«Lʌcʼʌlix laʼ coltʌntel»

 1. ¿Chuqui tsaʼ ujti ti jiñi jabil 66 yaʼ ti Jerusalén? (Qʼuele jiñi dibujo am bʌ tiʼ tejchibal.)

CHEʼ ti jabil 66, juntiquil soldado ñuc bʌ i yeʼtel romano bʌ, i cʼabaʼ Floro, tsiʼ xujchʼi cabʌl taqʼuin yaʼ ti templo i chaʼan Jerusalén. Jiñi judíojob tiʼ tsʌnsa cabʌl soldadojob i chaʼan Roma yicʼot tsaʼ sujtiyob tiʼ contra come tsaʼ wen michʼayob. Cheʼ maxto i taja uxpʼejl uw, jiñi gobernador yaʼ ti Roma Cestio Galo yicʼot 30,000 i soldado tsiʼ joyoyob jiñi tejclum. Jiñi jontol bʌ judíojob tsiʼ mujcuyob i bʌ yaʼ ti templo. Mach jalic tsaʼ cʼotiyob jiñi soldadojob yaʼ tiʼ tsʼajquil Jerusalén. Jiñi wiñicob xʼixicob (quixtañujob) tsaʼ wen cajiyob ti bʌqʼuen. ¿Bajcheʼ yubil tsaʼ wubi jatet cheʼ yaʼic añet ti jiñi bʌ ora?

 2. a) ¿Chuqui yom miʼ melob jiñi xñoptʼañob tsaʼ ajli cheʼ bʌ miʼ qʼuelob joyol Jerusalén? b) ¿Bajcheʼ tsaʼ mejliyob ti loqʼuel yaʼ ti tejclum?

² Jesús tsiʼ wʌn sube jiñi xcʌntʼañob i chaʼan chuqui miʼ cajel ti ujtel cheʼ bʌ maxto cʼotemic jiñi jabil. Tsiʼ subeyob: «Cheʼ mi laʼ qʼuel Jerusalén joyol bʌ ti soldadojob, ñaʼtanla cheʼ jiñi, lʌcʼʌlix i yorajlel i jisʌntel. Ti jimbʌ ora, laʼ putsʼicob majlel ti wits jiñi añoʼ bʌ ti Judea. Laʼ loqʼuicob jiñi añoʼ bʌ ti Jerusalén» (Lucas 21:20, 21). Pero ¿bajcheʼ mi caj i loqʼuelob mi joyol i chaʼañob jiñi tejclum? Jesús tsiʼ wʌn alʌ chaʼan mi caj i comʼesʌntel jiñi qʼuin, yom i yʌl chaʼan mi caj i waʼchocontel (Mateo 24:22). Cheʼʌch tsaʼ ujti. Jiñi tejclum mach wis ñaʼtʌbilic i chaʼan cheʼ bʌ jiñi romanojob tsaʼ sujtiyob majlel. Jiñʌch tsaʼ bʌ i colta jiñi xucʼul bʌ xñoptʼañob chaʼan miʼ mejlelob ti putsʼel majlel yaʼ ti wits tac cheʼ bajcheʼ tsiʼ yʌlʌ Jesús.a Cheʼ ti jabil 70, jiñi romanojob tsaʼ chaʼ majliyob ti Jerusalén, i tsaʼʌch i jisayob jiñi tejclum. Pero tiʼ pejtelel tsaʼ bʌ i jacʼbeyob i tʼan Jesús cuxul tsaʼ ajñiyob.

 3. a) ¿Chuqui jiñi lʌcʼʌlix bʌ mi caj lac chumtan? b) ¿Chuqui mi caj la cʌl ti ili temaj?

