3 Mose
24 Yehowa gblɔ na Mose be: 2 “Gblɔ na Israel-viwo be woatsɔ amititsetse ƒe ami nyuitɔ vɛ be woatsɔ ade akaɖi la me, ne akaɖigbɛ la nanɔ sisi ɖaa.+ 3 Aron nakpɔ akaɖi la gbɔ le takpegbadɔa me le xɔmetsovɔ si xe Ðaseɖinu la ŋkume la ŋgɔ, be wòanɔ bibim tso fiẽ va se ɖe ŋdi le Yehowa ŋkume ɖaa. Se wònye na mi ɖaa le miaƒe dzidzimewo katã me. 4 Nekpɔ akaɖigbɛawo ŋuti dɔwo gbɔ le sikakaɖiti+ la dzi le Yehowa ŋkume ɖaa.
5 “Tsɔ wɔ memee mè abolo kotoe wuieve. Tsɔ wɔ efa me mama ɖe ewo ƒe akpa eve* ƒo aboloawo dometɔ ɖe sia ɖe. 6 Nàɖo wo ɖe wo nɔewo dzi le agbaka eve me ɖe sikakplɔ̃ la dzi le Yehowa ŋkume;+ ade nanɔ agbaka ɖeka me.+ 7 Eye nàtsɔ lifi ɣi nyuitɔ ada ɖe agbaka eveawo dzi, be esia nanye kpɔɖeŋudzovɔsa*+ ƒe abolo na Yehowa. 8 Na wòaɖo aboloa ɖe ɖoɖo nu le sabat sia sabat dzi le Yehowa ŋkume ɖaa.+ Nubabla wònye le nye kple Israel-viwo dome ɖaa. 9 Woanye Aron kple viaŋutsuwo tɔ,+ eye woaɖui le teƒe kɔkɔe,+ elabena nu kɔkɔewo ƒe nu kɔkɔe wònye nɛ tso Yehowa ƒe dzovɔsawo me; ɖoɖo mavɔ wòanye.”
10 Ke gbe ɖeka la, dzre dzɔ ɖe Israel nyɔnu aɖe ƒe viŋutsu si wòdzi na Egipte ŋutsu+ aɖe kpakple Israel ŋutsu aɖe dome le asaɖa la me. 11 Eye Israel nyɔnua ƒe via gblɔ busunya ɖe Mawu ƒe ŋkɔ* la ŋu hedo ɖiŋu nɛ.+ Eya ta wokplɔe va Mose gbɔ.+ Dadaa ŋkɔe nye Selomit, eye wònye Dibri si tso Dan-to la me ƒe vinyɔnu. 12 Eye wosikae ɖi, va se ɖe esime woase nya aɖe tso Yehowa nu.+
13 Eye Yehowa gblɔ na Mose be: 14 “Kplɔ ɖiŋudola la yi asaɖa la godo, eye ame siwo katã se nya si wògblɔ la natsɔ woƒe asiwo aɖo eƒe ta dzi, eye ha blibo la katã naƒu kpee.+ 15 Eye nàgblɔ na Israel-viwo be, ‘Ne ame aɖe do ɖiŋu na eƒe Mawu la, eƒe nu vɔ̃ anɔ eƒe ta dzi. 16 Ne ame aɖe gblɔ busunya ɖe Yehowa ƒe ŋkɔ ŋu la, ku kee wòaku.+ Ha blibo la katã naƒu kpee. Woawu amedzrovi alo dumevi si agblɔ busunya ɖe Ŋkɔ la ŋu.
17 “‘Ne ame aɖe wu ame la,* ele be woawu eya hã.+ 18 Ame si wu aƒemelã aɖe la* naɖo eteƒe, agbe ɖe agbe teƒe.* 19 Ne ame aɖe wɔ nu vevi ehavi la, woawɔ nu vevi ma ke eya hã.+ 20 Ŋeŋe ɖe ŋeŋe teƒe, ŋku ɖe ŋku teƒe, aɖu ɖe aɖu teƒe, nu si wòwɔ amea la, nu ma kee woawɔ eya hã.+ 21 Ame si ƒo lã aɖe wòku la naɖo eteƒe,+ ke ame si ƒo ame wòku la, woawu eya hã.+
22 “‘Se ɖekae akplɔ amedzrovi kple dumevi siaa,+ elabena nyee nye Yehowa mia Mawu.’”
23 Eye Mose ƒo nu kple Israel-viwo, eye wokplɔ ɖiŋudola la yi asaɖa la godo heƒu kpee.+ Ale Israel-viwo wɔe abe ale si tututu Yehowa de se na Mose ene.