2 Kronika
19 Eye Yuda-fia Yehosafat gbugbɔ yi eya ŋutɔ ƒe aƒe me* le Yerusalem dedie.*+ 2 Azɔ Yehu,+ ŋutegakpɔla Hanani+ vi la, do yi ɖakpee, eye wògblɔ na Fia Yehosafat be: “Ame vɔ̃ɖi ŋue nèyi ɖakpe ɖo,+ eye ame siwo lé fu Yehowa ye nèlɔ̃a?+ Le esia ta Yehowa do dziku ɖe ŋuwò. 3 Gake wokpɔ nu nyui aɖewo le ŋuwò,+ elabena èɖe Aserawo* ɖa le anyigba la dzi, eye nèdzra wò dzi ɖo* be nàdi Mawu vavã la.”+
4 Yehosafat nɔ Yerusalem, eye wògatsa le dukɔ la dome ake tso Beer-Seba va se ɖe Efrayim+ tonuto la me, ne wòagatrɔ wo ɖe Yehowa, wo tɔgbuiwo ƒe Mawu la ŋu.+ 5 Eɖo ʋɔnudrɔ̃lawo hã ɖe Yuda du sesẽwo me le anyigba la katã dzi, ɖe du sia du me.+ 6 Eye wògblɔ na ʋɔnudrɔ̃laawo be: “Mikpɔ mia ɖokui dzi nyuie, elabena menye amegbetɔe miedrɔ̃a ʋɔnu na o, ke boŋ Yehowa ye, eye eli kpli mi le miaƒe nyametsotsowo me.+ 7 Azɔ mivɔ̃ Yehowa.+ Mikpɔ nyuie le nu si miewɔna la me, elabena le Yehowa mía Mawu gbɔ la, nu madzɔmadzɔ,+ ameŋkumekpɔkpɔ+ kple zãnuxɔxɔ+ aɖeke meli o.”
8 Yehosafat ɖo Lewi viwo kple nunɔlawo dometɔ aɖewo kpakple Israel ƒe tatɔ siwo le wo fofowo ƒe aƒekɔwo nu la dometɔ aɖewo ɖe Yerusalem hã be woanye ʋɔnudrɔ̃lawo na Yehowa ahadrɔ̃ nya na Yerusalem nɔlawo.+ 9 Eye wòde se na wo be: “Ale wòle be miatsɔ nuteƒewɔwɔ kple dzi blibo* awɔ nu le Yehowa vɔvɔ̃ mee nye esi: 10 Nya sia nya si mia nɔvi siwo le woƒe duwo me atsɔ vɛ na mi ku ɖe ʋukɔkɔɖi ŋu,+ alo bia nya tso se, senyawo, ɖoɖowo kple ʋɔnudɔdrɔ̃wo ŋu la, mixlɔ̃ nu wo bena woagaɖi fɔ le Yehowa ŋkume o; ne menye nenema o la, eƒe dziku ava mia kple mia nɔviwo dzi. Aleae wòle be miawɔ ne miagaɖi fɔ o. 11 Kpɔ ɖa, nunɔlawo ƒe tatɔ Amariya le mia nu ɖe Yehowa ƒe nya sia nya ŋu.+ Eye Zebadiya, Ismael vi, si nye Yuda ƒe aƒe la kplɔla, hã li ɖe fia ƒe nya sia nya ŋu. Eye Lewi vi siwo nye dɔdzikpɔlawo la li na mi. Misẽ ŋu eye mido vevie nu, Yehowa nenɔ kple ame siwo wɔa nu nyui.”*+