“Nenema Pɛ” Wowɔ
“Lɔlɔ̃ na Mawu enye si bena, míalé eƒe seawo me ɖe asi.”—YOHANES I, 5:3.
1. Nya kae míate ŋu agblɔ le alesi Mawu ƒe lɔlɔ̃ de toe ŋu?
“MAWU ENYE LƆLƆ̃.” Amesiwo katã va nya Mawu eye wowɔa eƒe sewo dzi ƒe ŋudzedzekpɔkpɔ ɖe lɔlɔ̃ ma ƒe todede ŋu dzina ɖe edzi. “Esia me lɔlɔ̃ la le: Menye bena míawo míelɔ̃ Mawu o, ke boŋ bena eya lɔ̃ mí, eye wòdɔ Via ɖo ɖa, bena wòanye avuléle le mía nuvɔ̃wo ta.” Ne míetsɔ Yesu ƒe tafevɔsa xɔasi la dzixɔse wɔ dɔe la, ‘míakpɔtɔ anɔ Mawu ƒe lɔlɔ̃ la me.’ (Yohanes I, 4:8-10, 16) Esia ana míate ŋu axɔ gbɔgbɔmeyayra geɖe fifia kple le nuɖoanyi si gbɔna me, agbe mavɔ.—Yohanes 17:3; Yohanes I, 2:15-17.
2. Aleke Mawu ƒe sewo dzi wɔwɔ ɖe vi na esubɔlawoe?
2 Amesiwo wɔ Mawu ƒe sewo dzi eye yayra geɖe tso eme na wo la ƒe kpɔɖeŋuwo le Biblia ƒe nuŋlɔɖiwo me fũ. Woƒe ɖewoe nye ɖasefo siwo nɔ anyi do ŋgɔ na Kristotɔwo ŋɔli, amesiwo dometɔ aɖewo ŋu apostolo Paulo ŋlɔ nu le be: “Le xɔse me amesiawo katã woku, eye woƒe asi mesu ŋugbedodo la dzi o, ke wokpɔe, eye wodo ɖoaƒe nɛ le adzɔge, eye woʋu me be, yewonye amedzrowo kple mɔzɔlawo le anyigba la dzi.” (Hebritɔwo 11:13) Emegbe “amenuveve kple nyateƒe [si] va to Yesu Kristo dzi” la ɖe vi na Kristotɔ Mawu subɔla siwo tsɔ wo ɖokui na. (Yohanes 1:17) Le amegbetɔ ƒe ŋutinya si ade ƒe 6,000 katã me la, Yehowa ɖo eteƒe na ɖasefo nuteƒewɔla siwo wɔ eƒe se, siwo le nyateƒe me la, ‘womesesẽ o’ dzi la.—Yohanes I, 5:2, 3.
Le Noa ƒe Ŋkekea Me
3. Mɔ kawo nue Noa wɔ “nenema pɛ” le?
3 Biblia ƒe nuŋlɔɖi gblɔ be: “Le xɔse me Noa, esime wòxɔ ɖeɖefia tso Mawu gbɔ le nusiwo womekpɔ haɖe o ŋuti la, etsɔ mawuvɔvɔ̃ wɔ aɖakaʋu hena eƒemetɔwo ɖeɖe, nusi me wòto bu fɔ xexemetɔwo, eye wòzu dzɔdzɔenyenye, si tso xɔse me la, ƒe domenyila.” Esi Noa nye “dzɔdzɔenyenye ƒe gbeƒãɖela” ta la, eɖo to Mawu bliboe eye wòxlɔ̃ nu xexeme wɔnuvlo si nɔ anyi do ŋgɔ na Tsiɖɔɖɔa tso Mawu ƒe ʋɔnudɔdrɔ̃ si gbɔna ŋu. (Hebritɔwo 11:7; Petro II, 2:5) Esi wònɔ aɖakaʋua kpam la, ekpakpa ƒe ɖoɖo si Mawu nɛ dzie wòzɔ ɖo pɛpɛpɛ. Emegbe ekplɔ lã siwo woyɔ la de eme eye wòtsɔ nuɖuɖu hã de eme. “Noa wɔe; alesi Mawu de se nɛ la, nenema pɛ wòwɔ.”—Mose I, 6:22.
