Loqʼuemonla ti mulil chaʼan i yutslel i pusicʼal Dios

1, 2. ¿Bajcheʼ miʼ coltañonla Romanos 5:12?

ROMANOS 5:12 miʼ yʌl: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel». Ili versículo wen laj cʌñʌ come jiñʌch muʼ bʌ laj cʼʌn cheʼ an majqui woli (choncol) lac pʌsben muʼ bʌ i yʌl jiñi Biblia.

² Yaʼ ti libro ¿Chuqui miʼ cʌntesañonla tiʼ sujmlel jiñi Biblia? miʼ wen cʼʌjñel ili versículo. Tajol cheʼ bʌ woli (yʌquel) laj qʼuel jiñi cʌntesʌntel 3, 5 yicʼot 6 la quicʼot la calobilob o yambʌlob, mi lac pejcʌbeñob Romanos 5:12. Mi lac pʌsbeñob chaʼan miʼ chʼʌmbeñob isujm chucoch mach paraísojic ili Pañimil, chucoch i cʼʌjñibalʌch i tojol jiñi mulil yicʼot chucoch mi lac chʌmel (sajtel). Pero ili versículo miʼ coltañonla ti lac pejtelel chaʼan mi lac ñumen qʼuel ti ñuc bajcheʼ añonla la quicʼot Jehová. Cheʼ jaʼel, miʼ mejlel i coltañonla lac jacʼben i tʼan Jehová ti jumpʼejl lac pusicʼal yicʼot mi lac chʌn pijtan jiñi albil bʌ i chaʼan.

 3. ¿Chuqui yom mi laj cʼajtesan ti lac pejtelel?

³ Yom mi laj cʼajtesan chaʼan xmulilonla yicʼot ti jujumpʼejl qʼuin mi lac taj lac sajtemal. Jehová yujil iliyi, pero miʼ pʼuntañonla yicʼot yom i ñusʌbeñonla lac mul (Salmo 103:13, 14). Jesús tsiʼ yʌlʌ chaʼan yom mi laj cʼajtiben Dios i ñusʌntel lac mul (Lucas 11:2-4). Mi tsaʼ lac chaʼle mulil ti wajali, pero mi tsaʼix i ñusʌbeyonla Jehová, mach yomix mi lac chʌn ñaʼtan. ¿Chucoch miʼ mejlel i ñusan lac mul Jehová? Laʼ laj qʼuel.

4, 5. a) ¿Chuqui miʼ coltañonla lac ñaʼtan chucoch mucʼʌch i mejlel i ñusʌbeñonla lac mul Jehová? b) ¿Chuqui yom i yʌl jiñi tʼan «i yutslel i pusicʼal»?

⁴ Jiñi carta chaʼan Romanos, ñumento yaʼ ti capítulo 6, miʼ coltañonla lac ñaʼtan chucoch miʼ mejlel i ñusan lac mul Jehová. Jiñi apóstol Pablo tiʼ tsictesa yaʼ ti Romanos 3:23, 24 chaʼan luʼ xmulilonla, i tsiʼ yʌlʌ: «Dios miʼ yotsañob tiʼ wenta chaʼan jach i yutslel i pusicʼal. Miʼ ñusʌbeñob i mul tiʼ majtan jach, come Cristo Jesús tsiʼ mʌñʌyob chaʼan miʼ yʌcʼob ti colel». Cheʼ bʌ Pablo tsiʼ yʌlʌ «i yutslel i pusicʼal» Dios, tsiʼ yʌcʼʌ ti ñaʼtʌntel chaʼan wen utsʼat chuqui tsiʼ mele ti lac tojlel i maʼañic tsiʼ pijta chaʼan mi lac chaʼ sutqʼuiben, jiñʌch mach bʌ i wentʌlelic mi la cʌqʼuentel o mi lac taj.

