Laʼ la cʌcʼ lac ñopoñel ti chuqui albil tac i chaʼan Jehová

 1. Mi Jehová miʼ yʌqʼueñonla lac ñopoñel, ¿chuqui yom mi lac mel?

MACH tiʼ pejtelelic wiñicob xʼixicob (quixtañujob) añob i ñopoñel (chʼujbiya) ti Dios (2 Tesalonicenses 3:2). Pero Jehová miʼ yʌqʼuen i ñopoñel jiñi muʼ bʌ i chʼujutesañob (Romanos 12:3; Gálatas 5:22). Jin chaʼan, yom mi la cʌqʼuen Jehová wocolix i yʌlʌ.

2, 3. a) ¿Chuqui mi lac taj cheʼ añʌch lac ñopoñel? b) ¿Chuqui ti cʼajtiya tac mi caj lac jacʼ?

² Jehová tsiʼ yʌcʼʌ i Yalobil chaʼan miʼ ñusʌbentelob i mul majqui jach miʼ ñop. Mi añʌch lac ñopoñel tiʼ tojlel Jesús, mi caj lac mejlel ti sujtel tiʼ yamigo Jehová i mi lac chumtʌl tiʼ pejtelel ora (Juan 6:44, 65; Romanos 6:23). Jehová wen an i yutslel ti lac tojlel. Anquese xmulilonla yicʼot i wentʌlel mach cuxuloñicla, tsiʼ qʼuele chaʼan miʼ mejlel lac mel chuqui wen (Salmo 103:10). Jin chaʼan, tsiʼ cʌntesayonla tiʼ tojlel Jesús yicʼot chaʼan jiñi i cuxtʌlel tsaʼ bʌ i yʌcʼʌ. Cheʼ bʌ tsaʼ la cʌcʼʌ lac ñopoñel ti Jesús i tsaʼ sujtiyonla ti xcʌntʼan i chaʼan, tsaʼ caji la cʌcʼ lac pijtaya chaʼan mi lac chumtʌl tiʼ pejtelel ora (pejcan 1 Juan 4:9, 10).

³ Pero ¿chuqui miʼ mejlel lac ñumen cʌn chaʼan jiñi chʼujbiya? Mi la com lac taj lac chʼujbiya, ¿jasʌl ba cheʼ la cujil chuqui melbil i chaʼan Dios ti lac tojlel yicʼot muʼ bʌ caj i mel ti talto bʌ qʼuin? Maʼañic. Laʼ laj qʼuel chuqui yambʌ yom mi lac mel.

 4. Mi añʌch lac ñopoñel, ¿chuqui mi caj lac mel?

⁴ Mi an lac ñopoñel ti Jehová yicʼot Jesús, mach jasʌlic mi caj la cubin cheʼ la cujil chuqui melbil i chaʼañob yicʼot muʼ bʌ caj i melob ti lac tojlel. Ti jumpʼejl lac pusicʼal mi caj lac chumtʌl cheʼ bajcheʼ miʼ mulañob yicʼot mi caj laj coltan yambʌlob chaʼan miʼ cʼotel i cʌñob. Jiñi apóstol Pablo tsiʼ yʌlʌ: «Mi tsaʼ subu ti a wej a Yumʌch Jesús, mi tsaʼ ñopo ti a pusicʼal tsaʼix i teche loqʼuel Dios baʼan chʌmeñoʼ bʌ, mi caj a coltʌntel. Come ti lac pusicʼal mi lac ñop. Cheʼ jini, mi la cʌqʼuentel toj bʌ lac pusicʼal. Ti la quej mi lac sub cheʼ ñopol lac chaʼan. Cheʼ jini, mi laj coltʌntel» (Romanos 10:9, 10; 2 Corintios 4:13).

 5. a) ¿Chucoch ñuc i cʼʌjñibal jiñi lac ñopoñel? b) Alʌ jumpʼejl ejemplo chaʼan maʼ tsictesan chuqui yom mi lac mel chaʼan pʼʌtʌl lac ñopoñel.

