Jehová miʼ pʌsben i tejclum jiñi bij chaʼan bʌ cuxtʌlel

1, 2. a) ¿Chuqui bʌ tijqʼuel an i colta cabʌl quixtañu? (Qʼuele jiñi foto am bʌ tiʼ tejchibal). b) ¿Chuqui ñuc bʌ coltʌntel woliʼ tajob i wiñicob Dios?

AÑIX ñumen 100 jab, ti chaʼpʼejl uxpʼejl país miʼ yʌjqʼuel señal tac yaʼ ti carretera baqui miʼ ñumel jiñi tren. Yaʼ ti señal miʼ yʌl: «WAʼI, QʼUELE, ÑɅCHʼTAN». Miʼ yʌjqʼuel chaʼan jiñi carro tac maʼañic miʼ jajtsʼel ti juncojt tren wen ajñel bʌ woli (choncol) i tilel. Ili señal tac an i colta cabʌl wiñicob xʼixicob (quixtañujob).

² Jehová an chuqui ñumen wem bʌ miʼ yʌqʼueñonla chaʼan miʼ coltañonla, i maʼañic mi lac taj wocol yicʼot lac sʌt laj cuxtʌlel. Miʼ yʌqʼueñonla ticʼojel tac muʼ bʌ i coltañonla lac taj laj cuxtʌlel maʼañic bʌ miʼ jilel. Lajalʌch bajcheʼ uts bʌ xcʌnta tiñʌmeʼ muʼ bʌ i pʌsben i bijlel i tiñʌmeʼ baqui maʼañic wocol (pejcan Isaías 30:21).

 3. ¿Chucoch mi lac chʌmel?

³ Cʼʌlʌl tiʼ tejchibal, Jehová an i yʌqʼue ticʼojel i wiñicob. Jumpʼejl ejemplo, yaʼ ti tʼojol jax bʌ pʌcʼʌbʌl i cʼabaʼ Edén tsiʼ yʌcʼʌ mandar chaʼan jiñi quixtañujob tijicña miʼ chumtʌlob i maʼañic miʼ chʌmelob (Génesis 2:15-17). Pero Adán yicʼot Eva maʼañic tsiʼ jacʼʌyob. Eva tsiʼ jacʼbe i tʼan jiñi lucum, Adán tsiʼ jacʼbe i tʼan Eva. Cheʼ bajcheʼ jiñi, tiʼ chaʼticlelob tsiʼ yilayob wocol yicʼot maʼañobix i pijtaya tsaʼ chʌmiyob. Tiʼ caj i ñusatʼañob, ti lac pejtelel mi lac chʌmel.

 4. a) ¿Chucoch tsaʼ ajqʼui tsijib mandar cheʼ bʌ tsaʼix ñumi jiñi colem Butʼjaʼ? b) ¿Chuqui miʼ coltañonla lac chʼʌmben isujm ili tsijib mandar?

⁴ Cheʼ bʌ ñumeñix cabʌl jab, Jehová tsiʼ sube chuqui yom miʼ mel Noé chaʼan miʼ tajob i coltʌntel. Cheʼ bʌ ñumeñix jiñi colem Butʼjaʼ, Dios tsiʼ sube jiñi quixtañujob chaʼan maʼañic miʼ cʼuxob yicʼot miʼ japob chʼichʼ. ¿Chucoch? Come muqʼuix caj i mejlel i cʼuxob weʼel. Tsaʼ ajqʼui tsijib mandar tac come an chuqui tsijib tac bʌ tsaʼ caji. Jin chaʼan tsiʼ subeyob: «Pero mach laʼ cʼux yicʼot i chʼichʼel come ticʼbil» (Génesis 9:1-4). Ili mandar tac miʼ coltañonla lac chʼʌmben isujm bajcheʼ yilal miʼ qʼuel laj cuxtʌlel Jehová. Come jiñʌch tsiʼ meleyonla, an tiʼ wenta laj cuxtʌlel. Jin chaʼan, jiñʌch miʼ mejlel i subeñonla chuqui yom mi lac mel chaʼan laj cuxtʌlel o chuqui mach bʌ yomic mi lac mel. Jumpʼejl ejemplo, tsiʼ yʌlʌ chaʼan mach yom mi lac chaʼlen tsʌnsa. Dios chʼujul miʼ qʼuel jiñi cuxtʌlel yicʼot jiñi chʼichʼ, yicʼot miʼ yʌqʼuen i toj i mul jiñi maʼañic bʌ miʼ qʼuel ti ñuc (Génesis 9:5, 6).

