NOTA TAC

I cʼabaʼ Dios jiñʌch Jehová, i cheʼ bajcheʼ miʼ yʌl junmojt muʼ bʌ i tsajiñob Biblia, ili cʼabaʼʌl yom i yʌl «Jiñʌch miʼ Mel chaʼan cheʼʌch miʼ Sujtel». Jehová maʼañic i pʼisol i pʼʌtʌlel i jin tsiʼ mele pejtelel chuqui an. An i pʼʌtʌlel chaʼan miʼ mel pejtelel chuqui yom.

Jiñi i cʼabaʼ Dios ti hebreo miʼ tsʼijbuntel ti chʌmpʼejl letra, i cʌmbil bajcheʼ YHWH o JHVH. Yaʼ ti ñaxam bʌ tsʼijbujel hebreo, jiñi i cʼabaʼ Dios lʌcʼʌl ti 7,000 miʼ tilel. Jiñi quixtañujob tiʼ petol pañimil cabʌl bajcheʼ miʼ tsʼijbuñob i cʼabaʼ Jehová yicʼot cheʼʌch miʼ yʌlob cheʼ bajcheʼ ñumen cʌmbil tiʼ tʼañob.

▸ Cʌntesʌntel 1, párr. 15, nota

Dios tsiʼ yʌcʼʌ ti mejlel jiñi Biblia, pero tsiʼ cʼʌñʌ wiñicob chaʼan miʼ tsʼijbuñob. Lajal bajcheʼ juntiquil tatuchʌl muʼ bʌ i suben i buts chaʼan miʼ tsʼijbun jumpʼejl carta. Jiñi i buts jiñʌch muʼ bʌ i cajel ti tsʼijb pero jiñi carta i chaʼañʌch jiñi tatuchʌl. Cheʼʌch tsaʼ ujti jaʼel yicʼot jiñi Biblia, Dios tsiʼ cʼʌñʌ jiñi chʼujul bʌ i yespíritu chaʼan miʼ tojʼesan jiñi xtsʼijbayajob chaʼan maʼañic miʼ bajñel tsʼijbuñob i ñaʼtʌbal. Jiñi i yespíritu cabʌl bajcheʼ tsiʼ tojʼesayob. Jumpʼejl ejemplo, an i tajol tsaʼ pʌsbentiyob ti ñajal tac i ti wiʼil tiʼ tsʼijbuyob.

▸ Cʌntesʌntel 2, párr. 5

Jiñʌch cʌntesa tac am bʌ ti Biblia muʼ bʌ i coltañonla chaʼan mi lac yajcan lac mel chuqui wen. Jumpʼejl ejemplo, jiñi principio muʼ bʌ i yʌl chaʼan «jini jontoloʼ bʌ lac piʼʌlob miʼ bibʼesañob lac pusicʼal» miʼ pʌsbeñonla chaʼan jiñi yambʌ lac piʼʌlob miʼ ñijcañoñobla lac mel chuqui wen o mach bʌ weñic (1 Corintios 15:33). Cheʼ jaʼel, jiñi principio muʼ bʌ i yʌl chaʼan «pejtelel chuqui jach miʼ pʌcʼ winic mi caj i cʼaj» miʼ pʌsbeñonla chaʼan pejtelel muʼ bʌ lac mel añʌch i wenlel o i wocolel (Gálatas 6:7).

▸ Cʌntesʌntel 2, párr. 12

Jiñʌch tʼan tac tilem bʌ ti Dios. An i tajol jiñʌch i tsictesʌntel chuqui yom bʌ Dios, mandar tac chaʼan bajcheʼ yilal yom lac melbal, o tsʌts bʌ ticʼojel. Miʼ mejlel i yʌl jaʼel chuqui miʼ cajel ti talto bʌ qʼuin. Cabʌl profecía am bʌ ti Biblia tsaʼix tsʼʌctiyi.

▸ Cʌntesʌntel 2, párr. 13

Pejtelel jiñi profecía tsaʼ bʌ ajli chaʼan jiñi Mesías tsaʼ tsʼʌctiyi ti Jesús. Qʼuele jiñi recuadro «Profecía tac chaʼan jiñi Mesías».

▸ Cʌntesʌntel 2, párr. 17, nota

Jehová yom tsiʼ yʌlʌ chaʼan ili Lum miʼ sujtel ti jumpʼejl paraíso i miʼ chumtʌlob jiñi quixtañujob muʼ bʌ i cʼuxbiñob. Pero maʼañic qʼuextʌyem jiñi tsaʼ bʌ i ñaʼta. Dios lʌcʼʌlix mi caj i jisan jontolil i jiñi muʼ bʌ i jacʼbeñob i tʼan mi caj i yʌqʼueñob i cuxtʌlel maʼañic bʌ i jilibal.

