Jiñi eʼtel la quicʼot Jehová miʼ yʌqʼueñonla tijicñʌyel

 1. Anquese Jehová wen an i pʼʌtʌlel, ¿chuqui miʼ yʌcʼ tiʼ tojlel yañoʼ bʌ?

JEHOVÁ tsiʼ mele tiʼ pejtelel chuqui an. Cojach ñumen am bʌ i ñaʼtʌbal yicʼot i pʼʌtʌlel. Ti jumpʼejl bʌ qʼuin, Job tsiʼ yʌlʌ chaʼan Dios miʼ mejlel i mel tiʼ pejtelel chuqui miʼ ñaʼtan. Maʼañic chuqui maʼañic bʌ miʼ mejlel i mel (Job 42:2). Cheʼ jaʼel maʼañic miʼ pijtan i coltʌntel ti yambʌlob. Pero miʼ yʌcʼ chaʼan yañoʼ bʌ miʼ chaʼleñob eʼtel yicʼot. Cheʼʌch miʼ pʌs chaʼan mucʼʌch i wen cʼuxbiñob.

 2. ¿Chuqui jiñi ñuc bʌ eʼtel tsaʼ aqʼuenti Jesús?

² Tsaʼ bʌ i ñaxan mele Dios jiñʌch i Yalobil, Jesús. Cheʼ jiñi, tsiʼ yʌqʼue wen ñuc bʌ i yeʼtel i Yalobil. Tsiʼ yʌcʼʌ chaʼan miʼ coltan i mel tiʼ pejtelel chuqui an (Juan 1:1, 2, 18). Jiñi apóstol Pablo tsiʼ yʌlʌ chaʼan «ti [i tojlel] Jesús melbil pejtelel chuqui tac an ti panchan yicʼot ti pañimil, jiñi tsiquil tac bʌ yicʼot jiñi mach bʌ tsiquil taquic». Yicʼot tsiʼ yʌlʌ chaʼan «laj melbilʌch ti Jesús, tsaʼ otsʌbenti tiʼ wenta, chaʼan miʼ qʼuejlel ti ñuc lac Yum» (Colosenses 1:15-17, Jiñi tsijiʼ bʌ wen tʼañ chaʼañ estudio). Jin chaʼan, Jehová tsiʼ yʌcʼʌ ti ñuc Jesús cheʼ bʌ tsiʼ yʌqʼue wen ñuc bʌ i yeʼtel yicʼot cheʼ tsiʼ sube yañoʼ bʌ.

 3. a) ¿Chuqui tsaʼ acʼbenti i mel Adán ti Jehová? b) ¿Chucoch tsiʼ cʌyʌ Jehová chaʼan Adán miʼ coltan?

³ Jehová tsiʼ cʌyʌ chaʼan ti lac pejtelel mi lac chaʼlen eʼtel la quicʼot. Tsiʼ cʌyʌ chaʼan Adán miʼ yotsʌben i cʼabaʼ tiʼ pejtelel añimal tac (Génesis 2:19, 20). Tiʼ sujm, Adán tsaʼʌch i wen taja i tijicñʌyel tiʼ melol ili eʼtel. Tsiʼ ñaxan wen qʼuele bajcheʼ yilal yicʼot chuqui miʼ mel jiñi añimal tac chaʼan miʼ mejlel i yotsʌben i cʼabaʼ. Jehová miʼ mejlel i mel jiñi eʼtel come jiñʌch tsiʼ mele tiʼ pejtelel jiñi añimal tac. Pero tsiʼ cʌyʌ chaʼan Adán miʼ coltan, come tsiʼ wen cʼuxbi. Cheʼ jeʼel, tsiʼ yʌqʼue tiʼ wenta chaʼan miʼ sujtesan ti jumpʼejl paraíso ili Pañimil (Génesis 1:27, 28). Pero ti wiʼil, Adán tsiʼ cʌyʌ eʼtel yicʼot Jehová. Tiʼ caj jiñi, Adán yicʼot tiʼ pejtelel i pʼolbalonbʌla an lac wen ila wocol (Génesis 3:17-19, 23).

 4. ¿Majqui an i chaʼleyob troñel yicʼot Dios chaʼan miʼ tsʼʌctiyel chuqui miʼ ñaʼtan i mel?

