Laʼ lac ñumen tajben i wenlel jiñi i pejcʌntel Biblia

 1. ¿Chuqui tac miʼ pʌs chaʼan wen ñuc i cʼʌjñibal tiʼ tojlel Jesús jiñi Tsʼijbujel?

¿AM BA lac ñaʼta bajcheʼ tsiʼ chaʼle cʌntesa Jesús? Ñʌmʌl i taj ti tʼan jiñi chʼujul bʌ Tsʼijbujel, i ti bele ora yujilix tiʼ jol. Cheʼʌch miʼ pʌs jiñi tsaʼ bʌ i yʌlʌ cheʼ bʌ tsaʼix i chʼʌmʌ jaʼ yicʼot cheʼ bʌ tsʼitaʼ jachix yom chaʼan miʼ chʌmel (sajtel) (Dt. 8:3; Sal. 31:5; Luc. 4:4; 23:46).b I cheʼ bʌ tsiʼ chaʼle subtʼan ti jiñi uxpʼejl jab yicʼot ojlil, Jesús tsiʼ wen pejca, tsiʼ taja ti tʼan yicʼot tiʼ tsictesa jiñi Tsʼijbujel (Mat. 5:17, 18, 21, 22, 27, 28; Luc. 4:16-20).

 2. ¿Chuqui tsiʼ colta Jesús chaʼan miʼ wen cʌn jiñi Tsʼijbujel cheʼ bʌ coleto mucʼ? (Qʼuele jiñi dibujo am bʌ tiʼ tejchibal).

² Anquese Jesús maxto i teche i subtʼan, ñʌmʌlix i pejcan jiñi i Tʼan Dios yicʼot i ñʌchʼtan yambʌlob cheʼ bʌ miʼ pejcañob o miʼ tajob ti tʼan. Miʼ mejlel la cʌl chaʼan tsiʼ yubi cheʼ bʌ José yicʼot María tsiʼ tajayob ti tʼan jiñi Tsʼijbujel cheʼ bʌ miʼ chaʼleñob tʼan (Dt. 6:6, 7).c La cujil chaʼan Jesús ti jujumpʼejl sábado miʼ yajñel ti sinagoga yicʼot i familia i miʼ wen ñʌchʼtan cheʼ bʌ miʼ pejcʌntel jiñi Tsʼijbujel (Luc. 4:16). I ti wiʼil tsaʼix caji i bajñel pejcan. Ili tsiʼ colta chaʼan miʼ cʼotel i cʌn muʼ bʌ i yʌl, miʼ cʼuxbin i miʼ coltan ti chuqui tac miʼ mel (chaʼlen). Junchajp muʼ bʌ i pʌs iliyi jiñʌch tsaʼ bʌ ujti yaʼ ti templo cheʼ bʌ 12 jaxto i jabilel. Jiñi xcʌntesajob, wen i cʌñʌyoʼ bʌ jiñi Mandar tsaʼ bʌ aqʼuenti Moisés, «toj sajtelob i pusicʼal cheʼ bʌ tsiʼ qʼueleyob bajcheʼ cʼamel miʼ chʼʌmben i sujm yicʼot chaʼan jiñi i jacʼbal tac muʼ bʌ i yʌcʼ» (Luc. 2:46, 47, 52).

 3. ¿Chuqui mi caj laj qʼuel ti ili estudio?

³ Joñonla jaʼel miʼ mejlel laj cʌn yicʼot laj cʼuxbin jiñi i Tʼan Dios mi mucʼʌch lac chʌcʌ pejcan. ¿Pero chuqui miʼ mejlel lac mel chaʼan mi lac ñumen tajben i wenlel? Laʼ laj qʼuel tsaʼ bʌ i sube Jesús jiñi wen i cʌñʌyoʼ bʌ Mandar, bajcheʼ jiñi xtsʼijbayajob, fariseojob yicʼot saduceojob. Anquese ñʌmʌlob i pejcan jiñi Tsʼijbujel, maʼañic miʼ tajbeñob i wenlel. Jesús tsiʼ taja ti tʼan uxchajp i wentʌlel bʌ tsiʼ meleyob chaʼan miʼ tajbeñob i wenlel. Jiñi tsaʼ bʌ i yʌlʌ Jesús mi caj i coltañonla chaʼan 1) mi lac ñumen chʼʌmben i sujm muʼ bʌ lac pejcan, 2) mi lac ñumen taj jiñi ñuc tac bʌ i cʼʌjñibal yicʼot 3) mi la cʌcʼ chaʼan jiñi i Tʼan Dios miʼ ñumen coltañonla.

