Jiñi yonlel wiñicob xʼixicob miʼ yʌqʼueñob i ñuclel Dios yicʼot Cristo

 1. ¿Chuqui tsaʼ ujti tiʼ tojlel juntiquil xcolel cheʼ bʌ tsiʼ ñʌchʼta jumpʼejl discurso cheʼ ti 1935?

CHEʼ ti 1926 juntiquil xcolel am bʌ 18 i jabilel tsiʼ chʼʌmʌ jaʼ. Jiñi i papá yicʼot i mamá Xpejcaya bibliajob (cheʼʌch miʼ subentelob jiñi i testigojob Jehová ti wajali). Añob uxtiquil chʼiton bʌ i yalobil yicʼot chaʼtiquil i yixicʼalob tsaʼ bʌ i cʌntesayob chaʼan miʼ sujtelob tiʼ wiñicob Jehová yicʼot chaʼan miʼ lajiñob Jesús. Ili xcolel ti jujumpʼejl jab tsiʼ cʼuxu jiñi pan yicʼot tsiʼ japʌ jiñi vino cheʼ tiʼ Cena lac Yum, lajal bajcheʼ ti pejtelel jiñi Xpejcaya bibliajob. Pero tsaʼ luʼ qʼuextʌyi cheʼ bʌ tsiʼ ñʌchʼta jiñi discurso: «Jiñi yonlel wiñicob xʼixicob». Ili discurso tsiʼ ñusa jiñi hermano Joseph Rutherford cheʼ ti 1935 ti jiñi colem tempa bʌ yaʼ ti Washington (Estados Unidos). ¿Chuqui tsaʼ tsijib tsictesʌnti ti jiñi colem tempa bʌ?

 2. ¿Chuqui tiʼ tsictesa jiñi hermano Rutherford ti jiñi i discurso?

² Jiñi hermano Rutherford tiʼ tsictesa majqui ochemob ti jiñi yonlel «winicob xʼixicob» muʼ bʌ i taj ti tʼan Apocalipsis 7:9. Ti jimbʌ ora, tsaʼ ñaʼtʌnti chaʼan ili junmojt wiñicob xʼixicob (quixtañujob) jiñʌch muʼ bʌ caj i majlelob ti panchan, pero mach wen xucʼulobic tsaʼ ajñiyob cheʼ bajcheʼ jiñi yajcʌbiloʼ bʌ. Jiñi hermano Rutherford tsiʼ cʼʌñʌ jiñi Biblia chaʼan miʼ tsictesan chaʼan jiñi ochemoʼ bʌ ti yonlel wiñicob xʼixicob maʼañic yajcʌbilob chaʼan miʼ majlelob ti panchan come ochemob ti jiñi yambʌ tiñʌmeʼb i chaʼan Cristo cuxul bʌ mi caj i ñumelob ti jiñi ñuc bʌ wocol yicʼot muʼ bʌ caj i chumtʌlob tiʼ pejtelel ora ila ti Lum (Ap. 7:14). Jesús tsiʼ yʌlʌ: «Anto yambʌ c tiñʌmeʼ mach bʌ ochemic ti jini corral. Wersa mic pʌy tilel jaʼel. Mi caj i yubin c tʼan. Junmojt jach mi caj i luʼ ajñelob yicʼot juntiquil Xcʌnta tiñʌmeʼ» (Jn. 10:16). Ti ili junmojt ochemob jiñi xucʼul bʌ i testigojob Jehová muʼ bʌ i pijtañob chumtʌlob tiʼ pejtelel ora ila ti Lum cheʼ bʌ sujtemix ti paraíso (Mt. 25:31-33, 46). Laʼ laj qʼuel bajcheʼ ili tsijib tsictesʌntel tsiʼ qʼuextʌbe i cuxtʌlel cabʌl i wiñicob Jehová, cheʼto jaʼel jiñi hermano am bʌ 18 i jabilel (Sal. 97:11; Pr. 4:18).

3, 4. Ti jiñi colem tempa bʌ ti 1935, ¿chuqui tsiʼ chʼʌmbeyob i sujm cabʌl hermanojob, i chucoch?

