Bebolo ba bamuloloma

10 Moto mō̱ a ta o Kaisarea nu ta nu belabe̱ ná Kornelio, mwaned’a ebwe’a sonja, ńa mulo̱ṅ mwena mu ta mu belabe̱ ná ma Italia.* 2 A ta nde moto nu dube̱ na nu mabwe̱ Loba bo̱ngo̱ mwemba na ndabo ao ńe̱se̱; a ta a bola batuedi jita la mabea,* a ta pe̱ a so̱so̱me̱ye̱ Loba ponda ye̱se̱. 3 Lambo ka nge̱ṅ ilalo ya mwese,* a ta e̱ne̱ ná se̱ṅse̱ṅ o je̱ne̱, ange̱l a Loba e maso̱lo̱ ombo’ao, e kwalane̱ mo̱ ná: “A Kornelio!” 4 Na Kornelio a mańme̱ye̱, ombwa mo̱ ná sī, a baise̱ ná: “A Sango, nje e?” Na mo̱ ńalabe̱ ná: “Mika mo̱ngo̱ na mabea o mabolano̱ batuedi bondedi nate̱na oboso ba Loba, a mo̱nge̱le̱ pe̱ mo̱. 5 Loma so̱ bato o Yope o bele̱ moto mō̱, Simon nu mabelabe̱ ná Petro. 6 Nu moto a jai omboa Simon, mupo̱nge̱ byobo ba ńama ńena ndabo ao ńe be̱be̱ na munja.” 7 Nde dibokime̱ne̱ ange̱l ni ta ni kwalisane̱ mo̱ ńalono̱, na mo̱ a bele̱ baboledi bao baba na sonj’a bila po̱ ni dube̱ Loba ńena ni ta o muso̱ngi ma ba bena ba ta ba bolea mo̱, 8 a langwea babo̱ mambo me̱se̱, a loma babo̱ o Yope.

9 Nde o buńa bo bupe̱, ke̱ ba bato ba dia o ngea, ba nisisea be̱be̱ na mundi, Petro a ta ondea omo̱ń a muńua lambo ka haw’a ko̱si* o kane̱. 10 Nde njai e ta ńalea mo̱ bwambi, na mo̱ a pula da. Nde niponda ba tano̱ bipe̱ da na mo̱ a kusa je̱ne̱, 11 e̱ne̱ mo̱ń e telam, na lambo* le ka mbo̱m a le̱ṅ ninde̱ne̱ di masibisabe̱ o wase, di kwe̱be̱ o matongo mao mane̱i; 12 pat’a ńam’a myende mine̱i ye̱se̱ na ńama i mo̱nge̱ mańolo wase na lono̱n la mo̱ń ba ta oten. 13 Na mo̱ a senga doi di makwalane̱ mo̱ ná: “A Petro, te̱me̱, bwa o de!” 14 Nde Petro alabe̱ nde ná: “A Sango, tomtom, ebanja na si dedi lambo la ńakaka to̱ di si sangi to̱ buńa.” 15 Na di doi di kwalane̱ pe̱te̱ mo̱ ngedi ni londe̱ iba ná: “O si bele̱ pe̱ mambo Loba a sangise̱no̱ ná ńakaka.” 16 Nika e bolan ngedi ilalo, na dibokime̱ne̱ ni mbo̱m* e no̱ngo̱be̱ o mo̱ń.

17 Niponda Petro a tano̱ a dia a ńaki, a tano̱ pe̱ a baise̱ mo̱me̱ne̱ nje di je̱ne̱ di mapulano̱ kwala, nde bato Kornelio a lomno̱ beno̱ o baise̱ owe̱ni ndabo a Simon ńeno̱, na babo̱ ba te̱me̱ o jo̱mbe̱. 18 Na babo̱ ba bele̱, ba baise̱ nga owa nde Simon nu belabe̱ ná Petro a majano̱. 19 Niponda Petro a tano̱ a dia a madutea ońola di je̱ne̱, na mudī mu kwalane̱ mo̱ ná: “Ombwa! Bato balalo be o wasa wa. 20 Te̱me̱, siba wase wale na babo̱ esibe̱ penda to̱ po̱, ebanja mba nde na lom babo̱.” 21 Na Petro a siba wase o dongame̱ne̱ ba bato, a kwala ná: “Mba nun, mba nde bińo̱ leno̱ o wasa. Nje e wan bińo̱ e?” 22 Na babo̱ balabe̱ ná: “Kornelio, mwaned’a ebwe’a sonja, moto nu te̱m ná sim nu mabwe̱ Loba bo̱ngo̱, nu be̱n pe̱ dina la bwam oteten a tumba la Bonayuda le̱se̱, a kusan ange̱l a bosangi bediedi be wu na Loba o bele̱ wa ná o ye ombo’ao, ná a senge nje o be̱nno̱ o kwala.” 23 Na mo̱ inge̱le̱ so̱ babo̱, a jese̱ babo̱.

