Qʼuele ti ñuc a majtan, jiñi cuxtʌlel

 1. ¿Majqui tsiʼ yʌqʼueyonla laj cuxtʌlel?

JEHOVÁ jiñʌch «cuxul bʌ» Dios (Jeremías 10:10). Jin tsiʼ meleyonla (pʌtʌyonla) i tsiʼ yʌqʼueyonla laj cuxtʌlel. Jiñi Biblia miʼ yʌl tiʼ tojlel: «Jatet tsaʼ mele pejtelel chuqui tac an. Tiʼ pejtelel tsaʼ mejli chaʼan cheʼʌch a wom. Tsaʼ laj aqʼue i cuxtʌlel» (Apocalipsis [Revelación] 4:11). Cuxulonla come cheʼʌch yom Jehová. Jiñi laj cuxtʌlel jumpʼejlʌch ñuc bʌ lac majtan (pejcan Hechos 17:24, 25).

 2. ¿Chuqui yom mi lac mel chaʼan wen mi la cajñel?

² Jehová miʼ yʌqʼueñonla pejtelel i cʼʌjñibal bʌ chaʼan laj cuxtʌlel, bajcheʼ i bʌl lac ñʌcʼ yicʼot jaʼ (Hechos 17:28). Cheʼ jaʼel, yom chaʼan tijicñayonla (Hechos 14:15-17). Chaʼan wen mi la cajñel, yom mi lac jacʼben i tʼan Dios (Isaías 48:17, 18).

 3. ¿Chuqui tsiʼ mele Jehová cheʼ bʌ Caín tiʼ tsʌnsa Abel?

³ Jiñi Biblia miʼ pʌsbeñonla chaʼan Jehová miʼ qʼuel ti ñuc i cuxtʌlel pejtelel wiñicob xʼixicob (quixtañujob). Laʼ laj qʼuel jiñi ejemplo chaʼan Caín, ñaxam bʌ i yalobil Adán yicʼot Eva. Caín tsaʼ wen michʼa yicʼot i yijtsʼin i cʼabaʼ Abel. Jin chaʼan, Jehová tiʼ sube chaʼan miʼ ticʼ i michʼajel pero maʼañic tsiʼ jacʼʌ, tsaʼ caji «i contrajin i yijtsʼin. Tsiʼ tsʌnsa» (Génesis 4:3-8). Jehová tsiʼ yʌqʼue i toj i mul come tiʼ tsʌnsa Abel (Génesis 4:9-13). Ili miʼ cʌntesañonla chaʼan jiñi michʼajel yicʼot tsʼaʼleya miʼ mejlel i sujtesañonla ti jontol bʌ quixtañu. Jiñi muʼ bʌ i melob (chaʼleñob) bajcheʼ jiñi, maʼañic mi caj i tajob i cuxtʌlel maʼañic bʌ i jilibal come «majchical jach miʼ tsʼaʼlen i piʼʌlob ajtsʌnsajʌch cheʼ jini. La cujilʌch isujm jini ajtsʌnsa machʼan i cuxtyʌlel machʼʌ yujil jilel» (1 Juan 3:15, Jini wen bʌ tʼan [WT]). Chaʼan wen miʼ qʼuelonla Jehová, yom mi laj cʼuxbin pejtelel quixtañujob (1 Juan 3:11, 12).

 4. ¿Chuqui miʼ cʌntesañonla chaʼan laj cuxtʌlel junchajp muʼ bʌ i yʌl jiñi Lujumpʼejl Mandar?

⁴ Cheʼ bʌ ñumeñix cabʌl mil jab, Jehová tsiʼ yʌqʼue Moisés jiñi Lujumpʼejl Mandar. Junchajp muʼ bʌ i yʌl jiñʌch: «Mach a chaʼlen tsʌnsa» (Deuteronomio 5:17). Ti wajali, jiñi muʼ bʌ i yʌlo tsʌnsan i piʼʌl miʼ tsʌnsʌntel jaʼel. Ili miʼ pʌsbeñonla chaʼan Jehová miʼ wen qʼuel ti ñuc jiñi cuxtʌlel.

 5. ¿Bajcheʼ yilal miʼ qʼuel Jehová cheʼ miʼ yʌlo chojquel jiñi alʌl cʌntʌbilto bʌ?