³ Lʌcʼʌlix mi caj lac chumtan lajal bʌ bajcheʼ jiñi tsaʼ bʌ ujti. ¿Baqui bʌ? Jiñʌch jiñi «ñuc bʌ wocol», mach bʌ tsiquilic mi caj i tejchel. Yom mi laj cʼajtesan, cheʼ bʌ Jesús tsiʼ sube jiñi xcʌntʼañob i chaʼan chuqui miʼ caj ti ujtel yaʼ ti Jerusalén yicʼot chuqui jiñi yom bʌ miʼ melob, tsiʼ taja ti tʼan jaʼel bajcheʼ miʼ caj ti ujtel ili ora (Mateo 24:3, 21, 29). Cheʼ ti ñaxam bʌ siglo, jiñi xucʼul bʌ xñoptʼañob cuxul tsiʼ ñusayob cheʼ bʌ tsaʼ jisʌnti Jerusalén. Ti ili ora jaʼel, cabʌl «motocña[...] wiñicob xʼixicob» cuxul bʌ mi caj i ñusañob cheʼ bʌ miʼ jisʌntel jiñi i pañimil (mulawil) Satanás (pejcan Apocalipsis 7:9, 13, 14). Wen i cʼʌjñibal cheʼ mi lac chʼʌmben isujm muʼ bʌ i yʌl jiñi Biblia chaʼan muʼ bʌ i cajel ti ujtel mi cuxul la com ajñel. Ti ili temaj mi caj laj qʼuel chuqui tac miʼ cajel ti ujtel ti mach jalix qʼuin yicʼot chuqui yom bʌ mi lac mel.

 4. ¿Bajcheʼ mi caj i tejchel jiñi ñuc bʌ wocol?

⁴ Jiñi ñuc bʌ wocol mi caj i tejchel cheʼ bʌ miʼ jisʌntel tiʼ pejtelel jiñi mach bʌ isujmic ñopbalʌl. Yaʼ ti Biblia miʼ yʌl chaʼan jiñi mach bʌ isujmic ñopbalʌl tac jiñʌch jiñi «colem lum Babilonia bʌ i cʼabaʼ. Lajal bajcheʼ jiñi i ñaʼ xʼixicob muʼ bʌ i choñob i bʌ» (Apocalipsis 17:5-7, Jini wen bʌ tʼan). ¿Chucoch miʼ lajintelob bajcheʼ juntiquil xʼixic muʼ bʌ i chon i bʌ? Come jiñi ñaxam bʌ miʼ yʌcʼob i bʌ ti ñopbalʌl tac mach xucʼulobic tiʼ tojlel Dios. Miʼ yʌqʼueñob i coltaya jiñi yumʌlob ti pañimil i mach jiñic Jesús yicʼot jiñi i Yumʌntel. An i chocoyob cʌntesʌntel tac loqʼuem bʌ ti Biblia chaʼan miʼ ñumen tajob i pʼʌtʌlel. Mach lajalobic bajcheʼ jiñi bombiloʼ bʌ muʼ bʌ i chʼujutesañob Dios ti sʌc (2 Corintios 11:2; Santiago 1:27; Apocalipsis 14:4). Pero ¿majqui mi caj i jisan tiʼ pejtelel jiñi ñopbalʌl tac mach bʌ isujmic? Jiñi Biblia miʼ yʌl chaʼan jiñʌch jiñi «lujuntsʼijt i xulub» am bʌ i chaʼan jiñi «chʌctsʼeran bʌ bʌteʼel». Jiñi bʌteʼel jiñʌch jiñi Organización de las Naciones Unidas, i jiñi 10 i xulub jiñʌch yom i yʌl tiʼ pejtelel jiñi yumʌlob muʼ bʌ i yʌqʼueyob i coltaya jiñi organización. Cheʼ bajcheʼ miʼ yʌl jiñi Biblia, Jehová mi caj i yʌcʼ chaʼan miʼ jisañob tiʼ pejtelel jiñi ñopbalʌl mach bʌ isujmic (pejcan Apocalipsis 17:3, 16-18).

5, 6. ¿Bajcheʼ la cujil chaʼan cheʼ bʌ mi caj i jisʌntel jiñi ñopbalʌl tac mach bʌ isujmic maʼañic mi caj i jisʌntel tiʼ pejtelel ochemoʼ bʌ ti jiñi ñopbalʌl?