⁵ Mi la com chumtʌl tiʼ pejtelel ora yaʼ ti tsijiʼ bʌ pañimil (mulawil), yom an lac ñopoñel yicʼot mi lac chʌn pʼʌtʼesan. Iliyi lajalʌch bajcheʼ jumpʼejl alʌ teʼ. Chaʼan utsʼat miʼ colel, yom mi lac chʌcʌ mul. Mi mach cheʼic mi lac mel, mi caj i chʌmel. Cheʼʌch miʼ yujtel ti lac ñopoñel jaʼel, yom mi lac chʌcʌ qʼuel chaʼan utsʼat miʼ yajñel yicʼot miʼ bej colel (Tito 2:2; 2 Tesalonicenses 1:3; Lucas 22:32; Hebreos 3:12).

 6. ¿Baqui bʌ jiñi chaʼpʼejl i sujmlel muʼ bʌ lac taj ti Hebreos 11:1 chaʼan jiñi ñopoñel?

⁶ Jiñi Biblia miʼ yʌl chaʼpʼejl i sujmlel chaʼan jiñi ñopoñel yaʼ ti Hebreos 11:1 (pejcan). Ñaxan, miʼ yʌl chaʼan jiñi am bʌ i ñopoñel miʼ xucʼchocon tiʼ pusicʼal chuqui woli (choncol) i pijtan. Jiñi woli (yʌquel) bʌ lac pijtan jiñʌch albil bʌ i chaʼan Dios chaʼan ti talto bʌ qʼuin. Jumpʼejl ejemplo, mi lac ñop ti jumpʼejl lac pusicʼal chaʼan Dios mi caj i jisan jontolil yicʼot mi caj i tsijibtesan ili pañimil. I chaʼpʼejlel, jiñi Biblia miʼ yʌl chaʼan jiñi am bʌ i ñopoñel «miʼ ñop ti isujm [chaʼan] tal jini mach bʌ tsiquilic». Jiñi mach tac bʌ tsiquilic muʼ bʌ lac ñop jiñʌch bajcheʼ Jehová, Jesucristo, jiñi ángelob yicʼot jiñi Yumʌntel am bʌ ti panchan (Hebreos 11:3). ¿Bajcheʼ mi lac pʌs chaʼan tiʼ sujm mi lac ñop jiñi albil bʌ i chaʼan Dios yicʼot jiñi mach bʌ tsiquilic? Jiñʌch cheʼ bajcheʼ chumulonla, ti chuqui mi la cʌl yicʼot mi lac mel.

 7. ¿Bajcheʼ miʼ coltañonla tsaʼ bʌ i mele Noé chaʼan mi lac ñaʼtan chuqui yom i yʌl cheʼ an lac ñopoñel? (Qʼuele jiñi dibujo am bʌ tiʼ tejchibal).