⁵ ¿Chuqui miʼ ñaʼtan Jehová cheʼ miʼ yʌlo chojquel jiñi alʌl? Jehová wen ñuc miʼ qʼuel i cuxtʌlel jiñi alʌl maxto bʌ i yila pañimil. Yaʼ ti mandar tsaʼ bʌ i yʌqʼue jiñi israelob tsiʼ yʌlʌ chaʼan mi an majqui miʼ choc juntiquil xʼixic cʌntʌbil bʌ i yalobil i jiñi alʌl miʼ chʌmel (sajtel), jiñi am bʌ i mul yom miʼ chʌmel jaʼel (pejcan Éxodo 21:22-25; Salmo 127:3). Ili miʼ cʌntesañonla chaʼan Jehová maʼañic miʼ mulan cheʼ bʌ miʼ yʌlo chojquel jiñi alʌl (qʼuele jiñi nota 27).

6, 7. ¿Bajcheʼ mi lac pʌsben Jehová chaʼan mucʼʌch laj qʼuel ti ñuc laj cuxtʌlel?

⁶ ¿Bajcheʼ mi lac pʌsben Jehová chaʼan mi laj qʼuel ti ñuc laj cuxtʌlel? Mach yom mi lac mel muʼ bʌ i yʌcʼ ti wocol laj cuxtʌlel o i chaʼan yambʌlob. Jin chaʼan, maʼañic mi lac chaʼlen cʼujts, yʌcʼʌjel yicʼot maʼañic mi laj cʼʌn droga, come miʼ mejlel i cʼamʼesañonla yicʼot i tsʌnsañonla.

⁷ Dios tsiʼ yʌqʼueyonla laj cuxtʌlel yicʼot lac bʌcʼtal, jin chaʼan yomʌch mi laj cʼʌn bajcheʼ miʼ mulan. Jiñi lac bʌcʼtal yom mi laj cʌntan. Mi maʼañic, bibiʼ mi caj i qʼuelonla Dios (Romanos 6:19; 12:1; 2 Corintios 7:1). Mach mejl lac chʼujutesan Dios mi maʼañic mi laj qʼuel ti ñuc laj cuxtʌlel, lac majtan tsaʼ bʌ i yʌqʼueyonla. An qʼuiñil machʌch cʼuñic ti cʌyol jiñi mach bʌ weñic. Pero mi mucʼʌch laj qʼuel ti ñuc laj cuxtʌlel yicʼot la comʌch laj cʌy jiñi melbalʌl tac, Jehová mi caj i coltañonla.

 8. ¿Chuqui yom mi lac mel chaʼan maʼañic mi laj cʌcʼ ti wocol laj cuxtʌlel yicʼot i chaʼan yambʌlob?

⁸ Tsaʼix laj cʌñʌ chaʼan jiñi laj cuxtʌlel jumpʼejlʌch ñuc bʌ lac majtan. Jehová yom chaʼan mi lac chaʼlen wersa chaʼan maʼañic mi la cʌcʼ ti wocol laj cuxtʌlel yicʼot i chaʼan yambʌlob. Jin chaʼan, wen jach yom mi lac ñijcan jiñi laj carro, motocicleta o yan tac bʌ. Cheʼ jaʼel, maʼañic mi laj cajel ti alas baqui miʼ mejlel lac low lac bʌ o tajol mi lac chʌmel, bajcheʼ jiñi lucha libre yicʼot yan tac bʌ alas (Salmo 11:5). Yom mi laj qʼuel chaʼan wen jiñi la cotot. Jehová tiʼ sube jiñi israelob: «Cheʼ maʼ mel tsijiʼ bʌ a wotot, yom maʼ joy tsʼajquiben i jol yaʼ baʼ mi laʼ letsel ame yajlic juntiquil, ame anic a mul cheʼ jini» (Deuteronomio 22:8).

 9. ¿Bajcheʼ yilal yom mi laj qʼuel jiñi añimal tac?