4, 5. (a) Aleke ŋusẽ vɔ̃ɖi aɖe kpɔ ŋusẽ ɖe ameƒomea dzii vaseɖe egbea? (b) Nukata wòle be míawɔ “nenema pɛ” le Mawu ƒe mɔfiamewo dzi zɔzɔ me?
4 Ehiã na Noa kple eƒe ƒomea be woanɔ te ɖe mawudɔla maɖotoawo ƒe ŋusẽkpɔɖeamedzi vɔ̃ɖiwo nu. Mawu vi siawo do amegbetɔŋutilã eye woɖe amegbetɔviwo ƒe nyɔnuwo hedzi dzidehlɔ̃mevi triakɔ siwo sẽ ŋuta le ameƒomea ŋu. “Xexeame gblẽ le Mawu ƒe ŋku me, eye nu vlo wɔwɔ xɔ anyigba la dzi.” Yehowa he Tɔɖɔɖɔa vɛ be wòaɖe dzidzime vɔ̃ɖi ma ɖa. (Mose I, 6:4, 11-17; 7:1) Tso Noa ŋɔli la, womegaɖe mɔ na mawudɔla zugbɔgbɔvɔ̃wo be woado amegbetɔŋutilã o. Gake ‘xexeme blibo la kpɔtɔ le vɔ̃ɖitɔ,’ Satana Abosam, ‘ƒe ŋusẽ te.’ (Yohanes I, 5:19; Nyaɖeɖefia 12:9) Le nyagblɔɖi me Yesu tsɔ dzidzime dzeaglã ma si nɔ anyi le Noa ŋɔli la sɔ kple ameƒomea ƒe dzidzime si gbee tso esime eƒe ‘anyinɔnɔ’ ƒe dzesia dze egɔme le ƒe 1914 me.—Mateo 24:3, 34, 37-39; Luka 17:26, 27.
5 Satana le agbagba dzem egbea be yeagblẽ ameƒomea kple míaƒe anyigba la abe alesi wòwɔe le Noa ŋɔli ene. (Nyaɖeɖefia 11:15-18) Eyata ehiã be míawɔ se sia si tso gbɔgbɔ me la dzi kaba be: “Mido Mawu ƒe aʋawɔnu blibo la katã, bene miate ŋu anɔ te ɖe Abosam ƒe aɖaŋu vɔ̃wo nu.” (Efesotɔwo 6:11) Mawu ƒe Nya sɔsrɔ̃ kple eŋudɔwɔwɔ le míaƒe agbenɔnɔ me doa ŋusẽ mí le esia me. Azɔ hã Yehowa ƒe habɔbɔ si léa be na ame la le mía si, eye eƒe “dɔla nuteƒewɔla kple aɖaŋudzela” amesiaminawo, kple eƒe hamemegã lɔ̃ameawo hã li be woakplɔ mí dzigbɔɖitɔe le mɔ si wòle be míato dzi. Xexeame katã ƒe gbeƒãɖeɖedɔ aɖe li míawɔ. (Mateo 24:14, 45-47) Mina míawo hã míawɔ “nenema pɛ” ɣesiaɣi abe alesi Noa zɔ ɖe Mawu ƒe mɔfiamewo dzi pɛpɛpɛ ene.
Mose—Ame Fafatɔ Kekeake
6, 7. (a) Tiatia si ŋu teƒeɖoɖo le kae Mose wɔ? (b) Dzideƒo ƒe kpɔɖeŋu kae Mose ɖo ɖi na mí?
6 Bu xɔsetɔ bubu—Mose ŋu kpɔ. Ate ŋu aɖu agbe blibaa le Egiptetɔwo ƒe agbeɖunuawo me hafi. Gake etiae be “yeakpe fu akpe ɖe Mawu ƒe dukɔ la ŋuti wu esi yeakpɔ nuvɔ̃ ƒe vivisese le ɣeyiɣi vi aɖe ko me.” Esi wònye Yehowa ƒe subɔla si wode dɔ asi na ta la, “ekpɔ teƒeɖoɖofetu la ɖa . . . [eye wòdo dzi, NW], abe ɖe wòle amesi womekpɔna o la kpɔm ene.”—Hebritɔwo 11:23-28.
