Xchʼocob, ¿bajcheʼ miʼ mejlel laʼ taj majlel laʼ ñaʼtʌbal?

 1. ¿Chuqui yom mi lac mel chaʼan mi lac taj majlel lac ñaʼtʌbal?

TAJOL cheʼ mi laj qʼuel juntiquil alob ñuquix bʌ tsaʼ bʌ laj cʌñʌ cheʼ chutto, miʼ toj sajtel lac pusicʼal i mi la cʌl: «Machʌch jalix tsaʼ coliyet». Pero chaʼan mi lac taj majlel jiñi laj colel o lac ñaʼtʌbal bajcheʼ xñoptʼan mach orajic miʼ yujtel, yom mi lac chaʼlen wersa (1 Cor. 13:11; Heb. 6:1).b Yom mi lac ñumen lʌcʼtesan lac bʌ ti Jehová, mi laj cʼajtiben i coltaya chaʼan mi lac taj wen tac bʌ lac melbal (chaʼlibal), mi laj cʌn chuqui tac yom melol yicʼot mi lac chajpan lac bʌ chaʼan jiñi talto bʌ qʼuin (Pr. 1:5).

 2. ¿Chuqui miʼ pʌsbeñonla Génesis 1:27, i chuqui mi caj laj qʼuel ti ili estudio?

² Jehová tsiʼ meleyonla (pʌtʌyonla) ti lac pejtelel (pejcan Génesis 1:27). Pero mach lajalic tsiʼ mele jiñi wiñic yicʼot xʼixic. Ti jujuntiquil tsaʼ aqʼuentiyob jumpʼejl i yeʼtel (troñel), i chaʼan miʼ mejlel i tsʼʌctesañob añʌch chuqui yom miʼ cʌñob i mel yicʼot yom miʼ tajob wen tac bʌ i melbalob (Gn. 2:18). Jin chaʼan, ti ili estudio mi caj laj qʼuel chuqui miʼ mejlel i mel jiñi hermanajob chaʼan miʼ tajob majlel i ñaʼtʌbal. I ti jiñi yambʌ mi caj laj qʼuel chuqui yom miʼ melob jiñi chʼitoñob.

3, 4. ¿Baqui miʼ mejlel i tajob wem bʌ ejemplo jiñi xchʼocob? (Qʼuele jaʼel jiñi foto).

³ Yaʼ ti Biblia miʼ yʌjlel cabʌl xʼixicob tsaʼ bʌ i melbeyob i yeʼtel Jehová yicʼot tsiʼ wen cʼuxbiyob (pejcan jiñi tema «¿Qué aprendemos de las mujeres de la Biblia?» am bʌ ti jw.org). Ili xʼixicob cheʼ yilalob bajcheʼ miʼ yʌjlel yaʼ ti texto baqui chucul ili estudio, pʼisbilob jach ti chuqui miʼ melob yicʼot xucʼulob tiʼ pejtelel. Tajol yaʼ ti a congregación an hermanajob wen añobix bʌ i ñaʼtʌbal i cabʌl chuqui miʼ mejlel a cʌn tiʼ tojlelob.   

⁴ Xchʼocob, ñaʼtanla majqui bʌ hermanajob wen bʌ ejemplo chaʼañetla i ñopo laʼ lajiñob. Qʼuelela jiñi wem bʌ i melbalob i ñaʼtanla chuqui miʼ mejlel la mel chaʼan mi laʼ pʌs jaʼel jiñi melbalʌl. Yaʼ ti yambʌ párrafo tac mi caj laj qʼuel chaʼpʼejl melbalʌl yom bʌ añob i chaʼan jiñi hermanajob añoʼ bʌ i ñaʼtʌbal.

 5. ¿Chucoch yom añob i pecʼlel jiñi hermanajob añoʼ bʌ i ñaʼtʌbal?

