An lac piʼʌlob wocol bʌ miʼ yubiñob chaʼan miʼ cʼuxbiñob Dios, come miʼ ñaʼtañob chaʼan mach i wentajoñicla yicʼot jontol. Laʼ laj qʼuel chuqui an i yʌlʌyob chaʼtiqui uxtiquilob:

• «Anquese mij cʼajtiben Dios chaʼan miʼ coltañon, wen ñajt an tic tojlel mi cubin. Tsaʼ c ñaʼta chaʼan Dios maʼañic bajcheʼ yubil miʼ yubin i bʌ» (Marco, chʼoyol bʌ ti Italia).

• «Com c melben i yeʼtel Dios tsaʼ cʌlʌ pero tsaʼ j qʼuele chaʼan mach mejloñic. Tsaʼ c ñaʼta chaʼan yom jach i yʌqʼueñonla lac toj lac mul, wen jontol i mach yujilic cʼuxbiya» (Rosa, chʼoyol bʌ ti Guatemala).

• «Cheʼ bʌ chutonto tsaʼ c ñaʼta chaʼan Dios jin jach miʼ sʌclan chuqui mach bʌ weñic mi lac mel chaʼan miʼ yʌqʼueñonla lac toj lac mul. Ti wiʼil, tsaʼ caji j qʼuel chaʼan wen ñajt an ti lac tojlel, i lajal bajcheʼ juntiquil yumʌl mach bʌ i wentajoñicla» (Raimunda, chʼoyol bʌ ti Canadá).

Ixcu jatet, ¿chuqui maʼ ñaʼtan? ¿Machʌch ba añic miʼ mejlel laj cʼuxbin Dios? Cabʌl lac piʼʌlob an i melbeyob i bʌ ili cʼajtiya. Jumpʼejl ejemplo, an lac piʼʌlob ti wajali xñoptʼañoʼ bʌ tsiʼ yʌlʌyob i bʌ pero maʼañic tsiʼ pejcayob Dios ti oración. ¿Chucoch? Come miʼ bʌcʼñañob. Will Durant juntiquil historiador miʼ yʌl: «¿Muʼ ba caj i lʌcʼtesan i bʌ juntiquil lac piʼʌl ti Dios cheʼ wen ñajt an yicʼot wen jontol?».

¿Chucoch cheʼ an i ñaʼtayob jiñi lac piʼʌlob tiʼ tojlel Dios bajcheʼ jiñi? ¿Chuqui miʼ yʌl jiñi Biblia? Cheʼ la cujilic i sujmlel tiʼ tojlel, ¿mucʼʌch ba caj laj cʼuxbin?

«Maʼañic miʼ mejlel lac ñoj al mi Dios añʌch i cʼabaʼ. I mi cheʼʌchi, mach la cujilic baqui bʌ» (maestro David Cunningham, ti jiñi i libro Theological Studies).

Dios miʼ yʌl: «Joñon Jehová. Jiñʌch j cʼabaʼ» (Isaías 42:8, Traducción del Nuevo Mundo). Jiñi i cʼabaʼ Jehová an ti hebreo, i yom i yʌl, «jiñʌch miʼ mel chaʼan cheʼʌch miʼ sujtel» (Génesis 2:4).

Jehová yom chaʼan mi laj cʼʌmben i cʼabaʼ. Jiñi Biblia miʼ yʌl: «Subenla wocolix i yʌlʌ lac Yum, pejcanla tiʼ cʼabaʼ. Pucbenla i melbal lac Yum yaʼ tiʼ tojlel winicob xʼixicob tiʼ pejtelel colem tejclum» (1 Crónicas 16:8).

Jesús tsiʼ cʼʌmbe i cʼabaʼ Dios i tsiʼ pʌsbe jiñi xcʌntʼañob i chaʼan. Ti jumpʼejl bʌ qʼuin, Jesús tsiʼ melbe oración i Tat, i tsiʼ yʌlʌ: «Tsaʼ cʌqʼueyob i cʌn a cʼabaʼ». ¿Chucoch tsiʼ mele? Miʼ bej al: «Chaʼan miʼ mejlel i pʌsob jiñi cʼuxbiya tsaʼ bʌ a pʌsbeyon i joñon temel quicʼotob» (Juan 17:26).

