Muʼ bʌ laj cʌn ti jiñi chaʼpʼejl i carta Pedro

 1. ¿Baqui bʌ eʼtel tsaʼ aqʼuenti Pedro cheʼ bʌ tsʼitaʼ jachix yom chaʼan miʼ chʌmel?

JIÑI apóstol Pedro xucʼul tsiʼ melbe i yeʼtel (troñel) Jehová cabʌl jab, tsaʼ ajñi yicʼot Jesús tiʼ subtʼan, tiʼ sube wen tʼan jiñi mach bʌ judíojobic, i cheʼ jaʼel, tsaʼ ajñi ti jiñi junmojt muʼ bʌ i pʌsob bij. Cheʼ ti jabil 62 cʼʌlʌl 64, cheʼ bʌ tsʼitaʼ jachix yom chaʼan miʼ chʌmel, Jehová tsiʼ yʌcʼʌ chaʼan miʼ tsʼijbun chaʼpʼejl carta, jiñʌch Primera yicʼot Segunda de Pedro. Jiñi apóstol yom chaʼan ili carta tac miʼ bej coltan jiñi xñoptʼañob anquese tsaʼix chʌmi (2 Ped. 1:​12-15).

 2. ¿Chucoch tsaʼʌch wen cʼʌjñibʌyi i carta tac Pedro?

² Pedro tiʼ tsʼijbu ili carta tac cheʼ bʌ jiñi hermanojob woli (choncol) i ñusañob cabʌl wocol (1 Ped. 1:6). An jontol bʌ (maña bʌ) wiñicob woli bʌ i pucob mach bʌ i sujmic cʌntesa tac i yomob chaʼan jiñi hermanojob miʼ yajlelob ti mulil, cheʼ bajcheʼ jiñi tsʼiʼlel (2 Ped. 2:​1, 2, 14). Cheʼ jaʼel, tsʼitaʼ jachix yom chaʼan jiñi hermanojob chumuloʼ bʌ ti Jerusalén miʼ qʼuelob bajcheʼ jiñi soldadojob romanojoʼ bʌ mi caj i jisañob jiñi tejclum yicʼot jiñi templo (1 Ped. 4:7). Jin chaʼan, miʼ mejlel la cʌl chaʼan jiñi i carta tac Pedro tsaʼʌch i wen colta jiñi hermanojob chaʼan miʼ lʌtʼob jiñi wocol tac i chaʼan miʼ chajpañob i bʌ chaʼan jiñi muʼto bʌ caj i tilel.b

 3. ¿Chucoch yomʌch mi lac wen qʼuel jiñi chaʼpʼejl i carta Pedro?

³ Anquese Pedro tiʼ tsʼijbu ili carta tiʼ tojlel jiñi xñoptʼañob ti ñaxam bʌ siglo, Jehová tsiʼ yʌcʼʌ ti tsʼijbuntel jaʼel yaʼ ti Biblia chaʼan mi lac tajben i wenlel (Rom. 15:4). Joñonla chumulonla baqui jiñi lac piʼʌlob wen lecojax i melbalob (chaʼlibalob) i an cabʌl wocol muʼ bʌ mejlel i mʌctañonla tiʼ melol i yeʼtel Jehová. Cheʼ jaʼel, ti talto bʌ qʼuin mi caj i tilel ñuc bʌ wocol mach bʌ añic miʼ laj i bʌ yicʼot jiñi tsaʼ bʌ i ñusayob jiñi judíojob. Jin chaʼan, jiñi chaʼpʼejl carta tsaʼ bʌ i tsʼijbu jiñi apóstol Pedro miʼ cʌntesañonla wen ñuc tac bʌ i cʼʌjñibal muʼ bʌ caj i coltañonla chaʼan chʌn yʌxʌl la co, maʼañic mi lac bʌcʼñan yañoʼ bʌ i mi lac wen cʼuxbin la quermañujob. Cheʼ jaʼel, mi caj i coltan jiñi ancianojob chaʼan wen miʼ cʌntañob jiñi hermanojob.

 4. ¿Chuqui miʼ mejlel i cʼuñʼesan lac ñopoñel? (2 Pedro 3:​3, 4).