⁵ Pecʼlel. Juntiquil hermana am bʌ i pecʼlel lʌcʼʌl an yicʼot Jehová i wen miʼ yajñel yicʼot yambʌlob (Sant. 4:6). Come jiñi hermana miʼ cʼuxbin Jehová yicʼot miʼ pʌs i pecʼlel, miʼ qʼuel ti ñuc jiñi principio tsaʼ bʌ i yʌcʼʌ Jehová chaʼan majqui añoʼ bʌ i yeʼtel ti congregación yicʼot ti jumpʼejl familia (1 Cor. 11:3).c

 6. ¿Bajcheʼ miʼ mejlel i lajiñob Rebeca jiñi xchʼocob?

⁶ Laʼ laj cʌl tiʼ tojlel Rebeca. Jiñʌch juntiquil xʼixic wen am bʌ i ñaʼtʌbal yicʼot tsiʼ ñaʼta chuqui yom miʼ mel, jala yicʼot bajcheʼ yom miʼ mel (Gn. 24:58; 27:5-17). Tsiʼ qʼuele ti ñuc yambʌlob yicʼot tsiʼ jacʼʌ tʼan (Gn. 24:17, 18, 65). Mi mucʼʌch a lajin Rebeca i maʼ pʌs a pecʼlel yicʼot maʼ qʼuel ti ñuc jiñi añoʼ bʌ i yeʼtel, mi caj a pʌs chuqui wem bʌ yaʼ ti a familia yicʼot ti a congregación.

 7. ¿Bajcheʼ miʼ mejlel i lajiñob Ester jiñi hermanajob?

⁷ Jiñi Biblia miʼ yʌl chaʼan pejtelel jiñi añoʼ bʌ i ñaʼtʌbal yom miʼ pʌsob i pecʼlel (Pr. 11:2). Ester jiñʌch juntiquil xʼixic tsaʼ bʌ i pʌsʌ ili wem bʌ melbalʌl. Cheʼ bʌ tsaʼ ochi ti reina, maʼañic tsiʼ chañʼesa i bʌ, cheʼ jaʼel tsiʼ jacʼbe i ticʼojel jiñi i primo Mardoqueo (Est. 2:10, 20, 22). Jatet jaʼel miʼ mejlel a lajin Ester cheʼ bʌ maʼ cʼajtin ticʼojel yicʼot maʼ jacʼ (Tito 2:3-5).

 8. ¿Bajcheʼ miʼ mejlel i jacʼob muʼ bʌ i yʌl 1 Timoteo 2:9, 10 jiñi hermanajob?

⁸ Ester mach cojach wen an i ñaʼtʌbal, juntiquilʌch xʼixic wen utsʼatax bʌ jaʼel, pero tsaʼʌch i pʌsʌ i pecʼlel i maʼañic tiʼ sʌcla chaʼan jin jach jiñi ñumen utsʼatax bʌ miʼ qʼuejlel (Est. 2:7, 15). ¿Bajcheʼ miʼ mejlel a lajin Ester? Junchajp jiñʌch cheʼ maʼ jacʼ muʼ bʌ i yʌl 1 Timoteo 2:9, 10 (pejcan). Jiñi tʼan tac tsaʼ bʌ i cʼʌñʌ Pablo ti ili versículo tac miʼ yʌcʼ ti ñaʼtʌntel chaʼan jiñi hermanajob yom wen jach bajcheʼ miʼ xojob i pislel yicʼot miʼ chʼʌmob ti ñuc chuqui miʼ ñaʼtan yambʌlob. Mi lac wen qʼuelob ti ñuc jiñi hermanajob muʼ bʌ i pʌsob i ñaʼtʌbal cheʼ bajcheʼ yilal miʼ xojob i pislel.

 9. ¿Chuqui mi laj cʌn tiʼ tojlel Abigaíl?

