CɅNTESɅNTEL 51
Laʼ lac tijicñesan Jehová cheʼ bajcheʼ mucʼonla ti tʼan
Cheʼ bʌ Jehová tsiʼ meleyonla (pʌtʌyonla), tsiʼ yʌqʼueyonla wen ñuc bʌ lac majtan jiñʌch cheʼ mi lac chaʼlen tʼan. ¿Muʼ ba i qʼuel ti ñuc bajcheʼ mi lac chaʼlen tʼan? ¡Mucʼʌch! (Pejcan Santiago 1:26). Jin chaʼan, ¿bajcheʼ yom mi lac chaʼlen tʼan chaʼan mi la cʌqʼuen i tijicñʌyel Jehová?
1. ¿Bajcheʼ yom mi lac chaʼlen tʼan?
Jiñi Biblia miʼ subeñonla: «Chʌn tijicñesan laʼ bʌ yicʼot comol pʼʌtʼesan laʼ bʌ» (1 Tesalonicenses 5:11). ¿Majqui yom miʼ ñuqʼuesʌbentel i pusicʼal? ¿Am ba chuqui miʼ mejlel a mel chaʼan maʼ tijicñesʌben i pusicʼal? Suben chaʼan maʼ wen qʼuel ti ñuc. Miʼ mejlel a suben chuqui wen tac bʌ maʼ qʼuel tiʼ tojlel. ¿Muʼ ba i tilel ti a jol jumpʼejl texto muʼ bʌ mejlel a pejcʌben juntiquil chaʼan maʼ ñuqʼuesʌben i pusicʼal? Cabʌl muʼ bʌ mejlel a pejcʌben. Cheʼ jaʼel, mach ñajʌyic a chaʼan chaʼan cheʼ bajcheʼ yilal maʼ chaʼlen tʼan miʼ mejlel a ñuqʼuesʌben i pusicʼal juntiquil lac piʼʌl. Jin chaʼan, chaʼlen wersa chaʼan wen jach bajcheʼ maʼ chaʼlen tʼan (Proverbios 15:1).
2. ¿Chuqui tac mach yomic mi la cʌl?
Jiñi Biblia miʼ yʌl: «Mach yomic miʼ loqʼuel ti laʼ wej tʼan tac muʼ bʌ i low yambʌlob» (pejcan Efesios 4:29). Ili yom i yʌl chaʼan mach yomic mi la cʌl tsucul tʼan, tʼan tac muʼ bʌ i low yambʌlob o muʼ bʌ i yʌcʼob ti quisin. Cheʼ jaʼel, maʼañic mi la cʌl yambʌlob yicʼot maʼañic mi lac chaʼlen jopʼtʼan (pejcan Proverbios 16:28).
3. ¿Chuqui mi caj i coltañonla chaʼan jiñi muʼ bʌ la cʌl miʼ coltan yambʌlob?
Lʌcʼʌ tiʼ pejtelel ora, jiñi muʼ bʌ la cʌl miʼ pʌs chuqui an ti lac pensar yicʼot bajcheʼ yubil mi la cubin lac bʌ (Lucas 6:45). Jin chaʼan, yom mi lac ñʌmtesan lac bʌ chaʼan mi la cʌl chuqui tac wem bʌ, yom i yʌl, pejtelel chuqui toj bʌ, pejtelel chuqui sʌc bʌ, pejtelel chuqui yom bʌ miʼ yʌqʼuentel i ñuclel yicʼot pejtelel muʼ bʌ i ñijcañonla lac pʌs cʼuxbiya (Filipenses 4:8). Chaʼan miʼ mejlel lac mel, yom mi lac sʌclan wem bʌ lac ñusaqʼuin yicʼot wem bʌ la camigojob (Proverbios 13:20). Cheʼ jaʼel, yom mi lac ñaxan pensarin chuqui mi caj la cʌl. Ñopo a pensarin bajcheʼ yubil mi caj i yubiñob i bʌ jiñi yambʌlob chaʼan jiñi muʼ bʌ caj a wʌl. Jiñi Biblia miʼ yʌl: «An winicob xʼixicob mach bʌ utsic i tʼan. Miʼ jecʼonla bajcheʼ espada. I tʼan jini weñoʼ bʌ i pusicʼal i wentajʌch tsʼac muʼ bʌ i lajmesañonla» (Proverbios 12:18).
LAʼ LAC ÑUMEN ÑAʼTAN
Laʼ laj qʼuel bajcheʼ yom mi lac chaʼlen tʼan chaʼan mi la cʌqʼuen i tijicñʌyel Jehová yicʼot mi lac ñuqʼuesʌben i pusicʼal yambʌlob.
4. Wen cʌntan chuqui mi caj a wʌl
Ti lac pejtelel an i tajol mi la cʌl mach bʌ weñic, i ti wiʼil muʼto lac chaʼ ñaʼtan lac bʌ (Santiago 3:2). Pejcanla Gálatas 5:22, 23 i tem alʌla iliyi:
Chaʼan maʼ mejlel a ticʼ chuqui mi caj a wʌl yicʼot bajcheʼ yom maʼ wʌl, ¿baqui bʌ jiñi melbalʌl tac a wom a cʼajtiben Jehová? ¿Bajcheʼ miʼ mejlel i coltañet jiñi melbalʌl tac?
