I referenciajlel jiñi Jun chaʼan lac tempa bʌ I Subtʼan yicʼot i Melbal jiñi xÑoptʼan
3-9 I CHAʼAN JUNIO
ÑUC TAC BɅ I CʼɅJÑIBAL TI BIBLIA | GÁLATAS 4-6
«Jumpʼejl ‹lajiya› am bʌ i sujmlel chaʼañonla»
(Gálatas 4:26, 27, I tʼan Dios [ITD]) Pero libre jini Jerusalén am bʌ ti chan. Jiñʌch lac ñaʼ ti lac pejtelel. 27 Come tsʼijbubil: «Tijicñesan a pusicʼal, jochol bʌ xʼixic, mach bʌ anic a walobil. Cʼam yom maʼ chaʼlen tʼan, jatet mach bʌ anic a bajqʼuel. Come ñumen cabʌl i yalobil jini bajñel bʌ xʼixic bajcheʼ jini am bʌ i ñoxiʼal».
w14-S 15/10 10 párr. 11
Laʼ la cʌcʼ lac ñopoñel tiʼ Yumʌntel Dios
11 Anquese jiñi trato tsaʼ bʌ mejli yicʼot Abrahán tsaʼ yoque tsʼʌctiyi cheʼ bʌ jiñi i pʼolbal tsaʼ ochiyob ti jiñi Lum tsaʼ bʌ wʌn Subentiyob, jiñi Tsʼijbujel miʼ pʌs chaʼan anto yambʌ bajcheʼ miʼ caj ti tsʼʌctiyel (Gá. 4:22-25). Yicʼot i coltaya chʼujul bʌ espíritu, jiñi apóstol Pablo tsiʼ yʌlʌ chaʼan jiñi mero i pʼolbal Abrahán jiñʌch Cristo i jiñi yambʌ parte i pʼolbal jiñʌch jiñi 144 mil xñoptʼañob bombiloʼ bʌ ti espíritu, ili jiñʌch bajcheʼ tsaʼ ñumen tsʼʌctiyi jiñi trato (Gá. 3:16, 29; Ap. 5:9, 10; 14:1; 14:4, Jiñi tsijiʼ bʌ wen tʼañ chaʼañ estudio). Jiñi xʼixic muʼ bʌ i yʌcʼ i pʼolbal jiñʌch jiñi «Jerusalén am bʌ ti chan», jiñʌch jumpʼejl parte i yorganización Dios yaʼ ti panchan, i yaʼ ochemob jiñi xucʼul bʌ ángelob (Gá. 4:26, 31). Cheʼ bajcheʼ miʼ yʌl jiñi trato tsaʼ bʌ mejli yicʼot Abrahán, jiñi i pʼolbal jiñi xʼixic mi caj i yʌqʼuen bendición tac jiñi quixtañujob.
(Gálatas 4:28-31, ITD) Joñonla, hermanojob, tsaʼ la quila pañimil cheʼ bajcheʼ Isaac chaʼan albil bʌ i tʼan Dios. 29 Cheʼ bajcheʼ tsaʼ ujti tiʼ yorajlel Isaac cheʼʌch miʼ yujtel wʌle. Jini muʼ bʌ i chaʼ ilañob pañimil ti Espíritu woliʼ ticʼlʌntelob tiʼ tojlel jini yom bʌ i yʌcʼob tiʼ jacʼol mandar. 30 ¿Chuqui miʼ yʌl i Tsʼijbujel Dios?: «Choco loqʼuel jini criada yicʼot i yalobil, come i yalobil criada maʼanic miʼ tem chʼʌm i chubʌʼan i tat yicʼot i yalobil jini mero i yijñam bʌ». 31 Jini chaʼan hermanojob, mach i yalobilonicla criada. I yalobilonla jini libre bʌ xʼixic.
Laʼ lac sʌclan ñuc tac bʌ i cʼʌjñibal
(Gálatas 4:6, Jiñi tsijiʼ bʌ wen tʼañ chaʼañ estudio [TWT]) I yalobiletla, Dios tsiʼ choco tilel ti lac pusicʼal i yEspíritu i Yalobil muʼ bʌ i yʌl: ¡Abba, c Tat!
w09-S 1/4 13
¿A wujilix ba?
¿Chucoch tsiʼ cʼʌñʌ Jesús jiñi tʼan «¡Abba, c Tat!» cheʼ bʌ tsiʼ pejca Jehová ti oración?