Jiñi teólogo Walter Lowrie tiʼ tsʼijbu: «Jiñi wiñic mach bʌ i cʌmbeyic i cʼabaʼ Dios, mach i cʌñʌyic tiʼ sujm [...] i mach mejlic i cʼuxbin».

Juntiquil wiñic i cʼabaʼ Victor ti jujumpʼejl semana miʼ majlel ti iglesia, pero mach i cʌñʌyic Dios. Miʼ yʌl: «Cheʼ bʌ tsaʼ j cʌñʌ i cʼabaʼ Dios, Jehová, lajal bajcheʼ ujtel jaxto j cʌn lon c bʌ. Tsaʼix cʼoti j cʌn jiñi wen an jach bʌ cubi tiʼ tojlel. Cʼʌlʌl ti jimbʌ ora Dios tsaʼ sujti ti camigo, lajal bajcheʼ muqʼuix c taj j qʼuel».

Jehová miʼ lʌcʼtesan i bʌ tiʼ tojlel jiñi muʼ bʌ i ñaʼtʌbeñob i cʼabaʼ, i miʼ yʌcʼ i tʼan: «Mi caj c ñusʌbeñob i mul cheʼ bajcheʼ winicob miʼ ñusʌbeñob i mul i yalobil muʼ bʌ i jacʼben i tʼan» (Malaquías 3:16, 17). Dios miʼ yʌqʼuen i bendición jiñi muʼ bʌ i pejcañob tiʼ cʼabaʼ. Jiñi Biblia miʼ yʌl: «Majqui jach miʼ cʼajtin coltaya tiʼ cʼabaʼ Jehová mi caj i coltʌntel» (Romanos 10:13).

Jiñi Diccionario Akal crítico de Teología miʼ yʌl chaʼan «jiñi Trinidad juntiquilʌch Dios, jiñi Tatʌl, jiñi i Yalobil yicʼot jiñi Chʼujul bʌ espíritu juntiquilob jach». Jiñi Diccionario abreviado del cristianismo miʼ yʌl: «Jiñi católicojob, ortodoxojob, protestantejob yicʼot yambʌlob miʼ ñopob ili cʌntesa».

Jesús, jiñi i Yalobil Dios, maʼañic baʼ ora tsiʼ yʌlʌ chaʼan lajal yicʼot i Tat. Tsaʼ bʌ i yʌlʌ jiñʌch ili: «Mic majlel baʼan jiñi Tatʌl, come jiñi Tatʌl ñumen ñuc i yeʼtel bajcheʼ joñon» (Juan 14:28). Cheʼ jaʼel, tiʼ sube juntiquil xcʌntʼan i chaʼan: «Mi caj c letsel majlel baqui an jiñi c Tat i laʼ Tat jaʼel, jiñi c Dios i laʼ Dios jaʼel» (Juan 20:17).

Jiñi chʼujul bʌ espíritu mach diosic. Jiñi ñaxam bʌ xcʌntʼañob «tsaʼ bujtʼiyob ti chʼujul bʌ espíritu», i Jehová tsiʼ yʌlʌ: «Mi caj c tʼox aqʼuen quespíritu majqui jach bʌ quixtañujob» (Hechos 2:1-4, 17). Jin chaʼan jiñi chʼujul bʌ espíritu i pʼʌtʌlelʌch Dios, mach ochemic ti Trinidad.

Karl Rahner yicʼot Herbert Vorgrimler chaʼtiquil am bʌ i wen qʼueleyob jiñi Biblia miʼ yʌlob chaʼan jiñi cʌntesan chaʼan Trinidad cojach miʼ mejlel la chʼʌmben i sujm yicʼot i coltaya Dios, pero anquese cheʼic bajcheʼ jiñi maʼañic mi caj i cʼotel lac laj chʼʌmben i sujm. Pero ¿mucʼʌch ba caj i cʼotel laj cʼuxbin juntiquil mach bʌ lac wen cʌñʌyic i maʼañic bʌ mi la chʼʌmben i sujm? Maʼañic. Jin chaʼan, jiñi cʌntesa chaʼan Trinidad miʼ mʌctañonla chaʼan mi laj cʼuxbin Dios.