7 Míexlẽ le Mose IV, 12:3 be: “Mose fa wu amesiwo katã le anyigba dzi.” Ke Egipte ƒe Farao ya wɔ nu abe amesi dana wu amewo katã ene. Esi Yehowa de se na Mose kple Aron be woaɖe gbeƒã yeƒe ʋɔnudɔdrɔ̃ Farao la, aleke wowɔ nui? Wogblɔ na mí be: “Alesi Yehowa de se na Mose kple Aron la, nenema wowɔ.” (Mose II, 7:4-7) Dzideƒo ƒe kpɔɖeŋu ka gbegbee nye si wònye na mí amesiwo ɖea gbeƒã Mawu ƒe ʋɔnudɔdrɔ̃wo egbea!
8. Aleke wobia tso Israel-viwo si be woawɔ “nenema pɛ,” eye aleke aseyetsotso si do tso eme la ava le etsɔme kpuie?
8 Ðe Israel-viwo nɔ megbe na Mose nuteƒewɔwɔtɔea? Esi Yehowa kplɔ fuwɔame ewoawo ƒe asieke ƒu Egiptetɔwo megbe la, efia mɔ Israel tsitotsito le Ŋutitotoŋkekenyuia ɖuɖu ŋu. “Tete dukɔ la de ta agu, eye wodo gbe ɖa. Eye Israel-viwo wɔ, abe alesi Yehowa de se na Mose kple Aron ene; nenema wowɔ.” (Mose II, 12:27, 28) Le afɔkuŋkeke ma ƒe zãtiƒe, Nisan 14, ƒe 1513 D.M.Ŋ. dzi la, Mawu ƒe dɔla va wu Egiptetɔwo ƒe ŋgɔgbeviwo katã, gake etso Israel-viwo ƒe aƒewo ɖi. Nukata wogblẽ Israel-viwo ƒe ŋgɔgbeviwo ɖi? Nusitae nye be wokpɔ takpɔkpɔ le Ŋutitotolẽvia ƒe ʋu si wohlẽ ɖe woƒe ʋɔtrutiwo ŋu me. Wowɔ pɛpɛpɛ abe alesi Yehowa de se na Mose kple Aron ene. Ẽ, “nenema wowɔ.” (Mose II, 12:50, 51) Yehowa gawɔ nukunu bubu le Ƒudzĩa nu tsɔ ɖe eƒe dukɔ ɖoto la esi wòtsrɔ̃ Farao kple eƒe aʋakɔ gã la. Israel-viwo kpɔ dzidzɔ ale gbegbe! Nenema ke egbea ame geɖe siwo wɔa Yehowa ƒe sededewo dzi akpɔ dzidzɔ be yewoakpɔ eteƒe woakɔ eŋu le Harmagedon me.—Mose II, 15:1, 2; Nyaɖeɖefia 15:3, 4.
9. Egbegbe mɔnukpɔkpɔ kawo ƒe kpɔɖeŋue alesi Israel-viwo wɔ “nenema pɛ” le agbadɔa gome la nye?
9 Esi Yehowa de se na Israel be woadzɔ nu atsɔ atu agbadɔe le gbeadzi la, dukɔ la kpe asi ɖe eŋu bliboe tso dzime faa. Azɔ Mose kple eƒe dɔwɔhati siwo lɔ̃ faa la zɔ ɖe xɔtuɖoɖo si Yehowa na wo ƒe nyakui ɖesiaɖe dzi. “Ale wowu nɔƒe, si enye Mawu ƒe agbadɔ la, ŋu dɔwo katã nu, eye Israel-viwo wɔe pɛpɛpɛ, abe alesi Yehowa de se na Mose be, woawɔe ene.” Nenema ke le nunɔlaɖogbe la, “Mose wɔe pɛpɛpɛ. Alesi Yehowa de se nɛ la, nenema wòwɔ.” (Mose II, 39:32; 40:16) Mɔnukpɔkpɔ su mía si egbea be míatsɔ dzi blibo akpe asi ɖe gbeƒãɖeɖedɔa kple Fiaɖuƒe takeke ŋuti ɖoɖowo ŋu. Eyata enye míaƒe mɔnukpɔkpɔ be míatsɔ ɖekawɔwɔ awɔ nui “nenema pɛ.”
Yosua—Elé Dzi Ðe Ƒo Hesẽ Ŋu
10, 11. (a) Nukae dzra Yosua ɖo be wòkpɔ dzidzedze? (b) Aleke woate ŋu ado ŋusẽ mí be míanɔ te ɖe egbegbe dodokpɔwo nui?