Jiñi tʼan am bʌ ti arameo ‹abbá› miʼ mejlel i chaʼlentel ti traducir bajcheʼ «tatʌl», cheʼ jaʼel bajcheʼ «c Tat». Tiʼ yuxpʼejlel baqui mi lac taj ili tʼan yaʼ ti Tsʼijbujel jiñʌch miʼ subentel Jehová, jiñi lac Tat am bʌ ti panchan, i yaʼʌch mi lac taj baqui miʼ taj ti tʼan jiñi oración tac. Pero ¿chucoch tsiʼ cʼʌñʌ Jesús ili tʼan?
Jumpʼejl libro miʼ tsictesan: «Cheʼ tiʼ yorajlel Jesús, jiñi tʼan ‹abbā› jiñʌch jumpʼejl tʼan ñʌmʌl bʌ i cʼʌñob jiñi xbiʼtalob chaʼan miʼ pejcañob i tat ti uts bʌ tʼan yicʼot cʼuxbiya, cheʼ jaʼel miʼ pʌs chaʼan mucʼʌch i qʼuelob ti ñuc» (The International Standard Bible Encyclopedia). Ili tʼan jiñʌch ñaxam bʌ miʼ cʌn jiñi xbiʼtalob chaʼan miʼ pejcañob i tat yicʼot utslel. Jesús tsiʼ cʼʌñʌ ili tʼan ti jumpʼejl wen ñuc bʌ qʼuin. Cheʼ bʌ yaʼan ti pʌcʼʌbʌl Getsemaní, cheʼ bʌ tsʼitaʼ jax yom chaʼan miʼ chʌmel, tsiʼ pejca Jehová ti oración i tiʼ sube: «Papa [«Abba», TNM], c Tat» (Marcos 14:36).
Jiñi libro tsaʼix bʌ la cʌlʌ miʼ chaʼ al: «Ti jiñi tsʼijbujel tac i chaʼan judíojob cheʼ tiʼ yorajlel jiñi griegojob yicʼot romanojob maʼañic miʼ wen chʼʌm tilel jiñi tʼan ‹abbā› chaʼan miʼ subentel jiñi Dios, come miʼ ñaʼtañob chaʼan maʼañix woliʼ qʼuelob ti ñuc cheʼ miʼ yʌlob jiñi tʼan». Pero ¿chuqui tsaʼ cʼoti i yʌl jiñi libro? «Cheʼ bʌ Jesús tsiʼ cʼʌñʌ [...] ili tʼan cheʼ bʌ tsiʼ mele oración miʼ yʌqʼueñonla lac ñaʼtan chaʼan wen lʌcʼʌlʌch an yicʼot Dios». Jiñi tʼan ‹abbá› miʼ tilel yambʌ chaʼpʼejl ti jiñi carta tsaʼ bʌ i tsʼijbu jiñi apóstol Pablo, ili miʼ pʌs chaʼan jiñi ñaxam bʌ xñoptʼañob tsaʼʌch i cʼʌñʌyob jaʼel chaʼan miʼ pejcañob Dios (Romanos 8:15, TWT; Gálatas 4:6, TWT).
(Gálatas 6:17, ITD) Mach i chʌn ticʼlañon majqui jach an tij contra, come tsiquil i yejtal tac c lojwel chaʼan i winicon Jesús.
w10-S 1/11 15
¿A wujilix ba?
¿Chucoch tsiʼ yʌlʌ Pablo: «Tsiquil i yejtal tac c lojwel chaʼan i winicon Jesús»? (Gálatas 6:17).
▪ Jiñi tʼan tsaʼ bʌ i yʌlʌ Pablo, tajol cabʌl bajcheʼ an i sujmlel chaʼan jiñi xñoptʼañob ti ñaxam bʌ siglo. Jumpʼejl ejemplo, ti wajali miʼ cʼʌñob ticʌw bʌ fierro chaʼan miʼ yʌqʼueñob i marcajlel tiʼ pʌchʌlel jiñi muʼ bʌ i chujquelob majlel cheʼ miʼ sʌtob guerra, jiñi muʼ bʌ i chaʼleñob xujchʼ ti templo yicʼot jiñi xyaj eʼtelob muʼ bʌ i lon ñopob putsʼel. Jiñi i marcajlel muʼ bʌ i cʌytʌl tiʼ pʌchʌlel miʼ yʌcʼ ti ñaʼtʌntel chaʼan maʼañix i cʼʌjñibal jiñi quixtañu.
