4 ¿Chuqui yom mi la cʌl ti la coración?

TIʼ pejtelel jiñi oración muʼ bʌ i mejlel, muʼ bʌ i ñumen ajlel jiñʌch tsaʼ bʌ i pʌsʌ Jesús: Jiñi padrenuestro. Pero cheʼ jaʼel, jiñʌch mach bʌ añic miʼ wen chʼʌmbentel i sujm. Yonlel lac piʼʌlob miʼ yʌlob ti jujumpʼejl qʼuin i mach junsujtel jach, anquese mach yujilobic chuqui yom i yʌl. Pero Jesús mach yomic chaʼan cheʼ miʼ mejlel bajcheʼ jiñi. ¿Chucoch mi la cʌl?

Cheʼ bʌ muʼto caj i yʌl ili oración, tsiʼ yʌlʌ: «Cheʼ bʌ maʼ chaʼlen oración, mach jin jach bʌ tʼan yom maʼ chʌcʌ al» (Mateo 6:7). Jesús maʼañic tsiʼ qʼuexta i tʼan i maʼañic tsiʼ wiʼil alʌ chaʼan yom mi laj cʌy ti la col jumpʼejl oración chaʼan jin jach mi lac teñe al. Yom bʌ i pʌs jiñʌch baqui bʌ jiñi ñumen ñuc bʌ i cʼʌjñibal yom mi la cʌl ti la coración. Jin chaʼan, laʼ lac ñumen qʼuel jiñi oración am bʌ ti Mateo 6:9-13.

Ti ñaxan, Jesús tsiʼ cʼajtesʌbe jiñi xcʌntʼañob i chaʼan chaʼan jiñi oración tac jin jach yom miʼ chocbentel majlel jiñi i Tat, Jehová. Pero ¿chucoch miʼ yʌl chaʼan jiñi i cʼabaʼ yom miʼ sʌqʼuesʌntel?

Come cʼʌlʌl tiʼ tejchibal an ajli lot tac tiʼ tojlel Dios, i an bibʼesʌbenti i cʼabaʼ. Satanás, jiñi ñuc bʌ i contra Dios, yom chaʼan mi lac ñop chaʼan Jehová juntiquil xlot, chaʼan jin jach miʼ bajñel ñaʼtan i bʌ i chaʼan maʼañic tiʼ wenta chaʼan miʼ yumañonla (Génesis 3:1-6). Jiñi am bʌ i ñopoyob muʼ bʌ i yʌl Satanás miʼ yʌlob chaʼan Dios mach cʼuxic miʼ yubin chuqui mi lac chaʼlen, chaʼan jontol yicʼot chaʼan mach yomic i ñusʌbeñonla lac mul. An muʼto bʌ i yʌlob chaʼan Dios maʼañic. An tsaʼ bʌ i locʼsʌbeyob i cʼabaʼ Dios yaʼ ti Biblia i an i yʌlʌyob chaʼan maʼañic mi laj cʼʌn.

Pero jiñi Biblia miʼ yʌl chaʼan Dios mi caj i jisan pejtelel iliyi (Ezequiel 39:7). I cheʼ bʌ miʼ mel, mi caj i tojʼesan jaʼel pejtelel jiñi wocol tac. ¿Bajcheʼ mi caj i mel? Jesús miʼ tsictesan.

Ti ili ora, jiñi xcʌntesajob ti jiñi ñopbalʌl tac mach junsujmic chuqui miʼ yʌlob chaʼan jiñi i Yumʌntel Dios, pero tiʼ yorajlel Jesús mach cheʼic tsaʼ ujti. Jiñi judíojob wen yujilob jiñi tsaʼ bʌ wʌn ajli tiʼ tojlel jiñi Mesías, jiñi tsaʼ bʌ i yajca Dios bajcheʼ Xcoltaya, muʼ bʌ caj i chaʼlen yumʌntel chaʼan miʼ qʼuextan ili pañimil (Isaías 9:6, 7; Daniel 2:44). Ili yumʌntel mi caj i sʌqʼuesʌben i cʼabaʼ Dios yicʼot mi caj i yʌcʼ ti cʌjñel jiñi i lot tac Satanás. Mi caj i jisan jiñi Diablo yicʼot pejtelel chuqui miʼ mel. Mi caj i jisan jiñi guerra, cʼamʌjel, wiʼñal yicʼot chʌmel (Salmo 46:9; 72:12-16; Isaías 25:8; 33:24). Jin chaʼan, cheʼ mi lac chʌcʌ cʼajtiben Dios chaʼan miʼ tilel i Yumʌntel, woli laj cʼajtiben chaʼan miʼ tsʼʌctiyel pejtelel iliyi.