⁹ Jehová i wentajʌch bajcheʼ yilal mi laj qʼuel jiñi añimal tac. Mucʼʌch i yʌqʼueñonla lac tsʌnsan chaʼan laj cʼux o cheʼ woliʼ yʌcʼ ti wocol laj cuxtʌlel (Génesis 3:21; 9:3; Éxodo 21:28, 29). Pero mach yom mi lac ticʼlan yicʼot lac toʼol tsʌnsan o mi la cʌcʼ i lajal jatsʼob i bʌ chaʼan mi lac tijicñesan lac bʌ (Proverbios 12:10).

10. ¿Chucoch la cujil chaʼan jiñi chʼichʼ i wentʌlelʌch cuxtʌlel?

¹⁰ Jehová chʼujul miʼ qʼuel jiñi chʼichʼ come i wentʌlelʌch cuxtʌlel. Jin chaʼan, tsiʼ yʌqʼue i toj i mul Caín come tsiʼ becʼbe i chʼichʼel Abel o tiʼ tsʌnsa (Génesis 4:10). Cheʼ bʌ ñumeñix jiñi ñuc bʌ Butʼjaʼ, Jehová tsiʼ chaʼ jamʌ pʌsʌ chaʼan jiñi chʼichʼ i wentʌlelʌch cuxtʌlel. Tsiʼ yʌcʼʌ chaʼan Noé yicʼot i familia miʼ cʼuxob jiñi añimal tac. Tiʼ subeyob: «I bʌlʌch laʼ ñʌcʼ pejtel cuxul tac bʌ muʼ bʌ ti xʌmbal. Cheʼ bajcheʼ tsaʼ cʌqʼueyetla pimel yicʼot yambʌ i wut lum, mi cʌqʼueñetla pejtel chuqui tac an». Cojach junchajp tsaʼ bʌ i yʌlʌ chaʼan mach yomic miʼ cʼuxob: «Pero mach laʼ cʼux yicʼot i chʼichʼel come ticʼbil. Jiñʌch i cuxtilel» (Génesis 1:29; 9:3, 4).

11. ¿Baqui bʌ mandar chaʼan chʼichʼ tsiʼ yʌqʼue Jehová jiñi i tejclum?

¹¹ Cheʼ bʌ ñumeñix 800 jab i subentel Noé chaʼan mach yom miʼ cʼux chʼichʼ, Jehová tiʼ sube i tejclum: «Cheʼ an bʌteʼel mi teʼlemut muʼ bʌ i chucob, mi jini israelob, mi jini ñajt bʌ chʼoyolob, wersa mi caj i becʼbeñob i chʼichʼel ti lum cheʼ miʼ tsʌnsañob». I tsiʼ yʌlʌ: «Mach mejlic i wis cʼuxob jini chʼichʼ» (Levítico 17:13, 14). Jehová yomto chaʼan jiñi i tejclum chʼujul miʼ qʼuelob jiñi chʼichʼ. Miʼ mejlel i cʼuxob weʼel, pero jiñi chʼichʼ maʼañic. Cheʼ miʼ tsʌnsañob juncojt añimal chaʼan miʼ cʼuxob, yomʌch miʼ becbeñob i chʼichʼel.

12. ¿Bajcheʼ yilal yom miʼ qʼuelob chʼichʼ jiñi xcʌntʼañob?

¹² Cheʼ bʌ añix ora i chʌmel Jesús, jiñi apóstolob yicʼot ancianojob yaʼ ti Jerusalén tsiʼ tempayob i bʌ chaʼan miʼ qʼuelob baqui bʌ Mandar tsaʼ bʌ aqʼuentiyob jiñi israelob yomto miʼ jacʼob. Tsiʼ yʌlʌyob: «Jini Chʼujul bʌ i Chʼujlel Dios tiʼ wen cotyʌyon lojon c pensalin. Cheʼ jini ti lojon c ñaʼtyʌ chaʼan mach yom mi lojon c lolon subeñetla cabʌl chʌ bʌ yom mi laʼ mel. Jini jach mi lojon c subeñetla jini mandar wersa yom chʼujbintic [...]: Maʼ mi laʼ cʼuxeʼ weʼel tsaʼ bʌ ajqʼui melel bʌ dios tyac. Maʼ mi laʼ cʼuxeʼ chʼichʼ. [...] Cʌñʌtyan laʼ bʌ chaʼan maʼan tʼan yicʼot yambʌ mach bʌ laʼ wijñamic mach bʌ laʼ ñoxiʼalic. Mi ti laʼ chʼujbi pejtyel jini, weñʌch mi quej laʼ wajñel [...]» (Hechos 15:28, 29, WT; 21:25). Jehová tsiʼ coltayob i ñaʼtan chaʼan mucʼʌch i bej qʼuel ti ñuc jiñi chʼichʼ i chaʼan jiñi xcʌntʼañob yomʌch chʼujul miʼ qʼuelob. Jiñi xcʌntʼañob ti ñaxam bʌ siglo mach yomic miʼ cʼuxob yicʼot miʼ japob chʼichʼ. Cheʼ jaʼel, mach yomic miʼ cʼuxob weʼelʌl mi mach wen tsaʼ locʼsʌbenti i chʼichʼel. I melol jiñi, tsʌts bʌ mulil bajcheʼ i chʼujutesʌntel diosteʼ yicʼot tsʼiʼlel. Cʼʌlʌl cheʼ jiñi, jiñi i sujm bʌ xñoptʼañob maʼañic miʼ cʼuxob yicʼot miʼ japob chʼichʼ. Jehová bej yom chaʼan chʼujul mi laj qʼuel jiñi chʼichʼ.