³ Jiñi ñumen utsʼatax bʌ tsaʼ bʌ ujti ti jiñi colem tempa bʌ jiñʌch cheʼ bʌ jiñi hermano Rutherford tsiʼ cʼajtibe jiñi yaʼ bʌ tempʌbilob: «¿Laʼ wom ba waʼtʌl pejtelel am bʌ laʼ pijtaya chaʼan miʼ laʼ chumtʌl ila ti Lum?». Ti jiñi colem tempa bʌ tsaʼ cʼotiyob cheʼ bʌ 20 mil i juntiquil tsajñi bʌ tsiʼ yʌlʌ chaʼan ñumen ti ojlil yaʼ bʌ tempʌbilob tsaʼ waʼleyob. Cheʼ jiñi, jiñi hermano Rutherford tsiʼ yʌlʌ: «Qʼuelela jiñi yonlel wiñicob xʼixicob». Jiñi yaʼ bʌ tempʌbilob tsiʼ wen jatsʼʌyob i cʼʌb yicʼot tsiʼ chaʼleyob oñel come wen tijicñayob. Jiñi waʼaloʼ bʌ tsiʼ chʼʌmbeyob i sujm chaʼan maʼañic tsaʼ yajcʌntiyob chaʼan miʼ majlelob ti panchan yicʼot chaʼan maʼañic yajcʌbilob ti chʼujul bʌ espíritu. Tiʼ yijcʼʌlel, 840 hermanojob tsiʼ chʼʌmʌyob jaʼ ti jiñi colem tempa bʌ i lʌcʼʌ tiʼ pejtelelob ochemob ti jiñi yambʌ tiñʌmeʼ.

⁴ Cʼʌlʌl ti jimbʌ ora, cabʌl hermanojob i yaʼ ochem jiñi hermano am bʌ 18 i jabilel, tsiʼ cʌyʌ i cʼuxob jiñi pan yicʼot i japob jiñi vino ti jiñi i Cʼajtesʌntel i chʌmel Jesús. Cabʌlob cheʼ tsiʼ yubiyob i bʌ bajcheʼ juntiquil hermano tsaʼ bʌ i yʌlʌ: «Cojachix tsaʼ j cʼuxu jiñi pan yicʼot tsaʼ c japʌ jiñi vino ti jiñi i Cena lac Yum tsaʼ bʌ mejli ti 1935. Tsaʼ j qʼuele chaʼan Jehová maʼañic tsiʼ cʼʌñʌ jiñi chʼujul bʌ i yespíritu chaʼan miʼ subeñon chaʼan tsiʼ yajcayon chaʼan mic majlel ti panchan. An c pijtaya chaʼan mic chumtʌl ila ti Lum yicʼot chaʼan mij cʌcʼ j coltaya chaʼan miʼ sujtel ti jumpʼejl paraíso» (Ro. 8:16, 17; 2 Co. 1:21, 22). Cʼʌlʌl ti jimbʌ ora, jiñi yonlel wiñicob xʼixicob woli (choncol) i bej oñʼan tilel yicʼot woliʼ chaʼleñob tsʌts bʌ eʼtel yicʼot jiñi yajcʌbiloʼ bʌ cʌylemobto bʌ ila ti Lum.

 5. ¿Bajcheʼ yilal miʼ qʼuel Jehová jiñi muʼ bʌ i cʌy i cʼuxob jiñi pan yicʼot i japob jiñi vino?

