi xucʼul bʌ i wiñicob ti ili cojix tac bʌ qʼuin. Cheʼ jiñi, cheʼ bajcheʼ tsiʼ wʌn alʌ, mi caj i yʌqʼueñonla jumpʼejl paraíso chaʼan mi lac chumtʌl tiʼ pejtelel ora. Mi mucʼʌch a yajcan a mel chuqui tac wen ti ili ora mi caj i mejlel a taj a cuxtʌlel mach bʌ añic i jilibal.