10 Esi Mose ɖo Yosua be wòakplɔ Israel ayi anyigba si ŋugbe wodo dzi la, anye be Mose ƒe agbalẽ atɔ̃awo, psalmo ɖeka alo eve, kple Hiob ƒe agbalẽa me koe Yehowa ƒe Nya si tso gbɔgbɔ me woŋlɔ la nɔ. Mose de se na Yosua be wòaƒo dukɔ la nu ƒu ne woɖo Ŋugbedodonyigba la dzi eye “[wòaxlẽ] se sia ɖe Israel blibo la ƒe to me.” (Mose V, 31:10-12) Hekpe ɖe eŋu la, Yehowa ŋutɔ de se na Yosua be: “Megaɖe nu le segbalẽ sia ŋu o, eye nabu eŋu zã kple keli, ne nalé nusiwo katã woŋlɔ ɖe eme la me ɖe asi, eye nawɔ wo dzi; elabena eya ko hafi dzɔgbenyui anɔ mɔ dzi na wò, eye nusianu adze dzi na wò.”—Yosua 1:8.
11 Yehowa ƒe “segbalẽ” la xexlẽ gbesiagbe dzra Yosua ɖo wònɔ te ɖe dodokpɔ siwo nɔ eŋgɔ nu abe alesi Yehowa ƒe Nya, Biblia, xexlẽ gbesiagbe doa ŋusẽ Eƒe egbegbe Ðasefowo wonɔa te ɖe ‘ŋkeke mamle’ sesẽ siawo ƒe dodokpɔwo nui ene. (Timoteo II, 3:1) Esi xexeme sẽŋuta sia ƒo xlã mí ta la, mina míawo hã míaxɔ nuxlɔ̃ame si Mawu na Yosua ɖe dzime be: “Lé dzi ɖe ƒo, eye nasẽ ŋu, ŋɔ megadzi wò o, eye dzidzi megaƒo wò [o]. Elabena Yehowa, wò Mawu la, li kpli wò le afisiafi, si nayi ɖo.” (Yosua 1:9) Esi woɖu Kanaan dzi megbe la, woɖo eteƒe na Israel-toawo geɖe esi wonɔ aƒe tsom ɖe woƒe domenyinua dzi. “Alesi Yehowa de se na Mose la, nenema Israel-viwo wɔ.” (Yosua 14:5) Teƒeɖoɖo ma tɔgbe le mí amesiwo katã xlẽa Mawu ƒe Nya la hewɔa eŋudɔ le míaƒe agbenɔnɔ me eye míetsɔa toɖoɖo wɔa “nenema pɛ” la ŋgɔ egbea.
Fiawo—Esiwo Wɔ Nuteƒe Kple Esiwo Meɖo To O
12. (a) Se kae wode na fiawo le Israel? (b) Nukae fiawo ƒe sea dzi mawɔmawɔ he vɛ?
12 Ke fia siwo nɔ Israel ya ɖe? Yehowa bia tso fia si be: “Ne eva fiazi dzi la, wòana Lewitɔwo, siwo nye nunɔlawo la, nagbugbɔ se sia aŋlɔ nɛ ɖe agbalẽ me. Eye wòanɔ esi wòaxlẽ le eƒe agbe me ŋkekewo katã me, ne wòanya alesi wòavɔ̃ Yehowa, eƒe Mawu la, eye wòalé se kple ɖoɖo siawo katã me nyawo me ɖe asi, eye wòawɔ wo dzi.” (Mose V, 17:18, 19) Ðe Israel-fiawo wɔ sedede ma dzia? Akpa gãtɔ da le edzi nublanuitɔe ale be fiƒode si wogblɔ ɖi le Mose V, 28:15-68 va wo dzi. Mlɔeba Israel va ka hlẽ “tso anyigba ƒe go ɖeka vaseɖe go keme.”