Marco, tsaʼ bʌ la cʌlʌ ti ñaxam bʌ tema, miʼ yʌl chaʼan jiñi cʌntesa chaʼan bʌ Trinidad maʼañic tsiʼ yʌcʼʌ chaʼan miʼ lʌcʼtesan i bʌ tiʼ tojlel Dios. Jin chaʼan tsiʼ ñaʼta chaʼan Dios woliʼ mujcun i bʌ i tiʼ caj jiñi maʼañic tsaʼ mejli i cʌn yicʼot i lʌcʼtesan i bʌ tiʼ tojlel. Pero jiñi Biblia miʼ yʌl chaʼan «mach ñajtic an Dios ti lac tojlel ti jujuntiquilonla» (Hechos 17:27, I tʼan Dios). Dios miʼ yʌcʼ i bʌ ti cʌjñel, maʼañic miʼ mujcun i bʌ. Jesús tsiʼ yʌlʌ: «Joñon lojon mi lon c chʼujutesan jiñi lon j cʌñʌyʌch bʌ» (Juan 4:22).

Marco miʼ yʌl: «Cheʼ bʌ tsaʼ j cʌñʌ chaʼan Dios mach jumpʼejlic Trinidad tsaʼ mejli c lʌcʼtesan c bʌ tiʼ tojlel yicʼot tsaʼ sujtiyon tiʼ yamigo». Tiʼ sujm, mi mucʼʌch laj qʼuel Jehová bajcheʼ juntiquil lac piʼʌl i mach cheʼic bajcheʼ juntiquil muʼ bʌ i mujcun i bʌ, mach wocolic mi caj la cubin chaʼan miʼ cʼotel laj cʼuxbin. Jiñi Biblia miʼ yʌl: «Jiñi mach bʌ yujilic cʼuxbiya maxto i cʌñʌyic Dios, come Dios cʼuxbiyajʌch» (1 Juan 4:8).

«Jiñi wen añoʼ bʌ i mul miʼ chʌmelob miʼ majlelob i chʼujlel ti infierno, i yaʼi, miʼ wen ubiñob wocol ti cʼajc tiʼ pejtelel ora» (Catecismo de la Iglesia Católica). Pero an ñucoʼ bʌ i yeʼtel ti ñopbalʌl tac muʼ bʌ i yʌlob chaʼan jiñi muʼ bʌ i majlelob ti infierno junyajl ñajtix miʼ cʌytʌlob tiʼ tojlel Dios.

Jiñi Salmo 146:4 miʼ yʌl tiʼ tojlel jiñi wiñicob xʼixicob: «Cheʼ miʼ cʌy i japob icʼ miʼ sujtelob ti lum. Ti jini jach bʌ qʼuin miʼ toʼol jilel chuqui tsiʼ ñaʼtayob i mel». Mi cheʼ bʌ mi lac chʌmel mi lac sujtel ti lum i mi lac jilel, ¿bajcheʼto mi caj la cubin wocol?

Jiñi tʼan am bʌ ti hebreo yicʼot griego muʼ bʌ i chaʼlentel ti traducir bajcheʼ «infierno», yom i yʌl, jiñi «mucoñibʌl» baqui mi lac majlel ti lac pejtelel. Jumpʼejl ejemplo, cheʼ bʌ Job tsiʼ taja jumpʼejl tsʌts bʌ cʼamʌjel, tiʼ sube Dios ti oración: «Utsʼat muqʼuic a mucon yicʼot jini chʌmeñoʼ bʌ» (Job 14:13). O cheʼ bajcheʼ miʼ chaʼlen ti traducir jiñi La Sagrada Biblia, i chaʼan Guillermo Jünemann, «yaʼ ti infierno». Job mach yomic i ñajtʼesan i bʌ ti Dios mi yomic i yubin wocol tiʼ pejtelel ora, yom jach i cʼaj i yoj yaʼ ti mucoñibʌl.