⁵ Cheʼ bʌ miʼ jisʌntel ñopbalʌl tac mach bʌ isujmic, ¿muʼ ba caj i jisʌntelob jaʼel tiʼ pejtelel jiñi ochemoʼ bʌ ti jiñi ñopbalʌl tac? Maʼañic. ¿Bajcheʼ mi lac ñaʼtan? Come jiñi Biblia miʼ yʌl chaʼan jiñi ñaxam bʌ miʼ yʌcʼob i bʌ ti ñopbalʌl mi caj i yʌlob chaʼan maʼañic tsiʼ yotsayob i bʌ ti jiñi ñopbalʌl mach bʌ isujmic. Jiñʌch tsaʼ bʌ i taja ti tʼan Zacarías cheʼ bʌ tsiʼ yʌlʌ chaʼan an majqui mi caj i yʌl: «Mach xʼaltʼañoñic, xʼeʼtelon ti cholel. Cʼʌlʌl cheʼ alobonto tsac ñopo eʼtel ti lum chaʼan i bʌl c ñʌcʼ». Mi an majqui miʼ cʼajtiben: «¿Chucoch tsepbil a cʼʌb yicʼot a tajn?» Mi cheʼen, mi caj i jacʼ: «Jiñʌch c lojwel tsaʼ bʌ i yʌqʼueyoñob c piʼʌlob ti cotot» (Zacarías 13:4-6).

⁶ ¿Chuqui mi caj i chaʼlen i tejclum Dios cheʼ mi caj i jisʌntel jiñi ñopbalʌl tac? Jesús tsiʼ yʌlʌ: «Machic tsiʼ wʌn ñaʼta i comʼesan i yorajlel wocol, maʼañic majqui miʼ coltʌntel mi juntiquilic. Pero chaʼan i coltʌntel jiñi yajcʌbiloʼ bʌ mi caj i comʼesʌntel i yorajlel wocol» (Mateo 24:22). Jehová tsiʼ yʌcʼʌ ti comʼesʌntel o waʼchocontel jiñi qʼuin cheʼ bʌ woli (choncol) i contrajintel Jerusalén cheʼ tiʼ yorajlel jiñi ñaxam bʌ xñoptʼan. Jiñi tsiʼ yʌcʼʌ chaʼan jiñi «yajcʌbiloʼ bʌ», yom i yʌl jiñi xñoptʼañob bombiloʼ bʌ, miʼ mejlelob ti putsʼel. Lʌcʼʌl lajal mi caj i yujtel ili ora. Jehová maʼañic mi caj i cʌy chaʼan jiñi «yajcʌbiloʼ bʌ» miʼ jisʌntelob tiʼ tojlel jiñi yumʌlob. Mi caj i waʼchocon jiñi ñaxam bʌ i tejchibal jiñi ñuc bʌ wocol chaʼan miʼ cʌntan i tejclum. Cheʼ bʌ miʼ yujtel iliyi mi cajel jumucʼ ñʌchʼtʌlel.

7, 8. a) Cheʼ miʼ ñʌjchʼel i contrajintel jiñi ñopbalʌl tac, ¿chuqui yom mi caj lac mel? b) Ti jiñi bʌ ora, ¿chucoch mach lajalic mi laj cajel bajcheʼ jiñi yañoʼ bʌ?