13. ¿Chucoch maʼañic miʼ chʼʌmob chʼichʼ jiñi xcʌntʼañob?

¹³ ¿Yom ba i yʌl chaʼan jiñi xcʌntʼañob mach yomic miʼ chʼʌmob chʼichʼ? Cheʼʌchi. Jehová miʼ yʌl chaʼan mach yom mi laj cʼux o lac jap chʼichʼ. Ñaʼtancu: Cheʼ muqʼuic i subeñet jiñi doctor chaʼan maʼañic maʼ jap lembal, ¿muʼ ba caj a wotsan ti a chijil? Maʼañic. Cheʼ jaʼel, jiñi i mandar Dios chaʼan mach yom mi laj cʼux yicʼot lac jap chʼichʼ, ochem jaʼel chaʼan mach yomic mi lac chʼʌm (qʼuele jiñi nota 28).

14. Anquese la com laj cʼocʼlel, ¿chuqui mach bʌ yomic mi lac mel?

¹⁴ ¿Ixcu mi juntiquil doctor miʼ yʌl chaʼan mi caj lac chʌmel mi maʼañic mi lac chʼʌm chʼichʼ? Jujuntiquil mi caj i ñaʼtan mi mucʼʌch caj i jacʼben i mandar Dios. Jiñi xcʌntʼañonbʌla mi laj qʼuel jiñi cuxtʌlel bajcheʼ jumpʼejl lac majtan tilem bʌ ti Dios, jin chaʼan mi laj qʼuel ti ñuc. Chaʼan bej cuxul mi la cajñel mi lac sʌclan yambʌ tsʼac tac, pero maʼañic mi lac chʼʌm chʼichʼ.

15. ¿Majqui jiñi yom bʌ mi lac ñumen jacʼben i tʼan?

¹⁵ Mach la com chʌmel, jin chaʼan mi lac chaʼlen wersa chaʼan cʼocʼonla. Pero jiñi chʼichʼ i wentʌlelʌch cuxtʌlel yicʼot chʼujul tiʼ wut Dios, jin chaʼan maʼañic mi lac chʼʌm. Ñumen ñuc bʌ chaʼañonla jiñʌch i jacʼbentel i tʼan Jehová i mach jiñic cheʼ mi lac ñop lac tamʼesan laj cuxtʌlel. Jesús tsiʼ yʌlʌ: «Come majqui jach yom i bajñel cʌntan i cuxtʌlel mi caj i sʌt, pero jiñi muʼ bʌ i yʌcʼ i cuxtʌlel chaʼañ miʼ tsajcañon mi caj i taj» (Mateo 16:25, Jiñi tsijiʼ bʌ wen tʼañ chaʼañ estudio). Com lac jacʼben i tʼan Jehová come mi laj cʼuxbin. Cheʼ jaʼel, yujil chuqui wem bʌ ti lac tojlel. Cheʼ bajcheʼ Jehová, mi laj qʼuel ti ñuc jiñi cuxtʌlel yicʼot chʼujulʌch (Hebreos 11:6).

16. ¿Chucoch mi lac jacʼben i tʼan Dios jiñi xcʌntʼañonbʌla?

