Jesús woliʼ yotañob cheʼ woliʼ yochel ti Jerusalén cheʼ cʼʌchʌl ti juncojt burro

¿Muʼ ba i pʌs jiñi profecía tac chaʼan Jesús jiñʌch jiñi Mesías?

I jacʼbal muʼ bʌ i yʌcʼ jiñi Biblia

Mucʼʌch. Cheʼ bʌ Jesús tsajñi wʌʼ ti Pañimil, tiʼ tsʼʌctesa cabʌl profecía tsaʼ bʌ ajli tiʼ tojlel jiñi «Yajcʌbil bʌ Yumʌl», jiñi muʼ bʌ caj i sujtel ti «xcoltaya i chaʼan jiñi pañimil» (Daniel 9:25; 1 Juan 4:14). I cheʼ bʌ tsaʼix chʌmi, tsaʼʌch i bej tsʼʌctesa yambʌ profecía tac (Salmo 110:1; Hechos 2:34-36).

**¿Chuqui yom i yʌl jiñi tʼan Mesías?**

Jiñi tʼan am bʌ ti hebreo Maschíaj (Mesías) yicʼot jiñi am bʌ ti griego Kjristós (Cristo) yom i yʌl «Yajcʌbil bʌ». Jin chaʼan, Jesucristo yom i yʌl «Jesús jiñi Yajcʌbil bʌ» o «Jesús jiñi Mesías».

Ti wajali, cheʼ bʌ miʼ yajcʌntel juntiquil chaʼan miʼ mel jumpʼejl ñuc bʌ eʼtel miʼ mulbentel i jol ti aceite (Levítico 8:12; 1 Samuel 16:13). Dios tsiʼ yajca Jesús bajcheʼ jiñi Mesías, tsiʼ yʌqʼue jumpʼejl ñuc bʌ eʼtel (Hechos 2:36). Pero Dios tsiʼ yajca Jesús yicʼot chʼujul bʌ espíritu, maʼañic tsiʼ mulbe i jol ti aceite (Mateo 3:16).

¿Muʼ ba i mejlel ti tsʼʌctiyel ti cabʌl lac piʼʌlob jiñi profecía tac chaʼan bʌ jiñi Mesías?

Maʼañic. Lajal bajcheʼ jumpʼejl huella miʼ yʌcʼ ti cʌjñel juntiquil lac piʼʌl, jiñi profecía tac am bʌ ti Biblia miʼ yʌcʼ ti cʌjñel chaʼan juntiquil jach jiñi Mesías, o Cristo. Pero jiñi Biblia mucʼʌch i yʌcʼ ili ticʼojel: «Mi caj i pʌsob i bʌ muʼ bʌ i cuyob i bʌ ti cristo yicʼot xlot bʌ xʼaltʼañob i mi caj i melob ñuc tac bʌ milagro chaʼan miʼ chaʼleñob lot, i mi mucʼʌch i mejlel, muʼto i lotiñob jaʼel jiñi yajcʌbiloʼ bʌ» (Mateo 24:24).

¿Muʼ ba caj i chaʼ pʌs i bʌ jiñi Mesías ti talto bʌ qʼuin?

Maʼañic. Jiñi Biblia tsiʼ wʌn alʌ chaʼan jiñi Mesías mi caj i tilel tiʼ pʼolbal David, juntiquil rey ti Israel ti wajali (Salmo 89:3, 4). Pero jiñi jun baʼ lotol i cʼabaʼ jiñi i pʼolbalob David tsaʼix jili. Miʼ ñaʼtʌntel chaʼan tsaʼ jili cheʼ bʌ jiñi romanojob tsiʼ jisayob Jerusalén cheʼ ti jabil 70.a Cʼʌlʌl ti jimbʌ ora, maʼañic majqui tsaʼ mejli i yʌl chaʼan tilem tiʼ pʼolbal jiñi rey David. Pero cheʼ tiʼ yorajlel Jesús añʌch jiñi jun tac, i wen tsiquil tsaʼ qʼuejli chaʼan Jesús tilemʌch tiʼ pʼolbal David (Mateo 22:41-46).

¿Jaypʼejl profecía an ti Biblia chaʼan jiñi Mesías?

Maʼañic miʼ mejlel lac ñoj al jaypʼejl profecía an. Mach junlajalic bajcheʼ miʼ tsijquel jiñi profecía tac muʼ bʌ i yʌjlel tiʼ tojlel jiñi Mesías. Jumpʼejl ejemplo, ti Isaías 53:2-7 cabʌl chuqui miʼ yʌjlel tiʼ tojlel jiñi Mesías. An muʼ bʌ i yʌlob chaʼan pejtelel muʼ bʌ i yʌl ili versículo tac jumpʼejl jach profecía, i an muʼ bʌ i tʼoxob jujunchajp muʼ bʌ i yʌjlel tiʼ tojlel jiñi Mesías bajcheʼ jujumpʼejl profecía.