⁹ I cʌñol chuqui jiñi wem bʌ yicʼot jiñi mach bʌ weñic. Cheʼ bʌ juntiquil miʼ cʼotel i cʌn chuqui jiñi wem bʌ yicʼot jiñi mach bʌ weñic, miʼ chʼʌmben i sujm chuqui yom bʌ miʼ mel. Laʼ laj qʼuel jumpʼejl ejemplo, jiñʌch tiʼ tojlel Abigaíl. Cheʼ bʌ jiñi i ñoxiʼal mach weñic chuqui tsiʼ mele, Abigaíl tsiʼ qʼuele chaʼan pejtelel jiñi añoʼ bʌ tiʼ yotot miʼ mejlel i tajob wocol. Tsiʼ cʌñʌ chaʼan mach weñic chuqui tsaʼ ujti i tsiʼ chʼʌmbe i sujm chuqui yom miʼ mel, cheʼ bajcheʼ jiñi tsiʼ colta jiñi añoʼ bʌ tiʼ yotot (1 S. 25:14-23, 32-35). Cheʼ mi laj cʌn chuqui jiñi wem bʌ yicʼot jiñi mach bʌ weñic miʼ coltañonla lac ñaʼtan jaʼel baqui ora yom mi lac chaʼlen tʼan yicʼot chuqui yom mi la cʌl. Cheʼ jaʼel, miʼ coltañonla chaʼan maʼañic mi lac mel cʼajtiya tac mach bʌ yomix mi lac mel cheʼ bʌ woli (choncol) lac chaʼlen tʼan la quicʼot jiñi hermanojob (1 Tes. 4:11).

10, 11. ¿Baqui bʌ i wenlel cheʼ maʼ cʌn tsʼijb yicʼot pejca jun? (Qʼuele jaʼel jiñi foto).

¹⁰ An tacʌch yom bʌ maʼ cʌn a mel come jiñi mi caj i coltañet ti talto bʌ qʼuin. Laʼ laj qʼuel baqui tac bʌ.

¹¹ Cʌñʌ tsʼijb yicʼot pejca jun. An cultura tac baqui miʼ ñaʼtʌntel chaʼan maʼañic i cʼʌjñibal cheʼ jiñi xʼixicob miʼ cʌñob tsʼijb yicʼot pejca jun. Pero iliyi wen ñucʌch i cʼʌjñibal chaʼan jiñi xñoptʼañob (1 Tim. 4:13).d Jin chaʼan, maʼañic chuqui yom miʼ mʌctañet chaʼan maʼ cʌn tsʼijb yicʼot pejca jun. ¿Baqui bʌ i wenlel? Mi caj i coltañet chaʼan maʼ taj a weʼtel, chaʼan maʼ pejcan jiñi Biblia yicʼot maʼ sujtel ti wem bʌ xcʌntesa. Cheʼ jaʼel, mi caj a ñumen lʌcʼtesan a bʌ ti Jehová (Jos. 1:8; 1 Tim. 4:15).

12. ¿Chuqui maʼ cʌn ti Proverbios 31:26?

¹² Cʌñʌ tʼan ti wen a wicʼot yambʌlob. Ili jiñʌch junchajp wen ñuc bʌ i cʼʌjñibal chaʼan jiñi xñoptʼañonbʌla. Santiago tsiʼ yʌcʼʌ jumpʼejl wem bʌ ticʼojel muʼ bʌ i coltañonla lac mel iliyi: «Yom chajpʌbiletla chaʼan mi laʼ ñʌchʼtan tʼan, pero mach ti orajic yom mi laʼ jacʼ» (Sant. 1:19). Mi an majqui woli (yʌquel) i pejcañonla i wen jach mi lac ñʌchʼtan woli lac pʌs chaʼan mucʼʌch laj qʼuel ti ñuc (1 Ped. 3:8). Mi maʼañic maʼ wen chʼʌmben i sujm maʼ wubin chuqui woli bʌ i subeñet o bajcheʼ miʼ yubin i bʌ, miʼ mejlel a melben cʼajtiya. Cheʼ jaʼel, ñaxan wen ñaʼtan chuqui mi caj a suben (Pr. 15:28). Cʼajtiben a bʌ: «¿I sujmʌch ba jiñi muʼ bʌ caj cʌl? ¿Weñʌch ba? ¿Muʼ ba caj i coltan?». Ñaʼtan tiʼ tojlel hermanajob cheʼ bʌ miʼ melob bajcheʼ iliyi i cʌñʌ tiʼ tojlelob (pejcan Proverbios 31:26). Wen ñʌchʼtan chuqui miʼ yʌlob i bajcheʼ miʼ yʌlob. Chaʼlen wersa a mel jaʼel, xucʼu xucʼul mi caj a ñumen mel ti wen, i ti wiʼil ñumen utsʼat mi caj a wajñel a wicʼot yambʌlob.