▸ Cʌntesʌntel 3, párr. 1

Jiñʌch jiñi ángel tsaʼ bʌ i teche i contrajin Dios. Satanás yom i yʌl «xcontra o xmʌctaya». Cheʼʌch miʼ subentel come an tiʼ contra Jehová. I jiñi tʼan Diablo yom i yʌl «xjopʼtʼan». Miʼ subentel jaʼel bajcheʼ jiñi come miʼ yʌl mach bʌ i sujmic tiʼ tojlel Dios yicʼot miʼ lotin quixtañujob.

▸ Cʌntesʌntel 3, párr. 4

Cheʼ bʌ Jehová maxto i mele ili Pañimil, tsiʼ mele jiñi ángelob. Tsiʼ meleyob chaʼan miʼ chumtʌlob ti panchan. An ñumen ti 100 millón ángelob (Daniel 7:10). Ti jujuntiquil an i cʼabaʼ yicʼot mach junlajalobic. Ili xucʼul bʌ ángelob añob i pecʼlel, mach yomobic chaʼan miʼ chʼujutesʌntelob. Mach junlajalic jiñi eʼtel aqʼuebiloʼ bʌ. An woliyoʼ bʌ ti eʼtel baʼan i buchlib Jehová, an muʼ bʌ i tsictesañob chuqui miʼ yʌl Dios, miʼ cʌntañob yicʼot miʼ tojʼesañob majlel i wiñicob Dios ila ti Lum, miʼ yʌcʼob ti tsʼʌctiyel tsʌts tac bʌ i ticʼojel Jehová yicʼot miʼ coltañob jiñi subtʼan chaʼan Yumʌntel (Salmo 34:7; Apocalipsis [Revelación] 14:6; 22:8, 9). Ti talto bʌ qʼuin, jiñi ángelob temel yicʼot Jesús miʼ cajelob ti guerra ti Armagedón (Apocalipsis 16:14, 16; 19:14, 15).

▸ Cʌntesʌntel 3, párr. 5; cʌntesʌntel 10, párr. 1

Jiñi mulil jiñʌch cheʼ mi lac mulan, mi lac ñaʼtan o mi lac mel maʼañic bʌ miʼ mulan Jehová. Miʼ ñajtʼesañonla ti Dios. Jin chaʼan, tsiʼ yʌqʼueyonla i mandar tac yicʼot principio tac muʼ bʌ i coltañonla chaʼan maʼañic mi lac yʌlol chaʼlen mulil. Cheʼ tiʼ tejchibal, toj pejtelel chuqui tsiʼ mele Jehová. Pero Adán yicʼot Eva tsiʼ ñusʌbeyob i tʼan. Cheʼ bʌ tsiʼ meleyob jiñi, tsaʼ sujtiyob ti xmulil, tsaʼ ñoxʼayob yicʼot tsaʼ chʌmiyob. Joñonla jaʼel mi lac ñoxʼan yicʼot mi lac chʌmel come Adán tsiʼ ñusʌbeyonla jiñi mulil.

▸ Cʌntesʌntel 3, párr. 7; cʌntesʌntel 5, párr. 3

Jiñʌch jiñi guerra baqui Dios mi caj i jisan jiñi pañimil am bʌ tiʼ cʼʌb Satanás yicʼot pejtelel jontolil.

▸ Cʌntesʌntel 3, párr. 13; cʌntesʌntel 8, párr. 18

Jumpʼejlʌch yumʌntel waʼchocobil bʌ i chaʼan Jehová ti panchan. Jiñi Rey jiñʌch Jesucristo. Ti talto bʌ qʼuin, Jehová mi caj i cʼʌn i Yumʌntel chaʼan miʼ jisan pejtelel jontolil. Ili Yumʌntel mi caj i mel i yeʼtel tiʼ pejtelel Pañimil.

▸ Cʌntesʌntel 3, párr. 14

Jesús jiñʌch ñaxam bʌ i melbal Dios. Jehová tsiʼ choco tilel ila ti Pañimil chaʼan miʼ chʌmel ti laj caj. Ti wiʼil, Jehová tsiʼ chaʼ chʼojyesa. Ili ora Jesús wolix ti yumʌntel yaʼ ti panchan bajcheʼ Rey tiʼ Yumʌntel Dios.

▸ Cʌntesʌntel 4, párr. 2

Jiñi Biblia tsiʼ wʌn alʌ jala mi caj i tsictiyel jiñi Mesías. Yom miʼ ñumel 69 semana, iliyi tsaʼ tejchi ti tsijquel cheʼ ti jabil 455 cheʼ maxto tilemic Cristo (m.t.C.), i tsaʼ ujti ti jabil 29 cheʼ bʌ tsajñix Cristo (t.C.).