 4. ¿Chuqui miʼ pʌsbeñonla Lucas 10:25-29 chaʼan i pejcʌntel jiñi Biblia?

⁴ La com lac chʼʌmben i sujm muʼ bʌ i yʌl jiñi Biblia come, mi maʼañiqui, maʼañic mi caj lac tajben i wenlel. Laʼcu lac ñaʼtan tsaʼ bʌ i yʌlʌ Jesús yicʼot «juntiquil wen i cʌñʌ bʌ Mandar» (pejcan Lucas 10:25-29). Jiñi wiñic yom i ñaʼtan chuqui yom miʼ mel chaʼan miʼ taj i cuxtʌlel mach bʌ añic miʼ jilel, i Jesús tsiʼ yʌqʼue i ñaʼtan muʼ bʌ i yʌl i Tʼan Dios. Tiʼ sube: «¿Chuqui tsʼijbubil yaʼ ti Mandar? ¿Chuqui maʼ pejcan yaʼi?». Weñʌch bajcheʼ tsiʼ jacʼʌ jiñi wiñic. Tsiʼ yʌlʌ chaʼan jiñi Tsʼijbujel miʼ yʌl chaʼan yom miʼ cʼuxbin Dios yicʼot jiñi i piʼʌlob (Lv. 19:18, TNM; Dt. 6:5). Cheʼ jiñi tsiʼ cʼajti: «¿I majqui tiʼ sujm jiñi c piʼʌl?». Cheʼ bajcheʼ iliyi tsiʼ pʌsʌ chaʼan maʼañic miʼ chʼʌmben i sujm jiñi tsaʼ bʌ i pejca. I tiʼ caj iliyi mach yujilic bajcheʼ yom miʼ jacʼ.

 5. ¿Chucoch miʼ coltañonla lac chʼʌmben i sujm muʼ bʌ i yʌl jiñi Biblia jiñi oración yicʼot cheʼ mach ora ora jach mi lac pejcan?

⁵ Muʼ bʌ i coltañonla chaʼan mi lac ñumen chʼʌmben i sujm jiñi i Tʼan Dios jiñʌch cheʼ wen bajcheʼ mi lac pejcan. Cabʌl chuqui miʼ mejlel lac mel. Ñaxam bʌ, yom mi lac ñaxan mel oración chaʼan mi lac tech lac pejcan. Mi maʼañic lac chaʼan i coltaya Jehová maʼañic miʼ mejlel lac chʼʌmben i sujm muʼ bʌ i yʌl jiñi Biblia, jin chaʼan mi laj cʼajtiben chʼujul bʌ i yespíritu chaʼan miʼ coltañonla lac xucʼchocon lac pensar. Cheʼ jiñi, laʼ lac tech lac pejcan, pero mach ora ora jach mi lac mel, xucʼul jach yom mi lac mel chaʼan mi lac ñaʼtan majlel. Yambʌ muʼ bʌ i mejlel i coltañonla jiñʌch cheʼ mi lac pejcan ti cʼam bʌ tʼan o mi lac ñʌchʼtan i audiojlel jiñi Biblia. Ili mi caj i coltañonla chaʼan mi lac ñaʼtan muʼ bʌ i yʌl, i mi caj i cʌytʌl ti lac jol yicʼot ti lac pusicʼal (Jos. 1:8). Cheʼ bʌ miʼ yujtel lac pejcan, laʼ lac chaʼ pejcan Jehová ti oración chaʼan mi la cʌqʼuen wocolix i yʌlʌ chaʼan jiñi i Tʼan yicʼot chaʼan mi laj cʼajtiben chaʼan miʼ coltañonla lac jacʼ jiñi tsaʼ bʌ lac pejca.

 6. ¿Bajcheʼ miʼ coltañonla cheʼ mi lac melben lac bʌ cʼajtiya tac yicʼot mi lac mel alʌ nota tac cheʼ bʌ mi lac pejcan jiñi Biblia? (Qʼuele jaʼel jiñi foto tac).