⁷ Cheʼ bajcheʼ tsiʼ mele Noé miʼ coltañonla lac ñaʼtan chuqui yom i yʌl jiñi ñopoñel. Pablo tsiʼ yʌlʌ chaʼan Noé tsaʼ subenti «chuqui miʼ caj ti ujtel cheʼ maxto tsiquilic», yom i yʌl, chuqui maʼañic bʌ qʼuelbil i chaʼan. Jin chaʼan, «tsiʼ mele jini colem barco chaʼan miʼ coltan pejtelel añoʼ bʌ tiʼ yotot» come utsʼat yom ajñel tiʼ wut Dios (Hebreos 11:7). Noé tsiʼ ñopo tsaʼ bʌ subenti ti Jehová, jin chaʼan tsiʼ mele jiñi colem bʌ arca. Tajol tsaʼʌch cʼajtibenti chucoch woliʼ mel jiñi. Pero la cujil chaʼan mach ñʌchʼʌlic jach tsaʼ cʌyle, come jiñi Biblia miʼ yʌl chaʼan tsiʼ «subu i sujmlel» (2 Pedro 2:5). Tsiʼ sube jiñi quixtañujob chaʼan Dios mi caj i choc tilel jiñi ñuc bʌ Butʼjaʼ chaʼan miʼ jisan jiñi jontolil. Tajol cheʼʌch tsiʼ subeyob bajcheʼ tsiʼ yʌlʌ Jehová: «Mi caj c jisan pejtel winicob xʼixicob, come cabʌl tsaʼ pʼojli jontolil tiʼ pejtel pañimil». Jehová tsiʼ sube jaʼel: «Mi caj c choc tilel butʼjaʼ chaʼan mic jisan pejtel i bʌl pañimil am bʌ i cuxtʌlel. Miʼ caj ti chʌmel pejtel cuxul bʌ ti pañimil». Ti wiʼil, Noé tajol tsaʼʌch i subeyob chuqui yom miʼ melob chaʼan maʼañic miʼ chʌmelob. Jehová tsiʼ sube: «Mi caj a wochel ti barco, jatet yicʼot a walobilob yicʼot a wijñam yicʼot i yijñamob a walobilob» (Génesis 6:13, 17, 18).

 8. ¿Chuqui tsiʼ yʌlʌ Santiago chaʼan jiñi ñopoñel?

⁸ Jiñi xcʌntʼan Santiago tsiʼ taja ti tʼan jaʼel jiñi ñopoñel. Tajol tsiʼ mele cheʼ bʌ Pablo ujtemix i tsʼijbun jiñi carta i chaʼan hebreojob. Santiago tsiʼ yʌlʌ: «¿Bajcheʼ mi caj a pʌsbeñon ti isujm mi wolaʼ ñop cheʼ maʼanic wen bʌ a melbal? Pero wen tsiquil wolic ñop Dios cheʼ mic pʌsbeñet wen bʌ c melbal» (Santiago 2:18). Tsiʼ yʌlʌ chaʼan mach jasʌlic yom mi lac ñop Dios chaʼan mi lac pʌs lac ñopoñel. Jiñi xibajob yujilob chaʼan añʌch Dios, pero maʼañobic i ñopoñel tiʼ tojlel. Cojach miʼ wen contrajiñob (Santiago 2:19, 20). Tiʼ sujm, jiñi am bʌ i ñopoñel mi caj i mel chuqui utsʼat chaʼan wen miʼ yajñel tiʼ tojlel Dios. Jiñʌch tsaʼ bʌ i mele Abraham. Santiago tiʼ tsʼijbu: «¿Mach ba anic tsaʼ qʼuejli ti toj lac tat Abraham chaʼan ti wen bʌ i melbal cheʼ bʌ tsiʼ yʌcʼʌ ti chʌmel i yalobil i cʼabaʼ Isaac yaʼ tiʼ pulʌntib i majtan Dios? Ñaʼtan cheʼ jini, mach cojic jach tsiʼ ñopo Dios pero tsiʼ mele chuqui wen». Ti wiʼil, tsiʼ yʌlʌ chaʼan maʼañic i cʼʌjñibal lac ñopoñel mi maʼañic mi lac pʌs ti lac melbal. Tsiʼ yʌlʌ: «Cheʼ loqʼuemix lac chʼujlel ti lac bʌcʼtal chʌmeñonixla. Cheʼ jaʼel mi toʼol tʼan jach woli lac ñop Dios cheʼ maʼanic wen bʌ lac melbal, chʌmeñonixla yubil come maʼanic mi lac ñop ti isujm» (Santiago 2:21-23, 26).

9, 10. Mi la com la cʌcʼ lac ñopoñel tiʼ Yalobil Dios, ¿chuqui yom mi lac mel?