⁴ Lʌcʼʌ tiʼ pejtelel lac piʼʌlob maʼañic miʼ ñopob muʼ bʌ i yʌl jiñi Biblia chaʼan jiñi talto bʌ qʼuin. Come añix ora i cajel lac sub chaʼan tal i jilibal ili pañimil, an lac piʼʌlob muʼ bʌ i wajleñoñobla i miʼ yʌlob chaʼan maʼañic baʼ ora mi caj i yujtel bajcheʼ jiñi (pejcan 2 Pedro 3:​3, 4). Mi an majqui miʼ subeñonla bajcheʼ ili yaʼ ti subtʼan, ti la qʼueʼtel o ti lac familia, jiñi lac ñopoñel miʼ mejlel ti cʼuñʼan. ¿Chuqui miʼ mejlel i coltañonla? Laʼ laj qʼuel chuqui tsiʼ yʌlʌ Pedro.

 5. ¿Chuqui mi caj i coltañonla lac chʌn pijtan jinto miʼ tilel i jilibal ili pañimil? (2 Pedro 3:​8, 9).

⁵ Tajol an muʼ bʌ i ñaʼtañob chaʼan Jehová tsaʼix wen jalʼa chaʼan miʼ jisan ili pañimil, pero Jehová mach lajalic i ñaʼtʌbal bajcheʼ lac chaʼan (pejcan 2 Pedro 3:​8, 9). Jiñʌch tsaʼ bʌ i cʼajtesʌbeyonla Pedro, tsiʼ yʌlʌ chaʼan tiʼ tojlel Jehová, mil jab lajal bajcheʼ jumpʼejl qʼuin. Cheʼ jaʼel, come wen yujil pijt, mach yomic chaʼan mi juntiquilic miʼ jisʌntel. Pero la cujil chaʼan i jilibal ili pañimil mucʼʌch caj i tilel. Jin chaʼan, ¿mach ba la com laj cʼʌn ti wen jiñi tiempo cʌylem bʌ chaʼan mi lac suben wen tʼan lac piʼʌlob?

 6. ¿Chuqui mi caj i coltañonla chaʼan chʌn yʌxʌl la co mi la cajñel? (2 Pedro 3:​11, 12).

⁶ Pedro miʼ yʌl chaʼan yom chʌn yʌxʌl la co chaʼan jiñi i qʼuiñilel Jehová (pejcan 2 Pedro 3:​11, 12). ¿Bajcheʼ mi lac mel? Aqʼuen i yorajlel chaʼan maʼ ñaʼtan bajcheʼ yilal mi caj lac chumtʌl yaʼ ti tsijiʼ bʌ pañimil. Ñaʼtancu cheʼ bʌ yaʼix añet: Maʼañix contaminación i mi caj a cʼux sumuc tac bʌ bʌlñʌcʼʌl. Mi caj a qʼuel cheʼ bʌ miʼ chaʼ chʼojyel jiñi tsaʼ bʌ chʌmiyob a chaʼan, i mi caj a tsictesʌbeñob jiñi tsaʼ bʌ chumleyob wajali bajcheʼ tsaʼ tsʼʌctiyi jiñi profecía tac am bʌ ti Biblia. Mi mucʼʌch a wen ñaʼtan iliyi, mi caj i coltañet chaʼan chʌn yʌxʌl a wo i maʼ cʼajtesan chaʼan añoñixla ti jiñi cojix tac bʌ qʼuin. Come la cujilix chuqui mi caj i yujtel ti talto bʌ qʼuin, maʼañic mi caj i lotiñoñobla ti jiñi mach bʌ i sujmic cʌntesa tac (2 Ped. 3:17).

 7. ¿Bajcheʼ miʼ mejlel i mʌctañonla cheʼ mi lac bʌcʼñan yambʌlob?

⁷ La cujil chaʼan lʌcʼʌlix i qʼuiñilel Jehová, jin chaʼan la com lac suben wen tʼan jiñi lac piʼʌlob. Pero an i tajol wocol mi la cubin chaʼan mi lac mel, ¿chucoch? Tajol mi lac bʌcʼñan yambʌlob, jiñʌch tsaʼ bʌ ujti tiʼ tojlel Pedro. Tsiʼ yʌlʌ chaʼan mach i cʌñʌyic Jesús i chaʼan mach xcʌntʼañic i chaʼan (Mat. 26:​69-75). Pero tsaʼʌch mejli i sʌt i bʌqʼuen i tsaʼ mejli i yʌl: «Mach laʼ bʌcʼñan chuqui miʼ bʌcʼñañob i mi yomicto mi laʼ cʼojoʼtan laʼ bʌ» (1 Ped. 3:14). Ili miʼ pʌsbeñonla chaʼan joñonla jaʼel miʼ mejlel lac mʌlben lac bʌqʼuen.

