¿Chuqui miʼ yʌl jiñi Biblia chaʼan baqui ora miʼ mejlel la cʌcʼ lac taqʼuin?
I jacʼbal muʼ bʌ i yʌcʼ jiñi Biblia
Jiñi Biblia miʼ subeñonla chaʼan cheʼ an chuqui mi la cʌcʼ mach yomic xicʼbilonla, yom loqʼuem ti lac pusicʼal. I cheʼ bʌ mi lac mel, mach jin jach miʼ taj i wenlel jiñi muʼ bʌ i chʼʌm, mi lac taj jaʼel (Proverbios 11:25; Lucas 6:38). Jesús tsiʼ yʌlʌ: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hechos 20:35).
¿Jalaqui wen chaʼan mi la cʌcʼ jiñi taqʼuin?
Cheʼ bʌ mach xicʼbilonla chaʼan mi la cʌcʼ jiñi taqʼuin mi lac tajben i wenlel. Jiñi Biblia miʼ yʌl: «Jujuntiquil laʼ i mel cheʼ bajcheʼ tsiʼ ñaʼta tiʼ pusicʼal i mach cheʼic bajcheʼ mach yomic i mel o xicʼbil jach, come Dios miʼ cʼuxbin jiñi muʼ bʌ i yʌcʼ yicʼot i tijicñʌyel» (2 Corintios 9:7).
Dios miʼ pijtan chaʼan jiñi muʼ bʌ i chʼujutesañob cheʼ bʌ an chuqui miʼ yʌcʼob yom loqʼuemob tiʼ pusicʼal (Santiago 1:27). Mi mucʼʌch laj coltan jiñi i cʼʌjñibaloʼ bʌ i chaʼan woli laj coltan Dios, i Dios miʼ qʼuel chaʼan an i bet yicʼotonla cheʼ bʌ mi lac tʼoxben yambʌlob chuqui an lac chaʼan (Proverbios 19:17). Jiñi Biblia miʼ yʌl chaʼan Dios miʼ yʌqʼueñonla i qʼuexol chaʼan jiñi tsaʼ bʌ lac tʼoxbe yambʌ (Lucas 14:12-14).
¿Baqui ora mach weñic chaʼan mi la cʌcʼ jiñi taqʼuin?
Jiñʌch cheʼ bʌ bajñel com lac taj lac wenlel. Jumpʼejl ejemplo:
Chaʼan miʼ qʼuelonla yambʌlob (Mateo 6:2).
Chaʼan jach mi lac taj chuqui la com (Lucas 14:12-14).
Chaʼan mi lac mʌn laj coltʌntel (Salmo 49:6, 7).
Cheʼ mi laj coltan mach bʌ weñic melbal tac. Jumpʼejl ejemplo, mach weñic cheʼ mi la cʌqʼuen taqʼuin juntiquil chaʼan miʼ chaʼlen alas taqʼuin, chaʼan miʼ yʌqʼuesan i bʌ o chaʼan miʼ chaʼlen i bʌ ti drogar (1 Corintios 6:9, 10; 2 Corintios 7:1). Mach weñic jaʼel cheʼ mi la cʌqʼuen taqʼuin juntiquil muʼ bʌ i mejlel ti eʼtel, pero mach yomic (2 Tesalonicenses 3:10).
Cheʼ bʌ miʼ mʌctañonla chaʼan mi lac tsʼʌctesan jiñi eʼtel aqʼuebilonbʌla ti lac wenta ti Dios. Jiñi Biblia miʼ yʌl chaʼan i jol jiñi familia yom miʼ yʌqʼuen chuqui i cʼʌjñibal i chaʼañoʼ bʌ (1 Timoteo 5:8). Mach weñic cheʼ miʼ yʌqʼuen yambʌlob i maʼañic miʼ yʌqʼuen jiñi i familia. Cheʼ jaʼel, Jesús mach weñic tsiʼ qʼuele cheʼ bʌ juntiquil maʼañic miʼ yʌqʼuen chuqui i cʼʌjñibal i chaʼan jiñi i tatob ñoxobix bʌ come miʼ yʌlob chaʼan jiñi añoʼ bʌ i chaʼan majtañʌlix i chaʼan Dios (Marcos 7:9-13).