Daniel

9 Le Dario,+ si nye Ahasweros Mediatɔ la ƒe vi, ame si wotsɔ ɖo fiae ɖe Kaldeatɔwo+ ƒe fiaɖuƒe la nu ƒe ƒe gbãtɔ me— 2 le eƒe fiaɖuɖu ƒe ƒe gbãtɔ me la, nye Daniel, melé ŋku ɖe agbalẽawo* me hekpɔe dze sii le Yehowa ƒe gbe si va na nyagblɔɖila Yeremiya nu be, Yerusalem+ ƒe aƒedozuzu la anɔ anyi ƒe blaadre.+ 3 Eya ta metrɔ mo ɖe Mawu vavã Yehowa ŋu, ne matsɔ gbedodoɖa, kokoƒoƒowo kple nutsitsidɔ adii,+ eye meta akpanya hebɔbɔ nɔ dzofi me. 4 Medo gbe ɖa na Yehowa nye Mawu heʋu eme be:

“Oo Yehowa, Mawu vavã kple Mawu gã si ŋu ŋɔdzi le, ame si wɔa eƒe nubabla dzi eye wòvea ame siwo lɔ̃nɛ kple ame siwo léa eƒe sededewo me ɖe asi la nu,+ 5 míewɔ nu vɔ̃, míeda vo, míewɔ nu tovo, eye míedze aglã;+ míetra ɖa le wò sededewo kple wò ʋɔnudɔdrɔ̃wo ŋu. 6 Míegbe toɖoɖo wò subɔla nyagblɔɖilawo,+ ame siwo ƒo nu kple míaƒe fiawo, míaƒe amegãwo, mía tɔgbuiwo kple dukɔ la me tɔwo katã le wò ŋkɔ me. 7 Oo Yehowa, tɔwò dzɔ, ke míawo, Yuda ŋutsuwo kple Yerusalem nɔlawo kpakple ame siwo katã le Israel, ame siwo le kpuiƒe kple didiƒe le anyigba siwo katã dzi nèka wo hlẽ ɖo le woƒe nuteƒemawɔmawɔ na wò ta la, mía tɔe nye ŋukpe,* abe ale si wòle egbe sia ene.+

8 “Oo Yehowa, mía kple míaƒe fiawo, míaƒe amegãwo kple mía tɔgbuiwo tɔe nye ŋukpe, elabena míewɔ nu vɔ̃ ɖe ŋuwò. 9 Ke Yehowa, mía Mawu, èkpɔa nublanui helɔ̃a tsɔtsɔke,+ ke míawo míedze aglã ɖe ŋuwò.+ 10 Míeɖo to Yehowa mía Mawu ƒe gbe hezɔ le eƒe se siwo wòde na mí to esubɔla nyagblɔɖilawo dzi la nu o.+ 11 Israel blibo la da wò Se la dzi, eye wote ɖe aga hegbe wò gbe sese, ale be nètrɔ fiƒode kple atam siwo woŋlɔ ɖe Mawu vavã ƒe subɔla Mose ƒe Se la me kɔ ɖe mía dzi,+ elabena míewɔ nu vɔ̃ ɖe Mawu ŋu. 12 Ewɔ eƒe nya si wògblɔ ɖe mía kple míaƒe dziɖulawo* ŋu la dzi,+ esi wòhe vɔ̃ gã aɖe va mía dzi; womewɔ nu si wowɔ le Yerusalem la tɔgbi le dziƒo bliboa te kpɔ o.+ 13 Vɔ̃ siawo katã dzɔ ɖe mía dzi,+ abe ale si woŋlɔe ɖe Mose ƒe Se la me ene, ke míeɖe kuku na Yehowa mía Mawu be wòakpɔ nublanui na mí ahaɖe asi le míaƒe vodadawo ŋu o,+ eye míese wò nyateƒe* la gɔme o.

14 “Eya ta Yehowa ƒe ŋku le te, eye wòhe vɔ̃ va mía dzi, elabena nu siwo katã Yehowa mía Mawu wɔ la le dzɔdzɔe; ke míawo míeɖo to eƒe gbe o.+