13. ¿Bajcheʼ miʼ mejlel a cʌn eʼtel ti otot? (Qʼuele jaʼel jiñi foto).

¹³ Cʌñʌ a chaʼlen eʼtel ti a wotot. Lʌcʼʌ tiʼ pejtelel ora jiñʌch jiñi xʼixicob muʼ bʌ i melob eʼtel tac ti otot. Tajol jiñi a mamá o yambʌ hermana miʼ mejlel i cʌntesañet. Juntiquil hermana i cʼabaʼ Cindy miʼ yʌl: «Jiñi wen ñuc bʌ majtañʌl tsaʼ bʌ i yʌqʼueyon c mamá jin cheʼ tsiʼ pʌsbeyon chaʼan cheʼ mi lac chaʼlen eʼtel tijicña mi la cubin lac bʌ. Cheʼ tsaʼ j cʌñʌ mel waj, i sʌqʼuesʌntel otot, tsʼisoñel yicʼot cheʼ pʼisbil jach bajcheʼ mij cʼʌn jiñi taqʼuin tsaʼʌch i wen coltayon, i cheʼ jaʼel tsaʼ mejli c ñumen melben i yeʼtel Jehová. Jiñi c mamá tsiʼ pʌsbeyon c tʼox jaʼel chuqui an c chaʼan, jin chaʼan tsaʼ mejli j cʌn cabʌl hermanojob i cabʌl chuqui tsaʼ j cʌñʌ tiʼ tojlelob» (Pr. 31:15, 21, 22). Jiñi xʼixicob yujiloʼ bʌ eʼtel tiʼ yotot yicʼot muʼ bʌ i tʼoxob chuqui añob i chaʼan jiñobʌch jumpʼejl bendición tiʼ familia yicʼot yaʼ ti congregación (Pr. 31:13, 17, 27; Hech. 16:15).

14. ¿Chuqui maʼ cʌn tiʼ tojlel Crystal, i baqui yom maʼ wʌcʼ a ñaʼtʌbal?

¹⁴ Cʌñʌ a sʌclan chuqui a wom. Tiʼ pejtelel jiñi xñoptʼañob añoʼ bʌ i ñaʼtʌbal yom miʼ cʌñob eʼtel chaʼan miʼ mejlel i tajob chuqui yomob, yicʼot jaʼel yom tijicñayob yicʼot jiñi añoʼ bʌ i chaʼan (Filip. 4:11). Juntiquil hermana i cʼabaʼ Crystal miʼ yʌl: «Cheʼ bʌ xcolelonto i añonto ti escuela, jiñi c papá c mamá tiʼ subeyoñob chaʼan mic yajcan muʼ bʌ i mejlel i coltañon ti wiʼil. Jiñi c papá tiʼ subeyon chaʼan mij cʌn contabilidad, iliyi tsaʼʌch i wen coltayon». Mach jiñic jach yom maʼ sʌclan a weʼtel, cheʼ jaʼel yom maʼ cʌn a cʼʌn ti wen jiñi taqʼuin am bʌ a chaʼan (Pr. 31:16, 18). Mi maʼañic maʼ wotsan a bʌ ti bet i tijicñayet yicʼot jiñi am bʌ a chaʼan mi caj i mejlel a wʌcʼ a ñaʼtʌbal tiʼ melol i yeʼtel Jehová (1 Tim. 6:8).

15, 16. ¿Chucoch mi lac wen qʼuelob ti ñuc jiñi hermanajob i bajñelobto bʌ? (Marcos 10:29, 30).

