2 Mose
12 Eye Yehowa gblɔ na Mose kple Aron le Egipte-nyigba dzi be: 2 “Ɣleti sia anye miaƒe ɣletiwo ƒe gbãtɔ. Eyae anye ɣleti gbãtɔ na mi le ƒea me.+ 3 Gblɔ na Israel ƒe ha blibo la katã be: ‘Le ɣleti sia ƒe ŋkeke ewolia dzi la, ame sia ame nalé alẽ ɖeka+ ɖe fofoa ƒe aƒe nu, aƒe ɖeka alẽ ɖeka. 4 Ke ne aƒea me tɔwo mesɔ gbɔ ate ŋu aɖu alẽ ɖeka o la, ekema woawo kple woƒe* aƒelika si tsɔ wo gbɔ la namae le woƒe aƒe me le ameawo* ƒe xexlẽme nu. Ne miele esia ŋu bum la, mibu lã ale si nu ame sia ame ate ŋu aɖu la ŋu. 5 Lãtsui si sɔ blibo,+ eye wòxɔ ƒe ɖeka lae mialé. Mitiae le alẽtsuiwo alo gbɔ̃tsuiwo dome. 6 Mikpɔ edzi va se ɖe ɣleti sia ƒe ŋkeke wuienelia dzi,+ eye Israel-viwo ƒe ha blibo la nawui le anyinutsyɔɣi.*+ 7 Eye woatsɔ ʋu la ƒe ɖe asisi ɖe aƒe si me woaɖui le la ƒe ʋɔtruti eveawo kple ʋɔtruti etametɔ ŋu.+
8 “‘Woaɖu lã la le zã ma me.+ Woamèe le dzo nu, eye woatsɔ amɔwɔ maʋamaʋã bolo+ kple ama veve aɖui.+ 9 Migaɖu eƒe ɖeke mumu alo aɖae le tsi me o, ke boŋ mimèe dɔ nogo le dzo nu; ta kple afɔwo kpakple dɔmenuwo nanɔ eŋu hafi miamèe. 10 Migagblẽ eƒe ɖeke ɖi ŋu nake ɖe edzi o; ne eƒe ɖe susɔ ŋu ke ɖe edzi la, mitɔ dzoe.+ 11 Ale miaɖui nye esi: Mibla miaƒe aliwo dzi, mido afɔkpa, eye milé miaƒe atizɔtiwo ɖe asi; eye minɔ kplakplakpla dzi miaɖui. Yehowa ƒe Ŋutitotoŋkekenyui wònye. 12 Elabena mato Egipte-nyigba la dzi le zã sia me ahawu ŋgɔgbeviwo katã, amegbetɔwo kple lãwo siaa,+ le Egipte-nyigba dzi; eye madrɔ̃ ʋɔnu Egipte mawuwo katã.+ Nyee nye Yehowa. 13 Ʋu la nanye dzesi anɔ xɔ siwo me miele la ŋu; ale be ne mele nu gblẽm le Egipte-nyigba dzi, eye mekpɔ ʋua la, mato mia ŋu ayi, ale be fuwɔame la mava mia dzi ahagblẽ nu le mia ŋu o.+
14 “‘Ŋkeke sia anye ŋkuɖodzi na mi, eye wòanye ŋkekenyui mianɔ ɖuɖum na Yehowa le miaƒe dzidzimewo katã me. Wòanye ɖoɖo na mi, eye mianɔ eɖum ɖaa. 15 Ŋkeke adre sɔŋ miaɖu amɔwɔ maʋamaʋã bolo.+ Ɛ̃, miaɖe amɔwɔ ʋaʋã ɖa le miaƒe aƒewo me le ŋkeke gbãtɔ dzi, elabena ame sia ame si aɖu nu ʋaʋã tso ŋkeke gbãtɔ dzi va se ɖe ŋkeke adrelia dzi la, woatsrɔ̃ ame* ma ɖa le Israel. 16 Miwɔ takpekpe kɔkɔe le ŋkeke gbãtɔ dzi, eye migawɔ takpekpe kɔkɔe le ŋkeke adrelia hã dzi. Womawɔ dɔ aɖeke le ŋkeke siawo dzi o.+ Negbe nu si wòhiã be ame sia ame* naɖu la koe miaɖa.