Profecía tac tiʼ tojlel jiñi Mesías tsaʼ bʌ tsʼʌctiyi ti Jesús

Tsaʼ bʌ ajli	Miʼ tilel ti	Tsaʼ tsʼʌctiyi
Tilem tiʼ pʼolbal Abrahán	Génesis 22:17, 18	Mateo 1:1
Tilem tiʼ pʼolbal Isaac, i yalobil Abrahán	Génesis 17:19	Mateo 1:2
Loqʼuem tiʼ tribu Judá	Génesis 49:10	Mateo 1:1, 3
Tilem tiʼ familia jiñi rey David	Isaías 9:7	Mateo 1:1
I yalobil juntiquil xchʼoc maxto bʌ piʼlebilic	Isaías 7:14	Mateo 1:18, 22, 23
Miʼ yilan pañimil ti Belén	Miqueas 5:2	Mateo 2:1, 5, 6
Miʼ subentel ti Emmanuelb	Isaías 7:14	Mateo 1:21-23
Pʼumpʼun baqui miʼ colel	Isaías 53:2	Lucas 2:7
Cheʼ bʌ tsiʼ yila pañimil tsaʼ tsʌnsʌnti cabʌl alʌlob	Jeremías 31:15	Mateo 2:16-18
Tsaʼ pʌjyi majlel ti Egipto	Oseas 11:1	Mateo 2:13-15
Tsaʼ cʌjñi bajcheʼ jiñi chʼoyol bʌ ti Nazaretc	Isaías 11:1	Mateo 2:23
Cheʼ bʌ maxto julemic, tsaʼ chojqui tilel juntiquil xsuboñel	Malaquías 3:1	Mateo 11:7-10
Tsaʼ yajcʌnti bajcheʼ Mesías ti jabil 29	Daniel 9:25	Mateo 3:13-17
Tsaʼ cʌjñi bajcheʼ i yalobil Dios	Salmo 2:7	Hechos 13:33, 34
Tsiʼ cʼuxbi i yotot Dios	Salmo 69:9	Juan 2:13-17
Tsiʼ subu jiñi wen tʼan	Isaías 61:1	Lucas 4:16-21
Jiñi i subtʼan ti Galilea lajal bajcheʼ colem cʼajc	Isaías 9:1, 2	Mateo 4:13-16
Tsiʼ mele milagro tac bajcheʼ Moisés	Deuteronomio 18:15	Hechos 2:22
Tsiʼ subu i tʼan Dios cheʼ bajcheʼ Moisés	Deuteronomio 18:18, 19	Juan 12:49
Tiʼ tsʼʌca cabʌl cʼamoʼ bʌ	Isaías 53:4	Mateo 8:16, 17
Maʼañic tsiʼ yʌcʼʌ chaʼan miʼ qʼuejlel ti ñuc tiʼ tojlel yambʌlob	Isaías 42:2	Mateo 12:17, 19
Tsiʼ pʼunta jiñi woli bʌ i ñusañob wocol	Isaías 42:3	Mateo 12:9-20; Marcos 6:34
Tsiʼ pʌsʌ chuqui jiñi toj bʌ tiʼ tojlel Dios	Isaías 42:1, 4	Mateo 12:17-20
Wen ñuc bʌ la Caj cʌntesa	Isaías 9:6, 7	Juan 6:68
Tsiʼ yʌcʼʌ ti cʌjñel i cʼabaʼ Jehová	Salmo 22:22	Juan 17:6
Tsiʼ chaʼle cʌntesa yicʼot lajiya tac	Salmo 78:2	Mateo 13:34, 35
Juntiquil Yumʌl	Daniel 9:25	Mateo 23:10
Cabʌlob maʼañic tsiʼ ñopoyob	Isaías 53:1	Juan 12:37, 38
Xajlel baʼ miʼ jatsʼob i yoc yambʌlob	Isaías 8:14, 15	Mateo 21:42-44
Tsaʼ tsʼaʼlenti	Salmo 118:22, 23	Hechos 4:10, 11
Miʼ tsʼaʼleñob anquese maʼañic i mul	Salmo 69:4	Juan 15:24, 25
Tsiʼ yotayob cheʼ woliʼ yochel ti Jerusalén cheʼ cʼʌchʌl ti juncojt burro	Zacarías 9:9	Mateo 21:4-9
Jiñi alobob tsiʼ qʼueleyob ti ñuc	Salmo 8:2	Mateo 21:15, 16
Tsaʼ tili tiʼ cʼabaʼ Jehová	Salmo 118:26	Juan 12:12, 13
Juntiquil i yamigo tsiʼ loti	Salmo 41:9	Juan 13:18
Tsaʼ chojñi ti 30 taqʼuin melbil bʌ ti platad	Zacarías 11:12, 13	Mateo 26:14-16; 27:3-10
Jiñi i yamigojob tsiʼ cʌyʌyob	Zacarías 13:7	Mateo 26:31, 56
Tsaʼ jopʼbenti i mul	Salmo 35:11	Mateo 26:59-61
Maʼañic tsiʼ chaʼle tʼan cheʼ yaʼan baʼan i contrajob	Isaías 53:7	Mateo 27:12-14
Tsiʼ tujbayob	Isaías 50:6	Mateo 26:67; 27:27, 30
Tsiʼ jatsʼʌyob tiʼ jol	Miqueas 5:1	Marcos 15:19
Tsaʼ sʌsʌp jajtsʼi	Isaías 50:6	Juan 19:1
Maʼañic tsiʼ colta i bʌ cheʼ bʌ tsaʼ jajtsʼi	Isaías 50:6	Juan 18:22, 23
Jiñi yumʌlob tsiʼ temeyob i tʼan chaʼan miʼ contrajiñob	Salmo 2:2	Lucas 23:10-12
Tsiʼ chʼijiyob tiʼ cʼʌb yicʼot tiʼ yoc ti juntsʼijt teʼ	Salmo 22:16	Mateo 27:35; Juan 20:25
Tsiʼ chaʼleyob alas tiʼ caj i pislel	Salmo 22:18	Juan 19:23, 24
Tsiʼ yʌlʌyob chaʼan juntiquil xmulil	Isaías 53:12	Mateo 27:38
Tsiʼ pʼajayob, tsiʼ wajleyob	Salmo 22:7, 8	Mateo 27:39-43
Ti jumpʼejl i pusicʼal tsiʼ ñusa wocol ti laj caj	Isaías 53:5, 6	1 Pedro 2:23-25
Dios tsiʼ cʌyʌ yilal	Salmo 22:1	Marcos 15:34
Tsiʼ yʌqʼueyob i jap vinagre	Salmo 69:21	Mateo 27:34
Tsaʼ tiqui i tiʼ cheʼ bʌ muqʼuix caj i chʌmel	Salmo 22:15	Juan 19:28, 29
Tsiʼ yʌcʼʌ i cuxtʌlel ti Dios	Salmo 31:5	Lucas 23:46
Tsiʼ yʌcʼʌ i bʌ ti chʌmel	Isaías 53:12	Marcos 15:37
Tsiʼ tojo lac mul	Isaías 53:12	Mateo 20:28
Maʼañic tsiʼ xulbeyob mi juntsʼijtic i bʌquel	Salmo 34:20	Juan 19:31-33, 36
Tsiʼ jeqʼueyob	Zacarías 12:10	Juan 19:33-35, 37
Tsaʼ mujqui bajcheʼ wen am bʌ i taqʼuin	Isaías 53:9	Mateo 27:57-60
Tsaʼ chaʼ chʼojyesʌnti	Salmo 16:10	Hechos 2:29-31
Judas, jiñi tsaʼ bʌ i chaʼle lot, tsaʼ ochi i qʼuexol	Salmo 109:8	Hechos 1:15-20
Buchul tiʼ ñoj Dios	Salmo 110:1	Hechos 2:34-36

