3 Mose

22 Yehowa gagblɔ na Mose be: 2 “Gblɔ na Aron kple viaŋutsuwo be woakpɔ wo ɖokuiwo dzi nyuie le ale si woawɔ Israel-viwo ƒe nu kɔkɔe siwo woatsɔ asa vɔ nam+ ŋu dɔe la ŋu, ne woagaƒo ɖi nye ŋkɔ kɔkɔe+ la o. Nyee nye Yehowa. 3 Gblɔ na wo be: ‘Le miaƒe dzidzimewo katã me la, ne miaƒe dzidzimevi aɖe si ŋu mekɔ o te ɖe nu kɔkɔe siwo ŋu Israel-viwo akɔ na Yehowa ŋu la, ekema woatsrɔ̃ ame* ma ɖa le nye ŋkuta.+ Nyee nye Yehowa. 4 Aron ƒe dzidzimeviwo dometɔ si le anyidɔ*+ lém alo tsi aɖe le dodom le eŋu+ la mekpɔ mɔ aɖu nu kɔkɔeawo o, va se ɖe esime eŋu kɔ+ hafi. Nenema kee nye wo dometɔ si ka asi ame si ŋu mekɔ o le esi wòƒo ɖi eɖokui le ame* kuku+ aɖe ta ŋu, alo ka asi ŋutsu si nyè tsi+ ŋu, 5 alo wo dometɔ si ka asi lã suesue siwo nɔa ha me+ siwo ŋu mekɔ o ŋu, alo ka asi ame si nu bubu aɖe na eŋu mekɔ o+ la hã ŋu. 6 Ame* si ka asi nu siawo dometɔ aɖe ŋu la ŋu mekɔ o va se ɖe fiẽ, eye maɖu nu kɔkɔeawo ƒe ɖeke o, negbe ɖeko wòale tsi hafi.+ 7 Ne ɣe ɖo to la, ekema eŋu kɔ, eye emegbe ate ŋu aɖu nu kɔkɔeawo ƒe ɖe, elabena eƒe nuɖuɖue.+ 8 Maɖu lã si ku le eɖokui si alo lã si gbemelã aɖe vuvu atsɔ agblẽ kɔ ɖo na eɖokui o.+ Nyee nye Yehowa.

9 “‘Woawɔ nu siwo meɖo na wo la dzi ale be woagada vo ahaku le esi wogblẽ kɔ ɖo na nu kɔkɔewo ta o. Nyee nye Yehowa, ame si kɔ wo ŋu.

10 “‘Ame si womeɖe mɔ na o* mekpɔ mɔ aɖu nu kɔkɔea+ ƒe ɖeke o. Nunɔla ƒe amedzro alo eƒe apadɔwɔla hã mekpɔ mɔ aɖu nu kɔkɔea ƒe ɖeke o. 11 Ke ne nunɔla aɖe tsɔ eƒe ga ƒle ame* aɖe la, ekema amea ate ŋu aɖui. Kluvi siwo wodzi ɖe eƒe aƒe me hã ate ŋu aɖu nuɖuɖu la.+ 12 Ne nunɔla aɖe ƒe vinyɔnu ɖe ame si metso nunɔlawo ƒe ƒomea me o la, ekema nyɔnu la mate ŋu aɖu nu kɔkɔe siwo wodzɔ la o. 13 Ke ne nunɔla aɖe ƒe vinyɔnu zu ahosi alo wogbee eye vi aɖeke hã mele esi o, eye wòhiã be wòatrɔ ayi fofoa ƒe aƒe me abe ale si wònɔe le eƒe ɖetugbuime ene la, ekema ate ŋu aɖu fofoa ƒe nuɖuɖu la ƒe ɖe;+ ame si womeɖe mɔ na o* mekpɔ mɔ aɖui o.