⁵ Juntiquil wen yujil bʌ miʼ yʌl chaʼan cheʼ bʌ jiñi Biblia miʼ yʌl chaʼan i yutslel i pusicʼal Dios o Cristo, lʌcʼʌ tiʼ pejtelel ora miʼ taj ti tʼan melbil bʌ i chaʼañob chaʼan miʼ locʼsañonla ti mulil yicʼot chʌmel. Jin chaʼan, yaʼ ti Traducción del Nuevo Mundo miʼ yʌl «i yutslel Dios mach bʌ i wentʌlel mi lac taj». Laʼ laj qʼuel chuqui melbil i chaʼan Dios ti lac tojlel yicʼot bajcheʼ miʼ coltañonla ili ora jiñi i yutslel i pusicʼal yicʼot miʼ yʌqʼueñonla lac pijtaya chaʼan ti talto bʌ qʼuin.

 6. ¿Majqui miʼ mejlelob i taj i wenlel chaʼan i yutslel i pusicʼal Dios, i chuqui miʼ tajob?

⁶ xMulilonla ti lac pejtelel yicʼot mi lac chʌmel tiʼ mul Adán. Jin chaʼan, jiñi Biblia miʼ yʌl chaʼan tiʼ caj i ñusatʼan «juntiquil winic», Adán, tsaʼ tejchi jiñi chʌmel. Pero Jehová tsiʼ pʌsʌ i yutslel i pusicʼal yicʼot tsiʼ yʌcʼʌ i tojol jiñi mulil chaʼan miʼ coltan tiʼ pejtelel wiñicob xʼixicob (quixtañujob), tsiʼ yʌcʼʌ «juntiquil, jiñʌch Jesucristo» (Romanos 5:12, 15, 17). Chaʼan i yutslel i pusicʼal Dios, ti lac pejtelel mi lac mejlel lac taj lac wenlel. Cabʌlob miʼ mejlelob ti qʼuejlel ti toj yicʼot miʼ mejlelob ti chumtʌl tiʼ pejtelel ora come Jesucristo tsiʼ jacʼʌ tʼan (Romanos 5:19, 21).

 7. ¿Chucoch jumpʼejlʌch majtañʌl mach bʌ i wentʌlelic miʼ yʌqʼueñonla Dios jiñi i tojol mulil?

⁷ I tojol jiñi mulil jiñʌch jumpʼejl majtañʌl muʼ bʌ i yʌqʼueñonla Dios chaʼan i yutslel mach bʌ i wentʌlelic miʼ yʌqʼueñonla. Laʼ cu lac ñaʼtan: Jehová tsiʼ wen pʌsʌ i yutslel cheʼ bʌ tsiʼ yʌcʼʌ bajcheʼ mi lac mejlel ti loqʼuel ti mulil yicʼot chʌmel. Dios maʼañic chucoch yom tsiʼ yʌcʼʌ i Yalobil bajcheʼ i tojol jiñi mulil. Cheʼ jaʼel, tsaʼ bʌ i mele Jehová yicʼot Jesús chaʼan mi lac taj i ñusʌntel lac mul yicʼot mi lac chumtʌl tiʼ pejtelel ora, mach i wentʌlelic mi lac taj. Chaʼan miʼ qʼuel mi mucʼʌch la cʌqʼuen wocolix i yʌlʌ Dios, yom mi lac pʌs ti bajcheʼ chumulonla.

 8. ¿Chuqui mach bʌ yomic mi lac ñaʼtan?

⁸ La cujil chaʼan Dios mucʼʌch i ñusʌbeñonla lac mul, jinto jiñi ñumen tsʌts bʌ jaʼel. Pero maʼañic ba ora yom mi lac ñaʼtan chaʼan mi lac mejlel ti mulil i maʼañic chuqui mi caj lac chaʼlen come Dios wen an i yutslel i mi caj i ñusʌbeñonla. An xñoptʼañob cheʼ bʌ tsiʼ ñaʼtayob ti jiñi ñaxam bʌ siglo, anquese anto apóstolob cuxuloʼ bʌ ti jiñi bʌ ora (pejcan Judas 4). Yom tsajilonla jeʼel ili ora chaʼan maʼañic majqui miʼ xucʼu xucʼul qʼuextan majlel lac pensar.