Pero mach tiʼ pejtelelic leco miʼ yʌcʼ ti ñaʼtʌntel jiñi marca tac muʼ bʌ i yʌqʼuentel juntiquil quixtañu. Cabʌl miʼ cʼʌñob chaʼan miʼ yʌcʼob i bʌ ti cʌjñel baqui tilemob o chuqui i ñopbalob. Jumpʼejl libro miʼ yʌl: «Jiñi siriojob miʼ yotsañob i marcajlel tiʼ cʼʌb o tiʼ bicʼ chaʼan miʼ yʌcʼob ti cajñel chaʼan miʼ chʼujutesañob jiñi dios Hadad yicʼot Atargatis [...]. Jiñi muʼ bʌ i chʼujutesañob jiñi dios Dionisio miʼ yotsañob ti pʌchʌlel i yejtal tac yopoteʼ» (Theological Dictionary of the New Testament).
Cheʼ jaʼel, cabʌl yujiloʼ bʌ chaʼan Biblia miʼ yʌlʌyob chaʼan tsaʼ bʌ i taja ti tʼan Pablo jiñʌch i yejtal tac i lojwel tsaʼ bʌ i taja cheʼ bʌ tsiʼ chaʼle subtʼan (2 Corintios 11:23-27). Cheʼ bʌ tsiʼ yʌlʌ i «yejtal tac» i lojwel, tajol mach jiñic tsiʼ yoque taja ti tʼan jiñi i lojweñal am bʌ tiʼ bʌcʼtal, tajol jiñʌch bajcheʼ yilal tsiʼ chumta i sujmlel bajcheʼ xñoptʼan.
10-16 I CHAʼAN JUNIO
ÑUC TAC BɅ I CʼɅJÑIBAL TI BIBLIA | EFESIOS 1-3
«Tsaʼ bʌ i chajpa Jehová yicʼot tajbil bʌ i chaʼan»
(Efesios 1:8, 9, Traducción del Nuevo Mundo [TNM]) [Dios] tsiʼ wen pʌsbeyonla ñuc bʌ i yutslel yicʼot pejtelel lac ñaʼtʌbal yicʼot wem bʌ lac pensar 9 cheʼ bʌ tsiʼ yʌqʼueyonla laj cʌn jiñi mucul bʌ i chaʼan. Cheʼʌch bajcheʼ miʼ mulan, tsiʼ ñaʼta
it-2-S 981 párr. 2
Mucul bʌ i chaʼan
I Yumʌntel jiñi Mesías. Pablo tsiʼ jamʌ tsictesa ti jiñi i tsʼijbujel tac bajcheʼ miʼ tsictiyel jiñi mucul tac bʌ ti Cristo. Ti Efesios 1:9-11 (TNM), miʼ tsictesan chaʼan Dios tsaʼix i yʌcʼʌ ti cʌjñel jiñi «mucul bʌ i chaʼan», miʼ yʌl: «Cheʼʌch bajcheʼ miʼ mulan, tsiʼ ñaʼta i chajpan chuqui mi caj i mel cheʼ bʌ miʼ cʼotel i yorajlel, chaʼan miʼ tempan pejtelel chuqui an i miʼ yʌqʼuen tiʼ wenta Cristo, jiñi an tac bʌ ti panchan yicʼot an tac bʌ ti Lum. Cheʼʌchi, tiʼ tojlel jiñi am bʌ la quicʼot. Tsaʼ yajcʌntiyonla chaʼan mi lac chaʼlen yumʌntel, tsiʼ pʌyʌyonla cheʼ bajcheʼ ñaʼtʌbil i chaʼan jiñi muʼ bʌ i tsʼʌctesan tiʼ pejtelel chuqui yom cheʼ bajcheʼ tsiʼ wʌn ñaʼta i mel». Ti jiñi «mucul bʌ» yaʼʌch ochem jumpʼejl yumʌntel, jiñʌch jiñi i Yumʌntel jiñi Mesías waʼchocobil bʌ i chaʼan Dios. Jiñi «an tac bʌ ti panchan», tsaʼ bʌ i yʌlʌ Pablo jiñʌch woliʼ taj ti tʼan jiñi añoʼ bʌ i pijtaya chaʼan miʼ chaʼleñob yumʌntel yicʼot Cristo. Jiñi «an tac bʌ ti Lum» jiñʌch jiñi quixtañujob muʼ bʌ caj i yajñelob wʌʼ ti Lum cheʼ bʌ wolix ti Yumʌntel Cristo. Jesús tsiʼ pʌsbe jiñi xcʌntʼañob i chaʼan chaʼan ti jiñi mucul tac bʌ yaʼʌch ochem jiñi i Yumʌntel cheʼ bʌ tsiʼ yʌlʌ: «Tsaʼix aqʼuentiyetla laʼ cʌn i sujmlel chaʼan i yumʌntel Dios mach bʌ tsictiyemic ti yambʌ ora» (Mr. 4:11).
