¿Jimba tiʼ caj jiñi taqʼuin cheʼ an cabʌl chuqui mach bʌ weñic?
I jacʼbal muʼ bʌ i yʌcʼ jiñi Biblia
Maʼañic. Jiñi Biblia maʼañic miʼ yʌl chaʼan jiñi taqʼuin mach weñic, mi muqʼuic i yʌl jaʼel chaʼan yaʼ miʼ tilel pejtel chuqui mach bʌ weñic. Miʼ yʌjlel chaʼan «tiʼ caj jiñi taqʼuin miʼ tejchel cabʌl wocol», i jiñi lac piʼʌlob miʼ yʌlob chaʼan cheʼʌch miʼ yʌl jiñi Biblia. Pero ¿i sujmʌch ba jiñi? Mach ñoj cheʼiqui. Jiñi Biblia miʼ yʌl: «Jiñi i cʼuxbintel taqʼuin jiñʌch i wiʼ pejtelel chuqui mach weñic» (1 Timoteo 6:10).
¿Chuqui miʼ yʌl jiñi Biblia chaʼan taqʼuin?
Jiñi Biblia miʼ yʌl chaʼan mi weñʌch mi laj cʼʌn jiñi taqʼuin miʼ mejlel i coltañonla i miʼ cʌntañonla (Eclesiastés 7:11, 12). Cheʼ jaʼel, wen chuqui miʼ yʌl tiʼ tojlel jiñi mach bʌ chʌquic tiʼ chubʌʼan (Proverbios 11:25).
Pero yom cʼajal a chaʼan, jiñi taqʼuin mach jiñic ñaxam bʌ yom maʼ wʌcʼ ti a cuxtʌlel. Hebreos 13:5 miʼ yʌl: «Mach laʼ cʼuxbin taqʼuin, i yom tijicñayetla yicʼot jiñi am bʌ laʼ chaʼan». ¿Chuqui mi laj cʌn? Chaʼan jiñi taqʼuin pʼisbil jach bajcheʼ yom mi laj qʼuel. Muʼ bʌ caj i coltañonla jiñʌch cheʼ tijicñayonla cheʼ an jiñi i cʼʌjñibal bʌ lac chaʼan, bajcheʼ jiñi lac waj, lac bujc yicʼot jiñi la cotot (1 Timoteo 6:8).
¿Chucoch an i wocolel cheʼ mi laj cʼuxbin taqʼuin?
Come jiñi muʼ bʌ i cʼuxbiñob taqʼuin maʼañic mi caj i tajob jiñi cuxtʌlel mach bʌ añic miʼ jilel (Efesios 5:5). Ñaxan, jiñi i cʌlʌx mulʌntel taqʼuin lajalʌch bajcheʼ i chʼujutesʌntel jiñi mach bʌ i sujmic dios (Colosenses 3:5). I chaʼpʼejlel, chaʼan miʼ mejlel i taj taqʼuin jiñi muʼ bʌ i cʌlʌx mulan taqʼuin, mucʼʌch i ñusan ti pʼis i mandar tac Dios. Pero jiñi Proverbios 28:20 miʼ yʌl: «Jini muʼ bʌ i bʌcʼ otsan i bʌ ti rico mi caj i toj i mul». Tajol chaʼan miʼ mejlel i taj, miʼ chaʼlen lot chaʼan miʼ mejlel i xujchʼiben i taqʼuin yambʌlob, miʼ yotsan i bʌ ti jumpʼejl secuestro o miʼ chaʼlen tsʌnsa.
Anquese maʼañic mi lac mel jiñi mach bʌ weñic, jiñi i cʼuxbintel taqʼuin mucʼʌch i yʌqʼueñonla yambʌ wocol tac. Ti 1 Timoteo 6:9 an chuqui muʼ bʌ i subeñonla: «Pero jiñi yomoʼ bʌ sujtel ti rico miʼ yajlelob ti mulil, ti yac tac yicʼot tiʼ mulʌntel chuqui bajñel yomob mach bʌ añic i cʼʌjñibal i muʼ bʌ i mejlel i ticʼlañob».
Jiñi wenlel muʼ bʌ lac taj cheʼ mi lac jacʼ muʼ bʌ i yʌl jiñi Biblia
Mi mucʼʌch laj qʼuel ti ñuc jiñi i mandar tac Dios maʼañic mi caj lac mel mach bʌ weñic chaʼan mi lac taj taqʼuin, cheʼ bajcheʼ jiñi wen jach mi caj la cubin lac bʌ, i Dios tijicña mi caj i qʼuelonla. Dios miʼ yʌcʼ i tʼan mi mucʼʌch a chʼʌm ti ñuc muʼ bʌ i yʌl: «Maʼañic baʼ ora mi caj j cʌyet i maʼañic baʼ ora mi caj j cʌy j coltañet» (Hebreos 13:5, 6). I cheʼ jaʼel miʼ yʌl: «Jini toj bʌ mi caj i yutsi taj i wenlel» (Proverbios 28:20).