⁹ Cheʼ bʌ ñumeñix 30 jab tiʼ tsʼijbu Santiago jiñi tʼan, Juan tiʼ tsʼijbu jiñi Evangelio yicʼot yambʌ uxpʼejl carta. Juan yujilʌch chuqui yom i yʌl jiñi ñopoñel, lajal bajcheʼ jiñi yambʌ tsaʼ bʌ i tsʼijbuyob jiñi Biblia. Tsiʼ cʼʌñʌ jumpʼejl tʼan am bʌ ti griego muʼ bʌ i cʼʌjñel bajcheʼ «muʼ bʌ i ñop» o «muʼ bʌ i pʌs i ñopoñel».

¹⁰ Jumpʼejl ejemplo, Juan tsiʼ yʌlʌ: «Jini muʼ bʌ i ñop i Yalobil Dios, an i chaʼan i cuxtʌlel mach bʌ anic miʼ jilel. Jini mach bʌ anic miʼ ñop i Yalobil Dios mach mejlic i yʌqʼuentel i cuxtʌlel. Miʼ yajñel tiʼ michʼlel Dios» (Juan 3:36). Chaʼan mi lac pʌs lac ñopoñel tiʼ Yalobil, yom mi lac chʼujbin i mandar tac (qʼuele jiñi recuadro «¿Chuqui yom i yʌl?»). Cheʼ mi lac pejcan tsaʼ bʌ i tsʼijbu Juan, mi laj cʌn chaʼan yom mi la cʌcʼ lac ñopoñel tiʼ tojlel Jesús yicʼot tiʼ Tat chaʼan mi lac taj laj cuxtʌlel maʼañic bʌ miʼ jilel (Juan 3:16; 6:29, 40; 11:25, 26; 14:1, 12).

11. ¿Bajcheʼ mi lac pʌsben Jehová chaʼan mucʼʌch laj qʼuel ti ñuc cheʼ miʼ cʌntesañonla?

¹¹ Jehová tsiʼ cʼʌñʌ jiñi chʼujul bʌ i yespíritu chaʼan miʼ cʼotel laj cʌn i sujmlel tiʼ tojlel yicʼot i Yalobil, i chaʼan mi la cʌcʼ lac ñopoñel tiʼ tojlelob (pejcan Lucas 10:21). ¿Bajcheʼ mi lac pʌs chaʼan mucʼʌch laj qʼuel ti ñuc melbil bʌ i chaʼan Jehová? Jiñʌch cheʼ mi la cʌqʼuen wocolix i yʌlʌ cheʼ mi lac mejlel ti sujtel tiʼ yamigo tiʼ tojlel Jesús, jiñi «muʼ bʌ i yʌqʼueñonla lac ñop» yicʼot muʼ bʌ i «tsʼʌctesʌbeñonla jaʼel chuqui mi lac ñop» (Hebreos 12:2). Cheʼ jaʼel, yom mi lac bej pʼʌtʼesan lac chʼujbiya. ¿Bajcheʼ? Yom mi lac mel oración yicʼot ti bele ora mi lac pejcan lac Biblia (Efesios 6:18; 1 Pedro 2:2).

12. ¿Chuqui mi caj lac mel mi añʌch lac ñopoñel?

¹² Tiʼ pejtelel ora mi caj lac pʌs ti lac melbal mi mucʼʌch lac ñop jiñi albil tac bʌ i chaʼan Jehová. Mi caj lac bej suben yambʌlob chaʼan bʌ i Yumʌntel Dios yicʼot mi caj laj coltañob i tsajcan majlel Jesús. Cheʼ jaʼel, «cheʼ an bajcheʼ chʼujbi laj cotyan lac piʼʌlob yom mi laj cotyañob. Más tyo yom mi laj cotyañob la quermañujob jini chʌncol bʌ i chʼujbiñob Dios jeʼel» (Gálatas 6:10, Jini wen bʌ tʼan). I mi caj lac chʌn chaʼlen wersa ‹chaʼan mi lac junyajlel choc pejtelel i chaʼan bʌ pañimil›, come mach la comic chuqui miʼ mʌctañonla chaʼan utsʼat mi la cajñel yicʼot Jehová (Colosenses 3:5, 8-10).