⁶ ¿Chuqui yambʌ mi caj i coltañonla lac chʼʌmben i sujm muʼ bʌ lac pejcan ti Biblia? Jiñʌch cheʼ mi lac melben lac bʌ cʼajtiya tac chaʼan jiñi relato. Jumpʼejl ejemplo, ¿majquiyob jiñi woli (choncol) bʌ i tajtʌlob ti tʼan?, ¿majqui jiñi woli (yʌquel) bʌ ti tʼan?, ¿majqui woliʼ pejcʌntel i chucoch?, ¿baqui yicʼot jalix tsaʼ ujti pejtelel jiñi? Ili cʼajtiya tac mi caj i coltañonla chaʼan mi la cʌcʼ ti eʼtel (troñel) lac ñaʼtʌbal yicʼot chaʼan mi lac ñaʼtan jiñi ñumen ñuc tac bʌ i cʼʌjñibal. Cheʼ jaʼel miʼ mejlel lac mel alʌ nota tac. Cheʼ mi lac mel iliyi mi caj i coltañonla chaʼan mi lac ñaʼtan bajcheʼ an i sujmlel jiñi woli bʌ lac pejcan. Iliyi mi caj i coltañonla lac chʼʌmben i sujm jiñi tsaʼ bʌ lac pejca yicʼot chaʼan mi laj cʌy ti lac jol. ¿Chuqui miʼ mejlel lac tsʼijbun? Jiñi cʼajtiya tac tsaʼ bʌ lac melbe lac bʌ, jiñi tsaʼ bʌ lac chaʼle ti investigar, jiñi ñumen ñuc tac bʌ i cʼʌjñibal, bajcheʼ miʼ mejlel laj cʼʌn jiñi tsaʼ bʌ lac pejca o bajcheʼ yubil tsaʼ la cubi lac bʌ cheʼ bʌ tsaʼ lac pejca jiñi relato. Mi mucʼʌch lac mel iliyi, lajal bajcheʼ Jehová woliʼ pejcañonla mi caj la cubin.

 7. ¿Chuqui yom mi lac mel cheʼ bʌ mi lac pejcan jiñi Biblia, i chucoch? (Mateo 24:15).

⁷ Jesús tsiʼ taja ti tʼan junchajp yom bʌ mi lac mel chaʼan mi lac chʼʌmben i sujm jiñi Biblia: Jiñʌch cheʼ mi laj cʼʌn lac ñaʼtʌbal (pejcan Mateo 24:15). ¿Chuqui yom i yʌl jiñi? Jiñʌch cheʼ mi laj qʼuel bajcheʼ miʼ taj i bʌ jiñi woli bʌ lac pejcan yicʼot mi laj qʼuel chuqui tac qʼuexel bʌ. Cheʼ jaʼel, mi lac chaʼlen wersa chaʼan mi laj qʼuel jiñi mach bʌ cʼajpan tsiquilic. I cheʼ bajcheʼ tsiʼ yʌlʌ Jesús, cheʼ mi laj cʼʌn lac ñaʼtʌbal mi caj i coltañonla laj qʼuel chuqui tac woliʼ yʌcʼ chaʼan miʼ tsʼʌctiyel jiñi profecía tac. Cheʼ jaʼel, wen ñuc i cʼʌjñibal iliyi chaʼan mi lac ñumen tajben i wenlel muʼ bʌ lac pejcan ti Biblia.

 8. ¿Chuqui miʼ mejlel lac mel chaʼan mi laj cʼʌn lac ñaʼtʌbal cheʼ bʌ mi lac pejcan jiñi Biblia?

⁸ Jehová jiñʌch muʼ bʌ i yʌqʼuen i ñaʼtʌbal i wiñicob. Jin chaʼan, yom mi lac chaʼlen oración yicʼot mi laj cʼajtin lac ñaʼtʌbal (Pr. 2:6). Pero mach yomic jach mi lac chaʼlen oración. Yom mi la cʌqʼuen i yorajlel chaʼan mi lac tsajin (wen qʼuel) jiñi muʼ bʌ lac pejcan i mi lac wen qʼuel bajcheʼ miʼ taj i bʌ yicʼot jiñi la cujilix bʌ. An cabʌl publicación muʼ bʌ i mejlel i coltañonla chaʼan mi lac mel iliyi, cheʼ bajcheʼ jiñi Coltʌntel chaʼan estudio. Mi mucʼʌch lac pejcan, mi caj i mejlel laj qʼuel i sujmlel jiñi relato tac yicʼot bajcheʼ miʼ mejlel lac jacʼ jiñi muʼ bʌ laj cʌn (Heb. 5:14). Mi mucʼʌch laj cʼʌn lac ñaʼtʌbal chaʼan mi lac pejcan jiñi Tsʼijbujel, mi caj lac ñumen chʼʌmben i sujm.