⁵ ¿Bajcheʼ yilal miʼ qʼuel Jehová jiñi tsaʼ bʌ i cʌyʌ i cʼuxob jiñi pan yicʼot i japob jiñi vino cheʼ ti 1935? ¿I chuqui miʼ yujtel mi juntiquil Testigo miʼ cʼux jiñi pan yicʼot miʼ jap jiñi vino come miʼ ñaʼtan chaʼan yajcʌbil, pero miʼ cʼotel i qʼuel chaʼan mach yajcʌbilic? (1 Co. 11:28). An tsaʼ bʌ i cʼuxuyob jiñi pan yicʼot tsiʼ japʌyob jiñi vino come tsiʼ poj ñaʼtayob chaʼan tsaʼ yajcʌntiyob chaʼan miʼ majlelob ti panchan. Pero mi mucʼʌch i cʌy i melob bajcheʼ jiñi come miʼ ñaʼtañob chaʼan machʌch añic tsaʼ yajcʌntiyob yicʼot miʼ chʌn melbeñob i yeʼtel (troñel) Jehová, Jehová miʼ yotsañob ti jiñi yambʌ tiñʌmeʼ. Anquese maʼañix miʼ cʼuxob jiñi pan yicʼot miʼ japob jiñi vino cheʼ tiʼ Cʼajtesʌntel i chʌmel Jesús, mucʼʌch i chʌn ajñelob come miʼ qʼuelob ti ñuc chuqui tsaʼ bʌ i mele Jehová yicʼot Jesús tiʼ tojlelob.

 6. ¿Chuqui miʼ subentelob ti Jesús jiñi ángelob?

⁶ Wolix (yʌquelix) i lʌcʼtiyel tilel jiñi ñuc bʌ wocol. Jin chaʼan, mi caj i pʼʌtʼesan lac pusicʼal cheʼ mi lac chaʼ tsʼitaʼ ñumen cʌn muʼ bʌ i yʌl Apocalipsis, capítulo 7 tiʼ tojlel jiñi yajcʌbiloʼ bʌ yicʼot tiʼ tojlel jiñi yonlel wiñicob xʼixicob ochemoʼ bʌ ti jiñi yambʌ tiñʌmeʼ. Yaʼi miʼ yʌl chaʼan Jesús miʼ suben jiñi ángelob chaʼan miʼ mʌctañob jiñi chʌmpʼejl icʼ muʼ bʌ i chaʼlen jisaya. Mach mejlic i yʌcʼob chaʼan jiñi icʼ miʼ ñumel ti jiñi Lum jinto cheʼ bʌ jiñi yajcʌbiloʼ bʌ tsaʼix aqʼuentiyob i sellojlel, yom bʌ i yʌl, cheʼ bʌ Jehová tsiʼ yʌlʌ chaʼan xucʼulʌch tsaʼ ajñiyob (Ap. 7:1-4). Jiñi eʼtel muʼ bʌ caj i tajob jiñi i yermañujob Cristo chaʼan xucʼulob jiñʌch cheʼ bʌ mi caj i sujtelob ti rey yicʼot ti sacerdote yicʼot Jesús yaʼ ti panchan (Ap. 20:6). Jehová, Jesús yicʼot jiñi ángelob wen tijicña mi caj i yubiñob i bʌ cheʼ bʌ jiñi 144 mil yajcʌbiloʼ bʌ yaʼix mi caj i yajñelob ti panchan.

 7. Cheʼ bajcheʼ miʼ yʌl Apocalipsis 7:9, 10, ¿majquiyob tsiʼ qʼuele Juan, i chuqui woliʼ melob? (Qʼuele jiñi dibujo am bʌ tiʼ tejchibal).

⁷ Cheʼ bʌ Juan miʼ taj ti tʼan jiñi 144 mil reyob yicʼot sacerdotejob, an yambʌ chuqui tsiʼ qʼuele: Jiñʌch jiñi yonlel wiñicob xʼixicob cuxul bʌ miʼ cʌytʌlob ti jiñi Armagedón. Ili chaʼmojt ñumen colem i maʼañic miʼ ñaʼtʌntel jaytiquilob (pejcan Apocalipsis 7:9, 10). «Lʌpʌl i chaʼañob pʌl bʌ i bujc sʌsʌc bʌ» muʼ bʌ i pʌs chaʼan maʼañic tsiʼ bibʼesayob i bʌ tiʼ pañimil (mulawil) Satanás yicʼot chaʼan tsiʼ chʌn jacʼbeyob i tʼan Dios yicʼot Cristo (Stg. 1:27). Miʼ chaʼleñob cʼam bʌ tʼan chaʼan miʼ yʌlob chaʼan tsaʼ coltʌntiyob ti Jehová yicʼot ti Jesús. Cheʼ jaʼel, chuculob i chaʼan i yopol xan muʼ bʌ i pʌs chaʼan miʼ chʼʌmob Jesús bajcheʼ jiñi rey tsaʼ bʌ i waʼchoco Jehová (laja yicʼot Juan 12:12, 13).

