4 Mose

16 Eye Kora,+ si nye Yizhar+ vi, Kohat+ vi, Lewi+ vi hekpe ɖe Eliab+ vi siwo nye Datan kple Abiram, kpakple Pelet vi On ŋu—ame etɔ̃ siawo tso Ruben+ ƒomea me—wo katã wowɔ ɖeka. 2 Eye wotso ɖe Mose ŋu, woawo kple ŋutsu alafa eve blaatɔ̃ siwo nye Israel-viwo ƒe tatɔwo, ame ŋkutawo, kple ame xɔŋkɔwo le ameha la dome. 3 Eye wova ƒo ƒu ɖe+ Mose kple Aron ŋu gblɔ na wo be: “Mia tɔ va glo! Ha blibo la katã le kɔkɔe,+ eye Yehowa le wo dome+ tso. Nu ka tae miedo mia ɖokui ɖe dzi le Yehowa ƒe ha la dome ale?”

4 Esi Mose see la, enumake etsyɔ mo anyi. 5 Eye wògblɔ na Kora kple edzidelawo katã be: “Etsɔ ŋdi la, Yehowa ana woanya ame si nye etɔ,+ ame si le kɔkɔe, kple ame si ate ɖe eŋu,+ eye ame si wòatia+ la, eyae ate ɖe eŋu. 6 Kora, wò kple ha blibo si le ŋuwò la,+ ale miawɔe nye esi: mitsɔ dzudzɔdosonuwo+ 7 miaɖe dzo ɖe wo me, eye miakɔ dzudzɔdonu ʋeʋĩ ɖe wo dzi ava Yehowa ŋkume etsɔ, eye ame si Yehowa atia+ la, eyae nye ame si le kɔkɔe. Mi Lewi viwo,+ mia tɔ va glo!”

8 Mose gagblɔ na Kora be: “Mi Lewi viwo, meɖe kuku, misee. 9 Nu tsɛ wònye le mia ŋkume be, Israel ƒe Mawu la ɖe mi ɖe vovo tso Israel ƒe ha+ la dome be miate ɖe ye ŋu awɔ Yehowa ƒe avɔgbadɔ la me dɔwo, mianɔ ha la ŋgɔ asubɔ wo,+ 10 eye be wòna wò kple nɔviwò Lewi viwo katã miete ɖe eŋua? Ðe miegale didim be yewoaxɔ nunɔlanyenye la hã?+ 11 Esia ta Yehowa ŋue wò kple ha blibo si le ŋuwò la miele tsitre tsim ɖo. Ke Aron ya, ame kae wònye be miele eŋu lĩm?”+

12 Emegbe Mose dɔ be woayi aɖayɔ Datan kple Abiram,+ siwo nye Eliab viwo avɛ, ke wogblɔ be: “Míegbɔna afi aɖeke o! 13 Nu tsɛ wònye be nèkplɔ mí tso anyigba si dzi notsi kple anyitsi le sisim le la dzi, be nàva wu le gbea dzia?+ Fifia, ɖe nègale didim be yeaɖu amegã hã ɖe mía dzia? 14 Mèkplɔ mí yi anyigba si dzi notsi kple anyitsi le sisim le la dzi,+ kaka ahayi anyigba kple waingble tsɔ ge na mí wòanye míaƒe domenyinu o. Ðe nèbe yeaho ŋku le to me na ŋutsu siawoa? Míegbɔna afi aɖeke o!”

15 Ale dzi ku Mose vevie, eye wògblɔ na Yehowa be: “Mègatrɔ kpɔ woƒe nuɖuvɔsa o. Nyemexɔ tedzi ɖeka teti hã le wo si o, eye nyemewɔ vɔ̃ wo dometɔ aɖeke hã o.”+

16 Eye Mose gblɔ na Kora be: “Wò kple ha blibo si le ŋuwò la katã kpakple Aron miva Yehowa ŋkume etsɔ. 17 Mia dometɔ ɖe sia ɖe natsɔ eƒe dzudzɔdosonu ahakɔ dzudzɔdonu ʋeʋĩ ɖe edzi, eye miatsɔe ava Yehowa ŋkume; woanye dzudzɔdosonu alafa eve blaatɔ̃, eye wò kple Aron hã mitsɔ miaƒe dzudzɔdosonuwo vɛ.” 18 Ale wo dometɔ ɖe sia ɖe tsɔ eƒe dzudzɔdosonu, ɖe dzo ɖe eme, eye wokɔ dzudzɔdonu ʋeʋĩ ɖe wo dzi heva tɔ ɖe takpegbadɔa nu; Mose kple Aron hã kpe ɖe wo ŋu. 19 Esi Kora ƒo edzidelawo+ nu ƒu ɖe wo ŋu le takpegbadɔa nu la, Yehowa ƒe ŋutikɔkɔe dze na ha blibo la katã.+

20 Eye Yehowa gblɔ na Mose kple Aron be: 21 “Mite ɖa le ha sia ŋu, ne matsrɔ̃ wo zi ɖeka.”+ 22 Ale wotsyɔ mo anyi gblɔ be: “Oo Mawu, wò Ame si na agbegbɔgbɔ amewo* katã,+ ɖe ame ɖeka pɛ awɔ nu vɔ̃, eye nàdo dziku ɖe ha blibo la katã ŋua?”+

23 Eye Yehowa gblɔ na Mose be: 24 “Gblɔ na ha la be, ‘Mite ɖa le Kora, Datan kple Abiram+ ƒe agbadɔwo ŋu!’”

25 Emegbe Mose tso yi Datan kple Abiram gbɔ, eye Israel ƒe ametsitsiwo+ yi kplii. 26 Eye wògblɔ na ha la be: “Meɖe kuku, mite ɖa le ame vɔ̃ɖi siawo ƒe agbadɔwo ŋu, eye migaka asi woƒe naneke ŋu o, ne woagatsrɔ̃ mi le woƒe nu vɔ̃wo ta o.” 27 Enumake wote ɖa le Kora, Datan kple Abiram ƒe agbadɔwo ŋu le akpa sia akpa, eye Datan kple Abiram do go va tɔ ɖe woƒe agbadɔwo nu, eye wo srɔ̃wo, wo viwo kple wo vi suewo le wo ŋu.