 9. ¿Baqui bʌ cʌntesa maʼañic tsiʼ chʼʌmʌyob ti ñuc jiñi saduceojob?

⁹ Jiñi saduceojob wen i cʌñʌyob jiñi ñaxam bʌ joʼpʼejl libro chaʼan bʌ jiñi Tsʼijbujel hebreo, pero tsiʼ ñusayob ti pʼis ñuc tac bʌ cʌntesa am bʌ ti jiñi libro tac. Ñaʼtancu tsaʼ bʌ i sube Jesús jiñi saduceojob cheʼ bʌ tsiʼ tajayob ti tʼan chaʼan bʌ jiñi chaʼ chʼojyel chaʼan miʼ yʌcʼob ti yajlel. Jesús tsiʼ cʼajtibeyob: «¿Maʼañic ba tsaʼ laʼ pejca yaʼ tiʼ juñilel Moisés, yaʼ baqui tsaʼ tsʼijbunti chaʼan jiñi juntejc alʌ teʼ, chaʼan Dios tiʼ sube: ‹Joñon i Dioson Abrahán, i Dioson Isaac yicʼot i Dioson Jacob›?» (Mar. 12:18, 26). Miʼ mejlel la cʌl chaʼan jiñi saduceojob tsaʼʌch i wen pejcayob ili relato, pero jiñi cʼajtiya tsaʼ bʌ i mele Jesús tsiʼ pʌsʌ chaʼan maʼañic tsiʼ chʼʌmʌyob ti ñuc jumpʼejl ñuc bʌ cʌntesa: Jiñi chaʼ chʼojyel (Mar. 12:27; Luc. 20:38).d

10. ¿Chuqui jiñi yom bʌ mi lac wen qʼuel cheʼ bʌ mi lac pejcan jiñi Biblia?

¹⁰ ¿Chuqui mi laj cʌn ti jiñi tsaʼ bʌ i yʌlʌyob? Chaʼan yom mi lac wen qʼuel chuqui miʼ mejlel i pʌsbeñonla jumpʼejl versículo o jumpʼejl relato cheʼ bʌ mi lac pejcan jiñi Biblia. Yom mi laj qʼuel jiñi mach bʌ cʼajpan tsiquilic, la com lac taj i sujmlel yicʼot principio tac mach bʌ cʼajpan tsiquilic.

11. Cheʼ bajcheʼ miʼ yʌl 2 Timoteo 3:16, 17, ¿bajcheʼ miʼ mejlel lac sʌclan ñuc tac bʌ i cʼʌjñibal ti Biblia?

¹¹ ¿Bajcheʼ miʼ mejlel lac taj ñuc tac bʌ i cʼʌjñibal mach bʌ cʼajpan tsiquilic yaʼ ti Biblia? Laʼ lac tsajin 2 Timoteo 3:16, 17 (pejcan). Yaʼi miʼ yʌl chaʼan «pejtelel jiñi Tsʼijbujel [...] i cʼʌjñibal» chaʼan chʌnchajp: Chaʼan miʼ cʌntesʌntel lac piʼʌlob, chaʼan miʼ pʌsbentelob chuqui jiñi mach bʌ weñic, chaʼan miʼ tojʼesʌntel pejtelel chuqui miʼ yujtel yicʼot chaʼan miʼ tojʼesʌntel i ñaʼtʌbal lac piʼʌlob. Mucʼʌch i coltañonla jaʼel jiñi libro tac am bʌ ti Biblia maʼañic bʌ miʼ wen tajtʌl ti tʼan. Laʼ lac tsajin muʼ bʌ lac pejcan chaʼan mi laj qʼuel chuqui miʼ pʌsbeñonla tiʼ tojlel Jehová, jiñi ñaʼtʌbil bʌ i chaʼan o jiñi principio tac. ¿Chuqui yom mi lac sʌclan ti jumpʼejl relato chaʼan miʼ pʌsbeñonla chuqui jiñi mach bʌ weñic? Yom mi lac sʌclan chuqui tac miʼ coltañonla laj cʌn yicʼot lac choc loqʼuel mach bʌ weñic ti lac tojlel, yicʼot muʼ bʌ i coltañonla chaʼan chʌn xucʼulonla ti Jehová. Laʼ lac ñaʼtan bajcheʼ miʼ mejlel i tojʼesan junchajp mach bʌ weñic, tajol tsaʼ bʌ subentiyonla ti subtʼan. ¿I chuqui yom mi lac mel chaʼan jumpʼejl relato miʼ tojʼesan lac ñaʼtʌbal? Yom mi lac sʌclan pejtelel muʼ bʌ i coltañonla chaʼan cheʼ mi lac ñaʼtan bajcheʼ Jehová. Mi chʌn cʼajal lac chaʼan ili chʌnchajp, mi caj lac ñumen taj ñuc tac bʌ i cʼʌjñibal muʼ bʌ caj i coltañonla chaʼan mi lac ñumen ñusan lac bʌ tiʼ pejcʌntel jiñi Biblia.