9, 10. ¿Chucoch tsiʼ yʌlʌ Pablo yicʼot yambʌ xñoptʼañob chaʼan chʌmeñobix tiʼ chaʼan bʌ mulil?

⁹ Pablo tsiʼ sube jiñi xñoptʼañob chaʼan mach utsʼatic cheʼ miʼ ñaʼtañob chaʼan mi caj i ñusʌbentelob chuqui tac miʼ melob. Tsiʼ subeyob chaʼan mach cheʼic yom miʼ ñaʼtañob, tsiʼ yʌlʌ: «Jilemix i pʼʌtʌlel mulil ti lac tojlel [«chʌmeñoñixla tiʼ chaʼan bʌ mulil», TNM]» (pejcan Romanos 6:1, 2). ¿Chuqui yom i yʌl jiñi Pablo?

¹⁰ Dios tsiʼ cʼʌñʌ i tojol jiñi mulil chaʼan miʼ ñusʌben i mul Pablo yicʼot yambʌ xñoptʼañob cheʼ ti ñaxam bʌ siglo. Jehová tsiʼ boñoyob ti chʼujul bʌ espíritu chaʼan miʼ sujtelob tiʼ yalobil. Mi xucʼul miʼ yajñelob, miʼ majlelob ti panchan yicʼot miʼ tem chaʼleñob yumʌntel yicʼot Cristo. Pero ¿chucoch tsiʼ yʌlʌ Pablo chaʼan chʌmeñobix tiʼ chaʼan bʌ mulil cheʼ wʌʼto añob ti Pañimil? Come tsiʼ junyajlel qʼuextayob bajcheʼ chumulob. Pablo tsiʼ taja ti tʼan Jesús chaʼan miʼ tsictesan ili. Tsiʼ yʌlʌ chaʼan Jesús maʼañix miʼ chʌn mejlel ti chʌmel come ti espíritujix tsaʼ chʼojyi. Lajal jaʼel jiñi xñoptʼañob, tsaʼ chʌmiyob «tiʼ chaʼan bʌ mulil», pero cuxulob chaʼan miʼ ñuqʼuesañob Dios ti Cristo Jesús (Romanos 6:9, 11). Tsiʼ qʼuextayob bajcheʼ chumulob come maʼañix tsiʼ yʌcʼʌyob chaʼan jiñi mulil miʼ yajñel tiʼ tojlelob. Tsaʼ cajiyob ti wersa chaʼan miʼ melob muʼ bʌ i mulan Dios.

11. ¿Bajcheʼ an i sujmlel cheʼ chʌmeñoñixla tiʼ chaʼan bʌ mulil?

¹¹ Ixcu joñonla, ¿bajcheʼ an i sujmlel cheʼ «chʌmeñoñixla tiʼ chaʼan bʌ mulil»? Tajol cabʌl mach bʌ weñic tsaʼ lac mele ti ñaxan come maxto la cujilic bajcheʼ yilal miʼ qʼuel Jehová. Chuculontola ti mulil (Romanos 6:19, 20). Pero cheʼ tsaʼ laj cʌñʌ yaʼ ti Biblia bajcheʼ yom Dios mi lac chumtʌl, tsaʼ lac chaʼle wersa lac tojʼesan, tsaʼ la cʌcʼʌ lac bʌ tiʼ tojlel yicʼot tsaʼ lac chʼʌmʌ jaʼ. Tsaʼ lac mulaj lac jacʼben i tʼan Jehová ti jumpʼejl lac pusicʼal i chaʼan mi lac chumtʌl cheʼ bajcheʼ miʼ mulan. Tsaʼ locʼsʌntiyonla ti mulil i tsaʼ ochiyonla tiʼ wiñic Dios chaʼan mi lac jacʼ chuqui toj (Romanos 6:17, 18).

12. ¿Chuqui jiñi yom bʌ mi lac ñaʼtan?