⁷ Cheʼ bʌ miʼ jisʌntel jiñi mach bʌ isujmic ñopbalʌl tac mi caj lac pʌs mi mucʼʌch laj cʼuxbin Jehová tiʼ sujmlel. An cabʌl muʼ bʌ caj i sʌclañob i coltʌntel yaʼ «ti xajlel tac am bʌ ti colem wits», yom i yʌl, jiñi organización tac am bʌ ti pañimil (Apocalipsis 6:15-17). Pero joñonla mi caj lac sʌclan laj coltʌntel ti Jehová. ¿Muʼ ba caj lac pijtan chaʼan cabʌlob mi caj i waʼ sujtelob tiʼ wiñicob Dios? Maʼañic. Cheʼ bʌ tsaʼ ñʌjchʼi jiñi ñaxam bʌ i contrajintelob yaʼ ti Jerusalén, cabʌl judíojob maʼañic tsaʼ sujtiyob ti xñoptʼan. Cojach jiñi xñoptʼañobix bʌ tsiʼ jacʼbeyob i tʼan Jesús yicʼot tsaʼ loqʼuiyob yaʼ ti tejclum. Cheʼ lajal jaʼel, cheʼ bʌ mi caj i ñʌjchʼel i contrajintel jiñi ñopbalʌl tac, yonlel maʼañic bʌ mi caj i yochelob yaʼ tiʼ sujm bʌ ñopbalʌl. Tiʼ sujm, jiñʌch i yorajlel mi lac pʌs chaʼan mucʼʌch laj cʼuxbin Jehová yicʼot chaʼan mi laj cʌqʼuen laj coltaya jiñi bombiloʼ bʌ (Mateo 25:34-40).

⁸ ¿Chuqui mi caj i yujtel ti jiñi bʌ ora? Mach wen la cujilic. Pero tajol wen wocol mi caj lac ñusan yicʼot tajol an chuqui tac yom mi caj laj cʌy. Yaʼ ti Jerusalén, jiñi xñoptʼañob tsiʼ cʌyʌyob i yotot yicʼot tsiʼ ñusayob tsʌts tac bʌ wocol chaʼan cuxul miʼ yajñelob (Marcos 13:15-18). Jin chaʼan yom mi laj cʼajtiben lac bʌ: «¿Chajpʌbiloñix ba chaʼan maʼañic cabʌl chuqui an c chaʼan mij cʌytʌl? Mi xucʼul com ajñel tiʼ tojlel Jehová, ¿mucʼʌch ba caj c mel chuqui jach yom ti jiñi bʌ ora?». Ñaʼtancu chaʼan ti jiñi bʌ ora cojach joñonla mi caj lac chʼujutesan Jehová anquese chuqui jach miʼ yujtel, cheʼʌch bajcheʼ tsiʼ mele jiñi xʼaltʼan Daniel (Daniel 6:10, 11).

9, 10. a) ¿Baqui bʌ tʼan mi caj lac sub ti jiñi ñuc bʌ wocol? b) ¿Bajcheʼ mi caj i jacʼ jiñi laj contrajob?

⁹ Tiʼ yorajlel jiñi ñuc bʌ wocol maʼañix mi caj lac chʌn sub jiñi «wen tʼan chaʼan i yumʌntel Dios». Tsaʼix ñumi i yorajlel. I yorajlelix miʼ tilel i «jilibal» (Mateo 24:14). Mi caj lac sub yicʼot lac chʼejlel jumpʼejl tʼan baqui yaʼ ochem tiʼ pejtelel jiñi quixtañujob, tajol jiñʌch chaʼan i pañimil Satanás muqʼuix caj i jisʌntel. Apocalipsis 16:21 miʼ yʌl chaʼan cheʼ bajcheʼ colem tuñijaʼ mi caj i qʼuelob jiñi tʼan muʼ bʌ caj lac subeñob i mi caj i pʼajob Dios.