 5. a) ¿Chuqui mi caj laj qʼuel ti ili temaj? b) ¿Bajcheʼ mi caj i coltañonla ili estudio?

⁵ Cheʼ bʌ chʌmeñix Noé, Dios maʼañic tsiʼ cʌyʌ i pʌsben bij i tejclum. Ti ili temaj mi caj laj qʼuel bajcheʼ tsiʼ mele. Cheʼ jaʼel, mi caj i coltañonla lac tsajcan i ticʼojel Jehová i mi lac chʌn ajñel ti jiñi bij muʼ bʌ i pʌyonla majlel ti tsijiʼ bʌ pañimil (mulawil).

 6. a) ¿Chucoch yomʌch miʼ jacʼob jiñi mandar tsaʼ bʌ aqʼuenti Moisés jiñi israelob? b) ¿Chuqui yom miʼ melob chaʼan miʼ yʌqʼuentelob bendición ti Dios?

⁶ Cheʼ tiʼ yorajlel Moisés, Jehová tsiʼ yʌqʼue wen tsiquil tac bʌ mandar jiñi i wiñicob chaʼan bajcheʼ yilal yomob yicʼot bajcheʼ yom miʼ chʼujutesañob. ¿Chucoch? Come an chuqui tac tsaʼ chaʼ qʼuextʌyi. Ñumen ti 200 jab tsaʼ ajñiyob bajcheʼ xyaj eʼtelob (troñelob) jiñi israelob yaʼ ti Egipto. Jiñi egiptojob cabʌl chuqui tsiʼ meleyob tsaʼ bʌ i yʌcʼʌ ti tsʼaʼlentel Dios, cheʼ bajcheʼ i chʼujutesʌntel chʌmeñoʼ bʌ yicʼot diosteʼ tac. Cheʼ bʌ jiñi israelob tsaʼ loqʼuiyob ti Egipto, tsaʼ aqʼuentiyob tsijib tac bʌ mandar. Jumpʼejlix tejclum cojach bʌ mi caj i jacʼbeñob i Mandar Moisés. Jiñi wen yujiloʼ bʌ, miʼ yʌlob chaʼan jiñi tʼan «mandar» ti hebreo, yom i yʌl «pʌs bij» o «acʼ ticʼojel». Jiñi i Mandar Moisés tsiʼ cʌnta chaʼan jiñi israelob maʼañic miʼ yajlelob ti tsʼiʼlel yicʼot ti jiñi muʼ bʌ i mel jiñi ñopbalʌl tac yaʼ ti lʌcʼʌl tac bʌ tejclum. Mi jiñi israelob yomob chaʼan Dios miʼ yʌqʼueñob i bendición, cʼʌñʌl miʼ jacʼbeñob i tʼan. Mi mach cheʼic miʼ melob, miʼ tajob tsʌts tac bʌ wocol (pejcan Deuteronomio 28:1, 2, 15).

 7. a) ¿Chuqui yambʌ i sujmlel cheʼ Jehová tsiʼ yʌqʼueyob tsijib tac bʌ mandar jiñi israelob? b) ¿Chucoch mi la cʌl chaʼan jiñi Mandar jiñʌch tsaʼ bʌ i colta jiñi israelob?

