1 Kronika
5 Esiae nye Ruben,+ Israel ƒe ŋgɔgbevi, ƒe viwo. Eyae nye ŋgɔgbevia, gake esi wòƒo ɖi* fofoa ƒe aba ta la,+ wotsɔ eƒe ŋgɔgbevinyenye la na Israel viŋutsu Yosef+ ƒe viwo, ale be womeŋlɔ eƒe ŋkɔ abe ŋgɔgbevi ene le dzidzimeawo nu o. 2 Togbɔ be Yuda+ kpɔ ŋusẽ le nɔviawo dome, eye eya mee ame si wotia be wòanye dziɖula+ la dzɔ tso hã la, ŋgɔgbevinyenye la nye Yosef tɔ. 3 Israel ƒe ŋgɔgbevi Ruben ƒe viwoe nye Hanok, Palu, Hezron kple Karmi.+ 4 Yoel vie nye Semaya, eya hã ƒe vie nye Gog, eya hã ƒe vie nye Simei, 5 eya hã ƒe vie nye Mika, eya hã ƒe vie nye Reaya, eya hã ƒe vie nye Baal, 6 eya hã ƒe vie nye Beera, ame si Asiria-fia Tilgat-Pilneser+ ɖe aboyoe; enye Ruben viwo ƒe tatɔwo dometɔ ɖeka. 7 Eye nɔviawoe nye esi, le ƒome siwo ƒe ŋkɔwo woŋlɔ ɖe dzidzimenuŋlɔɖiawo me le woƒe dzidzimewo nu: Yeiel, si nye tatɔ, kple Zakariya, 8 Bela, Azaz vi, Sema vi, Yoel vi, wonɔ Aroer+ va se ɖe Nebo kple Baal-Meon+ ke. 9 Wonɔ ɣedzeƒe gome, woƒe nɔƒewo tso keke gbea dzi ƒe gɔmedzeƒe le Frat-tɔsisi+ la nu ke, elabena woƒe lãhawo va sɔ gbɔ ɖe Gilead-nyigba+ dzi. 10 Le Saul ŋɔli la, wowɔ aʋa kple Hagritɔwo heɖu wo dzi, eye wonɔ woƒe agbadɔwo me le Gilead ƒe ɣedzeƒe gome katã.
11 Ke Gad viwo nɔ wo xa le Basan-nyigba dzi va se ɖe Saleka.+ 12 Yoel nye tatɔ, Safam nye evelia, eye Yanai kple Safat hã nye tatɔwo le Basan. 13 Eye ame siawoe nye wo nɔviwo le wo fofowo ƒe aƒekɔwo nu: Mikael, Mesulam, Seba, Yorai, Yakan, Zia kple Eber, wole ame adre. 14 Ame siawoe nye Abihayil viwo, ame si nye Huri vi, Yaroa vi, Gilead vi, Mikael vi, Yesisai vi, Yahdo vi, Buz vi. 15 Ahi, si nye Abdiel vi, Guni vi, ye nye tatɔ le wo fofowo ƒe aƒekɔ la nu. 16 Wonɔ Gilead,+ Basan+ kple eŋu duwo me kple lãnyiƒe siwo katã le Saron va se ɖe eƒe mlɔenu ke. 17 Woŋlɔ wo katã ŋkɔwo le woƒe dzidzimeawo nu le Yuda-fia Yotam+ ŋɔli kple Israel-fia Yeroboam*+ ŋɔli.
18 Aʋawɔla kalẽtɔ akpe blaene vɔ ene alafa adre blaade le Ruben viwo, Gad viwo kple Manase-to afã la si, ame siwo tsɔa akpoxɔnu kple yi, siwo nya aŋutrɔdada,* eye wona hehe wo le aʋa me. 19 Wowɔ aʋa kple Hagritɔwo+ kple Yetur, Nafis+ kpakple Nodab. 20 Wodo ɣli na Mawu be wòaxɔ na yewo le aʋa la me, eye wòse kuku si woɖe be wòave yewo nu la, elabena woɖo ŋu ɖe eŋu; eya ta Mawu kpe ɖe wo ŋu le aʋa la me, ale be wotsɔ Hagritɔwo kple ame siwo katã le wo ŋu la de asi na wo.+ 21 Woha woƒe lãhawo—kposɔ akpe blaatɔ̃, alẽ akpe alafa eve blaatɔ̃, tedzi akpe eve eye woɖe aboyo ame* akpe alafa ɖeka. 22 Wowu ame geɖewo, elabena Mawu vavã lae wɔ aʋa la.+ Eye wonɔ wo teƒe va se ɖe aboyoɖeɣi la.+
23 Ke Manase-to+ afã la ƒe dzidzimeviwo nɔ anyigba la dzi tso Basan va se ɖe Baal-Hermon kple Senir kpakple Hermon To+ la ŋu. Wosɔ gbɔ ŋutɔ. 24 Woƒe tatɔ siwo le wo fofowo ƒe aƒekɔwo nue nye: Efer, Yisi, Eliel, Azriel, Yeremiya, Hodavia kple Yahdiel; wonye ŋutsu kalẽtɔ sesẽ xɔŋkɔwo kple tatɔwo le wo fofowo ƒe aƒekɔwo nu. 25 Ke womewɔ nuteƒe na wo tɔgbuiwo ƒe Mawu la o, ke boŋ woyi ɖawɔ ahasi kple anyigba la dzi dukɔ siwo Mawu tsrɔ̃ keŋkeŋ le wo ŋgɔ la ƒe mawuwo.+ 26 Eya ta Israel ƒe Mawu la nyɔ Asiria-fia+ Pul (si nye Asiria-fia Tilgat-Pilneser)+ ƒe gbɔgbɔ ɖe wo ŋu, ale be wòɖe aboyo Ruben viwo, Gad viwo kple Manase-to afã la hekplɔ wo yi Hala, Habor, Hara kple Gozan-tɔsisi+ la nu, eye wole afi ma va se ɖe egbe sia.