¹⁰ ¿Bajcheʼ yilal mi caj i jacʼ laj contrajob cheʼ bʌ miʼ yubiñob jiñi pʼʌtʌl bʌ tʼan? Ezequiel tsiʼ wʌn alʌ muʼ bʌ caj i ñaʼtan i mel jiñi junmojt tejclum tac cʌmbil bʌ bajcheʼ Gog: «Mux c majlel c jisan jiñi tejclum mach bʌ mejlic i coltan i bʌ, baʼ ñʌchʼʌl añob, baʼ maʼañic tsʼajc tiʼ joytʌlel baʼ maʼañic tsucu taqʼuin tiʼ puerta tac». Cheʼ bajcheʼ tsiʼ wʌn alʌ Ezequiel, Gog mi caj i ñop i contrajin yicʼot i jisan jiñi i wiñicob Dios, come mi caj i qʼuelob bajcheʼ «tsaʼ bʌ loqʼuiyob tilel ti yambʌ colem tejclum tac. Wen chumulob chaʼan cabʌlob i wacax yicʼot i chubʌʼañob tiʼ yojlil pañimil baʼ joyolob ti yambʌ tejclum tac» (Ezequiel 38:10-12). Jiñi i wiñicob Dios tiʼ «yojlil pañimil» mi caj i yajñelob, yom i yʌl chaʼan tiʼ pejtelel wiñicob xʼixicob mi caj i qʼuelob chaʼan mach lajalobic bajcheʼ jiñi yañoʼ bʌ. Jiñi tejclum tac mach mejlix i pijtan chaʼan miʼ contrajin jiñi bombiloʼ bʌ yicʼot jiñi muʼ bʌ i yʌqʼueñob i coltaya.

11. a) ¿Chuqui yom laj cujil chaʼan bajcheʼ miʼ caj ti ujtel tac majlel jiñi wʌn albil bʌ cheʼ tiʼ yorajlel jiñi ñuc bʌ wocol? b) ¿Bajcheʼ yubil mi caj i yubiñob i contra Dios cheʼ bʌ mi caj i qʼuelob muʼ bʌ caj i «pʌstʌl»?

¹¹ ¿Chuqui mi caj i yujtel ti wiʼil? Jiñi Biblia miʼ yʌl chaʼan an cabʌl chuqui mi caj i yujtel, pero maʼañic miʼ yʌl baqui bʌ ñaxan miʼ caj ti ujtel majlel. Tajol an tiʼ yorajlel jach bʌ miʼ cajel ti ujtel tac. Cheʼ bʌ Jesús tsiʼ taja ti tʼan chaʼan i jilibal i pañimil Satanás, tsiʼ yʌlʌ: «An chuqui tac miʼ caj ti pʌstʌl ti qʼuin, yicʼot ti uw, yicʼot ti ecʼ. Jiñi wiñicob xʼixicob ti pañimil cabʌl mi caj i tsicob i pusicʼal. Mi caj i sʌc sojquelob i pusicʼal chaʼan juʼucña jiñi colem ñajb, wʌlʌcña jiñi jaʼ. Mi caj i cʌn chʌmelob wiñicob chaʼan bʌqʼuen yicʼot pensar chaʼan chuqui miʼ caj ti ujtel ti pañimil. Jiñi pʼʌtʌl tac bʌ ti panchan mi caj i wersa ñijcʌntel. Ti jimbʌ ora mi caj i qʼuelob i Yalobil Wiñic cheʼ miʼ tilel ti tocal yicʼot i pʼʌtʌlel yicʼot cabʌl i ñuclel» (Lucas 21:25-27; pejcan Marcos 13:24-26). ¿Chuquiyes muʼ bʌ i caj ti «pʌstʌl»? ¿Muʼ ba caj lac yoque qʼuel ti lac wut jiñi muʼ bʌ caj i yujtel yaʼ ti panchan? Yom to mi lac pijtan chaʼan mi lac ñaʼtan bajcheʼ miʼ cajel. Pero mach yʌlʌlic chuqui miʼ yujtel, la cujil chaʼan mi caj i wen bʌcʼñʌyel jiñi i contrajob Dios cheʼ bʌ mi caj i qʼuelob.

12, 13. a) ¿Chuqui mi caj i mel Jesús cheʼ bʌ miʼ tilel «yicʼot i pʼʌtʌlel yicʼot cabʌl i ñuclel»? b) ¿Chuqui mi caj i mel i wiñicob Dios ti jiñi bʌ ora?