12. ¿Chucoch tsiʼ cʼajtibe Jesús jiñi fariseojob mi mach pejcʌbilic i chaʼañob jiñi Tsʼijbujel?

¹² Jiñi fariseojob mach weñic bajcheʼ miʼ pejcañob jiñi i Tʼan Dios. Cheʼʌch tsiʼ pʌsʌ Jesús cheʼ bʌ tsiʼ cʼajtibeyob mi mach pejcʌbilobic i chaʼan jiñi Tsʼijbujel (Mat. 12:1-7).e Ti jiñi bʌ ora, jiñi fariseojob tsiʼ yʌlʌyob chaʼan jiñi xcʌntʼañob i chaʼan Jesús woliʼ ñusañob ti pʼis jiñi mandar chaʼan sábado. Chaʼan Jesús miʼ jacʼbeñob, tsiʼ taja ti tʼan chaʼpʼejl ejemplo am bʌ yaʼ ti Tsʼijbujel yicʼot jumpʼejl versículo am bʌ ti Oseas. Cheʼ bajcheʼ jiñi tsiʼ pʌsʌ chaʼan maʼañic miʼ chʼʌmbeñob i sujm jiñi Mandar yicʼot chaʼan maʼañobic i pʼuntaya. Ili wiñicob mucʼʌch i pejcañob i Tʼan Dios, pero maʼañic miʼ coltañob. ¿Chucoch? Come chanchan jax miʼ melob i bʌ i mucʼ jach i pejcañob jiñi Tsʼijbujel chaʼan miʼ qʼuelbeñob i sajtemal yambʌlob. Jiñi mach bʌ weñic i melbalob (chaʼlibalob) tsiʼ mʌctayob chaʼan maʼañic miʼ chʼʌmbeñob i sujm muʼ bʌ i pejcañob (Mat. 23:23; Juan 5:39, 40).

13. ¿Bajcheʼ yom mi lac pejcan jiñi Biblia, i chucoch?

¹³ Jiñi tsaʼ bʌ i yʌlʌ Jesús miʼ pʌsbeñonla chaʼan yom wen mi lac pejcan jiñi Biblia. Mach lac lajin jiñi fariseojob. Yom an lac pecʼlel i mi la cʌcʼ chaʼan Jehová miʼ cʌntesañonla. Cheʼ bajcheʼ miʼ yʌl Santiago 1:21, «yicʼot laʼ pecʼlel yom mi laʼ wʌcʼ chaʼan Dios miʼ pʌcʼ ti laʼ pusicʼal jiñi tʼan». Mi añʌch lac pecʼlel, mi caj la cʌcʼ ti ochel ti lac pusicʼal jiñi i Tʼan Dios. Cheʼ bʌ mi lac pejcan jiñi Biblia, mach yomic chanchan jax mi lac mel lac bʌ yicʼot mach yomic mi lac ñaʼtan i sajtemal yambʌlob. Cojach bajcheʼ jiñi mi caj la cʌcʼ chaʼan miʼ yochel ti lac pusicʼal muʼ bʌ i pʌsbeñonla chaʼan jiñi pʼuntaya, jiñi i yutslel lac pusicʼal yicʼot jiñi cʼuxbiya.