⁴ Ti wiʼil, Dios tsiʼ cʌyʌ chaʼan yañoʼ bʌ miʼ chaʼleñob eʼtel yicʼot. Jumpʼejl ejemplo, Noé tsiʼ mele jumpʼejl arca chaʼan yaʼʌch miʼ coltʌyel yicʼot i familia ti jiñi ñuc bʌ Butʼjaʼ. Moisés tsiʼ locʼsa Israel ti Egipto. Josué tsiʼ pʌyʌ majlel jiñi israelob yaʼ ti lum tsaʼ bʌ wʌn subentiyob. Salomón tsiʼ mele jiñi templo yaʼ ti Jerusalén. Ixcu jiñi María jiñʌch i ñaʼ Jesús. Ili xucʼul bʌ i wiñicob Dios yicʼot yañoʼ bʌ temel an i chaʼleyob eʼtel yicʼot Jehová chaʼan miʼ tsʼʌctiyel chuqui miʼ ñaʼtan i mel.

 5. a) ¿Chuqui bʌ eʼtel miʼ mejlel lac mel ti lac pejtelel? b) ¿Cʼʌñʌl ba chaʼan Jehová mi laj coltan tiʼ melol ili troñel? (Qʼuele jiñi dibujo am bʌ tiʼ tejchibal).

⁵ Ili ora, Jehová miʼ pʌyonla chaʼan mi laj cʌcʼ laj coltaya tiʼ yumʌntel. An cabʌl bajcheʼ miʼ mejlel lac mel. Anquese mach ti lac pejtelelic junlajal miʼ mejlel lac mel, mucʼʌch lac luʼ mejlel lac sub jiñi wen tʼan chaʼan jiñi Yumʌntel. ¿Cʼʌñʌl ba chaʼan Jehová mi laj coltan tiʼ melol ili troñel? Maʼañic. Cheʼic yom, anquese yaʼan ti panchan miʼ mejlel i pejcan jiñi wiñicob xʼixicob (quixtañujob). Jesús tsiʼ yʌlʌ chaʼan Jehová miʼ mejlel i yʌcʼ chaʼan jiñi xajlel (tun) tac miʼ suben jiñi quixtañujob majqui jiñi Rey chaʼan bʌ jiñi Yumʌntel (Lucas 19:37-40). Pero Dios tsiʼ cʌyʌ chaʼan mi lac sujtel ti ‹xʼeʼtel› i chaʼan (1 Corintios 3:9). Jiñi apóstol Pablo tiʼ tsʼijbu: «Joñon lojon xtem eʼtelon lojon yicʼot Dios. Mic xicʼbeñetla ti utsʼat ame lolomic jach mi laʼ chʼʌmben i yutslel i pusicʼal Dios» (2 Corintios 6:1). Jiñʌch wen ñuc bʌ lac majtan cheʼ mi lac chaʼlen eʼtel la quicʼot Jehová. Mi caj laj qʼuel chucoch mucʼʌch i yʌqʼueñonla lac tijicñʌyel.

 6. ¿Bajcheʼ yubil tsiʼ yubi Jesús cheʼ bʌ tsiʼ chaʼle troñel yicʼot i Tat?

⁶ Jiñi i wiñiconbʌla Jehová, tiʼ pejtelel ora tijicña mi la cubin cheʼ mi lac chaʼlen eʼtel la quicʼot. Cheʼ bʌ maxto tilemic Jesús wʌʼ ti Pañimil, tsiʼ chaʼle eʼtel yicʼot Jehová bajcheʼ juntiquil wem bʌ xʼeʼtel. Jesús yujil chaʼan mucʼʌch i wen cʼuxbintel ti Dios, tsiʼ yʌlʌ: «Wen contentojon tiʼ tojlel tiʼ pejtelel ora» (Proverbios 8:22, 30). Tsiʼ wen taja i tijicñʌyel cheʼ bʌ tsiʼ chaʼle troñel yicʼot i Tat come cabʌl chuqui tsiʼ mele yicʼot yujil chaʼan mucʼʌch i cʼuxbintel ti Dios. ¿Ixcu joñonla? ¿Muʼ ba mejlel laj cubin lac bʌ jaʼel bajcheʼ jiñi?

 7. ¿Chucoch miʼ yʌqʼueñonla tijicñʌyel jiñi subtʼan?

⁷ Jesús tsiʼ yʌlʌ chaʼan tijicñayonla cheʼ bʌ an chuqui mi la cʌcʼ yicʼot cheʼ bʌ an chuqui mi la cʌqʼuentel (Hechos 20:35). Wen tijicñayonla cheʼ bʌ tsaʼ cʌntesʌntiyonla tiʼ sujmlel. Pero tijicñayonla jaʼel cheʼ mi laj cʌntesan yañoʼ bʌ. ¿Chucoch? Come cheʼ bʌ miʼ cʌñob muʼ bʌ i cʌntesañonla jiñi Biblia yicʼot miʼ tech i cʌñob Dios, wen tijicñayob jeʼel. Mi lac taj lac tijicñʌyel cheʼ mi laj qʼuel bajcheʼ miʼ qʼuextañob i bʌ tiʼ melbal. La cujil chaʼan miʼ mejlel i tajob i cuxtʌlel mach bʌ añic i jilibal cheʼ miʼ sujtelob tiʼ yamigo Dios (2 Corintios 5:20). Jiñi ñumen ñuc bʌ eʼtel yicʼot muʼ bʌ i ñumen aqʼueñonla tijicñʌyel jiñʌch jiñi subtʼan.

 8. ¿Bajcheʼ yubil miʼ yubiñob i bʌ chaʼtiquil uxtiquil Testigojob cheʼ bʌ miʼ chaʼleñob eʼtel yicʼot Jehová?

⁸ Cheʼ bʌ mi laj coltan i cʌñob Dios jiñi yañoʼ bʌ, Jehová tijicña yicʼotonla yicʼot miʼ qʼuel ti ñuc jiñi woli (choncol) bʌ lac mel. Iliyi miʼ yʌqʼueñonla lac tijicñʌyel jaʼel (pejcan 1 Corintios 15:58). Juntiquil Testigo chʼoyol bʌ ti Italia i cʼabaʼ Marco, miʼ yʌl: «Maʼañic miʼ mejlel cʌl bajcheʼ cʼamel c tijicñʌyel cheʼ mi cʌqʼuen j cuxtʌlel Jehová i mach juntiquilic muʼ bʌ i ñajʌyel i chaʼan queʼtel». Yambʌ Testigo chʼoyol bʌ ti Italia i cʼabaʼ Franco miʼ yʌl: «Ti jujumpʼejl qʼuin, Jehová miʼ cʼʌn jiñi Biblia, jiñi jun tac yicʼot jiñi tempa bʌ chaʼan miʼ cʼajtesʌbeñonla chaʼan mucʼʌch i cʼuxbiñonla. Anquese tajol mi laj qʼuel mach cabʌlic muʼ bʌ lac mel, Jehová miʼ qʼuel ti ñuc cheʼ woli (yʌquel) lac chaʼlen wersa. Jin chaʼan, cheʼ mic chaʼlen troñel quicʼot Dios miʼ yʌqʼueñon c tijicñʌyel yicʼot miʼ yʌqʼuen i sujmlel j cuxtʌlel».

 9. Cheʼ bʌ Jesús maxto tilemic ti Pañimil, ¿bajcheʼ yilal an yicʼot Jehová, i chucoch?

⁹ Cheʼ mi lac chaʼlen eʼtel yicʼot juntiquil muʼ bʌ laj cʼuxbin, ñumen lʌcʼʌl mi la cubin lac bʌ tiʼ tojlel. Mi lac ñumen cʌn bajcheʼ yilal yicʼot i melbal. Mi lac ñaʼtan chuqui yom i mel ti talto bʌ qʼuin yicʼot chuqui woliʼ mel chaʼan miʼ taj. Jesús cabʌl jab tsiʼ chaʼle eʼtel yicʼot Jehová cheʼ maxto tilemic wʌʼ ti Pañimil. Maʼañic chuqui tsaʼ mejli i tʼoxob come tsaʼ cʼoti i wen cʼuxbiñob i bʌ. Jin chaʼan tsiʼ yʌlʌ Jesús: «Joñon quicʼot c Tat junlajalon lojon» (Juan 10:30). Tiʼ chaʼticlelob wen temelʌch añob come tsiʼ yubiyob i tijicñʌyel cheʼ bʌ lajal tsiʼ chaʼleyob eʼtel.

10. ¿Chucoch miʼ ñumen lʌcʼtesañonla ti Jehová yicʼot la quermañojob jiñi subtʼan?