28 Eye Mose gblɔ be: “Esia mee mianyae le be, Yehowa ye dɔm be mawɔ dɔ siawo katã, eye menye nye ŋutɔ koe tso le ewɔm o: 29 Ne ame siawo aku abe ale si ko amegbetɔwo katã kunae ene, eye woahe to na wo abe ale si ko wohea to na amegbetɔwo katã ene la, ekema menye Yehowa ye dɔm o.+ 30 Ke ne nu madzɔkpɔ aɖee Yehowa awɔ, eye anyigba ake nu ami wo kple woƒe nuwo katã, eye woayi tsiẽ* agbagbee la, ekema mianyae nyuie be ŋutsu siawo mede bubu Yehowa ŋu o.”

31 Mekpɔ ɖe nu le nya siawo me hafi anyigba la fe kpla le wo te o.+ 32 Eye anyigba ke nu mi wo kple woƒe aƒemetɔwo kple Kora dzidelawo+ kpakple woƒe nuwo katã. 33 Ale wo kple woƒe amewo katã yi tsiẽ* agbagbee, eye anyigba la tu ɖe wo nu, ale be wo nu yi le ha la dome.+ 34 Esi Israel-vi siwo katã ƒo xlã wo la se woƒe ɣlidodoa la, wosi, elabena wogblɔ be: “Ðewohĩ anyigba la ava mi míawo hã!” 35 Eye dzo tso Yehowa gbɔ+ va fiã ŋutsu alafa eve blaatɔ̃ siwo le dzudzɔ ʋeʋĩ dom+ la.

36 Yehowa gblɔ na Mose be: 37 “Gblɔ na Aron vi Eleazar be wòafɔ dzudzɔdosonuawo+ le afi si dzoa bi le la, elabena nu kɔkɔe wonye. Gblɔ nɛ be wòakaka dzoa ɖe adzɔge. 38 Na woaƒo ŋutsu siwo wɔ nu vɔ̃ eye woku* la ƒe dzudzɔdosonuawo gbadzɛ, afa ɖe vɔsamlekpui la ŋu,+ elabena wotsɔ wo va Yehowa ŋkume, eye wozu nu kɔkɔewo. Woanye dzesi na Israel-viwo.”+ 39 Ale nunɔla Eleazar fɔ akɔblidzudzɔdosonu siwo ame siwo dzoa fiã tsɔ vɛ la, eye woƒo wo gbadzɛ tsɔ fa ɖe vɔsamlekpui la ŋu, 40 abe ale si tututu Yehowa gblɔ nɛ to Mose dzi ene. Esia zu ŋkuɖodzinu na Israel-viwo be ame si womeɖe mɔ na o* si menye Aron ƒe dzidzimevi o la, dometɔ aɖeke nagava be yeado dzudzɔ ʋeʋĩ le Yehowa ŋkume+ o, eye ame aɖeke nagakpɔ Kora kple edzidelawo+ ƒe nu awɔ o.

41 Esi ŋu nya ke ko la, Israel ƒe ha blibo la de asi liʋiliʋĩlilĩ me le Mose kple Aron+ ŋu be: “Mi ŋutsu eve siawoe wu Yehowa ƒe amewo.” 42 Esi ha la wɔ ɖeka tso ɖe Mose kple Aron ŋu la, woawo trɔ dze ŋgɔ takpegbadɔ la, eye kpɔ ɖa, alilikpo la tsyɔ edzi, eye Yehowa ƒe ŋutikɔkɔe dze wokpɔ.+

43 Mose kple Aron yi takpegbadɔa ŋgɔ,+ 44 eye Yehowa gblɔ na Mose be: 45 “Mite ɖa le ha sia ŋu, ne matsrɔ̃ wo zi ɖeka.”+ Eye wotsyɔ mo anyi.+ 46 Emegbe Mose gblɔ na Aron be: “Tsɔ dzudzɔdosonu nàɖe dzo le vɔsamlekpuia+ dzi ɖe eme, kɔ dzudzɔdonu ʋeʋĩ ɖe edzi, eye netsɔ nàyi ha la dome alé avu ɖe wo ta,+ elabena Yehowa ƒe dziku gbɔna wo dzi. Dɔvɔ̃ la dze egɔme!” 47 Enumake Aron tsɔe, abe ale si tututu Mose gblɔe ene, eye wòƒu du yi ha la dome; eye kpɔ ɖa, fuwɔame la dze egɔme xoxo le dukɔ la dome! Eye wòkɔ dzudzɔdonu ʋeʋĩ ɖe dzudzɔdosonua dzi hede asi avuléle me ɖe dukɔ la ta. 48 Etɔ ɖe ame kukuawo kple agbagbeawo dome, eye mlɔeba fuwɔame la nu tso. 49 Ame siwo fuwɔamea wu la le ame akpe wuiene alafa adre, ke ame siwo ku le Kora ƒe nya la me ya mele eme o. 50 Mlɔeba, esi Aron trɔ va Mose gbɔ le takpegbadɔa nu la, fuwɔame la nu tso.