14 “‘Ke ne ame aɖe ɖu nu kɔkɔea ƒe ɖe le manyamanya me la, ekema wòaɖo nu kɔkɔe la teƒe na nunɔla la, eye wòagatsɔ nua me mama atɔ̃ ƒe ɖeka ƒe home akpee.+ 15 Ale woagagblẽ kɔ ɖo na Israel-viwo ƒe nu kɔkɔe siwo wodzɔ na Yehowa,+ 16 be woagahe to na wo le esi woɖu nu kɔkɔeawo heɖi fɔ ta o. Nyee nye Yehowa, ame si kɔ wo ŋu.’”

17 Yehowa gagblɔ na Mose be: 18 “Gblɔ na Aron kple viaŋutsuwo kpakple Israel-viwo katã be, ‘Ne Israel-vi alo amedzrovi aɖe si le Israel tsɔ eƒe adzɔgbeɖenunana alo tsɔ eƒe lɔlɔ̃nu faa nunana+ aɖe vɛ be woatsɔ asa numevɔ+ na Yehowa la, 19 ele be wòanye lãtsui si sɔ blibo,+ eɖanye nyi, alẽ alo gbɔ̃ o, be miaƒe nu nadze eŋu. 20 Migatsɔ lã nuwɔe+ aɖeke vɛ o, elabena miaƒe nu madze eŋu o.

21 “‘Ne ame aɖe be yeasa ŋutifafavɔ+ na Yehowa atsɔ axe eƒe adzɔgbeɖefe alo be wòanye lɔlɔ̃nu faa nunana la, ekema wòanye nyi alo alẽ si sɔ blibo, si naneke mewɔ afi aɖeke na o, be wòaxɔe ne amea ƒe nu nadze eŋu. 22 Migatsɔ lã si ƒe ŋku gbã, esi ŋe, esi xɔ abi, esi nu tè alo esi dze akpa alo esi ŋu zɔlĩ le la dometɔ aɖeke vɛ na Yehowa o, eye migatsɔ wo dometɔ aɖeke sa vɔe na Yehowa le vɔsamlekpui la dzi o. 23 Ke àte ŋu atsɔ nyi alo alẽ si ƒe ŋutinu aɖe didi wu kemɛa alo to ɖe eme la ana abe lɔlɔ̃nu faa nunana ene, ke ne adzɔgbeɖenunanae la, womakpɔ ŋudzedze ɖe eŋu axɔe na mi o. 24 Migatsɔ lã si ƒe voku woto alo wogbã, esi woha vo le gɔme na alo esi wota la vɛ na Yehowa o, eye migatsɔ lã mawo sa vɔe le miaƒe anyigba dzi o. 25 Migaxɔ nu siawo dometɔ aɖeke tso amedzrovi aɖeke si ana wòanye mia Mawu ƒe nuɖuvɔ o, elabena nu gblẽ le wo ŋu eye wozu lã nuwɔewo. Womakpɔ ŋudzedze ɖe eŋu axɔe na mi o.’”

26 Yehowa gagblɔ na Mose be: 27 “Ne wodzi nyi alo alẽ alo gbɔ̃ la, woana wòanɔ dadaa ŋu ŋkeke adre,+ ke ne exɔ ŋkeke enyi alo wu nenema, eye wotsɔe sa dzovɔ na Yehowa la, woaxɔe ahakpɔ ŋudzedze ɖe eŋu. 28 Ke migawu nyi alo alẽ kple via siaa gbe ɖeka o.+

29 “Ne miele akpedavɔ sam na Yehowa+ la, miwɔe le mɔ si ana miaƒe nu nadze eŋu la nu. 30 Gbe ma gbe kee woaɖui. Migagblẽ ɖeke ɖi ŋu nake ɖe edzi o.+ Nyee nye Yehowa.

31 “Milé nye seawo me ɖe asi, eye miawɔ wo dzi.+ Nyee nye Yehowa. 32 Migaƒo ɖi nye ŋkɔ kɔkɔe la+ o, ke boŋ mikɔ ŋunye le Israel-viwo dome.+ Nyee nye Yehowa, ame si kɔ mia ŋu.+ 33 Nyee kplɔ mi tso Egipte-nyigba dzi, be manye miaƒe Mawu.+ Nyee nye Yehowa.”