Cheʼ la cujil chaʼan Dios wen jontol mach la comic lac lʌcʼtesan lac bʌ tiʼ tojlel. Rocío, chʼoyol bʌ ti México, miʼ yʌl: «Cheʼ bʌ chutonto tsiʼ cʌntesayoñob chaʼan añʌch jiñi infierno. Mic wen bʌcʼñan Dios, come mic ñaʼtan chaʼan maʼañic wem bʌ i melbal. Tsaʼ c ñaʼta chaʼan tiʼ pejtelel ora michʼ i maʼañic miʼ ñusan lac mul».

Muʼ bʌ i yʌl jiñi Biblia tiʼ tojlel Dios yicʼot chaʼan bajcheʼ añob jiñi chʌmeñoʼ bʌ, tsiʼ qʼuextʌbe i pensar jiñi Rocío. Miʼ yʌl: «Librejoñix tsaʼ cubi c bʌ. Lajal bajcheʼ tsiʼ locʼsʌbeyoñob wen al bʌ j cuch. Tsaʼ cʼoti j qʼuel chaʼan Dios yom chuqui wem bʌ ti lac tojlel, chaʼan miʼ cʼuxbiñonla i chaʼan mucʼʌch i mejlel j cʼuxbin jaʼel. Wʌle mij qʼuel bajcheʼ juntiquil tatʌl muʼ bʌ i wen cʌntan i yalobilob i yom i coltañob» (Isaías 41:13).

Cabʌl lac piʼʌlob miʼ ñopob Dios chaʼan jach miʼ bʌcʼñañob majlel ti infierno, pero Dios mach yomic chaʼan mi lac melben i yeʼtel chaʼan jach mucʼonla ti bʌqʼuen. Jesús tsiʼ yʌlʌ: «Cʼuxbin a Dios Jehová» (Marcos 12:29, 30). Cheʼ la cujil chaʼan Dios tiʼ pejtelel ora toj chuqui miʼ mel, mach yomic mi lac bʌcʼñan chaʼan mi caj i mel mach bʌ weñic ti talto bʌ qʼuin. Miʼ mejlel la cʌl bajcheʼ Elihú, jiñi i yamigo Job: «Isujm, mach yujilic jontolil Dios. Jini Pʼʌtʌl bʌ Mach bʌ Anic i Pʼisol i Pʼʌtʌlel miʼ melonla ti toj» (Job 34:12).

Ti jumpʼejl bʌ qʼuin, yaʼ ti Jerusalén, Jesús tsiʼ taja ti tʼan jiñi i Tat, Jehová, i tsiʼ yʌcʼʌ ti cʌjñel jiñi lot tac muʼ bʌ i yʌlob jiñi ñucoʼ bʌ i yeʼtel ti ñopbalʌl tac ti jimbʌ ora (Juan 8:12-30). Jiñi tsaʼ bʌ i yʌlʌ miʼ pʌsbeñonla chaʼan yomʌch mi lac wen qʼuel chuqui miʼ yʌlob jiñi lac piʼʌlob tiʼ tojlel Dios. Jesús tsiʼ yʌlʌ: «Mi mucʼʌch laʼ chʌn ajñel tij cʌntesa tac, xcʌntʼañetla c chaʼan tiʼ sujm, mi caj laʼ cʌn jiñi i sujmlel, i jiñi i sujmlel mi caj i yʌqʼuetla ti cojlel» (Juan 8:31, 32).