17 “‘Miaɖu Amɔwɔ Maʋamaʋã Bolo Ŋkekenyui la,+ elabena ŋkeke sia tututu dzie makplɔ miaƒe amehawo* adzoe le Egipte-nyigba dzi. Minɔ ŋkeke sia ɖum le miaƒe dzidzimewo katã me wòanye ɖoɖo na mi ɖaa. 18 Miɖu amɔwɔ maʋamaʋã bolo le ɣleti gbãtɔ ƒe ŋkeke wuienelia ƒe fiẽ va se ɖe ɣletia ƒe ŋkeke blaeve vɔ ɖekɛlia ƒe fiẽ.+ 19 Ŋkeke adre sɔŋ womakpɔ amɔwɔ ʋaʋã le miaƒe aƒewo me o, elabena ame sia ame si aɖu nu ʋaʋã aɖe la, eɖanye amedzro alo Israel vidzidzi o,+ woatsrɔ̃ ame* ma ɖa le Israel ƒe ha la dome.+ 20 Migaɖu nu ʋaʋã aɖeke o. Amɔwɔ maʋamaʋã bolo miaɖu le mia nɔƒewo katã.’”
21 Enumake Mose yɔ Israel ƒe ametsitsiwo katã+ gblɔ na wo be: “Miyi ɖalé lãtsuiwo* le miaƒe ƒomeawo nu, ne miawu Ŋutitotovɔsalã la. 22 Eye mianyrɔ isop gbe babla ɖe ʋu la me le agba me, eye miatsɔe asisi ɖe ʋɔtruti etametɔ kple ʋɔtruti eveawo ŋu; mia dometɔ aɖeke megado go le eƒe me o va se ɖe esime ŋu ke. 23 Ekema ne Yehowa va to anyigba la dzi be yeawɔ fu Egiptetɔwo, eye wòkpɔ ʋu la le ʋɔtruti etametɔa kple ʋɔtruti eveawo ŋu la, ekema Yehowa ato miaƒe ʋɔtru la ŋuti, eye maɖe mɔ be gbegblẽ la nage ɖe miaƒe aƒewo me o.+
24 “Mia kple mia viwo milé ɖoɖo sia me ɖe asi ɖaa.+ 25 Eye ne mieva anyigba si Yehowa le mia na ge dzi, abe ale si wògblɔe ene la, milé wɔna sia me ɖe asi.+ 26 Eye ne mia viwo va bia mi be, ‘Nu kae wɔna sia fia na mi?’+ hã la, 27 ekema miaɖo eŋu be: ‘Ŋutitoto ƒe vɔsae wònye na Yehowa, ame si to Israel-viwo ƒe aƒewo ŋu le Egipte esime wòhe fuwɔame va Egiptetɔwo dzi, ke ekpɔ míaƒe aƒewo ya ta.’”
Eye dukɔ la bɔbɔ hede ta agu. 28 Ale Israel-viwo yi ɖawɔ abe ale si tututu Yehowa de se na Mose kple Aron ene.+ Nenema pɛpɛpɛ wowɔ.
29 Eye le zã titina la, Yehowa wu ŋgɔgbeviwo katã le Egipte-nyigba dzi,+ tso Farao si bɔbɔ nɔ eƒe fiazikpui dzi la ƒe ŋgɔgbevi dzi va ɖo aboyome si le gaxɔ* me ƒe ŋgɔgbevi dzi va se ɖe lãwo ƒe ŋgɔgbeviwo katã dzi.+ 30 Farao, eƒe subɔviwo katã kple Egiptetɔ bubuawo katã fɔ le zã me; eye avifafa de dzi bobobo le Egiptetɔwo dome, elabena aƒe aɖeke meli si me ame meku le o.+ 31 Enumake Farao yɔ Mose kple Aron+ le zãa me gblɔ be: “Mitso, mia kple Israel-vi bubuawo midzo le nye dukɔ la me. Miyi ɖasubɔ Yehowa abe ale si miegblɔe ene.+ 32 Mikplɔ miaƒe alẽhawo kple nyihawo hã yii abe ale si miegblɔe ene.+ Ke miyra nye hã.”
