CɅNTESɅNTEL 07

¿Bajcheʼ yilal Jehová?

Impreso bʌ

Cheʼ bʌ maʼ ñaʼtan Jehová, ¿bajcheʼ yilal maʼ wʌl? ¿Muʼ baʼ ñaʼtan chaʼan wen ñuc i chaʼan maʼañic a cʼʌjñibal tiʼ tojlel? ¿O muʼ baʼ ñaʼtan chaʼan Dios wen pʼʌtʌlʌch bajcheʼ jumpʼejl chajc, pero maʼañic wen tac bʌ i melbal (chaʼlibal)? ¿Bajcheʼqui ñoj yilal Jehová? Jiñi Biblia miʼ yʌl baqui bʌ jiñi i melbal tac yicʼot chaʼan mucʼʌch i chʼʌmet ti ñuc.

1. ¿Chucoch maʼañic miʼ mejlel laj qʼuel Dios?

«Dios juntiquilʌch espíritu» (Juan 4:24). Jehová mach lajalic bajcheʼ joñonla, maʼañic i bʌcʼtal yicʼot i chʼichʼel. Juntiquilʌch espíritu chumul bʌ ti panchan mach bʌ mejlic laj qʼuel jaʼel.

2. ¿Baqui bʌ jiñi i melbal tac Jehová?

Anquese maʼañic miʼ mejlel laj qʼuel Jehová, cheʼ bʌ mi laj cʌn miʼ cʼotel laj cʼuxbin come lajalʌch bajcheʼ juntiquil lac piʼʌl am bʌ wen tac bʌ i melbal. Jiñi Biblia miʼ yʌl: «Lac Yum miʼ mulan chuqui toj. Maʼanic miʼ cʌy i chaʼañoʼ bʌ» (Salmo 37:28). Cheʼ jaʼel, «wen yujil cʼuxbiya yicʼot pʼuntaya», ñumento tiʼ tojlel jiñi woli (choncol) bʌ i yubiñob wocol (Santiago 5:11). «Lʌcʼʌl an lac Yum [Jehová] baʼan chʼijyemoʼ bʌ i pusicʼal. Miʼ coltan jini woli bʌ i melob i pusicʼal» (Salmo 34:18). ¿I a wujil ba chaʼan jiñi muʼ bʌ lac mel miʼ mejlel i yʌqʼuen i tijicñʌyel o i chʼijyemlel Jehová? Jiñi muʼ bʌ i mel mach bʌ weñic, miʼ yʌqʼuen i chʼijyemlel i miʼ lowben i pusicʼal (Salmo 78:40, 41). Pero jiñi muʼ bʌ i mel chuqui wen, miʼ tijicñesʌben i pusicʼal (pejcan Proverbios 27:11).

3. ¿Bajcheʼ miʼ pʌs Jehová chaʼan miʼ cʼuxbiñonla?

Jiñi ñumen ñuc bʌ i melbal Jehová jiñʌch jiñi cʼuxbiya. 1 Juan 4:8 miʼ yʌl: «Dios cʼuxbiyajʌch». Jehová miʼ cʼʌn jiñi Biblia yicʼot pejtelel chuqui an i mele (pʌtʌ) chaʼan miʼ pʌsbeñonla i cʼuxbiya (pejcan Hechos 14:17). Ñaʼtancu bajcheʼ yilal tsiʼ meleyonla: Tsiʼ yʌqʼueyonla lac wut chaʼan mi laj qʼuel utsʼatax bʌ color tac, tsiʼ yʌqʼueyonla lac chiquin chaʼan mi lac ñʌchʼtan música yicʼot la quej chaʼan mi laj cʼux sumuc tac bʌ bʌlñʌcʼʌl. Yom chaʼan tijicña mi lac ñusan.

LAʼ LAC ÑUMEN ÑAʼTAN

Laʼ laj qʼuel chuqui miʼ cʼʌn Jehová chaʼan miʼ mel wen ñuc tac bʌ. I cheʼ jiñi, mi caj laj qʼuel bajcheʼ miʼ pʌs jiñi wen tac bʌ i melbal.

4. Jiñi chʼujul bʌ espíritu jiñʌch jiñi i pʼʌtʌlel Dios

Foto muʼ bʌ i pʌs jiñi melbil tac bʌ i chaʼan Dios ti chʼujul bʌ i yespíritu: 1. Planeta tac yicʼot jiñi universo. 2. Juntiquil tsaʼ bʌ i tsʼijbu jiñi Biblia wajali woliʼ tsʼijbun jiñi i ñaʼtʌbal Dios.