Ili tʼan tac miʼ pʌs chaʼan Dios mucʼʌch caj i tsʼʌctesan chuqui yom ila ti Lum, cheʼ bajcheʼ tsiʼ mele yaʼ ti panchan cheʼ bʌ jiñi i Yalobil tsiʼ mʌlbe Satanás yicʼot i xibajob i tsiʼ choco jubel ila ti Lum (Apocalipsis 12:9-12). Ili uxchajp tsaʼ bʌ i cʼajti Jesús ti oración miʼ cʼajtesʌbeñonla chaʼan ñumen ñuc bʌ i cʼʌjñibal jiñʌch cheʼ mi lac mel chuqui yom Dios, mach jiñic chuqui la com, come jiñi yom bʌ Dios jiñʌch chuqui ñumen wem bʌ chaʼañonla. Jesús tsiʼ yʌlʌ jaʼel: «Mach jiñic miʼ mejlel chuqui com, jiñʌch chuqui a wom» (Lucas 22:42).

Jesús tsiʼ pʌsʌ jaʼel chaʼan miʼ mejlel laj cʼajtin ti oración chuqui la com. Cheʼ bajcheʼ mi laj qʼuel, maʼañic i wocolel cheʼ mi laj cʼajtiben Dios chaʼan miʼ coltañonla lac taj chuqui i cʼʌjñibal bʌ lac chaʼan ti jujumpʼejl qʼuin. Cheʼ mi lac mel, mi lac ñop chaʼan Jehová jiñʌch «miʼ yʌqʼuen lac piʼʌlob jiñi cuxtʌlel, icʼ yicʼot pejtelel chuqui an» (Hechos 17:25). Jiñi Biblia miʼ lajeʼ bajcheʼ juntiquil tatʌl wen uts bʌ muʼ bʌ i yʌqʼuen i yalobil chuqui i cʼʌjñibal bʌ i chaʼan. Pero jiñi tatʌl maʼañic mi caj i yʌqʼuen jiñi i yalobil muʼ bʌ i mejlel i ticʼlan, anquese miʼ wen cʼajtin.

¿Chuqui lac mul tiʼ tojlel Jehová? ¿I chucoch la com chaʼan miʼ ñusʌbeñonla? Cabʌl miʼ yʌlob chaʼan maʼañobic i mul o chaʼan mach tsʌtsic chuqui tsiʼ meleyob, pero cheʼ bajcheʼ miʼ yʌl jiñi Biblia, jiñi tsʌts tac bʌ wocol bajcheʼ jiñi chʌmel, an tiʼ caj jiñi mulil. Come xmulilonla mi la quilan pañimil, mi lac mel mach bʌ weñic tiʼ wut Dios. Jin chaʼan, mi la com chumtʌl tiʼ pejtelel ora, yom mi laj cʼajtiben Dios chaʼan miʼ ñusʌbeñonla lac mul (Romanos 3:23; 5:12; 6:23). Pero jiñi Biblia miʼ cʼajtesʌbeñonla chaʼan Jehová uts i pusicʼal yicʼot yom i ñusʌbeñonla lac mul (Salmo 86:5).

Ti lac pejtelel i cʼʌjñibal lac chaʼan ti ora jiñi i coltaya Dios. Tajol cabʌlob maʼañic miʼ ñopob chaʼan an Satanás. Pero Jesús tsaʼʌch i ñopo, tsaʼto i yʌlʌ chaʼan jiñʌch «yumʌl chaʼan ili pañimil» (Juan 12:31; 16:11). Satanás añix tiʼ cʼʌb ili pañimil i mach jasʌlic miʼ yubin. Cheʼ jaʼel mach yomic chaʼan mi lac lʌcʼtesan lac bʌ ti Jehová (1 Pedro 5:8). Pero mach yomic mi lac bʌcʼñan, come Dios jiñʌch jiñi ñumen pʼʌtʌl bʌ yicʼot yom i coltañob jiñi muʼ bʌ i cʼuxbiñob.

An cabʌl chuqui miʼ mejlel laj cʼajtiben Dios ti oración. Ti 1 Juan 5:14 miʼ subeñonla: «Miʼ mejlel laj cʼajtiben chuqui jach la com mi lajalʌch yicʼot jiñi muʼ bʌ i mulan i mucʼʌch i ñʌchʼtañonla». Ti yambʌ tʼan, miʼ mejlel lac suben pejtelel chuqui mi lac pensarin, i mach lac ñaʼtan chaʼan maʼañic i cʼʌjñibal miʼ qʼuel jiñi lac wocol (1 Pedro 5:7).

¿Jala yom mi lac mel oración, i baqui? ¿Chuqui miʼ yʌl jiñi i Tʼan Dios? Mi caj laj qʼuelben i jacʼbal ti yambʌ tema.