¿Bajcheʼ la cujil chaʼan ti jabil 29 tsaʼ tsʼʌctiyi jiñi 69 semana? Ili 69 semana tsaʼ tejchi ti tsijquel ti jabil 455 m.t.C., cheʼ bʌ Nehemías tsaʼ sujti ti Jerusalén i tsiʼ teche i chaʼ mel jiñi tejclum (Daniel 9:25; Nehemías 2:1, 5-8). Cheʼ bajcheʼ jiñi tʼan docena miʼ yʌqʼueñonla lac ñaʼtan jiñi número 12, jiñi tʼan semana miʼ yʌcʼ ti ñaʼtʌntel jiñi número 7. Jiñi woli bʌ i yʌjlel ti ili profecía mach yomic i yʌl jumpʼejl semana wucpʼejl jach bʌ qʼuin miʼ chʼʌm tilel, woliʼ taj ti tʼan jabil tac. Ili mucʼʌch i taj i bʌ bajcheʼ miʼ cʼʌjñel jiñi tsic yaʼ ti Biblia cheʼ bʌ miʼ yʌl profecía tac: «Jumpʼejl qʼuin i wentajʌch jumpʼejl jab» (Ezequiel 4:6; Números 14:34). Ili yom i yʌl chaʼan ti jujumpʼejl semana an wucpʼejl jab i ti 69 semana 483 jab (69 miʼ chaʼlentel ti multiplicar yicʼot 7). Cheʼ mi lac tech lac tsic jubel 483 ti jabil 455 m.t.C. mi laj cʼotel ti jabil 29 t.C. (come maʼañic jabil cero). Jesús tsiʼ chaʼle chʼʌmjaʼ cheʼ ti jabil 29, i ti jimbʌ ora tsaʼ sujti ti Mesías (Lucas 3:1, 2, 21, 22).

Ili profecía miʼ taj ti tʼan yambʌ jumpʼejl semana, o yambʌ 7 jab. Cheʼ ñumel mucʼ jiñi jabil tac, jiñi Mesías mi caj i tsʌnsʌntel tsaʼ ajli. Ili tsaʼ ujti cheʼ ti jabil 33 t.C. Ti jiñi jabil 36 tsaʼ caji ti sujbel jiñi wen tʼan chaʼan i Yumʌntel Dios tiʼ pejtelel tejclum, mach cojach tiʼ tojlel jiñi judíojob (Daniel 9:24-27).

▸ Cʌntesʌntel 4, párr. 7, nota

Jiñi Biblia miʼ pʌs chaʼan Jehová tsiʼ mele pejtelel chuqui an yicʼot tsiʼ mele Jesús cheʼ bʌ maxto añic chuqui melbil (Colosenses 1:15). Jesús mach jiñic jiñi Dios mach bʌ añic i pʼisol i pʼʌtʌlel. Maʼañic tsiʼ wis alʌ chaʼan lajalʌch bajcheʼ Dios. Ili jiñʌch tsaʼ bʌ i yʌlʌ: «Ñumen ñuc c Tat bajcheʼ joñon» (Juan 14:28; 1 Corintios 15:28). Pero an ñopbalʌl tac muʼ bʌ i pʌsob chaʼan uxtiquil Dios. Miʼ yʌlob chaʼan jiñi Tatʌl, jiñi i Yalobil yicʼot jiñi chʼujul bʌ espíritu uxtiquilob pero juntiquil jach Dios. Jiñi tʼan uxtiquil Dios maʼañic miʼ tilel ti Biblia. Jumpʼejlʌch cʌntesa mach bʌ i sujmic.

Jiñi chʼujul bʌ espíritu jiñʌch i pʼʌtʌlel Dios. Jiñʌch i pʼʌtʌlel mach bʌ tsiquilic muʼ bʌ i cʼʌn i mel chuqui miʼ mulan. Mach quixtañujic. Jumpʼejl ejemplo, jiñi xñoptʼañob ti ñaxam bʌ siglo «tsaʼ laj bujtʼiyob ti Chʼujul bʌ Espíritu». I Jehová tsiʼ yʌlʌ: «Mi caj cʌqʼueñob quEspíritu pejtelel winicob xʼixicob» (Hechos 2:1-4, 17).

▸ Cʌntesʌntel 4, párr. 12; cʌntesʌntel 15, párr. 17

¿Chucoch maʼañic miʼ cʼʌñob cruz chaʼan miʼ chʼujutesañob Dios jiñi i sujm bʌ xñoptʼañob?