Joñonla mi laj cʼʌn ti eʼtel (troñel) jiñi laj cʼʌb, i Jehová miʼ cʼʌn jiñi chʼujul bʌ i yespíritu. Jiñi Biblia miʼ yʌl chaʼan jiñi chʼujul bʌ espíritu jiñʌch jiñi i pʼʌtʌlel Dios muʼ bʌ i cʼʌn chaʼan miʼ mel pejtelel chuqui yom, i mach juntiquilic quixtañu. Pejcanla Lucas 11:13 yicʼot Hechos 2:17, i tem alʌla iliyi:

Majqui jach miʼ cʼajtiben Dios jiñi chʼujul bʌ i yespíritu mi caj i yʌqʼuen. Bajcheʼ a wʌlʌ jatet, ¿juntiquil ba quixtañu jiñi chʼujul bʌ espíritu, o jiñʌch jiñi i pʼʌtʌlel Dios? ¿Chucoch che’ maʼ ñaʼtan bajcheʼ jiñi?

Jehová miʼ cʼʌn jiñi chʼujul bʌ i yespíritu chaʼan miʼ mel wen ñuc tac bʌ. Pejcanla Salmo 33:6 yicʼot 2 Pedro 1:20, 21, i tem alʌla iliyi:

¿Bajcheʼ tac an i cʼʌñʌ Jehová jiñi chʼujul bʌ i yespíritu?

Dibujo muʼ bʌ i pʌs jiñi melbil tac bʌ i chaʼan Dios ti chʼujul bʌ i yespíritu: 1. Planeta tac yicʼot jiñi universo. 2. Juntiquil tsaʼ bʌ i tsʼijbu jiñi Biblia wajali woliʼ tsʼijbun jiñi i ñaʼtʌbal Dios.

5. Jehová an wen tac bʌ i melbal muʼ bʌ lac mulan

Moisés xucʼul woli (yʌquel) i melben i yeʼtel Dios, pero tsiʼ mulaj i ñumen cʌn Jehová. Jin chaʼan Moisés tsiʼ yʌlʌ: «Pʌsbeñon a bijlel, chaʼan mij cʌñet» (Éxodo 33:13). Jehová tsaʼʌch i jacʼbe i tʼan i tsaʼ caji i tsictesan wen tac bʌ i melbal. Pejcanla Éxodo 34:4-6 i tem alʌla iliyi:

¿Baqui bʌ jiñi i melbal tac Jehová tsiʼ yʌlʌ?
¿Baqui bʌ jiñi i melbal tac Jehová maʼ ñumen mulan?

6. Jehová miʼ chʼʌmonla ti ñuc

Jiñi i tejclum Dios ti wajali, jiñi hebreojob, tsaʼ pʼumpʼun ticʼlʌntiyob ti eʼtel yaʼ ti Egipto. ¿Bajcheʼ yubil tsiʼ yubi i bʌ Jehová cheʼ bʌ tsiʼ qʼuele chaʼan jiñi i tejclum woliʼ ñusan wocol? Ñʌchʼtanla jiñi GRABACIÓN yicʼot pejcanla majlel jaʼel yaʼ ti laʼ Biblia, o pejcan jachla Éxodo 3:1-10. Cheʼ jiñi tem alʌla iliyi:

GRABACIÓN: Jehová chʼijyem tsiʼ yubi i bʌ cheʼ bʌ jiñi i tejclum woliʼ ñusan wocol (2:45)

Cheʼ bajcheʼ tsaʼ la cubi ti ili relato, ¿bajcheʼ yubil miʼ yubin i bʌ Jehová cheʼ bʌ miʼ qʼuel chaʼan mi lac ñusan wocol? (Qʼuelela jiñi versículo 7 yicʼot 8).
¿Yomʌch ba i coltañonla Jehová maʼ wʌl? ¿Mejlʌch ba i mel? ¿Chucoch che’ maʼ ñaʼtan bajcheʼ jiñi?

7. Mi laj qʼuel wen tac bʌ i melbal Jehová ti chuqui melbil tac i chaʼan

Dibujo tac: Juncojt delfín yicʼot i yal, utsʼatax bʌ ñichteʼ yicʼot juncojt xtsʼuñun.

Jehová miʼ pʌsbeñonla bajcheʼ yilal i melbal ti chuqui melbil tac i chaʼan. Qʼuelela jiñi VIDEO. Cheʼ jiñi pejcanla Romanos 1:20 i tem alʌla iliyi: