Jiñi mach bʌ i sujmic ñopbalʌl tac miʼ bibʼesʌbeñob i cʼabaʼ Dios

Dios cʼuxbiyajʌch. Pero jiñi ñopbalʌl tac an i meleyob mach tac bʌ weñic anquese miʼ lon alob chaʼan chʼoyol ti Dios jiñi i cʌntesajob yicʼot chuqui tac miʼ melob. ¿Chucoch? Come ili ñopbalʌl tac mach i sujmic. Tiʼ cajob i lot yicʼot chuqui miʼ melob miʼ yʌqʼuen i ñop jiñi lac piʼʌlob mach tac bʌ i sujmic tiʼ tojlel Dios. ¿Bajcheʼ an i meleyob? ¿Bajcheʼ yubil miʼ yubin i bʌ Dios tiʼ caj jiñi? ¿I chuqui mi caj i mel?

1. ¿Bajcheʼ an i bibʼesayob i cʼabaʼ Dios yicʼot i cʌntesajob?

Jiñi mach bʌ i sujmic ñopbalʌl an i «qʼuextayob ti lot jiñi i sujmlel chaʼan bʌ Dios» (Romanos 1:​25). Jumpʼejl ejemplo, cabʌl ñopbalʌl maʼañic miʼ yʌlob chuqui i cʼabaʼ Dios, pero jiñi Biblia miʼ yʌl chaʼan yom mi laj cʼʌn (Romanos 10:​13, 14). An añoʼ bʌ i yeʼtel ti ñopbalʌl tac miʼ yʌlob chaʼan cheʼ bʌ an chuqui miʼ yujtel chaʼan cheʼʌch yom Dios. Pero jiñi mach i sujmic, mach i mulic Dios cheʼ an chuqui tac miʼ yujtel (pejcan Santiago 1:​13). Chʼijyem ti ubintel come tiʼ caj jiñi lot tac jiñi lac piʼʌlob maʼañic miʼ ñopob Dios.

2. ¿Bajcheʼ an i bibʼesayob i cʼabaʼ Dios yicʼot i melbalob?

Jiñi ñopbalʌl tac mach junlajalic miʼ qʼuelob jiñi lac piʼʌlob cheʼ bajcheʼ miʼ qʼuel Jehová. Jiñi Biblia miʼ yʌl chaʼan i mul jiñi ñopbalʌl tac «tsaʼix tempʌyi cʼʌlʌl ti panchan» (Apocalipsis 18:5). Jiñi mach bʌ i sujmic ñopbalʌl tac añix ora cajel i yotsañob i bʌ ti política, ti guerra, i an i yʌcʼʌyob ti chʌmel (sajtel) cabʌl lac piʼʌlob. An ñucoʼ bʌ i yeʼtel ti ñopbalʌl tac yomoʼ bʌ ochel ti rico, jin chaʼan miʼ cʼajtibeñob taqʼuin jiñi i wiñicob. Ili miʼ pʌs chaʼan mach i cʌñʌyobic Dios. Jin chaʼan, ¿bajcheʼ miʼ mejlel i yʌlob chaʼan woli (choncol) i melob chuqui yom Dios? (Pejcan 1 Juan 4:8).

3. ¿Bajcheʼ yubil miʼ yubin i bʌ Dios cheʼ bʌ miʼ qʼuel chuqui miʼ mel jiñi ñopbalʌl tac?

¿Muʼ ba i michʼesañet cheʼ maʼ qʼuel chuqui miʼ melob jiñi mach bʌ i sujmic ñopbalʌl tac? Mi cheʼ bajcheʼ jiñi, ¡ñaʼtancu bajcheʼ yubil miʼ yubin i bʌ Jehová! Dios miʼ cʼuxbin lac piʼʌlob, pero miʼ michʼesan jiñi ñucoʼ bʌ i yeʼtel ti ñopbalʌl tac come miʼ bibʼesʌbeñob i cʼabaʼ yicʼot miʼ ticʼlañob jiñi lac piʼʌlob. Dios miʼ yʌcʼ i tʼan chaʼan mi caj i jisan jiñi ñopbalʌl tac mach bʌ i sujmic, i chaʼan «maʼañix baʼ ora mi caj lac chaʼ qʼuel» (Apocalipsis 18:​21). Lʌcʼʌlix mi caj i jisan pejtelel jiñi mach bʌ i sujmic ñopbalʌl (Apocalipsis 18:8).

LAʼ LAC ÑUMEN ÑAʼTAN

4. Mach tiʼ pejtelelic jiñi ñopbalʌl utsʼat miʼ qʼuel Dios

Cabʌl lac piʼʌlob miʼ ñopob chaʼan pejtelel jiñi ñopbalʌl tac miʼ lʌcʼtesañonla ti Dios, miʼ yʌlob chaʼan lajal bajcheʼ cabʌl bij pero junsujm jach baqui miʼ pʌyonla majlel. ¿I sujm ba jiñi? Pejcanla Mateo 7:​13, 14 i tem alʌla iliyi:

• Cheʼ bajcheʼ miʼ yʌl jiñi Biblia, ¿bajcheʼ yilal jiñi bij muʼ bʌ i pʌyonla majlel lac taj laj cuxtʌlel?

Qʼuelela jiñi VIDEO i tem alʌla iliyi:

VIDEO: ¿Wem ba miʼ qʼuel Dios pejtelel ñopbalʌl tac? (I xujtʼil) (3:​22)

• ¿Muʼ ba i yʌl jiñi Biblia chaʼan Dios utsʼat miʼ qʼuel pejtelel ñopbalʌl tac?