1. Jiñi mach bʌ i sujmic ñopbalʌl tac añix ora i cajel i cʼʌn jiñi cruz. Cʼʌlʌl ti wajali, jiñʌch muʼ bʌ i cʼʌñob i chʼujutesañob chuqui tac am bʌ ti pañimil yicʼot pejtelel jiñi qʼuiñijel muʼ bʌ i mejlel tiʼ tojlel diosteʼ tac. Cheʼ ñumeñix 300 jab i chʌmel Jesús, jiñi xñoptʼañob i chaʼan maʼañic tsiʼ cʼʌñʌyob cruz tiʼ chʼujutesʌntel Dios. Pero jiñi emperador ti Roma i cʼabaʼ Constantino tsiʼ cʼʌñʌ i yejtal jiñi cruz tiʼ tojlel jiñi muʼ bʌ i yʌlob chaʼan miʼ ñopob Cristo. Cheʼ bajcheʼ ili tsaʼ cajiyob ti ñumen cʌjñel. Pero wen qʼuexelʌch muʼ bʌ i yʌjlel chaʼan jiñi cruz yicʼot tiʼ tojlel Jesucristo. Jumpʼejl enciclopedia miʼ yʌl: «Jiñi cruz wʌn cʌmbilix yaʼ ti cultura tac baqui maxto añic miʼ ñojpel Cristo yicʼot tiʼ tojlel quixtañujob maʼañic bʌ miʼ ñopob Cristo».

2. Jesús mach ti jumpʼejlic cruz tsaʼ chʌmi. Jiñi tʼan am bʌ ti griego muʼ bʌ i yʌjlel bajcheʼ «cruz» yom i yʌl «teʼ» o «bʌñʌl bʌ teʼ». An jumpʼejl Biblia muʼ bʌ i tsictesan chaʼan jiñi Nuevo Testamento ti griego «maʼañic baqui miʼ wis acʼ ti ñaʼtʌntel chaʼtsʼijt teʼ». Jesús chʼijbil tsaʼ chʌmi ti juntsʼijt teʼ o bʌñʌl bʌ teʼ.

3. Jehová mach yomic cheʼ mi laj cʼʌn imagen tac o i yejtal tac chuqui jach yes chaʼan mi lac chʼujutesan (Éxodo 20:4, 5; 1 Corintios 10:14).

▸ Cʌntesʌntel 5, párr. 12

Jesús tiʼ sube jiñi xcʌntʼañob i chaʼan chaʼan miʼ cʼajtesañob jiñi i chʌmel. Jiñi xñoptʼañob miʼ melob iliyi ti jujumpʼejl jab, cheʼ ti 14 i chaʼan nisán. Ti jimbʌ qʼuin, jiñi israelob miʼ melob jaʼel jiñi i qʼuiñilel Pascua. Cheʼ miʼ cʼajtesʌntel i chʌmel Jesús miʼ ñusʌntel caxlan waj yicʼot vino, yom bʌ i yʌl, i bʌcʼtal yicʼot i chʼichʼel. Muʼ bʌ i cʼuxob jiñi caxlan waj yicʼot miʼ japob jiñi vino, jiñobʌch jiñi muʼ bʌ i cajelob ti yumʌntel yicʼot Jesús yaʼ ti panchan. Jiñi wʌʼ bʌ añob i pijtaya chaʼan miʼ chumtʌlob ila ti Lum miʼ wen qʼuelob ti ñuc cheʼ miʼ yajñelob ti ili tempa bʌ, pero maʼañic miʼ cʼuxob jiñi caxlan waj yicʼot maʼañic miʼ japob jiñi vino.

▸ Cʌntesʌntel 5, párr. 21

Jiñi tʼan tac am bʌ ti hebreo yicʼot griego tsaʼ bʌ chaʼlenti ti traducir bajcheʼ «espíritu» yicʼot «alma» ti español, ti jiñi Biblia tac am bʌ ti chʼol tsaʼ chaʼlenti ti traducir cheʼ bajcheʼ an i sujmlel, cheʼ jaʼel bajcheʼ «chʼujlel» yicʼot «espíritu». Ili tʼan tac cabʌl i sujmlel. Jiñi tʼan «chʼujlel» miʼ mejlel i taj ti tʼan juntiquil quixtañu, bajcheʼ yubil miʼ yubin i bʌ yicʼot jiñi pʼʌtʌlel muʼ bʌ i yʌqʼuen i cuxtʌlel quixtañujob yicʼot añimal tac (Salmo 107:9; Lucas 1:47; Santiago 2:26). Jiñi tʼan «espíritu» miʼ mejlel i taj ti tʼan ángelob yicʼot jiñi chʼujul bʌ espíritu, ili jiñʌch i pʼʌtʌlel Dios (Zacarías 6:5; Hechos 2:4; 23:9).