14. ¿Bajcheʼ miʼ mejlel lac ñaʼtan mi wolʌch la cʌcʼ chaʼan miʼ coltañonla jiñi Biblia? (Qʼuele jaʼel jiñi foto tac).

¹⁴ Miʼ mejlel lac ñaʼtan mi jiñi Biblia wolʌch i coltañonla ti bajcheʼ yilalonla tiʼ tojlel yambʌlob. Jiñi fariseojob maʼañic tsiʼ yʌcʼʌyob ti ochel jiñi i Tʼan Dios tiʼ pusicʼal i tiʼ caj jiñi miʼ jopʼbeñob i mul yañoʼ bʌ (Mat. 12:7). Jin chaʼan, laʼ laj qʼuel bajcheʼ yilal mi laj qʼuel yañoʼ bʌ yicʼot bajcheʼ yilalonla tiʼ tojlelob. Jumpʼejl ejemplo, ¿ñʌmʌl ba la cʌl chuqui wem bʌ tiʼ tojlel yambʌlob, o jin jach mi laj qʼuelbeñob i sajtemal? ¿Muʼ ba lac ñusʌbeñob i mul, o mi lac mulan la cʌlob yicʼot lac michʼleñob? Jiñi muʼ bʌ lac jacʼ miʼ pʌs mi wolʌch la cʌcʼ chaʼan jiñi Biblia miʼ coltañonla ti chuqui mi lac ñaʼtan, ti bajcheʼ yubil mi la cubin lac bʌ yicʼot ti chuqui mi lac mel (1 Tim. 4:12, 15; Heb. 4:12).

15. ¿Bajcheʼ yilal tsiʼ qʼuele Jesús jiñi Tsʼijbujel?

¹⁵ Jesús tsiʼ cʼuxbi jiñi Tsʼijbujel. Salmo 40:8 tsiʼ wʌn alʌ chaʼan mi caj i wen qʼuel ti ñuc: «C Dios tijicña wolic mel chuqui a wom. Lotol a mandar tic pusicʼal». Ili tsiʼ colta chaʼan tijicña yicʼot chaʼan miʼ chʌn melben i yeʼtel Jehová. Cheʼʌch mi caj i yujtel ti lac tojlel jaʼel mi mucʼʌch lac chaʼlen wersa lac pejcan jiñi i Tʼan Dios yicʼot chaʼan mi laj cʼuxbin (Sal. 1:1-3).

16. ¿Chuqui mi caj a mel chaʼan maʼ ñumen taj a wenlel cheʼ maʼ pejcan jiñi Biblia? (Qʼuele jiñi recuadro «Jiñi tsaʼ bʌ i yʌlʌ Jesús miʼ coltañonla lac chʼʌmben i sujm muʼ bʌ lac pejcan»).

¹⁶ Jiñi tsaʼ bʌ i yʌlʌ Jesús yicʼot jiñi i yejemplo miʼ coltañonla chaʼan ñumen wen bajcheʼ mi lac pejcan yicʼot mi lac chaʼlen ti estudiar jiñi Biblia. Chaʼan mi lac ñumen chʼʌmben i sujm, laʼ lac melben oración Jehová, xucʼul jach yom mi lac pejcan, laʼ lac melben lac bʌ cʼajtiya tac yicʼot laʼ lac mel alʌ nota tac. Chaʼan mi laj cʼʌn lac ñaʼtʌbal, laʼ lac wen tsajin jiñi relato i laʼ laj qʼuel muʼ bʌ i yʌl jiñi yan tac bʌ publicación. Chaʼan mi lac ñumen cʌn jiñi Tsʼijbujel, laʼ lac sʌclan ñuc tac bʌ i cʼʌjñibal, yicʼotto yaʼ ti relato tac mach bʌ wen cʌmbilic. I yom wen bajcheʼ mi lac pejcan chaʼan jiñi i Tʼan Dios miʼ coltañonla. Mi mucʼʌch lac mel pejtelel iliyi, mi caj lac ñumen taj lac wenlel cheʼ mi lac pejcan jiñi Biblia i mi caj lac ñumen lʌcʼtesan lac bʌ ti Jehová (Sal. 119:17, 18; Sant. 4:8).