(Efesios 1:10, TNM) i chajpan chuqui mi caj i mel cheʼ bʌ miʼ cʼotel i yorajlel, chaʼan miʼ tempan pejtelel chuqui an i miʼ yʌqʼuen tiʼ wenta Cristo, jiñi an tac bʌ ti panchan yicʼot an tac bʌ ti Lum. Cheʼʌchi, tiʼ tojlel
w12-S 15/7 27, 28 párr. 3, 4
Jehová miʼ tempan i familia
3 Pejtelel chuqui miʼ mel Jehová chaʼañʌch miʼ tsʼʌctiyel chuqui ñaʼtʌbil bʌ i chaʼan. Jin chaʼan, «cheʼ bʌ miʼ cʼotel i yorajlel», Dios tsaʼ caji «i chajpan chuqui mi caj i mel» ili yom i yʌl, jumpʼejl eʼtel chaʼan miʼ tempʌntel pejtelel chuqui an tac bʌ ti panchan yicʼot an tac bʌ ti Lum (Pejcan Efesios 1:8-10, TNM). Ili añʌch chaʼchajp bajcheʼ miʼ caj ti tsʼʌctiyel. Ñaxam bʌ, miʼ chajpʌntel jiñi bombiloʼ bʌ chaʼan miʼ chumtʌlob yicʼot Jesús yaʼ ti panchan. Ili tsaʼʌch caji cheʼ ti Pentecostés ti jabil 33 cheʼ bʌ tilemix Cristo (t.C.), Jehová tsaʼ caji i tempan jiñi quixtañujob muʼ bʌ caj i chaʼleñob yumʌntel yicʼot Cristo yaʼ ti panchan (Hch. 2:1-4). Chaʼan i cuxtʌlel tsaʼ bʌ i yʌcʼʌ Cristo, jiñi bombiloʼ bʌ tsaʼix ñusʌbentiyob i mul, jin chaʼan miʼ mejlelob ti chumtʌl tiʼ pejtelel ora. Miʼ cʼotel i ñaʼtañob chaʼan tsaʼ chʼʌjmiyob bajcheʼ ‹i yalobilob Dios› (Ro. 3:23, 24; 5:1; 8:15-17).
4 I chaʼpʼejlel, miʼ chajpʌntel jiñi muʼ bʌ caj i chumtʌlob ila ti Lum cheʼ bʌ miʼ sujtel ti jumpʼejl Paraíso cheʼ bʌ wolix ti Yumʌntel Cristo. Jiñi ñaxam bʌ junmojt jiñʌch jiñi yonlel «winicob xʼixicob» (Ap. 7:9, 13-17; 21:1-5). Ti jiñi Mil jab i Yumʌntel Cristo mi caj i yajñelob jaʼel yonlel quixtañujob muʼ bʌ caj i chaʼ tejchelob (Ap. 20:12, 13). Cheʼ miʼ chaʼ tejchelob jiñi chʌmeñoʼ bʌ mi caj i ñumen pʌs chaʼan temelʌch añonla. Cheʼ miʼ yujtel jiñi Mil jab, jiñi an tac bʌ ti «pañimil» mi caj i ñusan jiñi cojix bʌ wocol. Jiñi xucʼul bʌ miʼ yajñelob mi caj i chʼʌjmelob bajcheʼ «i yalobilob Dios» muʼ bʌ caj i chumtʌlob ila ti Lum (Ro. 8:21; Ap. 20:7, 8).