a Jumpʼejl enciclopedia miʼ yʌl: «Miʼ mejlel lon cʌl chaʼan jiñi jun tac baqui miʼ tilel i cʼabaʼ jiñi judíojob tsaʼ jili cheʼ bʌ tsaʼ jisʌnti Jerusalén» (Cyclopedia de McClintock y Strong).

b Jiñi cʼabaʼ am bʌ ti hebreo Emmanuel, yom i yʌl, «An lon quicʼot Dios», i miʼ pʌs jiñi eʼtel tsaʼ bʌ i mele Jesús bajcheʼ jiñi Mesías. Cheʼ bʌ Jesús tsaʼ ajñi wʌʼ ti Pañimil yicʼot pejtelel jiñi tsaʼ bʌ i mele tsiʼ pʌsʌ chaʼan Dios an yicʼot pejtelel muʼ bʌ i chʼujutesañob (Lucas 2:27-32; 7:12-16).

c Jiñi tʼan Nazareno tajol tilem ti tʼan hebreo nétser, yom bʌ i yʌl «buts teʼ».

d Ili profecía yaʼan ti libro chaʼan Zacarías, pero Mateo miʼ yʌl chaʼan jin tsiʼ yʌlʌ «jiñi xʼaltʼan Jeremías» (Mateo 27:9). Jiñi libro chaʼan Jeremías an i tajol yaʼ miʼ ñaxan ajqʼuel tiʼ tejchibal jiñi Tsʼijbujel tac cʌmbil bʌ bajcheʼ «jiñi Xʼaltʼañob» (Lucas 24:44). Tajol Mateo tsiʼ yʌlʌ «Jeremías» chaʼan miʼ taj ti tʼan pejtelel jiñi tsʼijbujel, baʼ miʼ tilel jaʼel jiñi libro chaʼan Zacarías.