2 Mose
9 Eye Yehowa gblɔ na Mose be: “Yi Farao gbɔ nàgblɔ nɛ be: ‘Ale Yehowa, Hebritɔwo ƒe Mawu la, gblɔe nye esi: “Ðe asi le nye dukɔ ŋu woayi aɖasubɔm.+ 2 Ke ne ègbe asiɖeɖe le wo ŋu, eye nègalé wo ɖi la, 3 ekema Yehowa ƒe asi+ ava wò lãha siwo le gbedzi la dzi. Dɔvɔ̃ dziŋɔ aɖe adze sɔwo, tedziwo, kposɔwo, nyihawo kple alẽhawo dzi.+ 4 Yehowa ade vovototo Israel-viwo ƒe lãhawo kple Egiptetɔwo ƒe lãhawo dome, eye Israel-viwo ƒe lã aɖeke maku o.”’”+ 5 Yehowa ɖo ɣeyiɣi hã gblɔ be: “Yehowa awɔ esia etsɔ le Egipte-nyigba la dzi.”
6 Le ŋufɔke la, Yehowa wɔ esia, ale Egiptetɔwo ƒe lãhawo katã ku,+ ke Israel-viwo ƒe lã aɖeke meku o. 7 Esi Farao bia la, kpɔ ɖa, Israel-viwo ƒe lã ɖeka pɛ hã meku o! Ke hã Farao gasẽ dzi me, eye meɖe asi le dukɔ la ŋu woyi o.+
8 Emegbe Yehowa gblɔ na Mose kple Aron be: “Miɖe kpomedzɔble ɖe miaƒe asiʋlowo me, eye Mose nahlẽe ɖo ɖe yame* le Farao ŋkume. 9 Azu ʋuʋudedi ɖe Egipte-nyigba blibo la dzi eye wòazu ƒoƒoe vɔ̃ ate amegbetɔwo kple lãwo siaa le Egipte-nyigba blibo la katã dzi.”
10 Ale woɖe kpomedzɔble, eye wova tɔ ɖe Farao ŋkume, eye Mose hlẽe ɖe yame, wòzu ƒoƒoe vɔ̃ te amegbetɔwo kple lãwo. 11 Ke akunyawɔlawo mete ŋu tɔ ɖe Mose ŋkume o le ƒoƒoe si te akunyawɔlaawo kple Egiptetɔwo katã la ta.+ 12 Ke Yehowa ɖe mɔ Farao ƒe dzi me sẽ, eye meɖo to wo o, abe ale si tututu Yehowa gblɔe na Mose ene.+
13 Eye Yehowa gblɔ na Mose be: “Fɔ ŋdi kanya nàyi aɖatɔ ɖe Farao ŋkume agblɔ nɛ be: ‘Ale Yehowa, Hebritɔwo ƒe Mawu la, gblɔe nye esi: “Ðe asi le nye dukɔ ŋu woayi aɖasubɔm. 14 Elabena mele nye fuwɔameawo katã lɔ ge atrɔ ɖe wò ŋutɔ, wò subɔviwo, kple wò dukɔ la dzi, ne nàdze sii be ame aɖeke mede nunye le anyigba blibo la katã dzi o.+ 15 Elabena mate ŋu ado nye asi ɖa atsɔ dɔvɔ̃ aƒo wò ŋutɔ kple wò dukɔ ale be nàtsrɔ̃ le anyigba la dzi xoxoxo hafi. 16 Gake susu si tae mena nèle agbe ɖoe nye be, maɖe nye ŋusẽ afia wò, eye woaɖe gbeƒã nye ŋkɔ le anyigba blibo la dzi.+ 17 Ðe nègale ɖokuiwò dom ɖe dzi kokoko ɖe nye dukɔ la ŋu hegbe asiɖeɖe le wo ŋua? 18 Kpɔ ɖa, mana kpetsi gã aɖe nadza etsɔ ɣealewoɣi, kpetsi sia tɔgbi medza le Egipte kpɔ tso gbe si gbe woɖo egɔme anyi va se ɖe fifia o. 19 Eya ta dɔ woaɖakplɔ wò lãhawo katã kple wò nu sia nu si le gbedzi la ade xɔ. Ame kple lã, siwo katã le gbedzi eye womekplɔ wo va aƒe me o la, kpetsi la adza ɖe wo dzi woaku.”’”
