Bebolo ba bamuloloma
9 Nde Saulo a ta a dia a mońa na malinga te̱nge̱ne̱ bokwedi ba Sango, ńo̱ng’ao e ta pe̱ nde ná a bo̱le̱ babo̱ diboma, na mo̱ ala omboa prisi ninde̱ne̱, 2 a baise̱ mo̱ ná a bole mo̱ maleta ońola mandabo ma ndongame̱n o Damasko, ná be̱se̱ a me̱nde̱no̱ so̱ bena be o ni Ngea,* bome na bito, a wane babo̱ na ngata o Yerusalem.
3 Niponda a tano̱ o ngea, ke̱ a nisisea be̱be̱ na Damasko, na mwe̱ne̱n mu wa o mo̱ń epańpań mu pańa dinge̱le̱ mo̱, 4 na mo̱ a ko̱ wase, a senga doi di makwalane̱ mo̱ ná: “A Saulo, a Saulo, ońola nje o matakise̱no̱ mba e?” 5 Na mo̱ a baise̱ ná: “A Sango, wa nja e?” Na di doi di kwala ná: “Mba nde ne Yesu, ńena o matakise̱no̱. 6 Te̱me̱, wingeye o mundi, oten ba me̱nde̱ langwea wa nje wangame̱nno̱ bola.” 7 Nde bato bena ba ta mwemba na mo̱ o lo̱ndo̱ ba ta buba, kańena ba si ta ba we̱le̱ kwala to̱ lambo, ebanja ba ta ba senga mumban ma doi nde ba si ta be̱ne̱ to̱ moto. 8 Na Saulo a te̱me̱ omo̱ń, nde to̱ná miso̱ mao ma tano̱ ma telame̱, a si ta e̱ne̱ to̱ lambo. Na babo̱ ba kwe̱ mo̱ dia, balane̱ mo̱ o Damasko. 9 Etum a mińa milalo a si ta e̱ne̱ to̱ lambo, a si ta pe̱ to̱ a da to̱ ńo̱.
10 Mokwedi mō̱ a ta o Damasko nu ta nu belabe̱ ná Anania. Na Sango a kwalane̱ mo̱ o je̱ne̱ ná: “A Anania!” Na mo̱ alabe̱ ná: “Mba nun, a Sango.” 11 Na Sango a kwalane̱ mo̱ ná: “Te̱me̱, ala o ngea ni belabe̱ ná Nite̱m, omboa Yuda, o baise̱ moto nu mabelabe̱ ná Saulo, mot’a Tarso. Ebanja e o kane̱, 12 e̱n pe̱ o je̱ne̱ moto nu mabelabe̱ ná Anania a mingea, a ne̱nge̱le̱ mo̱ mā omo̱ń ná e̱ne̱ pe̱te̱.” 13 Nde Anania alabe̱ nde ná: “A Sango, na sengi bato jita ba malangwa mambo jombwea nu moto, na bobe bwe̱se̱ a bolanno̱ basangedi bo̱ngo̱ o Yerusalem. 14 A kusan pe̱ banedi ba prisi doi o damea* be̱se̱ ba mabele̱ dina lo̱ngo̱ owan.” 15 Nde Sango a kwalan nde mo̱ ná: “Ala, ońolana nun moto e nde ewa na po̱sino̱ o walane̱ dina lam oboso ba matumba name̱ne̱ pe̱ na kiṅe̱ na bana ba Israel. 16 Na me̱nde̱ lee̱ mo̱ ná bwē njika jita la mambo ma ndutu angame̱nno̱ kusa ońola dina lam.”
17 Na Anania ala, ingea o ndabo, a ne̱nge̱le̱ mā omo̱ń ao, a kwala ná: “A munate Saulo, Sango Yesu ńena nu busedi wa o ngea o wuno̱, nde a lom mba, ná we̱ne̱ pe̱te̱, o londe pe̱ na mudī musangi.” 18 Na dibokime̱ne̱ bema bō̱ bena be ta be̱ne̱ne̱ ka byańa basumwe̱ mo̱ o miso̱ be ko̱ wase, na mo̱ e̱ne̱ pe̱te̱. Na mo̱ a te̱me̱ a dubisabe̱, 19 a da, na ńolo ńembame̱ mo̱.
Nde Saulo a ta a ja na bokwedi o Damasko ońola ngus’a mińa, 20 na dibokime̱ne̱ a botea te̱ dikalo o mandabo ma ndongame̱n, ná Yesu e nde Mun’a Loba. 21 Nde be̱se̱ bena ba ta ba senga mo̱ a makwala nika ba ta ba ńaka bwambi, ba kwala ná: “Seto̱ nun moto nde a ta a takise̱ ba bena ba mabele̱ din dina o Yerusalem e? A si po̱i nde owan o damea babo̱ na bake̱ babo̱* banedi ba prisi e?” 22 Nde Saulo a ta a benga be̱ ngińa, a ta a tabilane̱ Bonayuda bena ba ta ba ja o Damasko, ebanja a ta a teleye̱ babo̱ ná bwē ná Yesu nde e Kristo.