¹⁶ Jiñi i sujm bʌ xcʌntʼañonla comʌch lac jacʼben i mandar Dios chaʼan jiñi chʼichʼ. Jin chaʼan, maʼañic mi laj cʼux yicʼot lac jap mi muqʼuicto lac chʼʌm bajcheʼ tsʼac.a Pero mucʼʌch lac chʼʌm yan tac bʌ tsʼac chaʼan mi lac ñop laj cʼoqʼuesan lac bʌ. Mi lac ñop chaʼan Jehová yujil chuqui wen chaʼañonla come jin tsiʼ meleyonla.

17. ¿Bajcheʼ tsaʼ aqʼuentiyob i cʼʌn chʼichʼ jiñi israelob?

¹⁷ Yaʼ ti mandar tsaʼ bʌ aqʼuenti Moisés, Jehová tiʼ sube jiñi israelob: «I chʼujlel muʼ bʌ i yʌqʼuen i cuxtʌlel jini alʌcʼʌl an tiʼ chʼichʼel. Tsaʼix cʌqʼueyet chaʼan maʼ tsijcan yaʼ ti pulʌntib chaʼan i ñusʌntel la mul» (Levítico 17:11). Cheʼ bʌ jiñi israelob miʼ chaʼleñob mulil, miʼ chʼʌmob majlel juncojt añimal yaʼ ti templo chaʼan jiñi xmotomaj miʼ tsʌnsan yicʼot miʼ tsʼitaʼ becʼben i chʼichʼel yaʼ ti pulʌntib chaʼan miʼ ñusʌbentelob i mul ti Jehová. Cojach bajcheʼ iliyi, Jehová tsiʼ yʌcʼʌ chaʼan miʼ cʼʌjñel jiñi chʼichʼ.

18. ¿Chuqui tsaʼ mejli lac taj cheʼ bʌ tsiʼ yʌcʼʌ i cuxtʌlel Jesús?

¹⁸ Cheʼ bʌ Jesús tsajñi ti Pañimil, tsiʼ yʌcʼʌ i cuxtʌlel o chʼichʼel chaʼan miʼ ñusʌntel lac mul. Cheʼ bajcheʼ jiñi, mach cʼʌñʌlix miʼ tsʌnsʌntel añimal tac bajcheʼ tsiʼ yʌlʌ jiñi Mandar (Mateo 20:28; Hebreos 10:1). I cuxtʌlel Jesús wen ñuc i cʼʌjñibal. Wocolix i yʌlʌ jiñi, Jehová tsaʼ mejli i yʌqʼueñonla lac pijtaya chaʼan mi lac chumtʌl tiʼ pejtelel ora (Juan 3:16; Hebreos 9:11, 12; 1 Pedro 1:18, 19).

19. ¿Chuqui yom mi lac mel chaʼan maʼañix ti lac wenta i cuxtʌlel yañoʼ bʌ?

¹⁹ Mi la cʌqʼuen wocolix i yʌlʌ Jehová chaʼan laj cuxtʌlel, jiñi ñuc bʌ lac majtan. Jin chaʼan, la com lac suben jiñi quixtañujob chaʼan mi mucʼʌch i ñopob Jesús, miʼ mejlelob ti chumtʌl tiʼ pejtelel ora. Cheʼ jaʼel, mi lac chaʼlen wersa lac pʌsbeñob chuqui yom miʼ melob chaʼan miʼ tajob i cuxtʌlel maʼañic bʌ i jilibal come mi laj cʼuxbiñob (Ezequiel 3:17-21). Cheʼ bajcheʼ jiñi, miʼ mejlel la cʌl bajcheʼ jiñi apóstol Pablo: «Mach chʌn c wentajix laʼ cuxtʌlel ti laʼ pejtelel. Maʼanic tsac chaʼle bʌqʼuen, pero tsʼʌcʌl tsac subeyetla i tʼan Dios» (Hechos 20:26, 27). Cheʼ mi la cʌcʼ ti cʌñol Jehová yicʼot chaʼan miʼ qʼuel ti ñuc jiñi cuxtʌlel, mi lac pʌs chaʼan mucʼʌch laj qʼuel ti ñuc jaʼel jiñi cuxtʌlel yicʼot chʼichʼ.