⁷ Pero añʌch yambʌ i sujmlel cheʼ tsaʼ aqʼuentiyob tsijib mandar tac jiñi israelob. Jiñi i Mandar Moisés tsiʼ chajpayob chaʼan baqui ora miʼ cʼotel jiñi Mesías, Jesucristo. Ili ñuc i cʼʌjñibal chaʼan chuqui ñaʼtʌbil bʌ i chaʼan Jehová. Jiñi mandar tsiʼ cʼajtesʌbeyob chaʼan xmulilob. Tsiʼ coltayob i chʼʌmbeñob isujm jaʼel chaʼan i cʼʌjñibal i chaʼañob jiñi i tojol mulil, yom i yʌl, chaʼan miʼ yʌjqʼuel jumpʼejl cuxtʌlel toj bʌ muʼ bʌ i jisʌbeñob i mul tiʼ pejtelel ora (Gálatas 3:19; Hebreos 10:1-10). Yicʼot jaʼel, jiñi mandar tsiʼ cʌnta jiñi familia baqui mi caj i tilel jiñi Mesías. Cheʼ bʌ tsaʼ cʼoti jiñi Mesías, jiñi mandar tsiʼ colta jiñi israelob chaʼan miʼ mejlelob i cʌn. Jin chaʼan, jiñi Biblia miʼ yʌl chaʼan jiñi mandar jiñʌch tsaʼ bʌ jumucʼ ajñiyob tiʼ wenta o tsaʼ bʌ i coltayob chaʼan miʼ cʼotel i cʌñob jiñi Cristo (Gálatas 3:23, 24).

 8. ¿Chucoch yom mi lac wen ñaʼtan jiñi principio tac baqui chucul jiñi i Mandar Moisés?

⁸ Jiñi xñoptʼañonbʌla miʼ mejlel lac taj lac wenlel ti jiñi mandar tac tsaʼ bʌ aqʼuenti Moisés ti Jehová. ¿Bajcheʼ? Lajal bajcheʼ jiñi ejemplo tsaʼ bʌ laj qʼuele ti ñaxam bʌ párrafo, miʼ mejlel lac wen ñaʼtan ti xucʼul jiñi principio tac baqui chucul jiñi mandar. Anquese mach xicʼbiloñixla chaʼan mi lac jacʼ, an cabʌl principio muʼ bʌ mejlel lac chʼʌm ti ñuc. ¿Chucoch? Come jiñʌch muʼ bʌ caj i coltañonla ti laj cuxtʌlel yicʼot cheʼ mi lac chʼujutesan Jehová. Dios tsiʼ yʌcʼʌ ti tsʼijbuntel jiñi i Mandar Moisés yaʼ ti Biblia chaʼan mi laj cʌn yicʼot miʼ tojʼesañonla jiñi i principio tac. Miʼ mejlel la cʌqʼuen wocolix i yʌlʌ Jesús chaʼan jiñi ñumen ñuc bʌ tsiʼ cʌntesayonla, mach bʌ cheʼic bajcheʼ i Mandar Moisés. Jumpʼejl ejemplo, yom mi lac jacʼ i ticʼojel Jesús: «Tsaʼix laʼ wubi tsaʼ bʌ ajli: ‹Mach maʼ chaʼlen tsʼiʼlel›. Pero joñon mic subeñetla, majqui jach miʼ qʼuel xʼixic tiʼ colosojlel [tsuculel] i pusicʼal tsaʼix i chaʼle tsʼiʼlel tiʼ pusicʼal yicʼot». Jiñi i Mandar Moisés tsiʼ yʌlʌ chaʼan juntiquil ñujpuñem bʌ mach yomic miʼ piʼlen yambʌ mach bʌ jiñic ñujpuñem yicʼot. Pero Jesús tsiʼ yʌlʌ chaʼan yom mi lac choc loqʼuel jiñi bibiʼ tac bʌ ti lac pusicʼal yicʼot mach bʌ weñic lac pensar (Mateo 5:27, 28).

 9. ¿Chucoch i cʼʌjñibalʌch cheʼ tsiʼ ñumen acʼʌ yambʌ mandar tac Jehová?

⁹ Cheʼ bʌ Jesús tsaʼix ochi bajcheʼ Mesías, Jehová tsiʼ yʌcʼʌ tsijib mandar tac yicʼot cabʌl to chuqui tsiʼ chaʼ acʼʌ ti cʌjñel chaʼan bajcheʼ miʼ caj ti tsʼʌctiyel chuqui ñaʼtʌbil i chaʼan. ¿Chucoch tsiʼ mele? Come tsaʼ chaʼ qʼuextʌyi bajcheʼ yilal an i tejclum Dios. Cheʼ ti jabil 33, Dios maʼañix tsiʼ qʼuele ti utsʼat jiñi tejclum Israel i tsiʼ yajca bajcheʼ i tejclum jiñi xñoptʼañoʼ bʌ ti jumpʼejl congregación.

10. a) ¿Chucoch i cʼʌjñibal i chaʼañob tsijib mandar jiñi xñoptʼañob? b) ¿Chucoch mach lajalic jiñi i Mandar Moisés yicʼot i mandar Cristo?

¹⁰ Tsaʼix laj qʼuele, Jehová tsiʼ yʌqʼue i Mandar Moisés chaʼan jiñi israelob miʼ ñaʼtañob bajcheʼ yom miʼ chumtʌlob yicʼot bajcheʼ miʼ chʼujutesañob. Cheʼ bʌ Jesús tsaʼix tili ti Pañimil, Jehová tsiʼ yʌcʼʌ yambʌ ticʼojel tac yicʼot tsijib mandar tac. ¿Chucoch? Come ti jiñi bʌ ora, jiñi i wiñicob mach cojach ti jumpʼejl tejclum mi caj i loqʼuelob, ti cabʌlix tejclum yicʼot cultura mi caj i tilelob. Wʌle jiñix i tejclum jiñi chʼujul bʌ israelob. Ili jiñobʌch jiñi xñoptʼañoʼ bʌ ti jumpʼejl congregación yicʼot muʼ bʌ caj i yochelob ti jiñi tsijiʼ bʌ trato. Cheʼʌch tsiʼ pʌsʌ Dios chaʼan «junlajal miʼ qʼuel winicob». Tsiʼ pʌsʌ chaʼan maʼañic majqui miʼ tsʼaʼlen, miʼ chʼʌm tiʼ pejtelel muʼ bʌ i jacʼben i tʼan yicʼot miʼ mel chuqui toj, anquese mach junlajalic baqui chʼoyolob (Hechos 10:34, 35). Jiñi tsijib congregación tsiʼ jacʼbeyob «i mandar Cristo». Ili mandar mach lajalic bajcheʼ i Mandar Moisés. ¿Chucoch? Come loqʼuem ti principio tac mach bʌ tsʼijbubilic ti xajlel (tun), tsʼijbubil tiʼ pusicʼal jujuntiquil xñoptʼan. Ili mandar mi caj i tojʼesan yicʼot i coltan tiʼ pejtelel i wiñicob Dios anquese mach junlajalic baqui chʼoyolob (Gálatas 6:2).

11. ¿Chuqui jiñi chaʼchajp yaʼ bʌ ochem yaʼ ti «i mandar Cristo»?

¹¹ Jiñi israelob tsiʼ wen tajayob i wenlel chaʼan «i mandar Cristo». Cheʼ bʌ lʌcʼʌlix chaʼan miʼ mejlel jiñi tsijiʼ bʌ trato, Jesús tsiʼ yʌcʼʌ chaʼpʼejl mandar ñuc bʌ i cʼʌjñibal. ¿Baqui bʌ? Ñaxam bʌ jiñʌch jiñi subtʼan. Jiñi yambʌ jiñʌch chaʼan bajcheʼ yom miʼ qʼuelob i bʌ jiñi xñoptʼañob. Come i chaʼañʌch tiʼ pejtelel xñoptʼañob ili mandar tac, yom mi lac jacʼ ti lac pejtelel anquese ti panchan woli (yʌquel) lac pijtan chumtʌl o wʌʼ ti Pañimil.

12. ¿Chucoch miʼ mejlel la cʌl chaʼan tsijib to jiñi subtʼan?

¹² Ti wajali, cheʼ bʌ juntiquil mach bʌ israelic yom i melben i yeʼtel Jehová, jin yom miʼ majlel i sʌclan jiñi tejclum Israel (1 Reyes 8:41-43). Pero Jesús tsiʼ sube chaʼan jiñix jiñi xcʌntʼañob i chaʼan yom bʌ miʼ majlelob i sʌclan jiñi quixtañujob (pejcan Mateo 28:19, 20). Ti jiñi qʼuiñijel chaʼan Pentecostés ti jabil 33, Jehová tsiquil tsiʼ yʌlʌ chaʼan yom miʼ majlelob ti subtʼan jiñi i wiñicob tiʼ pejtelel pañimil. Ti jiñi qʼuin, tsaʼ aqʼuentiyob chʼujul bʌ espíritu cheʼ bʌ 120 xcʌntʼañob ti jiñi tsijiʼ bʌ congregación. Cheʼ jiñi, tsaʼ cajiyob ti subtʼan ti cabʌl tʼan tac tiʼ tojlel judíojob yicʼot mach bʌ judíojob, chʼoyoloʼ bʌ ti yan tac bʌ país tsaʼ bʌ sujtiyob ti judío (Hechos 2:4-11). Ti wiʼil, tsaʼ subentiyob jiñi samaritanojob. Cheʼ ti jabil 36 jiñi wen tʼan tsaʼ subentiyob jiñi mach bʌ judíojob. Wen tsiquil chaʼan jiñi xñoptʼañob yom miʼ subob jiñi wen tʼan tiʼ pejtelel pañimil.