23 Ombusa ngus’a mińa, Bonayuda ba ta ba weka mwano ná ba bwe mo̱. 24 Nde Saulo a timbi bia mwano mabu. Ba ta pe̱ ba tata mo̱mbe̱ ma mundi bulu na mwese ná ba bwe mo̱. 25 Bulu bō̱, bokwedi bao ba ta so̱ ba no̱ngo̱ mo̱, ba tombise̱ mo̱ la dipo̱ndi l’edim’a mundi, ba sibise̱ mo̱ n’esanja.
26 A po̱ino̱ o Yerusalem, na mo̱ a keka lata na bane̱ bokwedi, nde babo̱ be̱se̱ ba ta ba bwa mo̱ bo̱ngo̱ ebanja ba si ta ba dube̱ ná a mátimba mokwed’a Yesu. 27 Na Barnabas a wanea mo̱ jongwane̱, alane̱ mo̱ omboa bamuloloma, a langwea babo̱ mambo me̱se̱, ne̱ni Saulo e̱nno̱ Sango o ngea, na ná nun a kwalisan mo̱, na ne̱ni a to̱pino̱ o Damasko na bokenju o dina la Yesu. 28 Saulo a jai so̱ na babo̱, a ta a yo̱mbo̱ na wonja ńe̱se̱* o Yerusalem, a to̱po̱ na bokenju o dina la Sango. 29 A ta a kwalisane̱ Bonayuda bena ba mato̱pe̱ eyem’a Grikia, bā na babo̱ ba ta pe̱ ba sungane̱ madoi, nde ban ba ta ba wasa o bwa mo̱. 30 Ponda bonasango ba so̱ṅtanno̱ nika, na babo̱ ba sibane̱ mo̱ o Kaisarea, ba loma mo̱ o Tarso.
31 Nde mwemba o Yudea ńe̱se̱, name̱ne̱ pe̱ na o Galilea na o Samaria mu ta mu be̱ne̱ pambo a ponda ńa musango, mu benga pe̱ joa; kana mu tano̱ mu dangwa o bo̱ngo̱ ba Yehova na o lo̱ko̱mea la mudī musangi, muso̱ngi ma bokwedi mu ta mu benga to̱ndo̱.
32 Niponda Petro a tano̱ a yo̱mbo̱ o ekombo ye̱se̱, a ta pe̱ a siba omboa basangedi bena ba ta ba ja o Lida. 33 A ta a bomane̱ moto mō̱ oten nu ta nu belabe̱ ná E̱nea, nu ta nu nanga o no̱ngo̱ etum a mbu lo̱mbi, ońolana a ta nje̱mbe̱le̱. 34 Na Petro a kwalane̱ mo̱ ná: “A E̱nea, Yesu Kristo a mabo̱lise̱ wa. Te̱me̱ o po̱nge pe̱ no̱ngo̱ lo̱ngo̱.” Na mo̱ a te̱me̱ dibokime̱ne̱. 35 Ponda be̱se̱ bena ba ta ba ja o Lida na o sanj’a Saron be̱nno̱ mo̱, na babo̱ ba timba na Sango.
36 Mokwed’a muto mō̱ a ta o Yope, nu ta nu belabe̱ ná Tabita, nik’e matukwabe̱ ná “Dorkas.”* A ta a bola jita la bebolo ba bwam, a ta pe̱ a bola batuedi mabea. 37 Nde o mi mińa a ta a boa, na mo̱ a wo̱. Ba ta bo̱kise̱ mo̱, ba ne̱nge̱le̱ mo̱ o tuṅ a mo̱ń. 38 Kana Lida e tano̱ be̱be̱ na Yope, ponda bokwedi ba sengino̱ ná Petro e o mu mundi, na babo̱ ba loma bome baba o so̱so̱me̱ye̱ mo̱ ná: “Son pomane̱ po̱ na biso̱.” 39 Na Petro a te̱me̱, ala na babo̱. A po̱ino̱, na babo̱ bondane̱ mo̱ o tuṅ a mo̱ń; na mikusa me̱se̱ mi sisea mo̱ be̱be̱, mi kumwa jeya, mi lee̱ mo̱ jita la maloki na mbo̱ti Dorkas a bangono̱ niponda a tano̱ longe̱. 40 Na Petro a busise̱ bato be̱se̱, a numa mabo̱ngo̱ wase, a kane̱. Na mo̱ a yo̱mbo̱ jombwa mbimba, a kwala ná: “A Tabita, te̱me̱!” Na mo̱ a tele̱ miso̱, nde e̱nno̱ Petro, na mo̱ a ja. 41 Na Petro a bola mo̱ dia, a te̱se̱ mo̱, a bele̱ basangedi na mikusa na babo̱ be̱se̱ be̱ne̱ ná e longe̱. 42 Nde Yope ńe̱se̱ e ta e senga nika, na jita ba dube̱ Sango. 43 Petro a ta a ja o Yope eyek’a mińa omboa Simon, mupo̱nge̱ byobo ba ńama.