O buńa bo bupe̱, a ta a te̱me̱, ala mwemba na babo̱, bonasango bō̱ ba Yope pe̱ ba ta bala die̱le̱ mo̱. 24 O bone̱ bao a ta ingea o Kaisarea. Kornelio a ta enge̱le̱ babo̱, a ta a ko̱te̱le̱ mbia mao na mako̱m mao ma batabata. 25 Petro ingedino̱, na Kornelio a po̱ dongame̱ne̱ mo̱, a ko̱ o myende mao, a nungame̱ oboso bao.* 26 Nde Petro a te̱se̱ mo̱, a kwala ná: “Te̱me̱; mba pe̱ ne nde mot’a benama.” 27 Nde niponda a tano̱ a kwalisane̱ mo̱, na mo̱ ingea, a bomane̱ bato jita ba ko̱to̱me̱. 28 Na mo̱ a kwalane̱ babo̱ ná: “Bińo̱me̱ne̱ lo bi bwambwam ná mbenda e si mabola mot’a Bonayuda wonja o lata na mot’a tumba dipe̱pe̱ to̱ mo̱me̱ne̱ sisea mo̱ be̱be̱; nde Loba a lee̱ mba ná na s’angame̱n bele̱ moto to̱ mō̱ ná ńakaka to̱ nu si sangi. 29 Ońola nika nde na po̱ino̱ esibe̱ penda to̱ po̱ ponda na belabe̱no̱. Tatan so̱, bińo̱ langwea mba ońola nje lo bele̱no̱ mba.”

30 Na Kornelio a kwala ná: “Mińa mine̱i we̱nge̱, lambo ka ninka ponda me̱ne̱, na ta na kane̱ o ndabo am, lambo ka nge̱ṅ ilalo ya mwese;* na moto mō̱ a te̱me̱ mba oboso na mbo̱ti ni mapańe̱, 31 a kwala ná: ‘A Kornelio, Loba a sengi muka mo̱ngo̱, a mo̱nge̱le̱ pe̱ mabea o mabolano̱ batuedi. 32 Loma so̱ bato o Yope o bele̱ Simon nu mabelabe̱ ná Petro. Nu moto a jai omboa Simon mupo̱nge̱ byobo ba ńama, ńena ndabo ao ńe be̱be̱ na munja.’ 33 Na lom so̱ bato dibokime̱ne̱ o bele̱ wa, o boli bwam ná o po̱i owan. Tatan so̱, biso̱ be̱se̱ ban oboso ba Loba, o senga mambo me̱se̱ Yehova anedino̱ wa ná o to̱pe.”

34 Na Petro a botea to̱po̱, a kwala ná: “Tatan, na maso̱ṅtane̱ na mbale̱ ná Loba a titi ndando, 35 nde o to̱ njika tumba moto nu mabwe̱ mo̱ bo̱ngo̱, nu mabole̱ pe̱ nje e te̱m ná sim, a mado̱lisane̱ mo̱. 36 A lomedi bana ba Israel eyala o langwea babo̱ myango ma bwam ma musango tongwea na Yesu Kristo, mo̱ ńena ńe Sango a be̱se̱. 37 Bińo̱me̱ne̱ lo bi nje bato ba tano̱ ba to̱po̱ o Yudea ńe̱se̱, botea o Galilea ombusa dubise̱ lena Yohane a tano̱ a langwa: 38 ońola Yesu ńa Nasaret, ne̱ni Loba o̱kise̱no̱ mo̱ na mudī musangi na ngińa, na ne̱ni a dangono̱ o ekombo ye̱se̱, a bola bwam, a bo̱lise̱ pe̱ be̱se̱ bena ba ta ba tusabe̱ na Diabolo, ebanja Loba a ta na mo̱. 39 Je mboṅ a mambo me̱se̱ mena a bolino̱ o ekombo a Bonayuda na o Yerusalem; nde ba pane̱ mo̱ o ebongo,* ba bwa mo̱. 40 Loba a pumbwe̱le̱ mo̱ o buńa bo londe̱ milalo, a bola ná e̱ne̱ne̱,* 41 seto̱ na bato be̱se̱, nde na mboṅ yena Loba a po̱sino̱ oboso ba ponda, biso̱ bena di dedi di ńo̱ pe̱ na mo̱ ombusa bepumbwedi bao oteten a bawedi. 42 Anedi pe̱ biso̱ ná di te̱ye̱ be̱se̱ dikalo di bole pe̱ mboṅ ni londi ná mo̱ nde Loba a te̱se̱no̱ ka mukaised’a ba be longe̱* na ba ba wedi. 43 Ońol’ao nde bato̱pedi ba mudī be̱se̱ ba mabolano̱ mboṅ, ná to̱ nja nu dube̱ mo̱, myobe mao mi malakisabe̱ o dina lao.”

44 Ke̱ Petro a dia a malangwa ma mambo, na mudī musangi mu po̱ omo̱ń a be̱se̱ bena ba ta ba senga eyal’a Loba. 45 Nde badubedi* bendabe̱ bena ba ta ba po̱ na Petro ba ta ba ńaka, ebanja jabea la mudī musangi Loba a mabolano̱ tete di ta pe̱ di komea omo̱ń a bato ba matumba. 46 Ebanja ba ta ba senga babo̱ ba mato̱po̱ be̱n ba leme̱, ba sesa pe̱ Loba. Na Petro a kwala ná: 47 “Kana ban ba kusino̱ mudī musangi kapo̱ ka biso̱, mo̱ moto e ná a banga ná ba si dubisabe̱ na madiba e?” 48 Na mo̱ a bola doi ná ba dubisabe̱ o dina la Yesu Kristo. Ombusa nika ba ta ba baise̱ mo̱ ná a je na babo̱ ońola ngus’a mińa.