¿Chuquiyes jiñi Armagedón?

Jiñi Armagedón jiñʌch cheʼ mi caj i contrajiñob i bʌ jiñi yumʌlob yicʼot Dios, añob tiʼ contra Dios come mach yomobic i coltʌbeñob i yumʌntel Dios (Salmo 2:2). Ili guerra mi caj i jisan pejtelel jiñi yumʌlob añoʼ bʌ ila ti pañimil (Daniel 2:44).

Jiñi tʼan Armagedón, miʼ tsʼijbuntel jaʼel bajcheʼ Har-Magedón, junyaj jach miʼ tilel yaʼ ti Biblia, mi lac taj ti Apocalipsis. Ti ili libro an jumpʼejl profecía baqui miʼ yʌl chaʼan jiñi reyob tiʼ petol pañimil mi caj i tempʌntelob «ti jiñi guerra chaʼan bʌ jiñi ñuc bʌ i qʼuiñilel Dios, jiñi Mach bʌ añic i pʼisol i pʼʌtʌlel». Mi caj i yujtel «ti jiñi ajñibʌl i cʼabaʼ Armagedón ti jiñi tʼan hebreo» (Apocalipsis 16:14, 16).

¿Majqui mi caj i chaʼleñob guerra ti armagedón? Jiñʌch Jesucristo yicʼot ángelob muʼ bʌ caj i jisañob jiñi i contrajob Dios (Apocalipsis 19:11-16, 19-21). Mi caj i jisʌntelob jaʼel jiñi añoʼ bʌ tiʼ contra i Yumʌntel Dios yicʼot mach bʌ añic miʼ qʼuelob ti ñuc (Ezequiel 39:7).

¿Junsujm jach ba baqui miʼ cajel jiñi guerra chaʼan Armagedón? Maʼañic, jiñi guerra chaʼan Armagedón miʼ cajel tiʼ pejtelel pañimil (Jeremías 25:32-34; Ezequiel 39:17-20).

Jiñi tʼan Armagedón (ti hebreo, Har Meghiddóhn) yom i yʌl «Wits chaʼan Meguidó». Meguidó jiñʌch jumpʼejl tejclum am bʌ ti wajali yaʼ baqui tsaʼ chumleyob israelitajob. Jiñi historia miʼ yʌl chaʼan lʌcʼʌl yaʼi tsaʼ ujti guerra tac, jiñi Biblia mucʼʌch i yʌl jaʼel (Jueces 5:19, 20; 2 Reyes 9:27; 23:29). Harmagedón mach jumpʼejlic tejclum am bʌ yaʼ ti Meguidó come maʼañic jumpʼejl wits lajal bʌ bajcheʼ jiñi. Cheʼ jaʼel, ti Jezreel, baqui an Meguidó, mach luʼ ochobic muʼ bʌ caj i contrajiñob Dios. Armagedón jiñʌch cheʼ mi caj i tempañob i bʌ pejtelel jiñi yumʌlob añoʼ bʌ ila ti pañimil chaʼan miʼ contrajiñob i yumʌntel Dios.

¿Chuqui mi caj i yujtel ti Armagedón? Mach la cujilic bajcheʼ mi caj i cʼʌn i pʼʌtʌlel Dios, pero la cujilʌch chaʼan jiñʌch mi caj i cʼʌn tsaʼ bʌ i cʼʌñʌ ti wajali, tuñijaʼ, yujquel lum, butʼjaʼ, cʼajc yicʼot azufre, chajc yicʼot cʼamʌjel muʼ bʌ i pam pujquel (Job 38:22, 23; Ezequiel 38:19, 22; Habacuc 3:10, 11; Zacarías 14:12). Come maʼañic mi caj i ñaʼtañob chuqui woli i yujtel, jiñi contrajob Dios mi caj i wʌlʌc tsʌnsañob i bʌ. Ti wiʼil mi caj i ñaʼtañob chaʼan jiñʌch Dios woli bʌ ti guerra yicʼotob (Ezequiel 38:21, 23; Zacarías 14:13).

¿Muʼ ba caj i junyajl jisʌntel ili pañimil ti Armagedón? Ili pañimil maʼañic mi caj i jilel come tsaʼ mejli chaʼan miʼ chumtʌlob jiñi lac piʼʌlob tiʼ pejtelel ora (Salmo 37:29; 96:10; Eclesiastés 1:4). Cheʼ ti Armagedón maʼañic mi caj i jisʌntel pejtelel chuqui an. Tiʼ sujm cuxul mi caj i yajñelob yonlel lac piʼʌlob (Apocalipsis 7:9, 14; Salmo 37:34).

Pero ¿mach ba añic miʼ yʌl jiñi Biblia chaʼan jiñi Armagedón mi caj i chʼʌm tilel i jilibal ili pañimil? I sujmʌch chaʼan an versículo tac baqui miʼ cʼʌjñel jiñi tʼan pañimil chaʼan miʼ taj ti tʼan jiñi lac planeta. Pero jiñi Biblia miʼ cʼʌn jaʼel chaʼan miʼ taj ti tʼan jiñi añoʼ bʌ tiʼ contra Dios (1 Juan 2:15-17). I jiñʌch muʼ bʌ caj i jisʌntelob ti armagedón (Mateo 24:3).

¿Jala mi caj i tejchel jiñi guerra chaʼan Armagedón? Cheʼ bʌ Jesús tsiʼ taja ti tʼan jiñi ñuc bʌ wocol muʼ bʌ caj i yujtel cheʼ bʌ maxto tilemic jiñi armagedón, tsiʼ yʌlʌ: «Pero maʼañic majqui yujil chuqui ti qʼuin yicʼot bajcheʼ ora, mi jiñicto jiñi ángelob yaʼ ti panchan, mi jiñicto i Yalobil Dios, cojach jiñi Tatʌl» (Mateo 24:21, 36). Jiñi Biblia miʼ yʌl chaʼan jiñi armagedón mi caj i tejchel cheʼ chaʼ wʌʼix an Jesús. Jiñi Biblia miʼ pʌs chaʼan cʼʌlʌl cheʼ ti 1914 chaʼ wʌʼix an Jesús (Mateo 24:37-39).