5. Jiñi mach bʌ i sujmic ñopbalʌl tac maʼañic miʼ pʌsob jiñi cʼuxbiya am bʌ i chaʼan Dios

Jiñi ñopbalʌl tac cabʌl bajcheʼ an i bibʼesʌbeyob i cʼabaʼ Dios. Junchajp jiñʌch cheʼ an i yotsayob i bʌ ti guerra tac. Chaʼan maʼ cʌn junchajp bajcheʼ an i mele, qʼuelela jiñi VIDEO. Cheʼ jiñi tem alʌla iliyi:

VIDEO: Tsaʼ bʌ i mele jiñi ñopbalʌl tac cheʼ ti Segunda Guerra Mundial (2:​22)

• ¿Chuqui tsiʼ mele cabʌl ñopbalʌl ti jiñi Segunda Guerra Mundial?

• ¿Bajcheʼ yilal maʼ qʼuel jatet jiñi tsaʼ bʌ i meleyob?

Pejcanla Juan 13:​34, 35 yicʼot 17:​16. Cheʼ jiñi tem alʌla iliyi:

• ¿Bajcheʼ yubil miʼ yubin i bʌ Jehová maʼ wʌl cheʼ bʌ jiñi ñopbalʌl tac miʼ yotsañob i bʌ ti guerra?

• Jiñi mach bʌ i sujmic ñopbalʌl tac an i meleyob cabʌl mach bʌ weñic i maʼañic miʼ pʌsob i cʼuxbiya Dios, ¿chuqui tac an a qʼuele jatet muʼ bʌ i pʌs chaʼan cheʼʌchi?

6. Dios yom i locʼsan lac piʼʌlob ti jiñi ñopbalʌl tac mach bʌ i sujmic

Pejcanla Apocalipsis 18:4a i tem alʌla iliyi:

• Dios yom i coltan jiñi lac piʼʌlob am bʌ lotintiyob ti jiñi ñopbalʌl tac mach bʌ i sujmic, ¿chuqui maʼ ñaʼtan jatet chaʼan jiñi?

7. Bej cʌñʌ jiñi i sujm bʌ Dios

¿Yom ba mi lac ñaʼtan mach bʌ weñic tiʼ tojlel Dios tiʼ caj chuqui tac an i mele jiñi ñopbalʌl tac mach bʌ i sujmic? Laʼcu lac ñaʼtan chaʼan juntiquil xcolel maʼañic miʼ jacʼben i ticʼojel i tat, miʼ loqʼuel majlel tiʼ yotot i miʼ mel chuqui tac mach bʌ weñic. Pero jiñi tatʌl mach weñic miʼ qʼuel i melbal (chaʼlibal) jiñi i yalobil, ¿i mul ba jiñi tatʌl chaʼan bajcheʼ yilal chumul?

• ¿Yom ba mi la cʌqʼuen tiʼ mul Jehová chaʼan chuqui tac miʼ mel jiñi mach bʌ i sujmic ñopbalʌl tac i tiʼ caj iliyi mi laj cʌy laj cʌn tiʼ tojlel?

TSAʼ BɅ LAJ CɅÑɅ

Jiñi mach bʌ i sujmic ñopbalʌl tac an i bibʼesʌbeyob i cʼabaʼ Dios tiʼ cʌntesajob yicʼot tiʼ melbalob. Dios lʌcʼʌlix mi caj i jisan.

¿Chuqui tsaʼ cʌñʌ?

• ¿Bajcheʼ yilal maʼ qʼuel jiñi am bʌ i mele jiñi mach bʌ i sujmic ñopbalʌl tac yicʼot i cʌntesa tac?

• ¿Bajcheʼ yilal miʼ qʼuel Jehová jiñi mach bʌ i sujmic ñopbalʌl tac?

• ¿Chuqui mi caj i tumben Dios jiñi mach bʌ i sujmic ñopbalʌl tac?

CɅÑɅ YAN TAC BɅ

Dios miʼ tsʼaʼlen cabʌl ñopbalʌl tac, qʼuele chaʼchajp chucoch.

«¿Muʼ ba i lʌcʼtesañonla ti Dios pejtelel jiñi ñopbalʌl tac?» (Tema am bʌ ti jw.org)

¿Chucoch yom Jehová chaʼan mi lac chʼujutesan temel yicʼot yambʌlob, i mach ti lac bajñel jach?

«¿Wersa ba yom mi la cochel ti jumpʼejl ñopbalʌl?» (Tema am bʌ ti jw.org)

Juntiquil sacerdote an chuqui tac maʼañic tsiʼ mulaj yaʼ tiʼ ñopbal, pero jiñi maʼañic tsiʼ mʌcta chaʼan miʼ cʌn jiñi i sujmlel.

«Juntiquil sacerdote tsiʼ cʌyʌ jiñi Iglesia» (¡Jamʌx a wut!, febrero i chaʼan 2015)

Cʼʌlʌl ti wajali, jiñi ñopbalʌl tac an i yʌlʌyob lot tiʼ tojlel Dios yicʼot an i yʌqʼueyob i ñop jiñi lac piʼʌlob chaʼan mach i wentajoñicla yicʼot chaʼan jontol. Cʌñʌ uxpʼejl lot muʼ bʌ i yʌjlel tiʼ tojlel Dios.

«Lot tac muʼ bʌ i ñajtʼesañonla ti Dios» (Lac Tsictesʌbentel, 1 i chaʼan noviembre, 2013)