¹² ¿Chuqui mi caj i mel Jesús cheʼ bʌ miʼ tilel «yicʼot i pʼʌtʌlel yicʼot cabʌl i ñuclel»? Jiñi xucʼuloʼ bʌ ti Dios mi caj i yʌqʼuentelob i majtan, i jiñi mach bʌ xucʼulobic mi caj i yʌqʼuentelob i toj i mul (Mateo 24:46, 47, 50, 51; 25:19, 28-30). ¿Bajcheʼ mi caj i mel? Jiñʌch tsiʼ chaʼ alʌ: «Cheʼ miʼ tilel i Yalobil Wiñic tiʼ ñuclel yicʼot pejtelel i yángelob miʼ caj ti buchtʌl tiʼ yumʌntel yicʼot i ñuclel. Tiʼ tojel i wut mi caj i tempʌntelob pejtelel wiñicob xʼixicob loqʼuemoʼ bʌ ti pejtelel lum. Jiñi Xcʌnta tiñʌmeʼ mi caj i tʼoxob. Parte miʼ yʌcʼ chivo, parte miʼ yʌcʼ tiñʌmeʼ. Miʼ yʌcʼ tiñʌmeʼ tiʼ ñoj. Miʼ yʌcʼ chivo tiʼ tsʼej» (Mateo 25:31-33). Ili yom i yʌl chaʼan tiʼ pejtelel jiñi quixtañujob, Jesús miʼ caj ti meloñel tiʼ tojlelob. Mi mach xucʼulic miʼ qʼuel juntiquil, mi caj i yʌl chaʼan jiñʌch jiñi «chivo» i mi caj i jisʌntel tiʼ pejtelel ora. Pero mi tsiʼ qʼuele chaʼan juntiquil xucʼulʌch, mi caj i yʌl chaʼan jiñʌch jiñi «tiñʌmeʼ» i tiʼ pejtelel ora mi caj i chumtʌl (Mateo 25:46).

¹³ Jiñi Biblia miʼ yʌl chaʼan cheʼ bʌ miʼ qʼuelob chaʼan mi caj i jisʌntelob jiñi lajaloʼ bʌ bajcheʼ «chivo», «miʼ cajelob ti cabʌl uqʼuel» (Mateo 24:30). ¿Chuqui mi caj i melob jiñi bombiloʼ bʌ yicʼot jiñi yambʌ i wiñicob Dios? Mi caj i melob tsaʼ bʌ i yʌlʌ Jesús: «Cheʼ miʼ cajel ti ujtel ili tac, letsan laʼ wut, letsan laʼ jol, come lʌcʼʌlix laʼ coltʌntel» (Lucas 21:28).

14, 15. a) ¿Chuqui miʼ caj ti ujtel cheʼ bʌ Gog tsaʼix i teche i contrajin i tejclum Dios? b) ¿Chuqui yom i yʌl cheʼ bʌ Jesús mi caj i ‹tempan jiñi yajcʌbiloʼ bʌ i chaʼan›?

¹⁴ ¿Chuqui miʼ caj ti ujtel cheʼ bʌ Gog tsaʼix i teche i contrajin i tejclum Dios? Jiñi Biblia miʼ yʌl: «[Jesús] mi caj i choc majlel i yángelob chaʼan miʼ tempañob tilel tiʼ chʌnwejlel pañimil jiñi yajcʌbiloʼ bʌ i chaʼan chʼoyoloʼ bʌ tiʼ ñajtlel pañimil cʼʌlʌl tiʼ ñajtlel panchan» (Marcos 13:27; Mateo 24:31). ¿Yom ba i yʌl ili tʼan chaʼan muʼto caj i yajcʌntel jiñi bombiloʼ bʌ ti jiñi bʌ ora? Maʼañic. ¿O yom ba i yʌl chaʼan ti jiñi bʌ ora mi caj i yʌqʼuentelob jiñi cojix bʌ sello jiñi bombiloʼ bʌ wʌʼto bʌ añob ti Pañimil? Maʼañic jaʼel, come jiñi cojix bʌ sello mi caj i yʌqʼuentelob cheʼ bʌ maxto tejchemic jiñi ñuc bʌ wocol (Mateo 13:37, 38; Apocalipsis 7:1-4). Cheʼ jiñi, ¿chuqui yom i yʌl cheʼ bʌ Jesús mi caj i ‹tempan jiñi yajcʌbiloʼ bʌ i chaʼan›? Yom i yʌl chaʼan Jesús mi caj i yʌqʼuen i majtan jiñi bombiloʼ bʌ wʌʼto bʌ añob ti Pañimil i mi caj i pʌyob majlel ti panchan (1 Tesalonicenses 4:15-17; Apocalipsis 14:1). Ili mi caj i yujtel cheʼ bʌ Gog añix tsʼitaʼ jumucʼ i tech i contrajin i tejclum Dios (Ezequiel 38:11). Cheʼ jiñi, cheʼ bajcheʼ tsiʼ yʌlʌ Jesús, «miʼ caj ti tsictiyel i sʌclel jiñi tojoʼ bʌ i pusicʼal cheʼ bajcheʼ qʼuin yaʼ tiʼ yumʌntel i Tat» (Mateo 13:43).b