Cheʼ jaʼel, cheʼ bʌ juntiquil quixtañu an chuqui miʼ mel ‹tiʼ pejtelel i chʼujlel› yom i yʌl chaʼan ti jumpʼejl i pusicʼal miʼ mel yicʼot cheʼʌch bajcheʼ cʼamel miʼ mejlel (Deuteronomio 6:5; Mateo 22:37). Pero jiñi Biblia maʼañic baqui miʼ pʌs chaʼan anto chuqui cuxul miʼ cʌytʌl cheʼ bʌ mi lac chʌmel (Génesis 3:19; Eclesiastés 3:20).

▸ Cʌntesʌntel 6, párr. 5; cʌntesʌntel 15, párr. 17

An Biblia tac baqui tsaʼ chaʼlenti ti traducir bajcheʼ «cʼajc» jiñi tʼan «Gehena» am bʌ ti griego, pero iliyi jiñʌch i cʼabaʼ jumpʼejl joctʌl am bʌ tiʼ tʼejl Jerusalén baqui miʼ pulel basura. Maʼañic chuqui miʼ pʌs chaʼan yaʼ ti joctʌl miʼ pulel o miʼ tʌcʼlʌntel añimal tac o lac piʼʌlob cheʼ cuxulobto cheʼ tiʼ yorajlel Jesús. Jin chaʼan, jiñi tʼan Gehena mach yomic i yʌl jumpʼejl ajñibʌl mach bʌ tsiquilic baqui miʼ pulel yicʼot miʼ ticʼlʌntel tiʼ pejtelel ora jiñi quixtañujob muʼ bʌ i chʌmelob. Jesús tsiʼ yʌlʌ chaʼan an muʼ bʌ caj i majlelob ti Gehena, ili yom i yʌl chaʼan mi caj i junyajl jisʌntelob (Mateo 5:22, TNM; 10:28, TNM).

▸ Cʌntesʌntel 7, párr. 20

Jiñʌch tsaʼ bʌ i cʼʌñʌ Jesús chaʼan miʼ cʌntesan jiñi xcʌntʼañob chaʼan bajcheʼ yom miʼ chaʼleñob oración. Jesús tsiʼ cʌntesayonla chaʼan mi laj cʼajtin tac iliyi yicʼot yan tac bʌ:

• «Laʼ chʼujutesʌntic a cʼabaʼ»

  Mi laj cʼajtiben Jehová chaʼan miʼ sʌqʼuesan i cʼabaʼ tiʼ caj jiñi lot tac muʼ bʌ i yʌjlel tiʼ tojlel. Cheʼ jiñi, pejtelel cuxul tac bʌ am bʌ ti panchan yicʼot ti Pañimil mi caj i qʼuelbeñob ti ñuc i cʼabaʼ.

• «Laʼ tilic a yumʌntel»

  Mi laj cʼajtin chaʼan jiñi i Yumʌntel Dios miʼ jisʌben i pañimil Satanás, miʼ yuman ili Pañimil yicʼot miʼ sujtesan ti jumpʼejl Paraíso.

• «Laʼ mejlic chuqui a wom ti pañimil»

  Mi laj cʼajtin chaʼan miʼ tsʼʌctiyel chuqui yom bʌ Dios chaʼan ili Pañimil: Chaʼan mach chʌn xmulilobix jiñi quixtañujob xjacʼtʼañoʼ bʌ yicʼot miʼ chumtʌlob tiʼ pejtelel ora ti paraíso. Jiñʌch yom bʌ Jehová tsiʼ ñaʼta cheʼ bʌ tsiʼ mele jiñi quixtañujob.

▸ Cʌntesʌntel 8, párr. 2

Jehová tsiʼ tojo chaʼan mi laj coltʌntel loqʼuel ti jiñi mulil yicʼot chʌmel. Jiñi i tojol laj coltʌntel jiñʌch yom bʌ miʼ yʌjqʼuel chaʼan mi lac chaʼ taj jiñi toj bʌ laj cuxtʌlel tsaʼ bʌ i sʌtʌ Adán. Cheʼ jaʼel, i cʼʌjñibalʌch chaʼan miʼ mejlel lac chaʼ lʌcʼtesan lac bʌ ti Dios. Jehová tsiʼ choco tilel i Yalobil chaʼan miʼ chʌmel tiʼ caj xmulilob. Wocolix i yʌlʌ cheʼ tsiʼ yʌcʼʌ i cuxtʌlel Jesús, mi lac mejlel ti sujtel ti toj ti lac pejtelel yicʼot maʼañix ba ora mi lac chʌmel.

▸ Cʌntesʌntel 8, párr. 21; cʌntesʌntel 9, párr. 13

Jiñi profecía am bʌ ti capítulo 4 i chaʼan Daniel miʼ cʌntesañonla chaʼan jiñi i Yumʌntel Dios mi caj i tech i yeʼtel ti 1914.