¹⁵ Mi maʼ pʌs melbalʌl tac muʼ bʌ i mulan Jehová yicʼot an tac chuqui maʼ cʌn a mel mi caj i coltañet ti talto bʌ qʼuin. Laʼ laj qʼuel bajcheʼ.

¹⁶ Tajol maʼ ñaʼtan chaʼan maxto añic maʼ ñujpuñel. Cheʼ bajcheʼ tsiʼ yʌlʌ Jesús, an maʼañic bʌ miʼ ñaʼtañob ñujpuñel anquese ti jiñi i cultura cheʼʌch ñʌmʌl ti mejlel i muʼto i xijqʼuelob (Mat. 19:10-12). I an tacʌch yambʌ chucoch juntiquil i bajñel miʼ yajñel. Mi maxto ñujpuñemetic, miʼ mejlel a ñop chaʼan Jehová yicʼot Jesús miʼ wen qʼueletob ti ñuc. Tiʼ petol pañimil, jiñi hermanajob i bajñelobto bʌ wen ñucʌch i cʼʌjñibalob yaʼ ti congregación tac. Cheʼ miʼ pʌsob cʼuxbiya yicʼot miʼ qʼuelob ti ñuc yambʌlob miʼ sujtelob tiʼ mamá, tiʼ chich o i yijtsʼin yambʌ hermanojob (pejcan Marcos 10:29, 30; 1 Tim. 5:2).

17. ¿Chuqui mi caj i coltan jiñi hermanajob chaʼan miʼ ñumen melbeñob i yeʼtel Jehová?

¹⁷ Miʼ mejlel a ñumen melben i yeʼtel Jehová. Jiñi woli bʌ i ñumen chaʼleñob coltaya ti subtʼan jiñobʌch jiñi hermanajob (Sal. 68:11). Ñaʼtan bajcheʼ miʼ mejlel a ñumen melben i yeʼtel Jehová, tajol maʼ mejlel ti ochel bajcheʼ precursora, maʼ majlel ti construcción o ti Betel. Cheʼ jiñi, ¿chuqui yom bʌ maʼ mel? Suben Jehová i pejcan jiñi wolix bʌ i mel ili eʼtel. Cʼajtibeñob chuqui yom maʼ mel, cheʼ jiñi tsʼijbun jujunchajp yom bʌ maʼ mel chaʼan maʼ taj jiñi a meta. Mi cheʼʌch maʼ mel cabʌl chuqui utsʼatax bʌ mi caj a ñusan tiʼ melol i yeʼtel Jehová.

18. ¿Chucoch ñuc i cʼʌjñibal chaʼan juntiquil hermana miʼ wen ñaʼtan majqui mi caj i ñujpuñel yicʼot? (Qʼuele jaʼel jiñi foto).

¹⁸ Maʼ mejlel ti ñujpuñel. Jiñi wen tac bʌ melbalʌl yicʼot tsaʼ tac bʌ a cʌñʌ miʼ mejlel i coltañet chaʼan maʼ sujtel ti wem bʌ ijñamʌl. Pero ñaxan yom maʼ wen qʼuel majqui a wicʼot mi caj a ñujpuñel. Ili jiñʌch junchajp wen ñuc bʌ ti a cuxtʌlel. Cʼajtesan chaʼan jiñi muʼ bʌ caj i ñujpuñel a wicʼot mi caj i sujtel ti a jol (Rom. 7:2; Efes. 5:23, 33). Jin chaʼan, cʼajtiben a bʌ: «¿Juntiquilʌch ba wiñic añix bʌ i ñaʼtʌbal? ¿Tsiquil ba chaʼan jiñi ñumen ñuc bʌ i cʼʌjñibal tiʼ cuxtʌlel jiñʌch Jehová? ¿Wem ba chuqui tac miʼ yajcan i mel? ¿Muʼ ba i pʌs i pecʼlel cheʼ bʌ miʼ taj i sajtemal? ¿Miʼ qʼuel ti ñuc jiñi xʼixicob? ¿Muʼ ba caj i mejlel i cʌntañon chaʼan chʌn lʌcʼʌl mi cajñel ti Jehová, chaʼan mic taj chuqui i cʼʌjñibal c chaʼan yicʼot chaʼan chʌn tijicñayon? ¿Muʼ ba i tsʼʌctesan ti wen jiñi eʼtel tac am bʌ i chaʼan, bajcheʼ yaʼ ti congregación?» (Luc. 16:10; 1 Tim. 5:8). Mi a wom a taj wem bʌ a ñoxiʼal, yom maʼ chaʼlen wersa a chajpan a bʌ chaʼan wem bʌ ijñamʌlet jaʼel.