20 Farao ƒe subɔvi siwo Yehowa ƒe nya la tso dzika ƒo na la wɔ kaba yi ɖakplɔ woƒe subɔviwo kple woƒe lãhawo va aƒe me, 21 ke ame si mebu Yehowa ƒe nya la ɖe naneke me o la gblẽ eƒe subɔviwo kple eƒe lãhawo ɖe gbedzi.
22 Azɔ Yehowa gblɔ na Mose be: “Do wò asi ɖe dziƒo, ne kpetsi nadza ɖe Egipte-nyigba blibo la dzi,+ ɖe amegbetɔwo kple lãwo kpakple nu miemie siwo katã le gbedzi le Egipte-nyigba dzi la dzi.”+ 23 Eya ta Mose do eƒe atikplɔ la ɖe dziƒo, eye Yehowa na dzi ɖe gbe, kpetsi dza, eye dzo* dza ɖe anyigba la dzi, ale Yehowa na kpetsi la dza ɖe Egipte-nyigba la dzi. 24 Kpetsi dza, eye dzi nɔ dzo kem le kpetsi la me miamiamia. Enu sẽ ale gbegbe; etɔgbi aɖeke medza ɖe Egipte-nyigba blibo la katã dzi kpɔ tso esime wòzu dukɔ o.+ 25 Eye kpetsi la gblẽ nu sia nu si le gbedzi le Egipte-nyigba blibo la dzi, amegbetɔwo, lãwo, kple nu miemiewo katã, eye wòfe gbemetiwo katã.+ 26 Negbe Gosen-nyigba dzi, afi si Israel-viwo le la, koe kpetsi aɖeke medza le o.+
27 Eya ta Farao dɔ woɖayɔ Mose kple Aron vɛ, eye wògblɔ na wo be: “Fifia ya, mewɔ nu vɔ̃. Yehowa tɔ dzɔ, eye nye kple nye dukɔ la tɔ medzɔ o. 28 Miɖe kuku na Yehowa, ne wòana dziɖegbe kple kpetsi la nu natso. Ekema maɖe asi le mia ŋu miadzo faa, eye miaganɔ afi sia azɔ o.” 29 Mose gblɔ nɛ be: “Ne menya do go le dua me ko la, make nye abɔwo me le Yehowa ŋkume. Dziɖegbea atɔ te, eye kpetsi la nu atso, ne nàdze sii be Yehowa tɔe nye anyigba la.+ 30 Ke menyae xoxo be, ne eva eme alea gɔ̃ hã la, wò kple wò subɔviwo miele Yehowa Mawu vɔ̃ ge o.”
31 Ke kpetsi la na ɖeti* kple ƒo dome gblẽ, elabena ƒo ɖi, eye ɖeti hã ƒo se. 32 Ke lu kple lu dzĩ ya dome megblẽ o, elabena woawo metse haɖe o.* 33 Eye Mose dzo le Farao gbɔ hedo le dua me, eye wòke eƒe abɔwo me le Yehowa ŋkume, ale dziɖegbea kple kpetsi la nu tso, eye tsia ke le anyigba la dzi.+ 34 Esi Farao kpɔ be tsia kple kpetsia kpakple dziɖegbea nu tso la, egawɔ nu vɔ̃, eya kple eƒe subɔviwo siaa gasẽ dzi me.+ 35 Ale Farao gasẽ dzi me kokoko, eye meɖe asi le Israel-viwo ŋu o, abe ale si tututu Yehowa gblɔe to Mose dzi ene.+