Jiñi profecía. Jehová tsiʼ yʌcʼʌ chaʼan jiñi rey Nabucodonosor miʼ ñajlen chuqui tac mi caj i yujtel. Ti jiñi i ñajal, jiñi rey tsiʼ qʼuele juntejc colem teʼ woli bʌ i sejqʼuel. Ti wiʼil, tsaʼ xot cʌjchi ti hierro yicʼot ti cobre jiñi i xujcʼunteʼlel chaʼan maʼañic miʼ colel jinto miʼ ñumel «wucpʼejl jab». Cheʼ bʌ miʼ ñumel jiñi «wucpʼejl jab», jiñi teʼ mi caj i chaʼ colel (Daniel 4:1, 10-16).

I sujmlel. Jiñi teʼ miʼ lajintel bajcheʼ i yumʌntel Dios. Ñumen ti 500 jab, Dios tsiʼ cʼʌñʌ jiñi reyob ti Jerusalén chaʼan miʼ coltan jiñi tejclum Israel (1 Crónicas 29:23). Pero ili reyob tsiʼ ñusʌbeyob i tʼan Dios, i jiñi i yumʌntelob tsaʼ jili. Jerusalén tsaʼ jisʌnti ti jabil 607 cheʼ bʌ maxto tilemic Cristo (m.t.C.). Ti jiñi jabil tsaʼ tejchi jiñi «wucpʼejl jab» (2 Reyes 25:1, 8-10; Ezequiel 21:25-27). Jesús tsiʼ yʌlʌ chaʼan Jerusalén mi caj i tʼuchtʌntel tiʼ tojlel yambʌ tejclum tac jinto miʼ tsʼʌctiyel «i yorajlel gentilob». Ili «i yorajlel gentilob» jin jach jaʼel jiñi «wucpʼejl jab» (Lucas 21:24). Jin chaʼan, jiñi «wucpʼejl jab» maʼañic tsaʼ ujti cheʼ bʌ wʌʼto an Jesús ila ti Pañimil. Jehová tsiʼ wʌn alʌ chaʼan mi caj i waʼchocon juntiquil Rey tiʼ yujtibal jiñi «wucpʼejl jab». Ili Rey jiñʌch Jesús. Mi caj i yʌcʼ bendición tac tiʼ tojlel i wiñicob Dios wʌʼ ti Pañimil (Lucas 1:30-33).

I jalijel. Jiñi «wucpʼejl jab» tsaʼ jalʼa 2,520 jab. ¿Bajcheʼ mi lac ñaʼtan ili? Jiñi Biblia miʼ yʌl chaʼan uxpʼejl jab yicʼot ojlil yom i yʌl 1,260 qʼuin (Apocalipsis 12:6, 14). Jin chaʼan, cheʼ chaʼsujtel mi lac tsic jiñi uxpʼejl jab yicʼot ojlil mi lac taj «wucpʼejl jab», yom i yʌl 2,520 qʼuin. Jiñi 2,520 qʼuin yom i yʌl 2,520 jab come an texto tac muʼ bʌ i yʌl chaʼan «jumpʼejl qʼuin i wentajʌch jumpʼejl jab» (Ezequiel 4:6; Números 14:34).

Cheʼ mi lac tech lac tsic 2,520 jab cheʼ ti 607 m.t.C., mi laj cʼotel ti 1914. Ti jimbʌ ora, Jehová tsiʼ yotsa Jesús, jiñi Mesías, ti Rey chaʼan i Yumʌntel ti panchan.

▸ Cʌntesʌntel 8, párr. 23

Yaʼ ti Biblia juntiquil jach cʼax ñuc bʌ ángel miʼ tajtʌl ti tʼan, i cʼabaʼ jiñʌch Miguel (Daniel 12:1; Judas 9).

Miguel jiñʌch am bʌ tiʼ wenta pejtelel jiñi xucʼul bʌ i yángelob Dios. Jiñi Biblia miʼ yʌl: «Miguel yicʼot i yángelob tsiʼ chaʼleyob guerra tiʼ contra jini ajin yicʼot i yángelob jini ajin» (Apocalipsis 12:7). Miʼ yʌl jaʼel chaʼan Jesús jiñʌch i yum jiñi xguerrajob añoʼ bʌ ti panchan. Jin chaʼan, Miguel jiñʌch yambʌ i cʼabaʼ Jesús (Apocalipsis 19:14-16).