 8. ¿Chuqui mi caj i coltañonla chaʼan mi lac mʌlben lac bʌqʼuen? (1 Pedro 3:15).

⁸ ¿Chuqui mi caj i coltañonla chaʼan maʼañic mi lac bʌcʼñan yambʌlob? Pedro tsiʼ yʌlʌ: «Qʼuelela ti ñuc Cristo bajcheʼ laʼ Yum yaʼ ti laʼ pusicʼal» (pejcan 1 Pedro 3:15). Ili yom i yʌl chaʼan mi laj qʼuel ti ñuc jiñi eʼtel am bʌ i chaʼan Jesús yicʼot mi lac ñaʼtan bajcheʼ cʼamel i pʼʌtʌlel. Jin chaʼan, mi maʼ chaʼlen bʌqʼuen cheʼ bʌ mi caj a sub jiñi wen tʼan, ñaʼtan chaʼan yaʼix an Jesús tiʼ yeʼtel yicʼot yonlel ángelob. Cʼajtesan chaʼan tsaʼ aqʼuenti tiʼ wenta pejtelel chuqui an ti panchan yicʼot ti pañimil, i chaʼan mi caj i yajñel yicʼotet ti jujumpʼejl qʼuin cʼʌlʌl cheʼ tiʼ yorajlel i jilibal pañimil (Mat. 28:​18-20). Pedro miʼ yʌl chaʼan yom chajpʌbilonla tiʼ pejtelel ora chaʼan mi laj coltan jiñi ñopol bʌ lac chaʼan. ¿A wom ba a sub jiñi wen tʼan ti a weʼtel, ti escuela o baqui jach? Mi cheʼʌchi, ñaʼtan jala a wom a mel i chajpan muʼ bʌ caj a wʌl. Cʼajtiben Jehová chaʼan miʼ yʌqʼueñet a chʼejlel i ñopo chaʼan mi caj i coltañet chaʼan maʼ mʌlben a bʌqʼuen (Hech. 4:29).

 9. ¿Baqui ora maʼañic tsiʼ pʌsʌ cʼuxbiya jiñi Pedro? (Qʼuele jaʼel jiñi dibujo).

⁹ Pedro tsiʼ cʌñʌ bajcheʼ yom mi lac pʌsben lac bʌ cʼuxbiya. Yaʼan yicʼot Jesús cheʼ bʌ tsiʼ yʌlʌ: «Mi cʌqʼueñetla jumpʼejl tsijiʼ bʌ mandar: Chaʼan mi laʼ cʼuxbin laʼ bʌ. Cheʼ bajcheʼ tsaʼ j cʼuxbiyetla, cheʼʌch yom mi laʼ cʼuxbin laʼ bʌ ti jujuntiquil» (Juan 13:34). Pero ti wiʼil, Pedro tsiʼ chaʼle bʌqʼuen i tsiʼ cʌyʌ i cʼux i waj yicʼot jiñi hermanojob mach bʌ judíojobic. Jiñi apóstol Pablo tsiʼ jamʌ sube chaʼan mach utsʼatic jiñi woli bʌ (yʌquel bʌ) i mel (Gál. 2:​11-14). Pedro tsaʼʌch i jacʼʌ jiñi i tojʼesʌntel i tsiʼ qʼuexta i melbal. Ti jiñi chaʼpʼejl carta tsaʼ bʌ i tsʼijbu, tsiʼ jamʌ alʌ chaʼan mach yomic jach mi la cubin cʼuxbiya tiʼ tojlel jiñi hermanojob, yomʌch mi lac pʌs.

10. ¿Chuqui mi caj i coltañonla lac pʌsben lac bʌ i sujm bʌ cʼuxbiya? (1 Pedro 1:22).