13, 14. a) ¿Chuqui yom mi lac mel chaʼan mi lac tsʼʌctesan jiñi «tsijib mandar» tsaʼ bʌ i yʌcʼʌ Jesús? b) ¿Chuqui tsiʼ cʌntesayonla Jesús chaʼan tsaʼ bʌ i mele?

¹³ Jesús tsiʼ yʌcʼʌ «tsijib mandar» jaʼel chaʼan bajcheʼ yom mi laj qʼuel lac bʌ jiñi xñoptʼañonbʌla (pejcan Juan 13:34, 35). Isujm chaʼan ti jujumpʼejl qʼuin yom mi lac pʌsben cʼuxbiya la quermañojob. Pero ti jumpʼejl lac pusicʼal yom mi la cʌcʼ lac tʼan chaʼan mi la cʌcʼ laj cuxtʌlel tiʼ tojlelob. Ili mandar maʼañic yaʼ tiʼ Mandar Moisés (Mateo 22:39; 1 Juan 3:16).

¹⁴ Jesús jiñʌch wem bʌ ejemplo chaʼan tsaʼ bʌ i cʼuxbi yambʌyob ñumento bajcheʼ i bʌ. Tsiʼ wen cʼuxbi xcʌntʼañob i chaʼan, jin chaʼan ti jumpʼejl i pusicʼal tsiʼ yʌcʼʌ i cuxtʌlel tiʼ tojlelob. Jesús miʼ pijtan chaʼan ti jumpʼejl lac pusicʼal yom mi la cʌcʼ lac bʌ chaʼan mi la quilan wocol o tajol chaʼan mi la cʌcʼ laj cuxtʌlel tiʼ tojlel la quermañojob (1 Tesalonicenses 2:8).

15, 16. a) ¿Bajcheʼ woliʼ pʌsben bij i tejclum Dios ili ora? b) ¿Bajcheʼ yilal bʌ qʼuin añonla ili ora?

¹⁵ Ili ora, Jesús tsiʼ waʼchoco jiñi «xucʼul bʌ xʼeʼtel am bʌ cabʌl i ñaʼtʌbal» chaʼan miʼ yʌqʼueñob chʼujul bʌ bʌlñʌcʼʌl jiñi xcʌntʼañob i chaʼan «cheʼ tiʼ yorajlel» (Mateo 24:45-47). Ti ili bʌlñʌcʼʌl yaʼʌch ochem jiñi ticʼojel tac ñuc bʌ i cʼʌjñibal miʼ yʌqʼuen Dios i tejclum cheʼ bʌ an chuqui miʼ qʼuextʌyel. ¿Bajcheʼ yilal bʌ qʼuin añonla ili ora?

¹⁶ Ili ora chumulonla «ti cojix bʌ qʼuin tac». Mach jalix mi caj lac chumtan cabʌl wocol bajcheʼ maʼañic bʌ ñusʌbil lac chaʼan (2 Timoteo 3:1; Marcos 13:19). Satanás yicʼot i xibajob tsaʼix chojquiyob loqʼuel ti panchan i choncol i yʌcʼob wocol wʌʼ ti Pañimil (Apocalipsis 12:9, 12). Cheʼ jaʼel, woli lac chʼujbin i mandar Jesús chaʼan mi lac chaʼlen subtʼan tiʼ pejtelel pañimil. Ñumen cabʌl quixtañu woli lac suben jiñi wen tʼan yicʼot ti cabʌlix tʼan tac.