13. a) ¿Chucoch ñuc i cʼʌjñibal cheʼ an lac ñopoñel? b) ¿Chuqui miʼ yʌl jiñi Biblia chaʼan jiñi ñopoñel, chucoch?

¹³ Jiñi Biblia miʼ yʌl chaʼan mach utsʼatic añonla tiʼ wut Dios mi maʼañic lac ñopoñel, «come majqui jach yom i cʌn Dios, wersa miʼ ñop mi an Dios, come jiñʌch muʼ bʌ i yʌqʼuen i chobejtʌbal majqui jach miʼ tsajcan» (Hebreos 11:6). Miʼ yʌl jaʼel chaʼan jiñi lac ñopoñel jiñʌch junchajp ‹i tejchibal bʌ cʌntesa›. ¿Chucoch? Come jiñʌch jiñi ñaxam bʌ yom miʼ cʼotel i taj juntiquil isujm bʌ xñoptʼan (Hebreos 6:1). Pero chaʼan utsʼat mi lac chʌn ajñel la quicʼot Dios yom mi lac taj yambʌ lac melbal tac ñuc bʌ i cʼʌjñibal jaʼel, mach cojach jiñi lac ñopoñel (pejcan 2 Pedro 1:5-7; Judas 20, 21).

14, 15. ¿Chucoch ñumen ñuc jiñi cʼuxbiya?

¹⁴ Tsaʼ bʌ i ñumen tajayob ti tʼan jiñi tsaʼ bʌ i tsʼijbuyob Biblia jiñʌch jiñi ñopoñel. Pero ¿yom ba i yʌl chaʼan jiñʌch jiñi ñumen ñuc bʌ chaʼan juntiquil xñoptʼan? Laʼ laj qʼuel.

¹⁵ Pablo tsiʼ laja jiñi ñopoñel yicʼot jiñi cʼuxbiya. Tsiʼ yʌlʌ: «Muqʼuic c ñop Dios ti xucʼul bʌ c pusicʼal chaʼan mic tʌtsʼ wits, pero mi maʼanic j cʼuxbiya, maʼanic j cʼʌjñibal» (1 Corintios 13:2). Jesús tsiʼ yʌlʌ chaʼan i cʼuxbintel Dios jiñʌch jiñi «mandar cʼax ñuc [bʌ] tiʼ mandar Dios» (Mateo 22:35-40). Jiñi cʼuxbiya miʼ coltañonla lac taj yambʌ lac melbal tac utsʼat bʌ miʼ qʼuel Dios. Jumpʼejl ejemplo, jiñi Biblia miʼ yʌl chaʼan jiñi cʼuxbiya miʼ ñop tiʼ pejtelel. Jin chaʼan, miʼ coltañonla lac ñop muʼ bʌ i yʌl Dios yaʼ ti Biblia (1 Corintios 13:4, 7).

16, 17. a) ¿Bajcheʼ miʼ pʌs jiñi Biblia chaʼan wen ñucʌch i cʼʌjñibal jiñi ñopoñel yicʼot cʼuxbiya? b) ¿Baqui bʌ jiñi ñumen ñuc bʌ i cʼʌjñibal, i chucoch ñucʌch?