Pejcanla 1 Corintios 15:33 i tem alʌla iliyi:
¿Bajcheʼ miʼ mejlel i ticʼlañet o i coltañet bajcheʼ maʼ chaʼlen tʼan jiñi a wamigojob yicʼot jiñi ñusaqʼuin muʼ bʌ a yajcan?
¿Chuqui tac miʼ mejlel i ticʼlañet o i coltañet chaʼan bajcheʼ maʼ chaʼlen tʼan?
Eclesiastés 3:7 miʼ yʌl chaʼan «an i yorajlel mi lac ñʌjchʼel. An i yorajlel mi lac chaʼlen tʼan».
¿Jalaqui ñumen wen chaʼan maʼañic mi lac chaʼlen tʼan o chaʼan yom mi lac pijtʌben i yorajlel chaʼan mi lac chaʼlen tʼan?
5. Alʌ chuqui wen tiʼ tojlel yambʌlob
¿Chuqui miʼ mejlel lac mel chaʼan maʼañic mi la cʌl mach bʌ weñic tiʼ tojlel yambʌlob o muʼ bʌ i lowob? Qʼuelela jiñi VIDEO i tem alʌla iliyi:
¿Chucoch jiñi hermano ti ili video tsiʼ mulaj i qʼuextan bajcheʼ miʼ pejcan yambʌlob?
¿I chuqui tsiʼ mele chaʼan miʼ mejlel i mel?
Pejcanla Eclesiastés 7:16 i tem alʌla iliyi:
¿Chuqui yom mi laj cʼajtesan mi an i tajol la com la cʌl mach bʌ weñic tiʼ tojlel yambʌ lac piʼʌl?
Pejcanla Eclesiastés 7:21, 22 (TNM) i tem alʌla iliyi:
Cheʼ bʌ an majqui miʼ yʌl mach bʌ weñic ti a tojlel, ¿muʼ ba i mejlel i coltañet ili versículo tac chaʼan maʼañic maʼ michʼan? ¿Chucoch?
6. Pejcan ti wen jach bʌ tʼan jiñi a familia
Jehová yom chaʼan wen jach mi lac pejcan jiñi lac familia. Qʼuelela jiñi VIDEO i tem alʌla iliyi:
¿Chuqui mi caj i coltañet chaʼan wen jach maʼ pejcan a familia?
Pejcanla Efesios 4:31, 32 i tem alʌla iliyi:
¿Bajcheʼ yom maʼ pejcan a familia chaʼan cʼuxbibil miʼ yubiñob i bʌ?
Jehová tiʼ sube Jesús bajcheʼ yubil miʼ yubin i bʌ tiʼ tojlel. Pejcanla Mateo 17:5 i tem alʌla iliyi:
¿Bajcheʼ miʼ mejlel a lajin Jehová cheʼ maʼ pejcan a familia?
Sʌclʌben i yorajlel chaʼan maʼ suben jiñi yambʌlob chaʼan weñʌch chuqui tac woliʼ melob.
AN MUʼ BɅ I YɅLOB: «Joñon mi cʌl chuqui com. Mi jiñi yambʌlob maʼañic miʼ mulañob, mach c wentajic».
¿Cheʼ ba maʼ ñaʼtan jaʼel bajcheʼ jiñi? ¿Chucoch?
TSAʼ BɅ LAJ CɅÑɅ
Jiñi lac tʼan wen an i pʼʌtʌlel, jin chaʼan yom mi lac ñaxan ñaʼtan chuqui mi caj la cʌl, jala mi caj la cʌl yicʼot bajcheʼ mi caj la cʌl.
¿Chuqui tsaʼ cʌñʌ?
¿Bajcheʼ maʼ mejlel a chaʼlen tʼan chaʼan maʼ coltan yambʌlob?
¿Chuqui tac mach yomic mi la cʌl?
¿Chuqui mi caj i coltañonla chaʼan wen jach mi lac chaʼlen tʼan?
CɅÑɅ YAN TAC BɅ
¿Chuqui miʼ mejlel i coltañonla chaʼan wen jach chuqui mi la cʌl?
Laʼ lac chaʼlen wersa chaʼan mi lac chaʼlen tʼan cheʼ bajcheʼ jiñi weñoʼ bʌ i pusicʼal (8:04)
Qʼuele chuqui miʼ mejlel i coltañet chaʼan maʼañic maʼ chaʼlen tsucul tʼan.
«¿Am ba i wocolel cheʼ mic chaʼlen tsucul tʼan?» (Tema am bʌ ti jw.org)
Qʼuele chuqui miʼ mejlel a mel chaʼan maʼañic maʼ wʌl yambʌlob.
Qʼuele bajcheʼ tsiʼ colta Jehová juntiquil wiñic chaʼan muqʼuix i cʌy i yʌl tsucul tʼan.
«Tsaʼ caji c ñaʼtan chuqui woli c mel tij cuxtʌlel» (Lac Tsictesʌbentel, 1 i chaʼan agosto, 2013)