4 Mose

14 Eye ha blibo la katã wó avi, eye dukɔ la fa avi zã blibo ma katã.+ 2 Israel-viwo katã lĩ Mose kple Aron+ ŋu, eye ha blibo la gblɔ be: “Ne ɖe míeku le Egipte-nyigba dzi, alo ɖe míeku le gbe sia dzi la, ne enyo wu! 3 Nu ka tae Yehowa kplɔ mí yina anyigba sia dzi be míatsi yi nu?+ Mía srɔ̃wo kple mía viwo azu nu woaha.+ Ðe manyo na mí wu be míagbugbɔ ayi Egipte oa?”+ 4 Wogblɔ na wo nɔewo gɔ̃ hã be: “Mina míatia kplɔla bubu, ne míagbugbɔ ayi Egipte!”+

5 Ale Mose kple Aron tsyɔ mo anyi ɖe Israel ƒe ha si ƒo ƒu ɖe afi ma la katã ŋkume. 6 Eye Yosua,+ Nun vi kple Kaleb,+ Yefune vi siwo hã yi ɖatsa ŋku le anyigbaa dzi la, dze woƒe awuwo 7 hegblɔ na Israel ƒe ha blibo la be: “Anyigba si dzi míede ɖatsa ŋku le la, anyigba nyui aɖe ŋutɔe wònye.+ 8 Ne míaƒe nu dze Yehowa ŋu la, ekema akplɔ mí ayi anyigba sia si dzi notsi kple anyitsi le sisim+ le la dzi godoo ahatsɔe ana mí. 9 Gake migadze aglã ɖe Yehowa ŋu o, eye migavɔ̃ anyigba la dzi tɔwo o,+ elabena womede na mí o.* Takpɔnu meli na wo o, ke Yehowa li kpli míawo ya.+ Migavɔ̃ wo o.”

10 Ke ha blibo la di be yewoaƒu kpe wo.+ Eye Yehowa ƒe ŋutikɔkɔe dze le takpegbadɔ la tame Israel-viwo katã kpɔ kple ŋku.+

11 Eye Yehowa gblɔ na Mose be: “Va se ɖe ɣekaɣie dukɔ sia agbe bubudede ŋunye?+ Eye va se ɖe ɣekaɣie woagbe dzinye xɔxɔ se le dzesi siwo katã mewɔ le wo dome la megbe?+ 12 Na makplɔ dɔvɔ̃ aƒu wo ne woatsrɔ̃ ɖa, ne mawɔ wò nàzu dukɔ si lolo wu hekpɔ ŋusẽ wu wo.”+

13 Ke Mose gblɔ na Yehowa be: “Ekema Egiptetɔ siwo dome nètsɔ wò ŋusẽ kplɔ dukɔ sia dzoe le la asee godoo,+ 14 eye woagblɔe na anyigba sia dzi nɔlawo. Wosee hã be wò Yehowa ŋutɔe le dukɔ sia dome,+ eye nèɖe ɖokuiwò fia wokpɔ.+ Wòe nye Yehowa, wò alilikpo nɔa wo tame, eye nèdzea wo ŋgɔ le alilikpo dodo me le ŋkeke me kple dzobibi me le zã me.+ 15 Ne ètsrɔ̃ dukɔ blibo sia zi ɖeka la, ekema dukɔ siwo se wò ŋkɔxɔxɔ ŋu nya la agblɔ be, 16 ‘Esi Yehowa mete ŋu kplɔ dukɔ sia yi anyigba si ŋu wòka atam ɖo na wo dzi o tae wòwu wo le gbea dzi ɖo.’+ 17 Azɔ Oo Yehowa, meɖe kuku, ɖe wò ŋusẽ gã la fia, abe ale si tututu nègblɔe ene be, 18 ‘Yehowa, ame si medoa dziku kabakaba o, eye eƒe lɔlɔ̃ nu metsina o,+ ame si tsɔa vodada kple dzidada kena, ke megbea tohehe gbeɖe o, ame si hea fofowo ƒe vodada ŋuti tohehe vaa viwo dzi, vaa dzidzime etɔ̃lia kple dzidzime enelia dzi.’+ 19 Tsɔ dukɔ sia ƒe vodada la ke dzro le wò lɔlɔ̃ gã si nu metsina o la ta, abe ale si ko nètsɔe ke dukɔ sia tso Egipte va se ɖe fifia ene.”+