¹² Pablo tsiʼ yʌlʌ: «Mach mi laʼ yuman mulil ti laʼ bʌcʼtal yujil bʌ chʌmel, ame laʼ jacʼben i colosojlel laʼ pusicʼal» (Romanos 6:12). Jin chaʼan, yom mi lac ñaʼtan mi jin mi caj lac mel chuqui bibiʼ bʌ miʼ tilel ti lac pensar, o mi mucʼʌch caj lac ticʼ lac bʌ. Laʼ laj cʼajtiben lac bʌ: «¿Muʼ ba cʌcʼ chaʼan miʼ ñumen colel jiñi mach bʌ weñic miʼ tilel tic pensar i cheʼʌch miʼ cʼotel c mel? ¿O ti orajach ba mic locʼsan?». Mi mucʼʌch laj qʼuel ti ñuc jiñi i yutslel i pusicʼal Dios, mi caj lac chaʼlen wersa chaʼan utsʼat miʼ qʼuelonla.

13. ¿Baqui bʌ ejemplo tac miʼ pʌsbeñonla chaʼan mucʼʌch i mejlel lac mel chuqui toj?

¹³ Laʼ laj qʼuel tsaʼ bʌ ujti ti Corinto cheʼ ti ñaxam bʌ siglo muʼ bʌ i coltañonla lac ñop chaʼan mucʼʌch i mejlel lac mel chuqui wen. Ti Corinto an xujchʼob, muʼ bʌ i wʌlʌc piʼleñob i bʌ, muʼ bʌ i piʼleñob yambʌ mach bʌ i piʼʌlic, muʼ bʌ i chʼujutesañob diosteʼ tac yicʼot xyʌcʼajelob tsaʼ bʌ i qʼuextayob i melbal yicʼot tsiʼ pocoyob i bʌ cheʼ bʌ tsiʼ cʌñʌyob yicʼot tsiʼ cʼuxbiyob Jehová. Quisintic tsiʼ yubiyob chaʼan tsaʼ bʌ i meleyob (Romanos 6:21; 1 Corintios 6:9-11). Jiñi xñoptʼañob ti Roma yoma lajal tsiʼ meleyob. Pablo tsiʼ subeyob: «Mach mi laʼ wʌcʼ laʼ bʌcʼtal chaʼan miʼ chaʼlen jontolil. Aqʼuen laʼ bʌ Dios, come tejchemetixla chʼojyel ti chʌmel chaʼan miʼ cʼʌjñel laʼ bʌcʼtal tiʼ melol chuqui toj chaʼan mi laʼ ñuqʼuesan Dios» (Romanos 6:13). Pablo yujil chaʼan mucʼʌch i mejlel i melob chuqui toj chaʼan miʼ chʌn tajob i yutslel i pusicʼal Dios.

14, 15. ¿Chuqui tajol mi laj cʼajtiben lac bʌ?

¹⁴ Ili ora cheʼʌch miʼ yujtel jaʼel. An la quermañojob cheʼ bʌ tsiʼ meleyob bajcheʼ jiñi xñoptʼañob ti Corinto. Pero tsiʼ qʼuextayob i melbal cheʼ bʌ tsiʼ cʌñʌyob Jehová, lajal bajcheʼ tsiʼ pocoyob i bʌ. Ti lac pejtelel an chuqui tsaʼ laj cʌyʌ chaʼan utsʼat miʼ qʼuelonla Jehová. Pero laʼ lac chʌn pʌs chaʼan mi la cʌqʼuen wocolix i yʌlʌ chaʼan i yutslel i pusicʼal. ¿Bajcheʼ? Jiñʌch cheʼ mi lac chʌn chaʼlen wersa chaʼan maʼañic miʼ yochel bibiʼ bʌ ti lac pusicʼal yicʼot mi la cʌcʼ lac bʌ tiʼ melol i yeʼtel Jehová.