 8. ¿Chuqui miʼ yʌl Apocalipsis 7:11, 12 chaʼan jiñi i familia Jehová am bʌ ti panchan?

⁸ Pejcan Apocalipsis 7:11, 12. ¿Chuqui tsiʼ mele jiñi i familia Jehová am bʌ ti panchan? Juan miʼ qʼuel chaʼan wen tijicñayob i miʼ yʌqʼueñob i ñuclel Dios cheʼ bʌ miʼ pʌs i bʌ jiñi yonlel wiñicob xʼixicob. Jehová yicʼot jiñi i familia am bʌ ti panchan wen tijicña mi caj i yubiñob i bʌ cheʼ bʌ mi caj i tsʼʌctiyel tsaʼ bʌ i qʼuele Juan cheʼ bʌ jiñi yonlel wiñicob xʼixicob cuxul mi caj i cʌytʌlob ti jiñi ñuc bʌ wocol.

 9. Cheʼ bajcheʼ miʼ yʌl Apocalipsis 7:13-15, ¿chuqui wolix i melob jiñi yonlel wiñicob xʼixicob?

⁹ Pejcan Apocalipsis 7:13-15. Juan miʼ yʌl chaʼan jiñi yonlel wiñicob xʼixicob «tsaʼix i wutsʼuyob i pislel» yicʼot chaʼan «tsiʼ sʌqʼuesayob tiʼ chʼichʼel jini Tiñʌmeʼ». Ili yom i yʌl chaʼan sʌc añob i conciencia yicʼot chaʼan wen miʼ qʼuejlelob ti Jehová (Is. 1:18). Tsiʼ yʌcʼʌyob i bʌ ti Jehová yicʼot chʼʌmʌlob i chaʼan jaʼ i miʼ wen ñopob chaʼan Jesús tsiʼ yʌcʼʌ i bʌ ti chʌmel (sajtel) yicʼot i yamigojob Jehová (Jn. 3:36; 1 P. 3:21). Jin chaʼan, miʼ mejlel i yajñelob tiʼ tojel i buchlib Dios cheʼ bʌ miʼ melbeñob i yeʼtel cheʼ «ti qʼuiñil ti acʼʌlel» ila ti Lum. Woliʼ chaʼleñob subtʼan yicʼot i tijicñʌyel yicʼot woliʼ sutqʼuiñob ti xcʌntʼan yambʌlob, i miʼ yʌcʼob ti ñaxan jiñi i Yumʌntel Dios i mach jiñic chuqui bajñel yomob (Mt. 6:33; 24:14; 28:19, 20).

10. ¿Chuqui yujilob jiñi ochemoʼ bʌ ti jiñi yonlel wiñicob xʼixicob, i chuqui jiñi muʼ bʌ caj i qʼuelob chaʼan mi caj i tsʼʌctiyel?

¹⁰ Jiñi ochemoʼ bʌ ti jiñi yonlel wiñicob xʼixicob yujilob chaʼan Dios mi caj i chʌn cʌntañob cheʼ bʌ tsaʼix ujti jiñi ñuc bʌ wocol come jiñi Biblia miʼ yʌl chaʼan «jini buchul bʌ tiʼ yumʌntel mi caj i yajñel yicʼotob». Cheʼ jaʼel, mi caj i tsʼʌctiyel jiñi albil bʌ i chaʼan Dios añix bʌ ora caj i pijtañob jiñi yambʌ tiñʌmeʼ: «Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol ti pejtelel ora» (Ap. 21:3, 4).

11, 12. a) Cheʼ bajcheʼ miʼ yʌl Apocalipsis 7:16, 17, ¿chuqui ti bendición tac mi caj i tajob jiñi i wiñicob Dios? b) ¿Chuqui miʼ mejlel i melob jiñi yambʌ tiñʌmeʼ ti jiñi i Cʼajtesʌntel i chʌmel Jesús, i chucoch miʼ melob?

¹¹ Pejcan Apocalipsis 7:16, 17. Ti ili ora, an i wiñicob Dios muʼ bʌ i yubiñob wiʼñal tiʼ caj maʼañobic i taqʼuin o tiʼ caj jiñi wocol tac muʼ bʌ i tech jiñi quixtañujob yicʼot jiñi guerra. An añoʼ bʌ ti cárcel tiʼ caj i ñopoñelob. Pero jiñi ochemoʼ bʌ ti jiñi yonlel wiñicob xʼixicob wen tijicñayob come yujilob chaʼan cheʼ tsaʼix jisʌnti ili jontol bʌ pañimil, tiʼ pejtelel ora mi caj i tajob pejtelel chuqui miʼ cʼuxob yicʼot jiñi chʼujul bʌ bʌlñʌcʼʌl. Cheʼ bʌ miʼ jisʌntel ili jontol bʌ i pañimil Satanás, Jehová mi caj i cʌntan jiñi yonlel wiñicob xʼixicob ti jiñi i michʼajel lajal bʌ bajcheʼ tsʌts bʌ «ticwal». Jiñi cuxul bʌ miʼ cʌytʌlob cheʼ miʼ ñumel jiñi ñuc bʌ wocol, Jesús mi caj i pʌyob majlel ti «cuxul bʌ jaʼ» muʼ bʌ i yʌcʼ jiñi cuxtʌlel maʼañic bʌ i jilibal. Tiʼ pejtelel jiñi quixtañujob am bʌ chumleyob ti ili Pañimil, cojach jiñi yonlel wiñicob xʼixicob maʼañic bʌ mi caj i wis chʌmelob (Jn. 11:26).

¹² Jiñi yambʌ tiñʌmeʼ miʼ wen aqʼueñob wocolix i yʌlʌ Jehová yicʼot Jesús chaʼan jiñi i pijtayajob. Anquese Jehová maʼañic tsiʼ yajcayob chaʼan miʼ majlelob ti panchan, pero mucʼʌch i wen cʼuxbiñob yicʼot miʼ qʼuelob ti ñuc jaʼel bajcheʼ jiñi yajcʌbiloʼ bʌ. Jiñi yambʌ tiñʌmeʼ yicʼot jiñi yajcʌbiloʼ bʌ miʼ mejlel i yʌqʼueñob i ñuclel Dios yicʼot Cristo, ¿bajcheʼ? Junchajp jiñʌch cheʼ bʌ miʼ cʼotelob tiʼ Cena lac Yum.

13, 14. ¿Chucoch yomʌch mi lac majlel ti lac pejtelel cheʼ tiʼ Cʼajtesʌntel i chʌmel Jesús?

¹³ Ti jiñi jabil ñumen bʌ tilel, ti jiñi 1,000 quixtañujob muʼ bʌ i cʼotel tiʼ Cʼajtesʌntel i chʌmel Jesús, tajol juntiquil jach miʼ cʼux jiñi pan yicʼot miʼ jap jiñi vino. Yom i yʌl chaʼan ti cabʌl congregación maʼañic majqui miʼ cʼux jiñi pan yicʼot miʼ jap jiñi vino. Yonlel jiñi muʼ bʌ i yajñelob tiʼ Cʼajtesʌntel i chʌmel Jesús wʌʼ miʼ pijtañob chumtʌl ila ti Lum. Mi cheʼ bajcheʼ jiñi, ¿chucoch miʼ majlelob tiʼ Cʼajtesʌntel i chʌmel Jesús? Come miʼ cʼuxbiñob Cristo yicʼot jiñi yajcʌbiloʼ bʌ i miʼ yʌqʼueñob i coltaya. Lajal bajcheʼ cheʼ bʌ an majqui miʼ ñujpuñel miʼ cʼotel cabʌl i yamigojob come miʼ cʼuxbiñob yicʼot miʼ coltañob. I miʼ melob bajcheʼ ili come miʼ pʌsob chaʼan miʼ qʼuelob ti ñuc cheʼ bʌ tsiʼ yʌcʼʌ i cuxtʌlel Jesús, muʼ bʌ i yʌcʼ chaʼan mi lac mejlel ti chumtʌl tiʼ pejtelel ora ila ti Lum.