¹⁶ Jiñi Biblia miʼ pʌs chaʼan jiñi ñopoñel yicʼot cʼuxbiya jiñʌch wen ñuc tac bʌ melbalʌl. Jin chaʼan, tsaʼ bʌ i tsʼijbuyob jiñi Biblia tsiʼ laja tajayob ti tʼan. Jumpʼejl ejemplo, Pablo tsiʼ sube jiñi yambʌ xñoptʼañob chaʼan yom miʼ yʌcʼob i pusicʼal ti jiñi ‹woli bʌ i ñopob yicʼot cʼuxbiya› (1 Tesalonicenses 5:8). Pedro tsiʼ yʌlʌ tiʼ tojlel Jesús: «Maʼanic tsaʼ laʼ qʼuele Jesús, pero mi laʼ cʼuxbin. Maʼanic woli laʼ qʼuel wʌle, pero woli laʼ ñop» (1 Pedro 1:8). Santiago tsiʼ sube jiñi bombiloʼ bʌ o yajcʌbiloʼ bʌ ti espíritu: «Dios tsiʼ yajca jini mach bʌ añobic i chubʌʼan ti pañimil chaʼan miʼ wen chumtʌlob chaʼan jini muʼ bʌ lac ñop, come mi caj i yajñelob tiʼ yumʌntel Dios yicʼot pejtel muʼ bʌ i cʼuxbiñob Dios cheʼ bajcheʼ albil i chaʼan» (Santiago 2:5). Juan tsiʼ yʌlʌ jaʼel chaʼan Dios «yom mi lac ñopben i cʼabaʼ Jesucristo i Yalobil Dios. Yom mi laj cʼuxbin lac bʌ ti lac pejtelel» (1 Juan 3:23).

¹⁷ Pero Pablo tsiʼ yʌlʌ jaʼel: «Anto lac chaʼan uxchajp: lac ñopbal, lac pijtaya yicʼot laj cʼuxbiya. Pero jini ñumen ñuc bʌ jiñʌch cʼuxbiya» (1 Corintios 13:13). ¿Chucoch tsiʼ yʌlʌ chaʼan jiñʌch ñumen ñuc jiñi cʼuxbiya? Come cheʼ ti talto bʌ qʼuin mi caj i tsʼʌctiyel tiʼ pejtelel chuqui albil i chaʼan Jehová yaʼ ti tsijiʼ bʌ pañimil, i maʼañix baqui to yom mi caj la cʌcʼ lac ñopoñel. Tijicñayix mi caj lac chumtʌl cheʼ bajcheʼ miʼ yʌl jiñi Biblia. Pero yomʌch mi caj lac chʌn pʌs laj cʼuxbiya ti Dios yicʼot ti lac piʼʌlob. Jiñi laj cʼuxbiya mi caj i chʌn colel tiʼ tojlelob.

18, 19. ¿Chuqui tajbil ili ora tiʼ caj añobʌch i ñopoñel i wiñicob Dios, i majqui yom mi la cʌqʼuen i ñuclel chaʼan iliyi?

¹⁸ Jiñi i wiñicob Dios ili ora miʼ yʌcʼob i bʌ ti tojʼesʌntel ti chʼujul bʌ espíritu. Jin chaʼan, miʼ ñopob i Yumʌntel Dios yicʼot miʼ yʌcʼob i coltaya. Cheʼ jaʼel miʼ cʼuxbiñob i bʌ (Gálatas 5:22, 23). Ili an i yʌcʼʌ chaʼan ñumen ti 8 millón hermanojob tiʼ pejtelel pañimil añob ti ñʌchʼtʌlel yicʼot temel añob ti congregación tac. Wen tsiquil chaʼan pʼʌtʌlʌch jiñi ñopoñel yicʼot cʼuxbiya.

¹⁹ Cojach tiʼ coltaya Jehová temel mi lac mejlel ti ajñel. Jin chaʼan yom mi la cʌqʼuen i ñuclel (Isaías 55:13). Mi lac wen aqʼuen wocolix i yʌlʌ Jehová cheʼ miʼ mejlel i yʌqʼueñonla laj coltʌntel cheʼ an lac ñopoñel (Efesios 2:8). Jehová mi caj i chʌn coltan yambʌlob chaʼan miʼ yʌcʼob i ñopoñel tiʼ tojlel. Ti jumpʼejl bʌ qʼuin, ti ili Lum cojach mi caj i chumtʌl jiñi tojoʼ bʌ yicʼot tijicñayoʼ bʌ muʼ bʌ caj i yʌqʼueñob i ñuclel Jehová tiʼ pejtelel ora.