Ezekiel

37 Yehowa ƒe asi va dzinye, eye Yehowa ƒe gbɔgbɔ la kɔm yi ɖada ɖe bali la titina,+ eye ƒuwo yɔ bali la me fũu. 2 Ekplɔm to wo ŋu godoo va kpe, eye mekpɔ be ƒuawo sɔ gbɔ ɖe bali la me fũu, woƒu kplakplakpla.+ 3 Eye wòbiam be: “Amegbetɔvi, ɖe ƒu siawo agagbɔ agbea?” Meɖo eŋu be: “Aƒetɔ Dziɖulagã Yehowa, wò koe nya.”+ 4 Eye wògagblɔ nam be: “Gblɔ nya ɖi ɖe ƒu siawo ŋu, eye nàgblɔ na wo be: ‘Oo mi ƒu ƒuƒuwo, mise Yehowa ƒe nya:

5 “‘Nya si Aƒetɔ Dziɖulagã Yehowa gblɔ na ƒu siawoe nye esi: “Made gbɔgbɔ mia me ne miagbɔ agbe.+ 6 Made lãmeka mia ŋu, eye mana lãkusi naɖo mia ŋu, mafa ayi ɖe mia ŋu, eye made gbɔgbɔ mia me ne miagbɔ agbe; ne miadze sii be, nyee nye Yehowa.”’”

7 Eye megblɔ nya ɖi abe ale si tututu wògblɔ nam ene. Esi menya gblɔ nya ɖi ko la, zi tɔ, eye mese nane nɔ ɖiɖim xotsoxotso, eye ƒuawo nɔ tetem kpe, ƒu ɖe sia ɖe ɖe nɔvia ŋu. 8 Eye kpɔ ɖa, lãmeka kple lãkusi ɖo wo ŋu, eye ayi fa ɖe wo ŋu. Ke gbɔgbɔ aɖeke menɔ wo me o.

9 Eye wògblɔ nam be: “Amegbetɔvi, gblɔ nya ɖi ɖo ɖe ya. Gblɔ nya ɖi, nàgblɔ na ya be, ‘Ale Aƒetɔ Dziɖulagã Yehowa gblɔe nye esi: “Oo ya,* do tso ya eneawo me nàva ƒo to ame siawo siwo wowu la dzi, ne woagbɔ agbe.”’”

10 Eye megblɔ nya ɖi abe ale si tututu wòde se nam ene; ale gbɔgbɔ ɖo wo me wogbɔ agbe hetso ɖe woƒe afɔwo dzi;+ aʋakɔ gã nyadri aɖee wonye.

11 Eye wògblɔ nam be: “Amegbetɔvi, ƒu siawoe nye Israel ƒe aƒe blibo la.+ Kpɔ ɖa, wole gbɔgblɔm be, ‘Míaƒe ƒuwo ƒu kplakplakpla, eye mɔkpɔkpɔ bu ɖe mí.+ Woɖe mí ɖe aga kura.’ 12 Eya ta gblɔ nya ɖi, eye nàgblɔ na wo be, ‘Ale Aƒetɔ Dziɖulagã Yehowa gblɔe nye esi: “Nye dukɔ, kpɔ ɖa, maʋu miaƒe yɔdowo,+ mana miafɔ atso miaƒe yɔdowo me, eye makplɔ mi ayi Israel-nyigba dzi.+ 13 Oo nye dukɔ, ne meʋu miaƒe yɔdowo eye mena miefɔ tso yɔdoawo me la, ekema miadze sii be, nyee nye Yehowa.”’+ 14 ‘Made nye gbɔgbɔ mia me miagbɔ agbe,+ eye mana mianɔ miaƒe anyigba dzi; ne miadze sii be nye, Yehowa, ye ƒo nu, eye mewɔ edzi hã,’ Yehowa ye gblɔe.”

15 Eye Yehowa ƒe gbe gava nam be: 16 “Amegbetɔvi, tsɔ ati, eye nàŋlɔ ɖe eŋu be, ‘Yuda kple Israel-vi siwo wɔ ɖeka kplii la tɔe.’+ Gatsɔ ati bubu, eye nàŋlɔ ɖe eŋu be, ‘Efrayim ƒe ati, si nye Yosef kple Israel ƒe aƒe blibo si wɔ ɖeka kplii la tɔe.’+ 17 Eye nàtsiã wo woazu ati ɖeka ko le asiwò me.+ 18 Ne mia deviwo bia wò be, ‘Mèle nu si esiawo fia la gblɔ ge na mí oa?’ la, 19 ekema nàgblɔ na wo be, ‘Ale Aƒetɔ Dziɖulagã Yehowa gblɔe nye esi: “Kpɔ ɖa, matsɔ Yosef kple Israel-to siwo wɔ ɖeka kplii la ƒe ati, si le Efrayim si la, aɖo Yuda ƒe ati la nu ne wòazu ati ɖeka;+ woawɔ ɖeka le asinye me.”’ 20 Eye nàlé ati siwo ŋu nèŋlɔ nu ɖo la ɖe asi le wo ŋkume.

21 “Eye nàgblɔ na wo be, ‘Ale Aƒetɔ Dziɖulagã Yehowa gblɔe nye esi: “Kpɔ ɖa, makplɔ Israel-viwo tso dukɔ siwo me woyi la, eye maƒo wo nu ƒu tso goawo katã me akplɔ wo ava woƒe anyigba dzi.+ 22 Mawɔ wo woazu dukɔ ɖeka le anyigba la dzi,+ le Israel-towo dzi, eye fia ɖeka anɔ wo katã nu;+ womaganye dukɔ eve azɔ o, eye womagama ɖe fiaɖuƒe eve me azɔ o.+ 23 Womagatsɔ woƒe legba nyɔŋuwo,* woƒe ŋunyɔnuwɔwɔwo kple woƒe dzidadawo ƒe ɖeke aƒo ɖi wo ɖokuiwo azɔ o.+ Maɖe wo tso woƒe nuteƒemawɔmawɔ si xɔ aƒe ɖe wo dome la katã me, eye makɔ wo ŋu. Woanye nye dukɔ, eye manye woƒe Mawu.+

24 “‘“Nye subɔla David anye fia ɖe wo nu,+ eye kplɔla ɖeka anɔ wo katã si.+ Woalé nye ʋɔnudrɔ̃ɖoɖowo me ɖe asi ahawɔ nye sewo dzi pɛpɛpɛ.+ 25 Woanɔ anyigba si metsɔ na nye subɔla Yakob, anyigba si dzi mia tɔgbuiwo nɔ, la dzi,+ woawo kple wo viwo kpakple wo viwo ƒe viwo+ anɔ edzi ɖaa,+ eye nye subɔla David anye amegã ɖe wo nu ɖaa.+

26 “‘“Mabla ŋutifafanu kpli wo;+ nubabla mavɔ wòanye anɔ nye kpli wo dome. Mana woali ke sesĩe, mana woadzi ɖe edzi,+ eye maɖo nye kɔkɔeƒe la anyi ɖe wo dome tegbee. 27 Nye agbadɔ la anɔ wo gbɔ,* manye woƒe Mawu, eye woawo woanye nye dukɔ.+ 28 Eye dukɔwo adze sii be nye, Yehowa, ye kɔ Israel ŋu ne mena nye kɔkɔeƒe la le wo dome ɖaa tegbee.”’”+