¹⁰ Pedro tsiʼ yʌlʌ chaʼan yom mi lac pʌsben lac bʌ «i sujm bʌ cʼuxbiya cheʼ bʌ bajcheʼ muʼ bʌ i pʌstʌl ti jumpʼejl familia» (pejcan 1 Pedro 1:22). Cheʼ tsaʼ caji laj cʌn jiñi i sujmlel yicʼot tsaʼ caji lac jacʼ, jiñi cʼuxbiya tsaʼ caji ti colel. I cheʼ jaʼel, tsaʼ laj cʌñʌ chaʼan Dios junlajal miʼ qʼuel lac piʼʌlob (Hech. 10:​34, 35). Jin chaʼan, mi cojach mi lac pʌsben laj cʼuxbiya chaʼtiqui uxtiquil hermanojob ti congregación, maʼañic woli lac jacʼ jiñi mandar tsaʼ bʌ i yʌcʼʌ Jesús. I sujmʌch, tajol ñumen lʌcʼʌl mi la cubin lac bʌ tiʼ tojlel chaʼtiqui uxtiquil hermanojob, maʼañic i wocolel jiñi, cheʼʌch tsiʼ yubi i bʌ Jesús jaʼel (Juan 13:23; 20:2). Pero Pedro miʼ cʼajtesʌbeñonla chaʼan yom mi laj cʼuxbin tiʼ pejtelel hermanojob, cheʼʌch bajcheʼ miʼ pʌsbeñob i bʌ cʼuxbiya ti jumpʼejl familia (1 Ped. 2:17).

11. ¿Chuqui yom i yʌl cheʼ mi lac pʌsben lac bʌ cʼuxbiya loqʼuem bʌ ti lac pusicʼal?

¹¹ Pedro tsiʼ yʌcʼʌ ili ticʼojel: «Pʌsben laʼ bʌ cʼuxbiya loqʼuem bʌ ti laʼ pusicʼal». ¿Chuqui yom i yʌl ili? Chaʼan yomto mi laj cʼuxbin jiñi muʼ bʌ lac ñaʼtan chaʼan mach yomic mi laj cʼuxbin. Jumpʼejl ejemplo, mi juntiquil hermano miʼ subeñonla o miʼ melbeñonla mach bʌ weñic, tajol ñaxam bʌ miʼ tilel ti lac jol jiñʌch chaʼan mi lac chaʼ sutqʼuiben, i maʼañic mi lac pʌs laj cʼuxbiya. Pero jiñi maʼañic mi caj i mulan Jehová (Juan 18:​10, 11). Pedro tsiʼ yʌlʌ: «Mach laʼ chaʼ sutqʼuin chuqui mach bʌ weñic mi laʼ melbentel mi yomicto mi laʼ chaʼ sutqʼuin jiñi pʼajoñel cheʼ an majqui miʼ pʼajetla. Acʼʌla jumpʼejl bendición» (1 Ped. 3:9). Mi tiʼ sujm a wujil cʼuxbiya, mi caj a pʌs a wutslel anquese maʼ melbentel mach bʌ weñic.

12. a) Mi mucʼʌch lac wen cʼuxbin lac bʌ, ¿chuqui yambʌ mi caj lac mel? b) Cheʼ bajcheʼ miʼ pʌs jiñi video Laʼ lac sʌclan ñʌchʼtʌlel yicʼot la quermañujob, ¿chuqui jiñi a wom bʌ a mel?

¹² Ti jiñi ñaxam bʌ carta tsaʼ bʌ i tsʼijbu Pedro tsiʼ yʌlʌ chaʼan yom mi lac wen cʼuxbin lac bʌ. Ili cʼuxbiya mi caj i coltañonla chaʼan mi lac ñusʌben i sajtemal yambʌlob (1 Ped. 4:8). Cheʼ bʌ Pedro tiʼ tsʼijbu iliyi, tajol tsiʼ cʼajtesa tsaʼ bʌ i sube Jesús chaʼan bajcheʼ yom mi lac ñusʌben lac bʌ lac mul. Pedro tsiʼ cʼajtibe Jesús mi jasʌl 7 veces yom miʼ ñusʌben i mul juntiquil, pero Jesús tiʼ sube chaʼan «cʼʌlʌlto ti 77». Ili miʼ pʌsbeñonla chaʼan mach yomic mi lac tsic jaysujtel mi caj lac ñusʌben i mul yambʌ lac piʼʌl, i jiñʌch yom bʌ mi lac chʼʌm ti ñuc (Mat. 18:​21, 22). ¿Wocol ba maʼ wubin chaʼan maʼ jacʼ tsaʼ bʌ i yʌlʌ Jesús? Come xmulilonla, ti lac pejtelel an i tajol wocolʌch mi la cubin chaʼan mi lac ñusʌben i mul juntiquil. Jin chaʼan, ¿chuqui miʼ mejlel lac mel? Laʼ lac chʌn chaʼlen wersa chaʼan mi lac ñusʌben i mul jiñi la quermañu yicʼot chaʼan mi lac chaʼ utsʼan la quicʼot.c