Laʼ lac sʌclan ñuc tac bʌ i cʼʌjñibal
(Efesios 3:13, ITD) Jini chaʼan mic subeñetla ti wocol tʼan, mach mi laʼ wʌcʼ ti lujbʼan laʼ pusicʼal chaʼan ili wocol woli bʌ j cuch, come an i cʼʌjñibal chaʼan mi laʼ taj laʼ wenlel.
w13-S 15/2 28 párr. 15
Maʼañic chuqui yom miʼ mʌctañonla chaʼan mi lac tajben i ñuclel Dios
15 Cheʼ mi lac chʌn melben i yeʼtel Jehová miʼ yʌcʼ chaʼan yambʌ quixtañujob miʼ tajbeñob i ñuclel Dios. Jiñi apóstol Pablo tiʼ tsʼijbube jiñi xñoptʼañob ti Éfeso: «Mic subeñetla ti wocol tʼan, mach mi laʼ wʌcʼ ti lujbʼan laʼ pusicʼal chaʼan ili wocol woli bʌ j cuch, come an i cʼʌjñibal chaʼan mi laʼ taj laʼ wenlel» (Ef. 3:13). ¿Chucoch jiñi wocol tac tsaʼ bʌ i ñusa jiñi apóstol miʼ yʌqʼuen i wenlel jiñi añoʼ bʌ ti Éfeso? Come cheʼ tsaʼ chʌn caji i coltan jiñi hermanojob anquese woliʼ ñusan cabʌl wocol tsiʼ pʌsʌ chaʼan i melol i yeʼtel Dios jiñʌch jumpʼejl ñuc bʌ majtañʌl. Cheʼ tsaʼic lujbʼan i ñusan wocol tac jiñi apóstol Pablo, ¿mach ba muqʼuic i yʌcʼ ti ñaʼtʌntel chaʼan maʼañic i cʼʌjñibal cheʼ bajcheʼ an yicʼot Jehová, jiñi i subtʼan yicʼot jiñi pijtaya am bʌ i chaʼan? Cheʼ bajcheʼ tsiʼ cuchu jiñi wocol tsiʼ yʌcʼʌ ti ñuc jiñi eʼtel woli bʌ i mel i tsiʼ pʌsʌ chaʼan chuqui jach miʼ lac mel chaʼan mi lac sujtel ti xcʌntʼan i chaʼan Jesús wen ñucʌch i cʼʌjñibal.
(Efesios 3:19, ITD) Com mi laʼ cʌmben i cʼuxbiya Cristo, anquese mach lac luʼ cʌñʌyic, chaʼan mi laʼ taj pejtelel jini yom bʌ i yʌqʼueñonla Dios.
cl-S 299 párr. 21
«Mi laʼ cʌmben i cʼuxbiya Cristo»
21 Jiñi tʼan am bʌ ti griego tsaʼ bʌ chaʼlenti ti traducir bajcheʼ «cʌn» yom i yʌl «chaʼan miʼ mejlel laj cʌn ti chuqui ñusʌbil bʌ lac chaʼan». Cheʼ bʌ mi laj coltan yambʌlob ti jumpʼejl lac pusicʼal, cheʼ mi la cʌqʼueñob chuqui i cʼʌjñibal bʌ i chaʼañob yicʼot cheʼ mi lac ñusʌbeñob i mul, woli lac lajiben i cʼuxbiya Jesús i cheʼ bajcheʼ ili miʼ mejlel lac ñaʼtan bajcheʼ yubil miʼ yubin jaʼel. Miʼ mejlel laj «cʌmben i cʼuxbiya Cristo» ti chuqui ñusʌbil lac chaʼan. Mach ñajʌyic lac chaʼan, cheʼ bʌ ñumen lajal lac melbal bajcheʼ i chaʼan Cristo, ñumen lʌcʼʌl mi caj la cajñel tiʼ tojlel Jehová, jiñi cʼuxbibil bʌ Dios.
17-23 I CHAʼAN JUNIO
ÑUC TAC BɅ I CʼɅJÑIBAL TI BIBLIA | EFESIOS 4-6
Laʼ lac sʌclan ñuc tac bʌ i cʼʌjñibal
(Efesios 4:30, ITD) Mach laʼ wʌqʼuen i chʼijiyemlel i pusicʼal jini Chʼujul bʌ Espíritu tsaʼ bʌ laʼ taja ti Dios, come jiñʌch laʼ sellojlel ti jini tal to bʌ qʼuin cheʼ mi caj i tsictiyel majqui i chaʼañetla.