33 Eye Egiptetɔwo ƒo du ɖe dukɔ la nu be woadzo kaba+ le anyigba la dzi hegblɔ be: “Elabena mí katã míeku vɔ!”+ 34 Eya ta dukɔ la tsɔ woƒe amɔwɔ maʋamaʋã kpakple woƒe amɔwɔbluzewo* bla ɖe woƒe avɔwo me tsɔ ɖo abɔta. 35 Eye Israel-viwo wɔ abe ale si Mose gblɔe ene, eye wobia klosalonuwo, sikanuwo kple awuwo Egiptetɔwo.+ 36 Yehowa na Egiptetɔwo ve dukɔ la nu, eye wotsɔ nu siwo wobia la na wo; ale woha Egiptetɔwo.+
37 Eye Israel-viwo dze mɔ tso Ramses+ ɖo ta Sukot;+ woade ŋutsu afɔzɔla akpe alafa ade, womexlẽ ɖeviwo o.+ 38 Eye ame vovovowo ƒe ha*+ gã aɖe hã yi kpli wo, eye wokplɔ alẽwo kple nyiwo ɖe asi, wonye lãha gã aɖe ŋutɔ. 39 Le mɔa dzi la, wotsɔ amɔwɔ si wotsɔ tso Egipte la mè amɔwɔ maʋamaʋã bolo nogoewo. Amɔwɔ la meʋã o, elabena ɖe wonya wo le Egipte kpata, eye womekpɔ asinu ɖa nu ɖe asi o.+
40 Ɣeyiɣi si Israel-viwo, si nye dukɔ si nɔ Egipte, nɔ dzronyigba dzi+ la katã le ƒe alafa ene blaetɔ̃.+ 41 Eye le ƒe alafa ene blaetɔ̃awo ƒe nuwuwu, le gbe ma gbe tututu la, Yehowa ƒe amehawo* katã ʋu dzo le Egipte-nyigba dzi. 42 Enye zã si woaɖu ale si Yehowa kplɔ wo dzoe le Egipte-nyigba dzi la ƒe ŋkekenyui. Israel-viwo katã aɖo ŋku zã sia dzi atsɔ ade bubu Yehowa ŋu le woƒe dzidzimewo katã me.+
43 Eye Yehowa gblɔ na Mose kple Aron be, “Esiae nye Ŋutitotoŋkekenyui la ŋuti ɖoɖo: Amedzro aɖeke mekpɔ mɔ aɖui o.+ 44 Ke ne ame aɖe tsɔ ga ƒle kluvi aɖe la, ekema wòatso aʋa nɛ.+ Ema ko hafi wòkpɔ mɔ aɖui. 45 Amedzro si va tsi mia gbɔ kple apadɔwɔla mekpɔ mɔ aɖui o. 46 Miɖu alẽvi la le aƒe ɖeka me. Migatsɔ lã la ƒe ɖeke do go le aƒea me yi xexe o. Eye migagbã eƒe ƒu aɖeke o.+ 47 Israel ƒe ha blibo la katã naɖu ŋkekenyui la. 48 Ke ne amedzro si le gbɔwò di vevie be yeaɖu Ŋutitotoŋkekenyui na Yehowa la, ekema eƒe me ŋutsuwo katã natso aʋa. Ema ko hafi wòate ŋu aɖui, eye wòazu abe Israel vidzidzi ene. Ke aʋamatsomatsotɔ aɖeke mekpɔ mɔ aɖui o.+ 49 Se ɖeka nakplɔ dumevi kple amedzro si le mia dome la siaa.”+
50 Eye Israel-viwo katã wɔ abe ale si tututu Yehowa de se na Mose kple Aron ene. Nenema pɛpɛpɛ wowɔ. 51 Eye gbe ma gbe tututu la, Yehowa kplɔ Israel-viwo kple woƒe amehawo* dzoe le Egipte-nyigba la dzi.