20 Eye Yehowa gblɔ be: “Enyo, metsɔe ke wo, abe ale si nègblɔe ene.+ 21 Gake zi ale si mele agbe la, nye Yehowa, nye ŋutikɔkɔe ayɔ anyigba blibo la katã dzi taŋ.+ 22 Ke hã, ŋutsu siwo katã kpɔ nye ŋutikɔkɔe kple nye dzesi+ siwo mewɔ le Egipte kple gbea dzi, gake woyi edzi dom kpɔ+ zi gbɔ zi ewo sia, eye womeɖo to nye gbe o la,+ 23 makpɔ anyigba si ŋu meka atam ɖo na wo fofowo la akpɔ o. Ɛ̃, ame siwo katã gbe bubudede ŋunye la makpɔe o.+ 24 Ke makplɔ nye subɔla Kaleb+ ya ayi anyigba si dzi wòde la dzi godoo, eye eƒe dzidzimeviwo axɔe wòazu wo tɔ, elabena gbɔgbɔ bubue le eya me, eye wòyi edzi dze yonyeme kple dzi blibo.+ 25 Esi Amalektɔwo kple Kanaantɔwo+ le balia me ta la, etsɔ la, miho miatrɔ ato mɔ si ɖo ta Ƒudzĩ la gbɔ ayi gbea dzi.”+

26 Yehowa gagblɔ na Mose kple Aron be: 27 “Va se ɖe ɣekaɣi gɔ̃e ha vɔ̃ɖi sia anɔ liʋiliʋĩ lĩm le ŋunye?+ Mese Israel-viwo ƒe liʋiliʋĩ siwo lĩm wole le ŋunye la.+ 28 Gblɔ na wo be, ‘“Zi ale si mele agbe la,” Yehowa ye gblɔe, “ne nyemawɔ mi abe ale si tututu miegblɔ ɖe nye to me ene o fĩ!+ 29 Miaƒe kukuawo atsi gbe sia dzi,+ ɛ̃, mia dometɔ siwo katã xɔ ƒe blaeve kple edzivɔ, siwo ŋkɔ woŋlɔ la katã, mi ame siwo lĩ liʋiliʋĩ le ŋunye la, miatsi gbe sia dzi.+ 30 Mia dometɔ aɖeke made anyigba si dzi meka atam be mianɔ la dzi o,+ negbe Kaleb, Yefune vi kple Yosua, Nun vi ko.+

31 “‘“Makplɔ mia vi siwo miebe woazu nu woaha+ la ayi, eye woawoe akpɔ anyigba si miawo miegbe la.+ 32 Ke miawo ya miaƒe kukuawo atsi gbe sia dzi. 33 Mia viwo azu alẽkplɔlawo le gbea dzi ƒe blaene,+ eye woakpe fu ɖe miaƒe nuteƒemawɔmawɔ* ta, va se ɖe esime mieku vɔ le gbea dzi.+ 34 Ŋkeke blaene,+ siwo mietsɔ yi ɖatsa ŋku le anyigbaa dzi la nue miakpɔ miaƒe vodadawo me tsonu ɖo ƒe blaene,+ ŋkeke ɖeka ɖe sia ɖe nanye ƒe ɖeka, ne mianya nu si aglãdzedze ɖe ŋunye fia.

35 “‘“Nye, Yehowa, ye gblɔe. Ne menye aleae mawɔ ha vɔ̃ɖi sia, si tso ɖe ŋunye o fĩ: Wo nu ayi le gbe sia dzi, eye afi siae woaku ɖo.+ 36 Eye ŋutsu siwo Mose dɔ ɖa be woaɖatsa ŋku le anyigba la dzi, siwo na ha blibo la katã lĩ liʋiliʋĩ le eŋu esi wova gblɔ dziɖeleameƒonyawo tso anyigbaa ŋu la,+ 37 wo ame siwo he du vɔ̃ vɛ tso anyigbaa dzi la, woaƒo wo aƒu anyi woaku le Yehowa ŋkume.+ 38 Ke Yosua, Nun vi kple Kaleb, Yefune vi koe atsi agbe le ame siwo yi ɖatsa ŋku le anyigbaa dzi la dome.”’”+

39 Esi Mose gblɔ nya siawo na Israel-viwo katã la, dukɔ la de asi konyifafa me vevie. 40 Ke wofɔ ŋdi kanya heɖoe be yewoalia ayi to la tame, eye wogblɔ be: “Míewɔ nu vɔ̃,+ ke hã míele klalo be míayi teƒe si ŋu Yehowa ƒo nu le na mí la.” 41 Gake Mose gblɔ na wo be: “Nu ka tae miele Yehowa ƒe se la dzi dam? Madze edzi o. 42 Migayi o, elabena Yehowa mele mia dome o, ne miaƒe futɔwo nagasi mi o.+ 43 Elabena Amalektɔwo kple Kanaantɔwo le afi ma be yewoakpe kpli mi,+ eye miatsi yi nu. Esi mietrɔ le Yehowa yome ta la, Yehowa manɔ kpli mi o.”+

44 Ke wotri to helia toa,+ gake Yehowa ƒe nubablaɖaka la kple Mose ya tsi asaɖa la me.+ 45 Eye Amalektɔwo kple Kanaantɔ siwo le toa dzi la ɖi va hesi wo, eye wonya wo ɖe nu va se ɖe Horma ke.+