19. ¿Chucoch mi la cʌl chaʼan wen ñucʌch cheʼ miʼ subentelob jiñi xʼixicob bajcheʼ xyaj coltaya?

¹⁹ Jiñi Biblia miʼ yʌl chaʼan jiñi wem bʌ ijñamʌl «i yaj coltaya» jiñi i ñoxiʼal (Gn. 2:18). ¿Yom ba i yʌl jiñi chaʼan jiñi xʼixic mach ñuquic i cʼʌjñibal? Mach cheʼiqui, jumpʼejlʌch wen ñuc bʌ eʼtel cheʼ jiñi xʼixic miʼ coltan i ñoxiʼal. Jinto jiñi Biblia miʼ yʌl chaʼan Jehová jiñʌch la caj coltaya (Sal. 54:4; Heb. 13:6). Jiñi wem bʌ ijñamʌl miʼ coltan i ñoxiʼal chaʼan pejtelel chuqui miʼ ñaʼtan i mel wen miʼ loqʼuel. Cheʼ jaʼel, come miʼ wen cʼuxbin Jehová, miʼ chaʼlen wersa chaʼan wen chuqui miʼ ñaʼtʌntel tiʼ tojlel i ñoxiʼal (Pr. 31:11, 12; 1 Tim. 3:11). Mi woli a ñaʼtan ñujpuñel, teche a chajpan a bʌ, pʼʌtʼesan a cʼuxbiya ti Jehová i chaʼlen wersa chaʼan wem bʌ xcoltayajet ti a wotot yicʼot ti a congregación.

20. ¿Bajcheʼ miʼ mejlel i coltan i familia juntiquil hermana?

²⁰ Miʼ mejlel ti tilel a walobil. Mi tsaʼ ñujpuñiyet, miʼ mejlel ti tilel a walobil (Sal. 127:3). Jin chaʼan, weñʌch cheʼ maʼ ñaʼtan chuqui yom bʌ maʼ mel chaʼan wen maʼ cosan a walobilob. Jiñi melbalʌl tac yicʼot muʼ tac bʌ a cʌn a mel tsaʼ tac bʌ laj qʼuele ti ili estudio mi caj i wen coltañet. Mi maʼ pʌs cʼuxbiya, a wutslel yicʼot a wujilʌch pijt, chʌn tijicña mi caj i yajñel a familia yicʼot wen mi caj i colel jiñi a walobilob (Pr. 24:3).

21. ¿Bajcheʼ yilal maʼ qʼuel jiñi hermanajob i chucoch? (Qʼuele jiñi foto tac am bʌ tiʼ tejchibal).

²¹ Xchʼocob, mi lon c wen cʼuxbiñetla chaʼan pejtelel muʼ bʌ laʼ mel tiʼ tojlel Jehová yicʼot jiñi i tejclum (Heb. 6:10). Mi laʼ chaʼlen wersa laʼ taj wen tac bʌ laʼ melbal, chaʼan mi laʼ cʌn chuqui tac miʼ coltañetla yicʼot muʼ bʌ i coltan yambʌlob, yicʼot jaʼel mi laʼ chajpan laʼ bʌ chaʼan jiñi talto bʌ qʼuin. ¡Wen ñuc laʼ cʼʌjñibal tiʼ yorganización Jehová!