¹⁰ Jesús tsiʼ cʼajtibe Jehová chaʼan miʼ cʌntan jiñi xcʌntʼañob i chaʼan. ¿Chucoch? Jesús tsiʼ sube: «Chaʼan miʼ yajñelob ti jumpʼejl jach i pusicʼal cheʼ bajcheʼ joñonla» (Juan 17:11). Cheʼ mi lac jacʼ i tʼan Dios am bʌ ti Biblia yicʼot mi lac chaʼlen subtʼan, mi lac ñumen cʌn bajcheʼ yilal Jehová. Mi cʼotel lac ñaʼtan chaʼan ñumen wen cheʼ mi lac ñop tiʼ tojlel yicʼot cheʼ mi lac mel muʼ bʌ i subeñonla. Mi mucʼʌch lac chaʼlen wersa lac sujtel tiʼ yamigo, miʼ jacʼbeñonla (pejcan Santiago 4:8). Jiñi subtʼan miʼ lʌcʼtesañonla yicʼot la quermañojob jaʼel, come tsiquil chaʼan miʼ chaʼleñob wersa tiʼ melol muʼ bʌ i mulan Jehová. Miʼ cʼotel laj qʼuel jaʼel chaʼan cheʼ bajcheʼ joñonla, lajal bʌ wocol añob i chaʼan, tijicñʌyel yicʼot chuqui yom i tajob. Jin chaʼan temel mi lac chaʼlen eʼtel, mi lac taj lac tijicñʌyel yicʼot temel mi laj cuch wocol yicʼotob. Octavia, juntiquil Testigo chʼoyol bʌ ti Gran Bretaña, miʼ yʌl: «Cheʼ mic chaʼlen eʼtel yicʼot Jehová miʼ ñumen lʌcʼtesañon tiʼ tojlel yicʼot ti jiñi hermanojob». ¿Chucoch? Come miʼ yʌl chaʼan jiñi i yamigojob lajal chuqui yom i tajob bajcheʼ jiñi hermana. ¿Mach ba cheʼic mi laj cubin jaʼel?

11. ¿Chucoch ñumen temel mi caj laj cajñel la quicʼot la quermañojob yicʼot Jehová yaʼ ti tsijiʼ bʌ pañimil?

¹¹ Ili ora, mi lac wen cʼuxbin Jehová yicʼot la quermañojob. Pero yaʼ ti Paraíso muʼto caj lac ñumen cʼuxbiñob. Ñaʼtancu jiñi utsʼatax bʌ eʼtel mi caj lac tem mel ti talto bʌ qʼuin. Mi caj lac chʼʌmob jiñi muʼ bʌ caj i chaʼ tejchelob yicʼot mi caj laj cʌntesañob tiʼ chaʼan bʌ Jehová. Mi caj lac sujtesan ti jumpʼejl paraíso ili Pañimil. Wen tijicña cheʼ temel mi caj lac chaʼlen eʼtel yicʼot cheʼ xucʼu xucʼul mi caj lac sujtel ti toj bʌ cheʼ añoñixla tiʼ yumʌntel Cristo. Ti jujumpʼejl qʼuin ñumen temel mi caj la cajñel la quicʼot la quermañojob yicʼot Jehová. Mi caj i yʌqʼueñonla Jehová tiʼ pejtelel chuqui laj com (Salmo 145:16).

12. ¿Chucoch miʼ cʌntañonla jiñi subtʼan?

¹² Chumulonla tiʼ pañimil (mulawil) Satanás yicʼot xmulilonla. Mi maʼañic mi laj cʌntan lac bʌ, tajol cheʼ mi laj cajel ti pensar yicʼot lac mel bajcheʼ jiñi quixtañujob ti ili pañimil. Jin chaʼan, yom mi laj cʌntan bajcheʼ añonla la quicʼot Jehová. Yom mi lac chaʼlen wersa tiʼ melol jiñi. Lajal bajcheʼ woliyonla ti ñuxijel chaʼan maʼañic miʼ pʌyonla majlel jiñi jaʼ. Yom tsʌts mi lac chaʼlen ñuxijel mi mach la comic miʼ pʌyonla majlel. Jiñi subtʼan miʼ coltañonla chaʼan lʌcʼʌl mi la cajñel la quicʼot Jehová. ¿Chucoch? Come cheʼ mi la cʌl i chaʼan bʌ Dios yicʼot am bʌ ti Biblia, cojach an ti lac pensar jiñi ñumen i cʼʌjñibal bʌ yicʼot utsʼat bʌ. Mach jiñic mi lac ñaʼtan muʼ bʌ i cʼunʼesan lac ñopoñel (chʼujbiya) ti Dios (Filipenses 4:8). Miʼ ñumen pʼʌtʼesan lac ñopoñel jiñi subtʼan come miʼ cʼajtesʌbeñonla jiñi wʌn albil bʌ i chaʼan Dios yicʼot i mandar tac. Yicʼot jeʼel, miʼ coltañonla lac chʌn pʌs wem bʌ lac melbal i maʼañic mi lac yajlel tiʼ yac Satanás yicʼot ili i pañimil (pejcan Efesios 6:14-17).