13. Aleke Yehowa ƒe Nya la lɔlɔ̃ aɖe vi na mí abe alesi wòɖe vi na Dawid ene?
13 Gake Dawid—Israel-fia nuteƒewɔla gbãtɔ si nye amegbetɔ—ɖe ɖokuitsɔtsɔna Yehowa si tɔgbe mebɔ o fia. Eva zu ‘dzatavi le Yuda-toa me,’ eye wònye kpɔɖeŋu na Kristo Yesu, ‘dzatavi si tso Yuda-toa me, Dawid ƒe ke,’ si le dzi ɖum. (Mose I, 49:8, 9; Nyaɖeɖefia 5:5) Afikae Dawid kpɔ ŋusẽ tsoe? Ekpɔ ŋudzedze ɖe Yehowa ƒe Nya si woŋlɔ ŋu vevie eye wònɔ agbe ɖe enu. Míexlẽ le Psalmo 19 si nye “Dawid ƒe ha” me be: “Yehowa ƒe se de blibo.” Esi Dawid ƒo nu tso Yehowa ƒe ŋkuɖodzinya, sededewo, ɖoɖo, kple ʋɔnudɔdrɔ̃wo ŋu vɔ la, eyi edzi gblɔ be: “Wovena wu sika kple sika nyuitɔ geɖe, eye wovivina wu anyitsi kple anyiɖaɖa. Woawo wotsɔ fia mɔnu wò dɔla hã; fetu gã le wo me léle ɖe asi me.” (Psalmo 19:8-12) Ne Yehowa ƒe Nya la xexlẽ gbesiagbe kple ŋugbledede le eŋu ɖe vi ƒe 3,000 siwo va yi la, ke aleke gbegbe wòahaɖe vi wu egbea enye si!—Psalmo 1:1-3; 13:6; 119:72, 97, 111.
14. Mɔ ka nue afɔ si Salomo ɖe la ɖee fia le be nu geɖe hiã wu sidzedze ko?
14 Gake sidzedze ƒe amesisusu ɖeɖe mesɔ gbɔ o. Ele vevie hã be Mawu subɔlawo natsɔ sidzedze ma awɔ dɔe, woawɔ ɖe edzi le Mawu ƒe lɔlɔ̃nu nu—ẽ, woawɔ “nenema pɛ.” Míate ŋu atsɔ Dawid vi Salomo, amesi Yehowa tia “ne wòabɔbɔ nɔ Yehowa ƒe Israel-fiaɖuƒe la ƒe fiazikpui dzi” awɔ esia ƒe kpɔɖeŋui. Wode dɔ asi na Salomo be wòazã xɔtuɖoɖo siwo Dawid xɔ ‘tso gbɔgbɔ me’ la atu gbedoxɔ lae. (Kronika I, 28:5, 11-13) Aleke Salomo awɔ hafi awɔ dɔ gã sia? Yehowa ɖo eƒe gbedodoɖa aɖe ŋu eye wòtsɔ nunya kple sidzedze nɛ. To esiawo kple zɔzɔ ɖe ɖoɖo si Mawu nɛ dzi la, Salomo te ŋu tu xɔ dzeani ma eye Yehowa ƒe ŋutikɔkɔe va yɔe taŋ. (Kronika II, 7:2, 3) Gake Salomo va do kpo nu emegbe. Le nuka me? Yehowa ƒe sea gblɔ le fia si le Israel ŋu be: “Fia nagaɖe srɔ̃ geɖe o, ne eƒe dzi nagatre mɔ o.” (Mose V, 17:17) Gake Salomo ƒe “fiasrɔ̃wo, le alafa adre, eye eƒe ahiãwo le alafa etɔ̃; eye . . . srɔ̃awo trɔ eƒe dzi [vivivi, NW] ɖe mawu bubuwo ŋu.” Le Salomo ƒe agbenɔƒe mamleawo me la, etrɔ megawɔa “nenema pɛ” o.—Fiawo I, 11:3, 4; Nexemya 13:26.
15. Aleke Yosiya wɔ “nenema pɛ”?
15 Fia toɖola ʋee aɖewo nɔ Yuda, woƒe mlɔetɔe nye Yosiya. Le ƒe 648 D.M.Ŋ. me la, edze egɔme ɖe trɔ̃subɔsubɔ ɖa le dukɔ la dome eye wògadzra Yehowa ƒe gbedoxɔa ɖo. Afimae nunɔlagã la fɔ “Yehowa ƒe se, si wòna to Mose dzi la ƒe agbalẽ la” le. Nukae Yosiya wɔ le eŋu? “Fia la, Yuda-ŋutsuwo katã kple Yerusalemtɔwo, nunɔlawo kple Lewi-viwo kpakple dukɔ blibo la, tsitsiwo kple ɖeviwo siaa, woyi Yehowa ƒe aƒe la me, eye wòxlẽ nubabla ƒe agbalẽ, si wofɔ le Yehowa-ƒe me la me nyawo katã ɖe woƒe towo me. Eye fia la tsi tre ɖe enɔƒe, eye wòbla nu kple Yehowa be, yeadze Yehowa yome, eye yealé eƒe sewo, ɖaseɖiɖiwo kple ɖoɖowo me ɖe asi tso dzi blibo kple luʋɔ blibo me, eye yeawɔ nubabla ƒe nyawo, esiwo woŋlɔ ɖe agbalẽ sia me la dzi.” (Kronika II, 34:14, 30, 31) Ẽ, Yosiya wɔ “nenema pɛ.” Eƒe nuteƒewɔwɔ wɔe be wohe Yehowa ƒe ʋɔnudɔdrɔ̃ Yuda maxɔse la ɖe megbe vaseɖe via sẽtoawo ƒe ŋkekea me.