¹⁴ Yambʌ i sujmlel chucoch miʼ majlelob tiʼ Cʼajtesʌntel i chʌmel Jesús jiñi yambʌ tiñʌmeʼ chaʼañʌch miʼ jacʼbeñob i mandar Jesús. Cheʼ bʌ Jesús tsiʼ mele jiñi ñaxam bʌ i Cena lac Yum, tsiʼ yʌlʌ: «Cheʼʌch yom mi laʼ chaʼlen chaʼan mi laʼ ñaʼtañon» (1 Co. 11:23-26). Jin chaʼan, jiñi yambʌ tiñʌmeʼ mi caj i chʌn ajñelob ti jiñi i Cʼajtesʌntel i chʌmel Jesús cheʼ bʌ anto cʌylem jiñi yajcʌbiloʼ bʌ ila ti Lum. Cheʼ jaʼel, miʼ pʌyob cabʌl lac piʼʌlob tiʼ pejtelel pañimil chaʼan miʼ majlelob tiʼ Cena lac Yum.

15. ¿Bajcheʼ miʼ mejlel la cʌqʼuen i ñuclel Dios yicʼot Cristo tiʼ Cʼajtesʌntel i chʌmel Jesús?

¹⁵ Cheʼ tiʼ Cʼajtesʌntel i chʌmel Jesús, mi caj i mejlel la cʌqʼuen i ñuclel Dios yicʼot Cristo cheʼ bʌ mi lac chaʼlen cʼay yicʼot cheʼ miʼ mejlel oración. Jiñi discurso muʼ bʌ caj i ñusʌntel ti ili jabil an i temajlel: «Qʼuele ti ñuc tsaʼ bʌ i mele Dios yicʼot Cristo ti a tojlel». Cheʼ mi caj lac ñʌchʼtan, mi caj lac wen aqʼuen wocolix i yʌlʌ Jehová yicʼot Cristo. Cheʼ bʌ woliʼ ñusʌntel jiñi pan yicʼot jiñi vino, jiñi yaʼ bʌ tempʌbilonla mi caj laj cʼajtesan chaʼan jiñi pan jiñʌch i bʌcʼtal Jesús, i jiñi vino jiñʌch i chʼichʼel. Cheʼ jaʼel, mi caj laj cʼajtesan chaʼan Jehová tsiʼ yʌcʼʌ i Yalobil chaʼan miʼ chʌmel chaʼañonla chaʼan miʼ mejlel lac taj laj cuxtʌlel (Mt. 20:28). Jiñi muʼ bʌ i cʼuxbin lac Tat am bʌ ti panchan yicʼot i Yalobil mi caj i cʼotel tiʼ Cʼajtesʌntel i chʌmel Jesús.

16. ¿Bajcheʼ lajalob jiñi yajcʌbiloʼ bʌ yicʼot jiñi yambʌ tiñʌmeʼ?

¹⁶ Dios lajal miʼ qʼuel jiñi yajcʌbiloʼ bʌ yicʼot jiñi yambʌ tiñʌmeʼ. Dios miʼ laja cʼuxbiñob come tsiʼ yʌcʼʌ ti chʌmel i Yalobil chaʼan miʼ mʌn jiñi yajcʌbiloʼ bʌ yicʼot jiñi yambʌ tiñʌmeʼ. Cojach mach lajal jiñi i pijtayajob, pero yom xucʼulob ti Dios yicʼot ti Cristo (Sal. 31:23). I mach ñajʌyic lac chaʼan chaʼan Jehová miʼ mejlel i yʌqʼuen i yespíritu pejtelel jiñi i wiñicob chaʼan miʼ coltañob. Jehová miʼ mejlel i yʌqʼuen i yespíritu jujuntiquil cheʼ bajcheʼ cʼamel i cʼʌjñibal i chaʼan, mach yʌlʌyic mi ochem ti jiñi yambʌ tiñʌmeʼ o yajcʌbil chaʼan miʼ majlel ti panchan.

17. ¿Chuqui yomobix jiñi yajcʌbiloʼ bʌ?