▸ Cʌntesʌntel 9, párr. 4, nota

Ili tʼan yom i yʌl jiñi i yorajlel cheʼ cabʌl chuqui ñuc tac bʌ i cʼʌjñibal mi caj i yujtel ila ti Lum, cheʼ bʌ tsʼitaʼ jachix yom chaʼan i Yumʌntel Dios miʼ jisʌben i pañimil Satanás. Jiñi profecía tac am bʌ ti Biblia miʼ cʼʌn tʼan tac lʌcʼʌ lajal bʌ chaʼan miʼ taj ti tʼan ili i yorajlel, bajcheʼ jiñi i «jilibal pañimil» yicʼot cheʼ «miʼ caj ti tsictiyel i Yalobil Winic» (Mateo 24:3, 27, 37). Jiñi «cojix bʌ qʼuin tac» tsaʼ tejchi ti 1914 cheʼ bʌ tsaʼ waʼchoconti i Yumʌntel Dios yaʼ ti panchan i mi caj i yujtel cheʼ bʌ i pañimil Satanás miʼ jisʌntel ti jiñi guerra i chaʼan Armagedón (2 Timoteo 3:1; 2 Pedro 3:3).

▸ Cʌntesʌntel 9, párr. 4

Jiñi chaʼ chʼojyel jiñʌch cheʼ bʌ Dios miʼ chaʼ aqʼuen i cuxtʌlel jiñi tsaʼix bʌ chʌmiyob. Jiñi Biblia miʼ taj ti tʼan bolompʼejl chaʼ chʼojyel. Dios tsiʼ yʌqʼue i pʼʌtʌlel jiñi Elías, Eliseo, Jesús, Pedro yicʼot Pablo chaʼan miʼ chaʼ chʼojyesan quixtañujob. Jehová miʼ yʌcʼ i tʼan chaʼan mi caj i chaʼ chʼojyesan jiñi «tojoʼ bʌ» yicʼot «mach bʌ tojobic» chaʼan miʼ chumtʌlob ti Pañimil (Hechos 24:15). Jiñi Biblia miʼ yʌl jaʼel chaʼan an muʼ bʌ caj i chaʼ chʼojyelob chaʼan miʼ chumtʌlob ti panchan. Ili quixtañujob jiñʌch xñoptʼañob yajcʌbiloʼ bʌ ti Dios chaʼan miʼ chaʼleñob yumʌntel bajcheʼ rey yicʼot Jesús yaʼ ti panchan (Juan 5:28, 29; 11:25; Filipenses 3:11; Apocalipsis 20:5, 6).

▸ Cʌntesʌntel 9, párr. 13

Cabʌl quixtañu miʼ ñopob i pejcañob jiñi espíritujob tiʼ tojlel xwujtob, xtsʼacob o juntiquil espiritista. Mach weñic iliyi. Jiñi muʼ bʌ i melob miʼ ñopob chaʼan cheʼ bʌ mi lac chʌmel anto chuqui cuxul miʼ cʌytʌl yicʼot miʼ sujtel ti pʼʌtʌl bʌ espíritu. Pero iliyi mach i sujmic. Jiñi muʼ bʌ i pejcañob espíritujob yicʼot añoʼ bʌ i wʌy woliyʌch i yotsañob i bʌ tiʼ chaʼan bʌ xibajob. Jiñi xibajob miʼ chaʼleñob wersa chaʼan jiñi quixtañujob miʼ ñusʌbeñob i tʼan Dios. Miʼ cʼʌñob ti lot jiñi astrología, adivinación, magia yicʼot i chaʼan bʌ xwujtob. Miʼ cʼʌñob jeʼel chuqui tac miʼ ñopob jiñi quixtañujob. Jumpʼejl ejemplo, cheʼ bʌ lecoj miʼ chaʼlen uqʼuel jiñi tsʼiʼ miʼ poj ñaʼtañob chaʼan an chuqui mi caj i yujtel tiʼ tojlel i yum, o cheʼ bʌ miʼ cʼotel ti uqʼuel jiñi xcuj an chuqui mi caj i yujtel. Cheʼ jaʼel, an muʼ bʌ i cʌchbeñob chʌchʌc pisil o puy tiʼ cʼʌb juntiquil alʌl chaʼan maʼañic chuqui miʼ chaʼlen. Cabʌl libro, revista, horóscopo, película, jun tac muʼ bʌ i lʌjpʼel ti otot yicʼot cʼay tac miʼ pʌs chaʼan weñʌch jiñi magia yicʼot xibajob. Jiñi costumbre tac muʼ bʌ i mejlel cheʼ bʌ an majqui miʼ chʌmel an ochem tac bʌ tiʼ chaʼan bʌ xiba, yaʼ ochem cheʼ bʌ miʼ yʌqʼuentelob i majtan, i qʼuiñilel xchʌmelob, i qʼuiñilel cheʼ bʌ miʼ tsʼʌctiyel jujumpʼejl jab, jiñi oración muʼ bʌ i melob tiʼ tojlel chaʼan tijicña miʼ cʼaj i yo yicʼot yan tac bʌ muʼ bʌ i mejlel tiʼ cʌntʌntel jiñi xchʌmelob. Chaʼan miʼ cʼʌmbeñob i pʼʌtʌlel jiñi xibajob cabʌl quixtañujob miʼ cʼʌñob cʼujts, droga yicʼot lembal (Gálatas 5:20, 21; Apocalipsis 21:8).