¹⁵ An cabʌl muʼ bʌ i ñopob chaʼan mi caj i yoque qʼuelob tiʼ wut cheʼ bʌ Jesús mi caj i chaʼ tilel chaʼan miʼ yuman ili Pañimil yicʼot chaʼan Jesús mi caj i pʌyob majlel ti panchan cheʼ bajcheʼ añob yicʼot i bʌcʼtal. ¿Cheʼ ba mi caj i yujtel tiʼ tojlel jiñi bombiloʼ bʌ wʌʼto bʌ añob ti Pañimil? Maʼañic, come jiñi Biblia miʼ pʌsbeñonla chaʼan maʼañic mi caj laj qʼuel ti lac wut cheʼ bʌ Jesús miʼ tilel. Miʼ yʌl chaʼan mi caj i «tilel ti tocal ti panchan» yicʼot chaʼan jiñi «i Yalobil Wiñic mi caj i pʌs i yejtal i pʼʌtʌlel ti panchan» (Mateo 24:30). Jiñi Biblia miʼ yʌl chaʼan jiñi «lac bʌcʼtal yicʼot lac chʼichʼel yujil bʌ ocʼmʌl mach ochic tiʼ yumʌntel Dios». Cheʼ jiñi, ¿bajcheʼ mi caj i pʌjyelob majlel ti panchan jiñi bombiloʼ bʌ wʌʼto bʌ añob ti Pañimil? Jiñi Biblia miʼ yʌl chaʼan «cheʼ miʼ wustʌl jiñi cojix bʌ trompeta, ti ora jach mi caj [i yʌjñelob] cheʼ bajcheʼ ora jach miʼ mujtsʼel miʼ cajñel lac wut» (pejcan 1 Corintios 15:50-53).c (Pejcan jiñi nota.) Jiñi bombiloʼ bʌ wʌʼto bʌ añob ti Pañimil ti orajach mi caj i pʌjyelob majlel ti panchan, pero ti espíritujix.

16, 17. ¿Chuqui miʼ cajel ti ñaxan ujtel cheʼ bʌ maxto ñujpuñem jiñi Tiñʌmeʼ?