¹⁵ Isujm, yom mi laj cʌntan lac bʌ chaʼan maʼañic mi lac mel mulil tac bajcheʼ tsaʼ bʌ i mele jiñi añoʼ bʌ ti Corinto. Mach lac ñaʼtan chaʼan miʼ mejlel lac bej mel tsʌts bʌ mulil come Jehová an i yutslel i pusicʼal i miʼ ñusan lac mul. Pero tajol mi laj cʼajtiben lac bʌ: «¿Bajcheʼ yilal yom mij qʼuel jiñi mulil tac mach bʌ wen tsʌtsic miʼ yʌjlel? ¿Muʼ ba caj lac chaʼlen wersa lac jacʼben i tʼan Jehová tiʼ pejtelel?» (Romanos 6:14, 17).

16. ¿Bajcheʼ miʼ pʌs jiñi ejemplo i chaʼan Pablo chaʼan mach cojach yom mi laj cʌy jiñi mulil tac muʼ bʌ i yʌl 1 Corintios 6:9-11?

¹⁶ Laʼ lac ñaʼtan tiʼ tojlel jiñi apóstol Pablo. Tsiʼ yʌlʌ: «Pero winicon, tsucul c pusicʼal. Chuculon tiʼ pʼʌtʌlel mulil». Tsiʼ chaʼ alʌ: «Come maʼanic mic mel chuqui com. Muʼ jach c mel chuqui mic tsʼaʼlen» (Romanos 7:14, 15). Pablo mach jiñic woliʼ mel muʼ bʌ i yʌl 1 Corintios 6:9-11, pero tsiʼ yʌlʌ chaʼan choncol ti mulil. Tsiʼ chaʼle wersa i mel chuqui toj come utsʼat tsiʼ mulaj ajñel tiʼ tojlel Dios (pejcan Romanos 7:21-23). Yom mi lac lajin wem bʌ i melbal yicʼot mi lac chaʼlen wersa lac jacʼben i tʼan Jehová.

17. ¿Chucoch maʼañic mi lac chaʼlen lot?

¹⁷ Jumpʼejl ejemplo, la cujil chaʼan yom mi lac chaʼlen tʼan tiʼ sujmlel mi la com lac melben i yeʼtel Jehová (pejcan Proverbios 14:5 yicʼot Efesios 4:25). Mach cheʼic la com sujtel bajcheʼ Satanás, come «chʼoyol ti xiba pejtelel lot». Laʼ laj cʼajtesan jaʼel chaʼan Ananías yicʼot i yijñam tsaʼ chʌmiyob come tsiʼ chaʼleyob lot. Jin chaʼan maʼañic mi lac chaʼlen lot (Juan 8:44; Hechos 5:1-11). Pero i melol chuqui utsʼat mach cojach yom i yʌl cheʼ maʼañic mi lac chaʼlen lot. Cheʼ mucʼʌch laj qʼuel ti ñuc i yutslel i pusicʼal Dios, tiʼ pejtelel ora mi caj lac mel chuqui utsʼat. Laʼ laj qʼuel.

18, 19. Chaʼan utsʼat mi la cajñel, ¿chuqui mach bʌ yomic mi lac mel?

¹⁸ Chaʼan utsʼat mi la cajñel, an yambʌ mach bʌ yomic mi lac mel. Jumpʼejl ejemplo, Jehová tsiʼ sube jiñi israelob: «Mach laʼ chaʼlen xujchʼ. Mach yomic mi laʼ lotin laʼ piʼʌlob». ¿Chucoch mach yomic miʼ melob bajcheʼ jiñi? Jehová tsiʼ subeyob: «Chʼujul yom mi laʼ wajñel, come joñon chʼujulon» (Levítico 19:2, 11). Cheʼ bʌ an chuqui la com lac mel i mi lac sʌclan yambʌ lac tʼan chaʼan mucʼʌch lac jacʼbentel, mach utsʼatic, anquese tajol mach lotic woliyonla.