▸ Cʌntesʌntel 10, párr. 10; cʌntesʌntel 16, párr. 4

Jehová jiñʌch jiñi Dios maʼañic bʌ i pʼisol i pʼʌtʌlel i jiñʌch tsaʼ bʌ i mele panchan yicʼot pañimil (Apocalipsis 15:3). Jin chaʼan, luʼ i chaʼañʌch am bʌ ila ti pañimil yicʼot jiñʌch Cʼax Ñuc bʌ Yumʌl. Ili yom i yʌl chaʼan Jehová an tiʼ wenta miʼ yuman jiñi melbil tac bʌ i chaʼan (Salmo 24:1; Isaías 40:21-23; Apocalipsis 4:11). Jehová tsiʼ yʌcʼʌ mandar tiʼ pejtelel tsaʼ bʌ i mele. Cheʼ jaʼel, cojach an tiʼ wenta i waʼchocon majqui yom miʼ chaʼlen yumʌntel. Mi mucʼʌch laj cʼuxbin yicʼot mi lac jacʼben i tʼan mi lac pʌsben chaʼan woliyʌch laj coltʌben i yumʌntel (1 Crónicas 29:11).

▸ Cʌntesʌntel 11, párr. 10

Mach weñic cheʼ miʼ yilol chojquel jiñi alʌl maxto bʌ i yila pañimil. Cheʼ bʌ juntiquil xʼixic miʼ ñaʼtan chaʼan cʌntʌbilix i chaʼan i yalobil, juntiquilix quixtañu woliʼ colel. Cheʼ miʼ chojquel jiñi alʌl, lajalʌch bajcheʼ tsʌnsa.

▸ Cʌntesʌntel 13, párr. 5

Ili jiñʌch cheʼ jiñi doctor miʼ cʼʌn jiñi chʼichʼ bajcheʼ tsʼac chaʼan miʼ yotsʌntel ti lac chijil o jiñi chʌnchajp ñuc bʌ i cʼʌjñibal am bʌ i chaʼan jiñi chʼichʼ, bajcheʼ jiñi plasma, glóbulos rojos, glóbulos blancos yicʼot plaqueta. Tajol miʼ cʼʌjñel i chʼichʼel jiñi quixtañu o i chʼichʼel yambʌ wʌn lotbilix bʌ.

▸ Cʌntesʌntel 13, párr. 13

Yom mi laj cʌntesañob yicʼot lac ticʼob, i cheʼ bʌ miʼ tajob i sajtemal yom yicʼot cʼuxbiya mi lac tojʼesañob. Cheʼʌch miʼ mel Jehová tiʼ tojlel i wiñicob, mach ñoj tsʌtsic yicʼot mach ñumeñic ti pʼis bajcheʼ miʼ ticʼob (Proverbios 4:1, 2). Jehová juntiquilʌch wem bʌ ejemplo chaʼan jiñi tatʌlob. Cheʼ bʌ miʼ tojʼesan juntiquil quixtañu, wen jach bajcheʼ miʼ mel chaʼan ti jumpʼejl i pusicʼal miʼ jacʼ jiñi ticʼojel (Proverbios 12:1). Jehová miʼ cʌntesan yicʼot miʼ tojʼesan i wiñicob come miʼ cʼuxbiñob. Miʼ subeñob chuqui tac yom miʼ tojʼesañob i jiñi miʼ coltañob i ñaʼtan yicʼot i melob chuqui tac miʼ mulan. Tatʌlob, cheʼ bʌ jiñi laʼ walobilob miʼ tajob i sajtemal yom mi laʼ coltan chaʼan miʼ ñaʼtañob chucoch yom miʼ jacʼob tʼan. Cheʼ jaʼel, yom miʼ laʼ cʌntesañob i cʼuxbiñob Jehová, jiñi Biblia yicʼot yom mi laʼ coltañob chaʼan miʼ chʼʌmbeñob i sujm jiñi principio tac.

▸ Cʌntesʌntel 14, párr. 13

Jiñobʌch jontol bʌ espíritujob añoʼ bʌ i pʼʌtʌlel. Ti ñaxan ángelob, pero jontol tsaʼ sujtiyob cheʼ bʌ tsiʼ ñusʌbeyob i tʼan Dios i tsaʼ sujtiyob tiʼ contra (Génesis 6:2; Judas 6). Tsiʼ temeyob i bʌ yicʼot Satanás chaʼan miʼ contrajiñob Jehová (Deuteronomio 32:17; Lucas 8:30; Hechos 16:16; Santiago 2:19).

▸ Cʌntesʌntel 16, párr. 4