Ońola bato ba Roma

14 Bińo̱ kasa moto ńena nu bo̱bi o dube̱, lo si sa pe̱ to̱ ba bena ba be̱n mo̱nge̱le̱ me diwengisan na mańu. 2 Moto mō̱ a be̱n dube̱ o da mambo me̱se̱, nde moto nu bo̱bi mo̱, a mada nde bele̱mbe̱ buka te̱. 3 Nu nu made̱ a si yaṅa nu nu si made̱, nu pe̱ nu si made̱ a si kaise̱ nu nu made̱, ebanja Loba a kasi mo̱. 4 We nde nja o kaise̱ muboled’a nupe̱pe̱ e? E be̱ ná a te̱m to̱ ná a kwedi, sango ao mo̱me̱ne̱ nde a madomse̱. Na mbale̱, a me̱nde̱ te̱me̱, ebanja Yehova e ná ongwane̱ mo̱ o te̱me̱.

5 Moto mō̱ a mo̱nge̱le̱ ná buńa bō̱ bwe mweńa buka bope̱pe̱, nupe̱pe̱ a mo̱nge̱le̱ ná bo buńa bwe nde kapo̱ ka mine̱ me̱se̱; moto te̱ a be̱ne̱ mbaki ni londi ńa nje a mo̱nge̱le̱no̱. 6 Nu nu malange̱ buńa bō̱ tobotobo, a mabola nde nika ońola Yehova. Nu pe̱ nu made̱, a mada nde ońola Yehova, ebanja a matimbise̱le̱ Loba masoma; nu pe̱ nu si made̱, a si mada nde ońola Yehova, nde mo̱ pe̱ a matimbise̱le̱ Loba masoma. 7 Ebanja, to̱ mō̱ ńasu a titi longe̱ ońol’ao mo̱me̱ne̱, to̱ mō̱ pe̱ a si mawo̱ ońol’ao mo̱me̱ne̱. 8 Ebanja je te̱ longe̱, ke̱ je nde longe̱ ońola Yehova, di wedi pe̱ te̱, ke̱ di wedi nde ońola Yehova. E be̱ so̱ ná je longe̱, to̱ ná di wedi, je nde ba Yehova. 9 Ebanja ońola nika nde Kristo a wedino̱, a timbino̱ pe̱ o longe̱, ná a be̱ Sango ońola ba ba wedi na ba be longe̱.

10 Nde ońola nje o makaise̱no̱ munaso̱ngo̱ e? To̱so̱ ońola nje o mayaṅano̱ munaso̱ngo̱ e? Ebanja biso̱ be̱se̱ di me̱nde̱ te̱me̱ oboso ba kond’a bekaisedi ńa Loba. 11 Ebanja e tilabe̱ ná: “‘We̱ne̱ ná neno̱ longe̱,’ e kwali Yehova, ‘mabo̱ngo̱ me̱se̱ ma me̱nde̱ numabe̱ oboso bam, eyeme̱ te̱ pe̱ e me̱nde̱ jemba o mpoma ná ne nde Loba.’” 12 Ońola nika so̱, mō̱ ńasu te̱ a me̱nde̱ bola Loba bolangi ońola mo̱me̱ne̱.

13 Di si kaisane̱ pe̱ so̱ mō̱ na nune̱, nde o diwengisan, bola me̱se̱ ná lo si we̱le̱ dale l’eso̱njisan to̱ mukidi oboso ba munasango. 14 Ebanja na bi, ne pe̱ mbaki o Sango Yesu ná to̱ lambo di titi mbindo na mo̱me̱ne̱; buka te̱ ponda moto a malangano̱ lambo mbindo nde di mabe̱no̱ mbindo ońol’ao. 15 Ebanja yete̱na da o madano̱ di malingise̱ munaso̱ngo̱, ke̱ o titi pe̱ dangwa kaponda ndolo. Tongwea na da lo̱ngo̱, o si wana mbo̱lo̱n a* nu ńena Kristo a wedino̱ ońol’ao. 16 Lo s’ese̱le̱ so̱ ná ba to̱pe bobe ońola bwam lo mabolano̱. 17 Ebanja Janea la Loba di si se̱medi o da na ńo̱, nde di se̱medi nde o te̱me̱ la sim, musango na muńe̱nge̱ tongwea na mudī musangi. 18 Ebanja nu ńena nu mabole̱ ebolo ninka, ka mukom ońola Kristo, a mado̱lisane̱ Loba, a do̱lisane̱ pe̱ bato.

19 Ońola nika so̱, di pulise̱ mambo ma mawane̱ musango, na mambo ma mongwane̱ o longisane̱ mō̱ na nune̱. 20 O si bule̱le̱ pe̱ ebol’a Loba o njo̱m a da buka te̱. Ye mbale̱, mambo me̱se̱ ma sangi, nde ye bobe ná moto a de lambo, yete̱na nik’e maso̱njise̱ nupe̱pe̱. 21 Ye bwam ná o si da ńama to̱ ńo̱ wań, to̱ bola lambo dipe̱pe̱ di maso̱njise̱ munaso̱ngo̱. 22 Ni mbaki o be̱nno̱,* e̱ne̱ nde mo̱ ka lambo di mombweye̱ nde wa na Loba. Bonam na moto nu si makwese̱ mo̱me̱ne̱ muka ońola nje a madomse̱no̱ o bola. 23 Nde penda ńe te̱ mo̱ o mulema, ke̱ a máko̱ muka yete̱na a dedi, ońolana a mada esibe̱ be̱ mbaki* ná nik’e te̱nge̱n. Na mbale̱, nje ye̱se̱ e mabolabe̱ esibe̱ dube̱ ye nde bobe.