17, 18. ¿Chuqui yom mi lac mel cheʼ bʌ mi la cʌqʼuentel ticʼojel tac?

¹⁷ Cabʌl eʼtijibʌl miʼ yʌqʼueñonla i yorganización Dios chaʼan mi lac mejlel ti subtʼan. ¿Woli ba laj cʼʌn ti utsʼat? Yaʼ ti tempa bʌ tac mi la cʌqʼuentel ticʼojel tac chaʼan mi laj cʼʌn ti utsʼat jiñi eʼtijibʌl tac. ¿Muʼ ba lac jacʼ jiñi ticʼojel tac tilem bʌ ti Jehová?

¹⁸ Mi la com i bendición Dios, yom mi lac jacʼ tiʼ pejtelel muʼ bʌ i subeñonla tiʼ tojlel i congregación. Mi mucʼʌch lac jacʼ, cheʼʌch mi caj lac mel jeʼel ti jiñi ñuc bʌ wocol, cheʼ bʌ miʼ jisʌntel i pañimil Satanás (Mateo 24:21). Ti wiʼil, mi caj i chaʼ cʼʌjñibʌyel lac chaʼan tsijib tac bʌ mandar chaʼan mi lac chumtʌl yaʼ ti tsijiʼ bʌ pañimil, cheʼ jilemix Satanás.

19, 20. a) ¿Chuqui ti «jun tac» mi caj i yʌcʼ Jehová? b) ¿Chuqui miʼ caj ti ujtel cheʼ bʌ miʼ jajmel tsijib jun tac?

¹⁹ Ti wajali, Jehová tsiʼ yʌqʼue jiñi israelob i Mandar Moisés. Ti wiʼil, jiñi xñoptʼañoʼ bʌ ti jumpʼejl congregación tsiʼ yʌqʼueyob «i mandar Cristo». Yaʼ ti tsijiʼ bʌ pañimil, Jehová mi caj i yʌqʼueñonla «jun tac» am bʌ i chaʼan tsijib tac bʌ mandar (pejcan Apocalipsis 20:12). Ili jun tac tajol jiñʌch baqui mi caj i chʼʌm tilel i mandar tac Jehová yom bʌ chaʼan mi lac jacʼ ti jiñi bʌ ora. ¿Chuqui mi caj i yujtel cheʼ bʌ miʼ jajmel jiñi tsijib jun tac? Cheʼ bʌ joñonla yicʼot jiñi muʼ bʌ caj i chaʼ tejchelob mi caj lac pejcan jiñi jun, mi caj lac ñaʼtan chuqui yom Dios mi lac mel. Ti lac pejtelel mi caj lac ñumen chʼʌmben isujm chuqui miʼ ñaʼtan Jehová. Come mi caj lac ñumen chʼʌmben isujm jiñi Biblia, mi caj lac ñumen cʼuxbin lac bʌ yicʼot mi caj lac ñumen qʼuel lac bʌ ti ñuc (Isaías 26:9). Cheʼ bʌ jiñix woliʼ yumañonla lac Rey Jesucristo, ¿muʼ ba mejlel lac ñaʼtan bajcheʼ cʼamel mi caj laj cʌn yicʼot mi caj lac chaʼlen cʌntesa yaʼ ti Paraíso?

²⁰ Mi mucʼʌch lac jacʼ jiñi mandar tac tsʼijbubil bʌ ti jiñi «jun tac» yicʼot xucʼulonla ti Jehová ti jiñi cojix bʌ wocol, mi caj i tsʼijbun laj cʼabaʼ ti jiñi «jun baʼ tsʼijbubil i cʼabaʼob añoʼ bʌ i cuxtʌlel». Jiñi cuxtʌlel maʼañic bʌ i jilibal mucʼʌch i mejlel lac taj. Jin chaʼan yom mi lac pejcan i tʼan Dios, mi lac chʼʌmben isujm yom bʌ i yʌl yicʼot mi lac jacʼ jiñi i mandar tac. Mi cheʼʌch mi lac mel, cuxul mi caj lac ñumel ti jiñi ñuc bʌ wocol yicʼot tiʼ pejtelel ora mi caj lac bej cʌn i chaʼan bʌ Dios ti lac tijicñʌyel (Eclesiastés 3:11; Romanos 11:33).