¹⁶ Cheʼ bʌ yaʼix añob ti panchan jiñi 144,000, ¿ti orajach ba mi caj i ñujpuñel jiñi Tiñʌmeʼ? (Apocalipsis 19:9.) Maʼañic. Anto chuqui yom miʼ ñaxan ujtel. Laʼ laj cʼajtesan chaʼan Gog mi caj i contrajin i tejclum Dios cheʼ bʌ wʌʼto añob ti Pañimil jiñi bombiloʼ bʌ (Ezequiel 38:16). ¿Chuqui mi caj lac mel cheʼ miʼ tejchel laj contrajintel? Jiñi Biblia miʼ yʌl: «Ti ili guerra maʼañic mi caj laʼ chaʼlen leto [«jatsʼ», TNM]. Cheʼ jach waʼaletla yom. Ajñenla ti ñʌchʼʌl. Pijtan laʼ coltʌntel, come wʌʼan lac Yum laʼ wicʼot». Cheʼ jaʼel miʼ yʌl: «Mach mi laʼ chaʼlen bʌqʼuen. Mach mi laʼ mel laʼ pusicʼal» (2 Crónicas 20:17). Cheʼ bajcheʼ tsaʼix laj qʼuele, cheʼ bʌ Gog jumucʼ añix i teche i contrajin i tejclum Dios, jiñi bombiloʼ bʌ wʌʼto bʌ añob ti Pañimil mi caj i pʌjyelob majlel ti panchan. ¿Chuqui miʼ cajel ti wiʼil? Apocalipsis 17:14 miʼ tsictesan chaʼan jiñi i contrajob i tejclum Dios «mi caj i contrajiñob jiñi Tiñʌmeʼ ti guerra. Jiñi Tiñʌmeʼ mi caj i mʌl [...]. Pejtel muʼ bʌ i yajñelob yicʼot jiñi Tiñʌmeʼ jiñobʌch pʌybiloʼ bʌ, yajcʌbiloʼ bʌ, xucʼuloʼ bʌ i pusicʼal». Jesús yicʼot jiñi 144,000 reyob yaʼ ti panchan mi caj i coltañob i tejclum Dios am bʌ wʌʼ ti Pañimil.

¹⁷ Jiñi guerra chaʼan Armagedón mi caj i yʌqʼuen i ñuclel jiñi chʼujul bʌ i cʼabaʼ Jehová (Apocalipsis 16:16). Jiñi muʼ bʌ i cʌjñelob bajcheʼ «chivo» mi caj i jisʌntelob. Mi caj i jilel jiñi jontolil wʌʼ ti Pañimil, i yonlel wiñicob xʼixicob mi caj i tajob i coltʌntel. Cheʼ bʌ miʼ ñumel jiñi Armagedón, jiñi Tiñʌmeʼ muqʼuix i cajel ti ñujpuñel, cheʼʌch bajcheʼ miʼ tsictesan tiʼ yujtibal majlel jiñi libro chaʼan Apocalipsis (Apocalipsis 21:1-4).d (Pejcan jiñi nota.) Jehová mi caj i yʌqʼuen i cʼuxbiya yicʼot cabʌl chuqui wen tac bʌ jiñi cuxul bʌ miʼ cʌytʌlob wʌʼ ti Pañimil. Woli (yʌquel) lac wen pijtan cheʼ miʼ cʼotel i yorajlel ili qʼuin (pejcan 2 Pedro 3:13.)

18. ¿Chuqui yom mi lac mel cheʼ la cujilix muʼ bʌ i cajel ti ujtel ti mach jalix?

¹⁸ ¿Chuqui yom mi lac mel cheʼ la cujilix muʼ bʌ i cajel ti ujtel ti mach jalix? Jiñi apóstol Pedro miʼ subeñonla chaʼan yom mi lac wen ñaʼtan bajcheʼ yilal yomonla ti jujuntiquil. Yom sʌc bajcheʼ mi lac chumtʌl, mi laj cʼuxbin Dios, xucʼul mi la cajñel tiʼ tojlel yicʼot mi laj cʼajtesan chaʼan tsʼitaʼ jax cʌylem chaʼan miʼ cʼotel i yorajlel «i qʼuiñilel Dios». Pedro tsiʼ yʌlʌ jaʼel: «Cʼuxbibilet bʌ la, cheʼ woli laʼ pijtan jiñi qʼuin, yom mi laʼ chaʼlen wersa chaʼan mi laʼ wajñel ti chʼujul chaʼan sʌquetla, chaʼan ñʌchʼʌl laʼ pusicʼal cheʼ miʼ tajetla Jesús» (2 Pedro 3:11, 12, 14). Jin chaʼan, mach lac bibʼesan lac bʌ ti jiñi ñopbalʌl tac mach bʌ isujmic cheʼ mi lac chʼujutesan Jehová yicʼot laʼ lac chʌn aqʼuen laj coltaya jiñi rey i chaʼan bʌ ñʌchʼtilel, Jesucristo.