15 “Azɔ, Oo Yehowa mía Mawu, wò, ame si tsɔ alɔ sesẽ+ kplɔ wò dukɔ tso Egipte-nyigba dzi, eye nèwɔ ŋkɔ na ɖokuiwò abe ale si wòle egbe sia ene,+ míewɔ nu vɔ̃, míewɔ nu tovo. 16 Oo Yehowa, míeɖe kuku, wò dziku kple wò dɔmedzoe nu nefa ɖe wò du, Yerusalem, wò to kɔkɔe la ŋu, le wò nu dzɔdzɔe wɔwɔwo katã ta;+ elabena Yerusalem kple wò dukɔ la zu vlodonu na ame siwo katã ƒo xlã mí le míaƒe nu vɔ̃wo kple mía tɔgbuiwo ƒe vodadawo ta.+ 17 Azɔ, Oo mía Mawu, se wò subɔla ƒe gbedodoɖa kple eƒe kokoƒoƒo, eye na wò mo naklẽ ɖe wò kɔkɔeƒe+ si zu aƒedo+ la dzi le wò ŋutɔ ɖokuiwò ta, Oo Yehowa. 18 Oo nye Mawu, ƒu to anyi nàsee! Ke ŋku nàkpɔ nɔnɔme sesẽ si me míele, kple ale si du si ŋu woyɔ wò ŋkɔ ɖo la zu aƒedoe la; elabena menye míaƒe nu dzɔdzɔe wɔwɔ tae míele kuku ɖem na wò ɖo o, ke boŋ wò nublanuikpɔkpɔ geɖeawo tae.+ 19 Oo Yehowa, see. Oo Yehowa, tsɔe ke.+ Oo Yehowa, lé to ɖe eŋu, eye nàwɔe! Oo nye Mawu, mègahe ɖe megbe o le wò ŋutɔ ɖokuiwò ta, elabena wò ŋkɔe woyɔ ɖe wò du kple wò dukɔ la ŋu.”+

20 Esi megale nuƒoƒo dzi, le gbe dom ɖa hele nye nu vɔ̃ kple nye dukɔ Israel ƒe nu vɔ̃ me ʋum, eye mele Yehowa nye Mawu ƒe amenuveve biam ɖe nye Mawu ƒe to kɔkɔe la ta,+ 21 esi megale gbe dom ɖa hele nu ƒom la, ŋutsu Gabriel,+ ame si mekpɔ le ŋutega me tsã la,+ va gbɔnye le fiẽvɔsaɣi esime ɖeɖi te ŋunye belibeli. 22 Ena mese egɔme eye wògblɔ be:

“Oo Daniel, meva ɖo azɔ be makpe ɖe ŋuwò ne gɔmesese deto nasu asiwò, eye nàse nuwo gɔme. 23 Esi nèdze kokoƒoƒo gɔme la, mexɔ gbedeasi aɖe, eye meva be magblɔe na wò, elabena ame vevi*+ nènye. Eya ta bu nya la ŋu, eye nàse nu si kpɔm nèle la gɔme.

24 “Kwasiɖa blaadre* woɖo ɖe wò dukɔ la kple wò du kɔkɔe la ŋu,+ ne woatsi dzidada nu, ne woaɖe nu vɔ̃ ɖa,+ ne woalé avu ɖe vodada ta,+ ne woahe dzɔdzɔenyenye mavɔ vɛ,+ ne woatre ŋutega kple nyagblɔɖi* nu,+ eye woasi ami na Kɔkɔeƒewo Ƒe Kɔkɔeƒe la. 25 Azɔ nyae, eye nàse egɔme be, tso esime wode se be woagbugbɔ Yerusalem+ aɖo te ahagbugbɔe atso va se ɖe esime Mesia*+ Kplɔla+ la nava la, le kwasiɖa adre kple kwasiɖa blaade vɔ eve.+ Woagaɖo dua te, eye woagbugbɔe atso hekpe ɖe eƒe ablɔwo kple tsisitoƒewo ŋu, gake woawɔe le xaxaɣiwo.

26 “Eye le kwasiɖa blaade vɔ eve la megbe la, woaɖe Mesia la ɖa,*+ eye naneke masusɔ nɛ o.+

“Eye kplɔla aɖe si gbɔna la ƒe aʋakɔ agbã du la kple kɔkɔeƒe la.+ Eƒe nuwuwu ava abe tsiɖɔɖɔ ene. Aʋawɔwɔ anɔ anyi va se ɖe nuwuwu la; nu si woɖoe nye aƒedozuzu.+

27 “Alé nubabla la ɖe te na ame geɖewo kwasiɖa ɖeka; eye le kwasiɖaa ƒe afã me la, atsi vɔsa kple nunanawo nu.+

“Ame si ahe aƒedozuzu vɛ+ la anɔ ŋunyɔnuwo ƒe aʋala dzi ava; eye nu si woɖo la akɔ ɖe nu si zu aƒedo la hã dzi va se ɖe esime wòtsrɔ̃ keŋkeŋ.”