Cheʼ bʌ Jesús tsiʼ yʌlʌ «mi mucʼʌch laʼ chʌn ajñel tij cʌntesa tac», tsiʼ pʌsʌ chuqui miʼ mejlel i coltañonla chaʼan mi laj cʌn miʼ sujmʌch o mach i sujmic muʼ bʌ i yʌjlel tiʼ tojlel Dios. Cheʼ bʌ an chuqui maʼ subentel, cʼajtiben a bʌ: «¿Mucʼʌch ba i taj i bʌ yicʼot jiñi i cʌntesa tac Jesús yicʼot muʼ bʌ i yʌl jiñi Biblia?». Mele bajcheʼ tsiʼ meleyob jiñi tsaʼ bʌ i yubiyob ti cʌntesa jiñi apóstol Pablo: Wen tsajin o wen qʼuele muʼ bʌ i yʌl jiñi Biblia chaʼan maʼ ñaʼtan miʼ sujmʌch jiñi tsaʼ bʌ subentiyet (Hechos 17:11).

Jiñʌch tsaʼ bʌ i meleyob Marco, Rosa yicʼot Raimun­da, tsaʼix bʌ lac tajayob ti tʼan: Tsaʼ caji i chʼʌmob jumpʼejl estudio loqʼuem bʌ ti Biblia yicʼotob jiñi i testigojob Jehová. ¿Chuqui tsiʼ cʌñʌyob?

Marco miʼ yʌl: «Jiñi Testigo muʼ bʌ i yʌqʼueñon lojon estudio tsiʼ jacʼʌ jiñi lon j cʼajtiya yicʼot jiñi Biblia. Cʼunteʼ cʼunteʼ tsaʼ caji lon j cʼuxbin Jehová yicʼot tsaʼto pʼʌtʼa jiñi lon c ñujpuñel».

Rosa miʼ yʌl: «Tsaʼ c ñaʼta chaʼan jiñi Biblia jumpʼejlʌch libro tsaʼ bʌ i tsʼijbuyob wiñicob chaʼan miʼ ñopob i tsictesan tiʼ bajñel ñaʼtʌbalob majqui jiñi Dios. Pero ti wiʼil tsaʼ caji j qʼuel chaʼan jiñi Biblia mucʼʌch i luʼ aqʼuen i jacʼbal jiñi j cʼajtiya tac. Wʌle cujilix majqui Jehová tiʼ sujm, chaʼan juntiquilʌch Dios muʼ bʌ i mejlel lac ñop tiʼ tojlel».

Raimunda miʼ yʌl: «Tsaʼ c sube Dios chaʼan miʼ coltañon j cʌn. Mach jalic tsaʼ ñumi, tsaʼ caji c chʼʌm estudio quicʼot c ñoxiʼal. ¡I tsaʼ caji lon j cʌn i sujmlel chaʼan Jehová! Wen tijicña tsaʼ cubi lon c bʌ cheʼ tsaʼ lon j cʌñʌ majqui jiñi Dios».

Jiñi i Tʼan Dios, jiñi Biblia, mach cojach miʼ subeñonla majqui jiñi Dios, miʼ subeñonla jaʼel jiñi utsʼatax bʌ i melbal tac. Cheʼ jaʼel, miʼ coltañonla laj cʌn «chuqui tac tsiʼ yʌqʼueyonla tiʼ yutslel» (1 Corintios 2:12). ¿Bajcheʼ a wʌlʌ cheʼ muqʼuic a pejcan jiñi Biblia? Mi caj a ñumen cʌn tiʼ tojlel Dios, chucoch tsiʼ meleyonla yicʼot tsiʼ mele ili Pañimil, i bajcheʼ yilal mi caj lac chumtʌl ti talto bʌ qʼuin. Miʼ mejlel a ñumen cʌn yaʼ ti www.jw.org/ctu yaʼ ti sección «Cʌntesa tac > Cʼajtiya tac chaʼan bʌ Biblia». Cheʼ jaʼel, miʼ mejlel a cʼajtin chaʼan juntiquil i testigo Jehová miʼ yʌqʼueñet jumpʼejl estudio loqʼuem bʌ ti Biblia. Mi cheʼʌch maʼ mel, mi caj a qʼuel chaʼan mucʼʌch lac mejlel laj cʼuxbin Dios.