13. ¿Chucoch miʼ qʼuel ti ñuc jiñi subtʼan juntiquil Testigo chʼoyol bʌ ti Australia?

¹³ Cheʼ mi lac chaʼlen subtʼan, mi lac chaʼlen estudio yicʼot mi laj coltan hermanojob miʼ cʌntañonla jeʼel come maʼañix miʼ yʌqʼueñonla i yorajlel chaʼan mi laj cʌlʌx ñaʼtan lac wocol tac. Joel, juntiquil Testigo chʼoyol bʌ ti Australia, miʼ yʌl chucoch miʼ wen qʼuel ti ñuc jiñi subtʼan. Miʼ yʌl chaʼan cheʼ miʼ cʼajtesan chaʼan jiñi quixtañujob ñumen añob to i wocol, jiñʌch muʼ bʌ i coltan jaʼel. Yicʼot miʼ cʼajtesan chaʼan jiñi ticʼojel am bʌ ti Biblia mucʼʌch i wen coltan. Miʼ yʌl: «Jiñi subtʼan miʼ coltañon c pʌs c pecʼlel yicʼot chaʼan mic ñop ti Jehová yicʼot ti quermañojob».

14. ¿Bajcheʼ la cujil chaʼan woliʼ coltañonla Dios yicʼot i yespíritu?

¹⁴ Jiñi subtʼan miʼ pʌsbeñonla chaʼan Jehová wolʌch i cʼʌn i yespíritu chaʼan miʼ coltañonla. Chaʼan mi lac chʼʌmben isujm, laʼ laj cʌl jumpʼejl ejemplo. Ñaʼtancu chaʼan maʼ subentel a puc bʌlñʌcʼʌl yaʼ baqui chumulet. Pero jiñi quixtañujob maʼañic mi caj i tojet, jatetʌch mi caj a toj tiʼ pejtelel muʼ bʌ caj a cʼʌn. Cheʼ jaʼel, a wujil chaʼan jiñi lac piʼʌlob mach yomobic chaʼan maʼ chʼʌmbeñob majlel jiñi bʌlñʌcʼʌl, yicʼot an majqui mi caj i tsʼaʼleñetob chaʼan jiñi woli bʌ a mel. ¿Muʼ ba caj a jalijel tiʼ melol jiñi eʼtel? Tajol mi caj a mel a pusicʼal i maʼ cʌy. Lajal jaʼel, joñonla woli lac chʼʌmbeñob majlel i Tʼan Dios jiñi quixtañujob. Miʼ wajleñoñobla yicʼot miʼ tsʼaʼleñoñobla anquese mi la cʌqʼuen i yorajlel yicʼot mi laj cʼʌn lac taqʼuin tiʼ melol. Pero chʌn mucʼonla ti subtʼan ti jujumpʼejl jab. ¿Mach ba jiñic miʼ pʌsbeñonla ili chaʼan Jehová miʼ cʼʌn i yespíritu chaʼan miʼ coltañonla?

15. ¿Chucoch ñuc i cʼʌjñibal jiñi subtʼan?

¹⁵ Wen ñuc i cʼʌjñibal jiñi subtʼan come miʼ yʌcʼ ti tsʼʌctiyel chuqui yom bʌ Dios tiʼ tojlel wiñicob xʼixicob. Jehová yom tsiʼ yʌlʌ chaʼan tiʼ pejtelel ora miʼ chumtʌlob, i maʼañic tsiʼ qʼuexta i pensar cheʼ bʌ tsiʼ chaʼle mulil Adán (Isaías 55:11). Chaʼan miʼ locʼsañonla ti mulil yicʼot ti chʌmel, tsiʼ choco tilel Jesús chaʼan miʼ yʌcʼ i cuxtʌlel ti laj caj. Pero yom mi lac jacʼben i tʼan Dios mi la com lac taj lac wenlel yicʼot chumtʌl tiʼ pejtelel ora. Jesús tiʼ tsictesa chuqui yom Dios chaʼan miʼ melob jiñi quixtañu, i tsiʼ sube chaʼan cheʼʌch yom miʼ chaʼleñob cʌntesa jeʼel jiñi xcʌntʼañob i chaʼan. Jin chaʼan mucʼonla ti subtʼan yicʼot mi laj coltan yañoʼ bʌ chaʼan miʼ sujtelob tiʼ yamigo Dios. Cheʼ mi lac mel jiñi, woliyonla ti eʼtel la quicʼot Jehová yicʼot woli laj coltan jiñi yañoʼ bʌ ti jiñi mulil yicʼot chʌmel.

