Jiñi Diluvio cheʼ ti yorajlel Noé, ¿leyenda jach ba?

Jiñi Diluvio tsaʼʌch ujti. Dios tsiʼ choco tilel chaʼan miʼ jisan jiñi jontoloʼ bʌ. I tiʼ sube Noé chaʼan miʼ mel colem bʌ arca chaʼan maʼañic miʼ chʌmel jiñi mach bʌ jontolobic yicʼot jiñi añimal tac (Génesis 6:11-20). Miʼ mejlel lac ñop chaʼan tsaʼʌch ujti jiñi Diluvio come muʼ bʌ i yʌl jiñi Biblia tilemʌch ti Dios (2 Timoteo 3:16).

• ¿Tsaʼ ba ujti o leyenda jach?

• ¿Chucoch Dios tsiʼ choco tilel jiñi Diluvio?

• ¿Yujiloʼ ba jiñi lac piʼʌlob chaʼan mi caj i tilel jiñi Diluvio?

• ¿Bajcheʼ yila jiñi arca tsaʼ bʌ i mele Noé?

• ¿Bajcheʼ jalel tsaʼ mejli jiñi arca?

• Cuento o leyenda chaʼan jiñi Diluvio

Jiñi Biblia miʼ yʌl chaʼan Noé tsaʼ chumle ila ti lum yicʼot chaʼan tsaʼʌch ujti jiñi Diluvio. Jin chaʼan jiñi Diluvio tiʼ yorajlel Noé mach cuentojic mi leyendajic.

• Jiñi tsaʼ bʌ i tsʼijbuyob jiñi Biblia tsiʼ ñopoyob chaʼan tsaʼʌch chumle Noé. Esdras yicʼot Lucas tsiʼ tajayob ti tʼan Noé bajcheʼ i ñojteʼelob jiñi tejclum Israel, tsiʼ meleyob bajcheʼ iliyi come tsiʼ wen chaʼleyob ti investigar (1 Crónicas 1:4; Lucas 3:36). Mateo yicʼot Lucas tsiʼ tsʼijbuyob jaʼel ti jiñi i Evangelio tsaʼ bʌ i yʌlʌ Jesús chaʼan jiñi Diluvio tiʼ yorajlel Noé (Mateo 24:37-39; Lucas 17:26, 27).

  Cheʼ jaʼel, jiñi xʼaltʼan Ezequiel yicʼot jiñi apóstol Pablo tsiʼ yʌlʌyob chaʼan Noé tsiʼ pʌsʌ wem bʌ ejemplo chaʼan tsiʼ ñopo Dios yicʼot tsiʼ mele chuqui toj (Ezequiel 14:14, 20; Hebreos 11:7). Mi maʼañic tsaʼ chumle Noé ¿am ba i sujmlel cheʼ tsiʼ tajayob ti tʼan jiñi tsaʼ bʌ i tsʼijbuyob jiñi Biblia? Tsiquil chaʼan Noé yicʼot jiñi yambʌ wiñicob xʼixicob tsaʼ bʌ i ñopoyob Dios miʼ mejlel lac lajiñob come tsaʼʌch chumleyob (Hebreos 12:1; Santiago 5:17).

• Jiñi Biblia miʼ yʌl chuqui tac tsaʼ ujti ti jiñi Diluvio. Jiñi relato chaʼan Diluvio maʼañic miʼ tech bajcheʼ jumpʼejl cuento. Jiñi Biblia miʼ yʌl chuqui ti jabil, ti uw yicʼot chuqui ti qʼuin tsaʼ ujti jiñi Diluvio (Génesis 7:11; 8:4, 13, 14). Cheʼ jaʼel, miʼ yʌl bajcheʼ ñojel yicʼot i colemlel jiñi arca tsaʼ bʌ i mele Noé (Génesis 6:15). Jiñi Biblia miʼ pʌs chaʼan jiñi Diluvio tsaʼʌch ujti i mach jumpʼejlic jach leyenda.

Jiñi Biblia miʼ yʌl chaʼan «cabʌlix i jontolil winicob ti pañimil» cheʼ bʌ maxto tili jiñi Diluvio (Génesis 6:5). I jiñi lac piʼʌlob tsiʼ socoyob i bʌ tiʼ wut Dios come wen jontolob yicʼot tsaʼ cajiyob ti tsʼiʼlel (Génesis 6:11; Judas 6, 7).

Jiñi relato miʼ yʌl chaʼan cheʼ tsaʼ ujti jiñi pañimil bajcheʼ iliyi ti caj jiñi jontol bʌ ángelob come tsaʼ jubiyob tilel ila ti pañimil chaʼan miʼ piʼleñob jiñi xʼixicob. Jiñi xʼixicob tsiʼ yʌcʼʌyob i yalobil tsaʼ bʌ cʌjñiyob bajcheʼ nefilim, come i yalobilob ángelob. Ili i yalobilob tsiʼ yʌcʼʌyob cabʌl wocol (Génesis 6:1, 2, 4). Jin chaʼan, Dios tsiʼ jisa jiñi jontol bʌ wiñicob xʼixicob i jin jach tiʼ cʌyʌ jiñi muʼ bʌ i melob chuqui wen (Génesis 6:6, 7, 17).

Yujilobʌch. Dios tiʼ sube Noé chuqui mi caj i yujtel i tiʼ sube chaʼan miʼ mel jiñi arca chaʼan jiñi i familia yicʼot jiñi añimal tac maʼañic miʼ chʌmelob (Génesis 6:13, 14; 7:1-4). Noé tiʼ sube jiñi lac piʼʌlob chaʼan mi caj i jisʌntelob, pero maʼañic tsiʼ ñʌchʼtayob (2 Pedro 2:5). Jiñi Biblia miʼ yʌl: «Maʼañic tsiʼ jacʼʌyob jinto tsaʼ tili jiñi butʼjaʼ i tsaʼ laj misuntiyob» (Mateo 24:37-39).

Jiñi arca lajal bajcheʼ jumpʼejl colem caja am bʌ lʌcʼʌ 133 metro i ñajtlel, 22 metro i xujc yicʼot 13 metro i chanlel. Melbil ti tsʌts bʌ teʼ i tsiʼ boñoyob tiʼ alquitrán o brea tiʼ mal yicʼot tiʼ pat. An i chaʼan uxpʼejl i piso i tsaʼ tʼoxle tac. An jumpʼejl i puertajlel i yaʼ ti jol tocol tac. Tajol bajcheʼ melbil i pam jiñi arca mero buxul chaʼan miʼ jubel jiñi jaʼ (Génesis 6:14-16).

Jiñi Biblia maʼañic miʼ yʌl, pero tsiquil miʼ pʌs chaʼan tajol tsaʼʌch ñumi cabʌl jab chaʼan miʼ yujtel ti mejlel. Cheʼ bʌ tsiʼ yila pañimil jiñi ñaxam bʌ i yalobil Noé an 500 i jabilel i cheʼ bʌ tsaʼ ñumi jiñi Diluvio an 600 i jabilel (Génesis 5:32; 7:6).a

Tajol cheʼ bʌ Dios tiʼ sube Noé chaʼan mi mel jiñi arca tsaʼ ñumi 50 o 60 jab come jiñi i yalobilob ñucobix yicʼot ñujpuñemobix (Génesis 6:14, 18). Mi cheʼʌchi, tsaʼ jalʼa cheʼ bʌ 40 o 50 jab chaʼan miʼ yujtel i melob jiñi arca.