it-2-S 938 párr. 5
Sʌclel
Jiñi chʼujul bʌ espíritu. Jehová jiñʌch an tiʼ wenta jiñi espíritu o jiñi i pʼʌtʌlel i miʼ cʼʌn chaʼan miʼ tsʼʌctesan chuqui ñaʼtʌbil i chaʼan. Sʌc, chʼujul yicʼot mach wis añic i bibiʼlel, jiñʌch muʼ bʌ i cʼʌn Dios chaʼan miʼ mel chuqui wen. Jin chaʼan, miʼ subentel ti «Chʼujul bʌ Espíritu» (Sal. 51:11; Lc. 11:13; Ro. 1:4, TWT; Ef. 1:13). Cheʼ bʌ jiñi chʼujul bʌ espíritu miʼ mel i yeʼtel tiʼ tojlel juntiquil quixtañu, miʼ sujtel ti jumpʼejl pʼʌtʌlel muʼ bʌ i coltan i mel chuqui sʌc. Pejtelel bibiʼ tac bʌ o mach bʌ weñic melbalʌl miʼ contrajin o miʼ yʌqʼuen i yubin «i chʼijiyemlel» jiñi espíritu (Ef. 4:30). Anquese jiñi espíritu mach juntiquilic lac piʼʌl, pero miʼ mejlel i yubin i chʼijiyemlel come yaʼʌch loqʼuem ti Jehová. Pejtelel bibiʼ tac bʌ melbalʌl miʼ «yʌp jini Espíritu» (1 Ts. 5:19). Mi juntiquil quixtañu maʼañic miʼ cʌy jiñi bibiʼ tac bʌ i melbal, miʼ yʌqʼuen i yubil «i chʼijiyemlel» jiñi chʼujul bʌ i yespíritu Dios, i cheʼ jaʼel Dios miʼ qʼuel jiñi quixtañu bajcheʼ juntiquil i contra (Is. 63:10). Jiñi muʼ bʌ i yʌqʼuen i yubin i chʼijiyemlel jiñi chʼujul bʌ espíritu miʼ mejlel i cʼotel i pʼaj. Cheʼ bajcheʼ tsiʼ yʌlʌ Jesús, ili jiñʌch jumpʼejl mulil mach mejlic ti ñusʌbentel, mi wʌle ti ili pañimil, mi ti yambʌ pañimil muʼ bʌ i tilel (Mt. 12:31, 32; Mr. 3:28-30).
(Efesios 5:5, ITD) Come laʼ wujil ti isujm, maʼanic mi caj i yochel tiʼ yumʌntel Cristo yicʼot Dios jini muʼ bʌ i chaʼlen tsʼiʼlel mi jini am bʌ i bibiʼlel i pusicʼal, mi jini tsʌytsʌyña bʌ i pusicʼal chaʼan chubʌʼañʌl. Come i tsʌytsʌyniyel lac pusicʼal chaʼan chubʌʼañʌl lajalʌch bajcheʼ i cʼuxbintel diosteʼ.
it-1-S 255 párr. 5
Tsʌytsʌyña bʌ i pusicʼal chaʼan chubʌʼañʌl
Miʼ pʌs i bʌ ti lac melbal. Jiñi i mulʌntel chubʌʼañʌl tac miʼ tsictiyel cheʼ bʌ an chuqui mi lac mel i mi yʌcʼ ti ñaʼtʌntel chuqui mach bʌ weñic an ti lac pusicʼal yicʼot ñumeñix bʌ ti pʼis. Santiago jiñi xtsʼijbaya Biblia miʼ subeñonla chaʼan i mulʌntel mach bʌ weñic miʼ mejlel i yʌcʼonla ti mulil cheʼ bʌ miʼ colel majlel ti lac pusicʼal (Stg. 1:14, 15). Juntiquil quixtañu muʼ bʌ i wen mulan chubʌʼañʌl miʼ mejlel ti cʌjñel tiʼ melbal. Jiñi apóstol Pablo tsiʼ yʌlʌ chaʼan i mulʌntel chubʌʼañʌl lajalʌch bajcheʼ i chʼujutesʌntel diosteʼ tac (Ef. 5:5). Jiñi quixtañu muʼ bʌ i wen mulan chubʌʼañʌl tac miʼ sujtesan tiʼ dios chuqui am bʌ i chaʼan i miʼ tech i ñumen qʼuel ti ñuc i mach jiñix tiʼ melol i yeʼtel o i chʼujutesʌntel Jehová (Ro. 1:24, 25).