16. ¿Chuqui mi lac pʌs cheʼ mucʼonla ti subtʼan?

¹⁶ Cheʼ bʌ juntiquil ñaxam bʌ miʼ yʌcʼ i bʌ ti ñopbalʌl tsiʼ cʼajtibe Jesús baqui bʌ jiñi mandar ñumen ñuc bʌ, Jesús tsiʼ jacʼbe: «‹Cʼuxbin a Yum Dios tiʼ pejtelel a pusicʼal, tiʼ pejtelel a chʼujlel [«cuxtʌlel», TNM], tiʼ pejtelel a ñaʼtʌbal›. Jiñʌch jini ñaxan bʌ mandar, jini cʼax ñuc bʌ. Lajal jini wiʼilix bʌ mandar: ‹Cʼuxbin a piʼʌlob cheʼ bajcheʼ maʼ cʼuxbin a bʌ ti a bajñelil›» (Mateo 22:37-39). Cheʼ bʌ mi lac chaʼlen subtʼan yicʼot mi lac pʌsben lac piʼʌlob bajcheʼ miʼ tajob i cuxtʌlel mach bʌ añic miʼ jilel, mi lac pʌs chaʼan wolʌch lac jacʼ jiñi mandar chaʼan yom mi laj cʼuxbin lac piʼʌlob yicʼot Jehová (pejcan Hechos 10:42). La cujil chaʼan Dios «yom miʼ coltan pejtelel winicob xʼixicob. Yom miʼ cʌñob i sujmlel» (1 Timoteo 2:4).

17. ¿Chuqui maʼ ñaʼtan chaʼan ili eʼtel aqʼuebilonbʌla i chaʼan Jehová?

¹⁷ Mi la cʌqʼuen wocolix i yʌlʌ Jehová cheʼ miʼ cʌy chaʼan mi lac chaʼlen eʼtel la quicʼot. Miʼ wen aqʼueñonla lac tijicñʌyel comol eʼtel la quicʼot, miʼ lʌcʼtesañonla tiʼ tojlel yicʼot tiʼ tojlel hermanojob, i miʼ cʌntañonla. Cheʼ jaʼel, cheʼʌch miʼ mejlel lac pʌsben laj cʼuxbiya Jehová yicʼot la quermañojob. Dios an cabʌl i wiñicob tiʼ pejtelel pañimil, i mach junlajalic bajcheʼ woliʼ ñusañob. Pero mi lac luʼ chaʼlen wersa ti subtʼan, mach yʌlʌyic mi xcolelob to o mi añobix i jabilel, mi wen añob i taqʼuin o mi maʼañic, mi pʼʌtʌlob o mach cheʼiqui. Lajal mi la cubin lac bʌ bajcheʼ juntiquil hermana chʼoyol bʌ ti Francia, tsiʼ yʌlʌ: «Jiñi ñumen ñuc bʌ tiʼ pejtelel pañimil yicʼot panchan, tsaʼ bʌ i Mele tiʼ pejtelel chuqui an, jiñi tijicña bʌ Dios, miʼ subeñon: ‹Cucu yicʼot chaʼlen tʼan. Subu chaʼañon. Subu tiʼ pejtelel a pusicʼal. Mi caj cʌqʼueñet a pʼʌtʌlel, jiñi c Tʼan, i coltaya ángelob yicʼot a piʼʌlob ti subtʼan. Mi caj cʌntesañet bajcheʼ yom maʼ mel yicʼot tiʼ yorajlel jach›. Jehová miʼ yʌcʼ chaʼan mi lac mel chuqui yom yicʼot mi lac chaʼlen eʼtel la quicʼot. ¡Jiñʌch ñuc bʌ lac majtan iliyi!».