¹⁹ Laʼ cu lac ñaʼtan chaʼan juntiquil wiñic miʼ suben i yum ti eʼtel o yambʌ i piʼʌlob ti eʼtel chaʼan seb mi caj i sujtel come mi caj i majlel ti doctor. Pero tiʼ sujm, chaʼan jach yom majlel i julaʼtan i cʌñʌyoʼ bʌ. Tajol ti orajach mi caj i ñumel ti mʌn tsʼac. ¿Utsʼatʌch ba chuqui woliʼ mel? ¿O woli ba i muc i sujmlel? Tiʼ sujm, tsiʼ yʌqʼue i ñop yambʌlob mach bʌ isujmic. An i tajol, jiñi lac piʼʌlob miʼ mucob i sujmlel chaʼan miʼ tajob chuqui yom o chaʼan maʼañic chuqui miʼ tumbentelob. Pero joñonla mi lac jacʼ muʼ bʌ i yʌl Jehová: «Mach yomic mi laʼ lotin laʼ piʼʌlob». La com chaʼan toj yicʼot chʼujul tiʼ wut Dios chuqui mi lac mel (Romanos 6:19).

20, 21. Cheʼ mucʼʌch laj qʼuel ti ñuc i yutslel i pusicʼal Dios, ¿chuqui mi caj lac chaʼlen wersa lac mʌlben?

²⁰ La cujil chaʼan mach yom mi lac piʼlen yambʌ mach bʌ ñujpuñemic la quicʼot, jiñi yʌcʼʌjel yicʼot yambʌ tsʌts tac bʌ mulil. Pero mi mucʼʌch laj qʼuel ti ñuc i yutslel i pusicʼal Dios maʼañic mi caj lac mel yambʌ tac muʼ bʌ i tsʼaʼlen. Mi lac tsʼaʼlen jaʼel jiñi mach bʌ weñic ñusaqʼuin tac, mach cojach jiñi chaʼan bʌ tsʼiʼlel. La cujil chaʼan mulil jiñi qʼuixñijel, pero mi laj cʌntan lac bʌ chaʼan maʼañic mi lac ñumel ti pʼis jinto jʌmjʌmñayix lac jol mi la cubin. Tajol wocolʌch chaʼan miʼ mejlel laj cʌntan lac bʌ ti ili wocol, pero mucʼʌch lac mejlel.

²¹ Laʼ lac chaʼlen wersa chaʼan mi lac jacʼ ili i ticʼojel Pablo: «Mach mi laʼ yuman mulil ti laʼ bʌcʼtal yujil bʌ chʌmel, ame laʼ jacʼben i colosojlel [tsuculel] laʼ pusicʼal» (Romanos 6:12; 7:18-20). Jiñi mulil machʌch mejlic i cʌyonla ti junyajlel. Pero cheʼ mi lac chaʼlen wersa chaʼan maʼañic miʼ mʌlbeñonla, mi lac pʌs chaʼan mucʼʌch laj qʼuel ti ñuc jiñi i yutslel i pusicʼal Jehová yicʼot Jesús ti lac tojlel.

22. ¿Chuqui mi caj lac taj mi mucʼʌch laj qʼuelben ti ñuc i yutslel i pusicʼal Dios?

²² Jehová tsaʼix i ñusʌbeyonla lac mul, i cheʼʌch mi caj i bej mel. Mi lac wen aqʼuen wocolix i yʌlʌ chaʼan i yutslel. Laʼ lac chaʼlen wersa laj cʌy tiʼ pejtelel mach bʌ weñic tiʼ wut Dios, anquese an yambʌlob mach bʌ cheʼic miʼ qʼuelob. ¿Chuqui ti wenlel mi caj lac taj mi cheʼʌch mi lac mel? Pablo miʼ yʌl: «Wʌle locʼsʌbiletixla tiʼ pʼʌtʌlel mulil. I winiquetixla Dios. Woli laʼ taj laʼ sʌqʼuesʌntel yicʼot laʼ cuxtilel mach bʌ anic miʼ jilel» (Romanos 6:22).