24-30 I CHAʼAN JUNIO
ÑUC TAC BɅ I CʼɅJÑIBAL TI BIBLIA | FILIPENSES 1-4
Laʼ lac sʌclan ñuc tac bʌ i cʼʌjñibal
(Filipenses 2:17, TNM) Anquese joñon mic bejqʼuel bajcheʼ lʌmʌl bʌ majtañʌl tiʼ tojlel jiñi chʼujul bʌ eʼtel tsaʼ bʌ i yʌqʼueyetla laʼ mel jiñi laʼ ñopoñel, mi cubin c tijicñʌyel i mic ñusʌbeñetla c tijicñʌyel ti laʼ pejtelel.
it-2-S 525 párr. 9
Majtañʌl tac
Lʌmʌl bʌ majtañʌl. Tiʼ pejtelel jiñi majtañʌl tac tsaʼ bʌ aqʼuenti Jehová yaʼʌch ochem jaʼel jiñi lʌmʌl bʌ majtañʌl, ili tsaʼ caji ti cʼʌjñel cheʼ bʌ jiñi israelob tsaʼ ochiyob ti jiñi Lum tsaʼ bʌ wʌn Subentiyob (Nm. 15:2, 5, 8-10, TNM). Jiñi lʌmʌl bʌ majtañʌl muʼ bʌ i cʼʌñob jiñʌch jiñi vino i miʼ becʼob ti jiñi pulʌntib (Nm. 28:7, 14, TNM; laja yicʼot Éx. 30:9; Nm. 15:10, TNM). Jiñi apóstol Pablo tiʼ tsʼijbube jiñi xñoptʼañob ti Filipos: «Anquese joñon mic bejqʼuel bajcheʼ lʌmʌl bʌ majtañʌl tiʼ tojlel jiñi chʼujul bʌ eʼtel tsaʼ bʌ i yʌqʼueyetla laʼ mel jiñi laʼ ñopoñel, mi cubin c tijicñʌyel». Jiñi apóstol Pablo tsiʼ cʼʌñʌ bajcheʼ ejemplo jiñi lʌmʌl bʌ majtañʌl chaʼan miʼ tsictesan chaʼan miʼ mulan i coltan yambʌlob ti jumpʼejl i pusicʼal (Fil. 2:17, TNM). Cheʼ bʌ lʌcʼʌlix mi caj i chʌmel, jiñi apóstol Pablo tiʼ tsʼijbube Timoteo: Mach jalix mi caj cʌjqʼuel tiʼ majtan Dios [o bajcheʼ lʌmʌl bʌ majtañʌl]. Lʌcʼʌlix i yorajlel chaʼan mij cʌy pañimil (2 Ti. 4:6).
(Filipenses 3:11, TWT) jiñi chaʼañ mic pijtan chaʼañ mic chaʼ chʼojyel jaʼel tiʼ tojlel chʌmeñoʼ bʌ.
w07-S 1/1 26 párr. 5
Tsaʼix tejchi jiñi ñaxam bʌ chaʼ chʼojyel
5 Cheʼ jiñi, jiñi bombiloʼ bʌ xñoptʼañob, cʌmbiloʼ bʌ bajcheʼ i «chaʼañoʼ bʌ Dios» yom miʼ tempañob i bʌ yicʼot Jesucristo yaʼ ti panchan i temel mi caj i yajñelob tiʼ pejtelel ora (Gálatas 6:16; 1 Tesalonicenses 4:17). Ili cʌmbil bajcheʼ jiñi «chaʼ chʼojyel» o «muʼ bʌ i tejchelob chʼojyel ti ñaxan» (Filipenses 3:10, 11, TWT; Apocalipsis 20:6). Cheʼ bʌ tsaʼix ujti iliyi, i yorajlelix chaʼan miʼ chaʼ chʼojyel jiñi yonlel quixtañujob wʌʼ ti Pañimil chaʼan miʼ tajob i cuxtʌlel mach bʌ añic miʼ jilel. Jin chaʼan, mi woli lac pijtan chumtʌl ti panchan o ila ti Lum, mi lac mulan la cʌn jiñi temaj muʼ bʌ i yʌl chaʼan «muʼ bʌ i tejchelob chʼojyel ti ñaxan». ¿Bajcheʼ yilal bʌ chaʼ chʼojyel miʼ cajel? ¿Jala miʼ cajel?