Marko

9 Eye wògagblɔ na wo be: “Vavã mele egblɔm na mi be, ame aɖewo le ame siwo le tsitre ɖe afi sia dome, siwo maɖɔ ku akpɔ o, va se ɖe esime wokpɔ Mawu Fiaɖuƒe la wòva le ŋusẽ me.”+ 2 Ŋkeke ade megbe la, Yesu kplɔ Petro kple Yakobo kpakple Yohanes woyi to kɔkɔ aɖe dzi. Eye eƒe dzedzeme trɔ le wo ŋkume;+ 3 eƒe awudziwuiwo le dzo dam eye wofu ale gbegbe be nunyàla aɖeke mele anyigba dzi ate ŋu anya wo woafu nenema o. 4 Eliya kple Mose hã dze wokpɔ, eye wole dze ɖom kple Yesu. 5 Petro gblɔ na Yesu be: “Rabi, enyo na mí be míanɔ afi sia. Eya ta na míatu agbadɔ etɔ̃, ɖeka nanye tɔwò, ɖeka nanye Mose tɔ, eye ɖeka nanye Eliya tɔ.” 6 Le nyateƒe me la, Petro menya nu si wòawɔ o, elabena vɔvɔ̃ ɖo wo ŋutɔ. 7 Alilikpo aɖe do, eye wòdo vɔvɔli ɖe wo dzi, eye gbe aɖe ɖi+ tso alilikpoa me be: “Ame siae nye Vinye, si gbɔ nyemelɔ̃a nu le o.+ Miɖo toe.”+ 8 Kasia wotsa ŋku mlamlamla, gake womegakpɔ ame aɖeke le wo gbɔ o, negbe Yesu ko.

9 Esi wole ɖiɖim tso toa dzi la, ede se na wo vevie be womegagblɔ nu si wokpɔ la na ame aɖeke o,+ va se ɖe esime Amegbetɔvi la fɔ tso ame kukuwo dome hafi.+ 10 Eye wodzra nyaa ɖo ɖe dzi me,* ke wole dze ɖom tso nu si eƒe fɔfɔ tso ame kukuwo dome sia fia ŋu le wo nɔewo dome. 11 Eye wobiae be: “Nu ka tae agbalẽfialawo gblɔna be ele be Eliya+ nava gbã?”+ 12 Eɖo eŋu na wo be: “Nyateƒee, Eliya do ŋgɔ va heɖɔ nuwo katã ɖo;+ ke nu ka tae woŋlɔ ɖi le Amegbetɔvi la ŋu be akpe fu geɖe,+ eye womabui ɖe naneke me o?+ 13 Mele egblɔm na mi be, le nyateƒe me la, Eliya+ va, eye wowɔ nu sia nu si wodi la ɖe eŋu, abe ale si woŋlɔe ɖi le eŋu ene.”+

14 Ke esi wotrɔ va nusrɔ̃la bubuawo gbɔ la, wokpɔ be ameha gã aɖe ƒo xlã wo, eye agbalẽfialawo le nya hem kpli wo.+ 15 Ke esi ameha blibo la kpɔe la, woɖi vo ŋutɔ, eye woƒu du yi egbɔ ɖado gbe nɛ. 16 Yesu bia wo be: “Nya ka hem miele kpli wo?” 17 Ameha la dometɔ ɖeka ɖo eŋu nɛ be: “Nufiala, mekplɔ vinyeŋutsuvi va gbɔwò, elabena gbɔgbɔ aɖe le eme si na meƒoa nu o.+ 18 Afi sia afi si wòdze edzi le la, etsɔnɛ xlãna ɖe anyi, eye futukpɔ dona le enu, eɖua aɖukli, eye ŋusẽ vɔna le eŋu. Megblɔ na wò nusrɔ̃lawo be woanyae ado goe, ke womete ŋui o.” 19 Eɖo eŋu na wo be: “Oo, dzidzime maxɔse,+ ɣeyiɣi didi kae manɔ mia gbɔ ase ɖo? Ɣeyiɣi didi kae mado dzi atsɔ miaƒe nuwɔnawo ase ɖo? Mikplɔe va gbɔnye.”+ 20 Ale wokplɔ ŋutsuvi la va egbɔ, ke esi wòkpɔ Yesu la, gbɔgbɔ la na ŋutsuvi la ƒo tititi, eye wòdze anyi hele mimlim, eye futukpɔ le dodom le enu. 21 Eye Yesu bia fofoa be: “Ɣeyiɣi didi kae nye esia nu sia dzɔna ɖe edzi?” Eɖo eŋu be: “Tso eƒe ɖevime ke, 22 eye wòtsɔnɛ xlãna ɖe dzo kple tsi me enuenu be yeawui. Ke ne àte ŋu awɔ nane la, kpɔ nublanui na mí, eye nàkpe ɖe mía ŋu.” 23 Yesu gblɔ nɛ be: “Ðe nèbe, ‘Ne àte ŋuia’? Nyae be ame si si xɔse le la ate ŋu awɔ nu sia nu.”+ 24 Enumake ɖevia fofo do ɣli gblɔ be: “Xɔse le asinye! Gake kpe ɖe ŋunye le afi si mehiã xɔse le!”+