¹⁷ Jiñi xñoptʼañob yajcʌbiloʼ bʌ maxto yajcʌbilob chaʼan miʼ majlelob ti panchan cheʼ bʌ miʼ yilañob pañimil, jiñʌch Jehová yomto bʌ miʼ yʌqʼueñob jiñi i pijtajayob tiʼ pusicʼal. Jiñi yajcʌbiloʼ bʌ miʼ chʌn ñaʼtañob jiñi i pijtaya, miʼ tajob tiʼ tʼan tiʼ yoración i yomobix majlel ti chumtʌl yaʼ ti panchan. Anquese mach yujilobic bajcheʼ yilal miʼ cajelob jiñi i bʌcʼtal, yomobix i tempañob i bʌ yicʼot Jehová, Jesús, jiñi ángelob, jiñi yambʌ yajcʌbiloʼ bʌ yicʼot chaʼan miʼ chʼʌmob i yeʼtel tiʼ Yumʌntel Dios (Fil. 3:20, 21; 1 Jn. 3:2).

18. ¿Chuqui yomobix jiñi yambʌ tiñʌmeʼ?

¹⁸ Jiñi yambʌ tiñʌmeʼob miʼ pijtañob chumtʌl tiʼ pejtelel ora ila ti Lum (Ec. 3:11, TNM). Yomobix i yʌcʼob i coltaya chaʼan miʼ sujtesañob ti paraíso ili Pañimil yicʼot chaʼan miʼ melob i yotot, chaʼan an chuqui miʼ pʌcʼob yicʼot chaʼan cʼocʼ miʼ yajñelob yicʼotob pejtelel i familia (Is. 65:21-23). Yomobix i cʌñob tiʼ pejtelel ili Pañimil, i qʼuelob jiñi wits tac, jiñi colem teʼ tac, jiñi mar yicʼot chaʼan miʼ ñumen cʌñob jiñi tsaʼ tac bʌ i mele Jehová. Pero jiñi muʼ bʌ i ñumen aqʼueñob i tijicñʌyel jiñʌch cheʼ mi caj i ñumen ajñelob bajcheʼ i yamigojob Jehová ti jujumpʼejl qʼuin.

19. ¿Bajcheʼ miʼ ñumen coltañonla jiñi i Cʼajtesʌntel i chʌmel Jesús, i jala mi caj i mejlel ti ili jabil?

¹⁹ Jehová an i yʌqʼue jumpʼejl pijtaya jiñi tsaʼix bʌ i yʌqʼueyob i cuxtʌlel (Jer. 29:11). Jiñi i Cʼajtesʌntel i chʌmel Jesús miʼ wen coltañonla ti lac pejtelel chaʼan mi la cʌqʼuen i ñuclel Dios yicʼot Cristo chaʼan jiñi am bʌ i meleyob ti lac tojlel chaʼan mi lac mejlel ti chumtʌl tiʼ pejtelel ora. Jin chaʼan, jiñi i sujm bʌ xñoptʼañonbʌla jiñi i Cʼajtesʌntel i chʌmel Jesús jiñʌch jumpʼejl tempa bʌ wen ñuc bʌ i cʼʌjñibal lac chaʼan ti jujumpʼejl jab. Cheʼ ti 2021, jiñi i Cʼajtesʌntel i chʌmel Jesús mi caj i mejlel ti sábado 27 i chaʼan marzo cheʼ ti ochʼajel qʼuin. Ti ili jabil, cabʌlob mach wocolic mi caj i yubiñob chaʼan miʼ cʼotelob ti jiñi ñuc bʌ tempa bʌ, yambʌlob mucʼʌch caj i cʼotelob anquese miʼ contrajintelob i an muʼ bʌ caj i melob ili tempa bʌ yaʼ ti cárcel. Yaʼ ti panchan Jehová, Jesús, jiñi ángelob yicʼot jiñi yajcʌbiloʼ bʌ tsaʼix bʌ chaʼ cuxtʌyiyob mi caj i qʼuelob ili tempa bʌ. Jin chaʼan, pejtelel jiñi congregación tac yicʼot jiñi quixtañujob laʼ i yubiñob i tijicñʌyel ti ili tempa bʌ.