13. ¿Chucoch tajol wocol chaʼan jiñi ancianojob miʼ cʌntañob jiñi hermanojob?

¹³ Pedro tajol maʼañic tsaʼ wis ñajʌyi i chaʼan cheʼ bʌ Jesús tiʼ sube: «Cʌntan jiñi c tiñʌmeʼ tac» (Juan 21:16). Ili ora, jiñi ancianojob yomʌch miʼ jacʼob jaʼel, i chaʼan miʼ melob yom miʼ yʌqʼueñob cabʌl i yorajlel. An i tajol wocolʌch, come ti ñaxan, yom miʼ cʌntañob i familia, miʼ yʌqʼueñob chuqui i cʼʌjñibal i chaʼañob yicʼot miʼ coltañob chaʼan lʌcʼʌl miʼ yajñelob ti Jehová. Cheʼ jaʼel, yom miʼ chʌn loqʼuelob ti subtʼan, miʼ chajpañob discurso tac chaʼan tempa bʌ yicʼot colem tempa bʌ tac. I an muʼ bʌ i chaʼleñob coltaya ti jiñi Comité muʼ bʌ i pejcañob doctorob yicʼot yaʼ ti Oficina muʼ bʌ i qʼuel i melol i yotlel chʼujutesaya. Tiʼ sujm, cabʌl chuqui miʼ melob jiñi ancianojob.

14. ¿Chucoch jiñi ancianojob yomob i cʌntan jiñi hermanojob, i chuqui miʼ mejlel i coltañob i mel? (1 Pedro 5:​1-4).

¹⁴ Pedro tiʼ sube jiñi yambʌ xñoptʼañob ancianojoʼ bʌ jaʼel: «Cʌntʌbenla jiñi i tiñʌmeʼ tac Dios» (pejcan 1 Pedro 5:​1-4). La cujil chaʼan jiñi ancianojob miʼ cʼuxbiñob jiñi hermanojob i yomob i cʌntañob. Pero tajol miʼ ñaʼtañob chaʼan maʼañic miʼ mejlel i tsʼʌctesañob i yeʼtel come cabʌl chuqui miʼ melob yicʼot miʼ lujbʼañob. Mi cheʼ maʼ wubin a bʌ bajcheʼ jiñi, ¿chuqui miʼ mejlel a mel? Suben Jehová bajcheʼ maʼ wubin a bʌ. Pedro tsiʼ yʌlʌ: «Mi an muʼ bʌ i coltan yambʌlob, laʼ i mel bajcheʼ juntiquil cʌyʌl bʌ ti jiñi pʼʌtʌlel muʼ bʌ i yʌcʼ Dios» (1 Ped. 4:11). Tajol jiñi hermanojob woliʼ ñusañob wocol tac maʼañic bʌ mi caj i mejlel ti tojʼesʌntel ili ora. Pero cʼajtesan, Jesucristo, jiñi ñumen ñuc bʌ xcʌnta tiñʌmeʼ, ñumen cabʌlto chuqui miʼ mejlel i mel tiʼ tojlelob ili ora yicʼot ti talto bʌ qʼuin. Yom bʌ Jehová tiʼ tojlel jiñi ancianojob jiñʌch chaʼan miʼ cʼuxbiñob jiñi hermanojob, miʼ cʌntañob yicʼot chaʼan miʼ pʌsbeñob wem bʌ ejemplo.

15. ¿Chuqui miʼ mel juntiquil anciano chaʼan miʼ cʌntan jiñi hermanojob? (Qʼuele jaʼel jiñi foto).