25 Ke esi Yesu kpɔ be ameha aɖe le du dzi gbɔna yewo gbɔ la, eka mo na gbɔgbɔ makɔmakɔ la hegblɔ nɛ be: “Wò, gbɔgbɔ si nana wozua mumu kple tokunɔ, meɖe gbe na wò be, do go le eme, eye mègage ɖe eme azɔ o!”+ 26 Esi gbɔgbɔ la do ɣli hena ŋutsuvi la ƒo tititi zi geɖe vɔ la, edo go le eme, eye ŋutsuvi la zu abe ame kuku ene, ale be wo dometɔ akpa gãtɔ gblɔ be: “Eku!” 27 Ke Yesu lé ŋutsuvia ƒe alɔnu hekɔe dzi, eye wòtso ɖe tsitrenu. 28 Emegbe esi wòyi aƒe aɖe me la, eƒe nusrɔ̃lawo ɖeɖe va biae be: “Aleke wɔ míawo ya míete ŋu nyae do goe o?”+ 29 Eɖo eŋu na wo be: “Esia tɔgbi ya gbedodoɖa dzi koe woate ŋu ato anyae ado goe.”

30 Wodzo le afi ma yi ɖato Galilea, gake medi be ame aɖeke nanya o. 31 Elabena ele nu fiam eƒe nusrɔ̃lawo, eye wòle gbɔgblɔm na wo be: “Wole Amegbetɔvi la de ge asi na amewo, eye woawui,+ eye ne wowui la, afɔ ɖe tsitre le ŋkeke etɔ̃ megbe.”+ 32 Womese eƒe nya la gɔme o, gake wole vɔvɔ̃m be yewoabiae.

33 Azɔ wova Kapernaum. Esi wòle aƒe me la, ebia wo be: “Nya ka ʋlimee mienɔ le mɔa dzi?”+ 34 Wozi kpi, elabena esime wonɔ mɔa dzi la, wonɔ nya ʋlim le wo nɔewo dome le ame si nye gãtɔ la ŋuti. 35 Eya ta ebɔbɔ nɔ anyi, eye wòyɔ Ame Wuieveawo gblɔ na wo be: “Ne ame aɖe di be yeanye gbãtɔ la, ele nɛ be wòanye amewo katã ƒe mlɔetɔ kple wo katã ƒe subɔla.”+ 36 Ekplɔ ɖevi sue aɖe va wo dome, ekpla asi kɔ nɛ, eye wògblɔ na wo be: 37 “Ame sia ame si xɔ ɖevi+ siawo dometɔ ɖeka le nye ŋkɔ ta la, exɔ nye hã; eye ame sia ame si xɔm la, menye nye koe wòxɔ o, ke exɔ Ame si dɔm ɖa la hã.”+

38 Yohanes gblɔ nɛ be: “Nufiala, míekpɔ ame aɖe wòle gbɔgbɔ vɔ̃wo nyam do goe le wò ŋkɔ me, eye míegbe nɛ, elabena menye mía dometɔ ɖekae wònye o.”+ 39 Ke Yesu gblɔ be: “Migagbe nɛ o, elabena ame aɖeke meli, si awɔ ŋusẽdɔ le nye ŋkɔ me, eye le ema megbe kasia wòate ŋu agblɔ nya vɔ̃ ɖe ŋunye o. 40 Elabena ame si metsi tsitre ɖe mía ŋu o la, le mía dzi.+ 41 Elabena ame sia ame si na tsi kplu ɖeka mi mieno le esi mienye Kristo tɔ+ ta la, vavã mele egblɔm na mi be, eƒe fetu la mele eŋu tsi ge o.+ 42 Ke ame sia ame si azu nukikli na ɖevi sue siawo siwo si xɔse le la dometɔ aɖe la, anyo nɛ wu be woatsɔ té, si tedziwo trona, atsi ɖe kɔ nɛ ahatsɔe aƒu gbe ɖe atsiaƒu me.+

43 “Ne wò asi hea wò dea nu vɔ̃ me* la, lãe ɖa. Enyo na wò be nàtsɔ asi ɖeka ayi ɖe agbe la me wu be asi eve nanɔ asiwò nàyi Gehena,* le dzo si womate ŋu atsi o la me.+ 44 * —— 45 Ne wò afɔ hea wò dea nu vɔ̃ me* la, lãe ɖa. Enyo na wò be nàtsɔ afɔ ɖeka ayi ɖe agbe la me, wu be afɔ eve nanɔe na wò, evɔ woatsɔ wò aƒu gbe ɖe Gehena.*+ 46 * —— 47 Ne wò ŋku hea wò dea nu vɔ̃ me* la, hoe le eto me.+ Enyo na wò be nàtsɔ ŋku ɖeka ayi ɖe Mawu Fiaɖuƒe la me, wu be ŋku eve nanɔe na wò, evɔ woatsɔ wò aƒu gbe ɖe Gehena,*+ 48 afi si nyéwo mekuna le o, eye dzo metsina le o.+

49 “Elabena woawu dzo ɖe ame siawo tɔgbi dzi abe ale si wowua dze ɖe nu dzi ene.+ 50 Nu nyui aɖee dze nye, ke ne dze bu nu si na wònye dze ɖe, nu kae miatsɔ adee?+ Mina dze nanɔ mia me,+ eye minɔ ŋutifafa me kple mia nɔewo.”+