¹⁵ William, añix cabʌl jab cajel i mel i yeʼtel bajcheʼ anciano, miʼ wen qʼuel ti ñuc cheʼ miʼ cʌntʌntel jiñi hermanojob. Cheʼ bʌ tsaʼ tejchi jiñi pandemia chaʼan COVID-19, William yicʼot jiñi yambʌ ancianojob ti congregación tsiʼ yʌlʌyob chaʼan wen ñuc i cʼʌjñibal cheʼ miʼ pejcañob jujuntiquil jiñi hermanojob ti jiñi grupo tac chaʼan subtʼan. ¿Chucoch? Miʼ yʌl: «An cabʌl hermanojob i bajñel bʌ chumulob, i mach wocolic chaʼan miʼ mejlel i yubiñob i chʼijyemlel». Cheʼ bʌ juntiquil hermano miʼ ñusan wocol, William miʼ wen ñʌchʼtan chaʼan miʼ ñaʼtan chuqui i cʼʌjñibal i chaʼan yicʼot chuqui miʼ cʼojoʼtan (pensalin). Cheʼ jiñi, miʼ sʌclan bajcheʼ miʼ mejlel i coltan, tajol miʼ chocben majlel jumpʼejl video am bʌ ti jw.org. Miʼ yʌl: «Wen ñuc i cʼʌjñibal miʼ cʌntʌntel jiñi hermanojob. Joñonla mi lac chaʼlen wersa laj coltan yambʌ lac piʼʌlob chaʼan miʼ cʌñob Jehová, i jiñʌch yom bʌ mi lac mel jaʼel ti congregación, yom mi laj coltan jiñi hermanojob chaʼan miʼ chʌn ajñelob tiʼ sujmlel».

16. ¿Bajcheʼ miʼ mejlel lac jacʼ jiñi tsaʼ bʌ laj cʌñʌ yaʼ ti chaʼpʼejl i carta Pedro?

¹⁶ Ti ili estudio tsaʼ jach laj qʼuele chaʼpʼej uxpʼejl muʼ bʌ laj cʌn ti jiñi i carta tac Pedro. Tajol tsaʼ qʼuele chuqui tac muʼ bʌ mejlel a ñumen weñʼesan. Jumpʼejl ejemplo, ¿muʼ baʼ mulan a ñumen aqʼuen i yorajlel chaʼan maʼ ñaʼtan bajcheʼ yilal mi caj lac chumtʌl yaʼ ti tsijiʼ bʌ pañimil? ¿A wom baʼ ñumen chaʼlen subtʼan ti a weʼtel, ti escuela o baqui jach? ¿Am baʼ ñaʼta bajcheʼ yambʌ miʼ mejlel a pʌsben cʼuxbiya jiñi hermanojob? I mi ancianojet, ¿a wom baʼ ñumen aqʼuen i yorajlel chaʼan maʼ cʌntan jiñi hermanojob? Mi tsaʼ taja a qʼuel chaʼan anto baqui miʼ mejlel a weñʼesan, mach a wubin a chʼijyemlel, cʼajtesan chaʼan Jehová wen an i yutslel i yom i coltañet (1 Ped. 2:3). Pedro miʼ yʌl: «Dios […] mi caj i xucʼchocoñetla, jin mi caj i pʼʌtʼesañetla, jin mi caj i yʌqʼuetla ti tsʌts bʌ laʼ cʼʌclib» (1 Ped. 5:10).

17. ¿Chuqui mi caj lac taj mi tsaʼ laj cʌyʌ chaʼan Jehová miʼ cʌntesañonla?

¹⁷ Junsujtel, Pedro tsiʼ ñaʼta chaʼan i wentʌlel mach yaʼic an yicʼot Jesús, jiñi i Yalobil Dios (Luc. 5:8). Pero tiʼ coltaya Jehová yicʼot Jesús, Pedro xucʼul tsiʼ chʌn tsajca. Jin chaʼan tsaʼ ajqʼui ti ochel «yaʼ ti Yumʌntel mach bʌ añic i jilibal i chaʼan bʌ Jesucristo jiñi lac Yum yicʼot la caj Coltaya» (2 Ped. 1:11). ¡Pedro tsiʼ taja wen ñuc bʌ i majtan! Mi jatet jaʼel maʼ chaʼlen wersa i maʼ wʌcʼ a bʌ ti coltʌntel ti Jehová, mi caj a taj a cuxtʌlel mach bʌ añic miʼ jilel. Mi caj a taj a coltʌntel come an a ñopoñel (1 Ped. 1:9).