Agbenɔnɔ Ðe Mawu ƒe Nya la Nu
16, 17. (a) Nukawo mee wòle be míadze Yesu ƒe afɔɖoƒewo yome le? (b) Mawu subɔla wɔnuteƒe bubu kawoe ɖo kpɔɖeŋu ɖi na mí?
16 Le amesiwo katã nɔ anyi kpɔ dome la, Aƒetɔ Yesu Kristoe ɖo kpɔɖeŋu nyuitɔ kekeake ɖi le ŋugbledede le Mawu ƒe Nya la ŋu kple agbenɔnɔ ɖe enu me. Mawu ƒe Nya nɔ nɛ abe nuɖuɖu ene. (Yohanes 4:34) Egblɔ na eƒe nyaselawo be: “Vi la mate ŋu awɔ naneke le eya ŋutɔ ɖokui si o, ne menye Fofoae le ewɔm wòkpɔ o; elabena nusiwo ke wɔm eyama le la, esiawo Vi la hã wɔna nenema ke.” (Yohanes 5:19, 30; 7:28; 8:28, 42) Yesu wɔ “nenema pɛ” hegblɔ be: “Meɖi tso dziƒo va, menye bena mawɔ nye ŋutɔ nye lɔlɔ̃nu o, negbe amesi dɔm ɖa la ƒe lɔlɔ̃nu ko.” (Yohanes 6:38) Wobia tso mí amesiwo nye Yehowa ƒe Ðasefo ɖeadzɔgbewo si be míawɔ “nenema pɛ” le Yesu ƒe afɔɖoƒewo yomedzedze me.—Luka 9:23; 14:27; Petro I, 2:21.
17 Mawu ƒe lɔlɔ̃nu wɔwɔ nye nu vevitɔ nɔ Yesu ƒe susu me ɣesiaɣi. Enya Mawu ƒe Nya la nyuie eye esia na wòsu te te ŋu ɖo nyawo ŋu tso Ŋɔŋlɔawo me. (Mateo 4:1-11; 12:24-31) Ne míeléa to ɖe Mawu ƒe Nya ŋu ɣesiaɣi la, míawo hã míate ŋu ‘asu te blibo anɔ dzadzraɖoɖi hena dɔ nyui sia dɔ nyui wɔwɔ.’ (Timoteo II, 3:16, 17) Mina míasrɔ̃ Yehowa subɔla wɔnuteƒe siwo nɔ anyi le blema kple esiwo va emegbe, eye ƒo wo katã ta la, mía Aƒetɔ Yesu Kristo ƒe kpɔɖeŋu, amesi gblɔ be: “Bena xexeame nanyae bena, melɔ̃a Fofo la, eye alesi Fofo la de se nam la, nenema ke mewɔna.” (Yohanes 14:31) Mina míawo hã míayi edzi awɔ “nenema pɛ” atsɔ aɖe míaƒe lɔlɔ̃ na Mawu afia.—Luka 12:29-31.
18. Nukae le be wòaʋã mí bene ‘míazu nyadziwɔlawo,’ eye nuka mee míagadzro?
18 Ne míede ŋugble tso Mawu subɔla siwo nɔ anyi le Biblia ƒe ɣeyiɣiwo me ƒe toɖoɖo ŋuti la, ɖe medea dzi ƒo na mí be míasubɔ nuteƒewɔwɔtɔe le Satana ƒe nuɖoanyi vɔ̃ɖi sia ƒe ŋkeke mamleawo me oa? (Romatɔwo 15:4-6) Le nyateƒe me la, ele be wòaʋã mí be ‘míazu nyadziwɔlawo’ le nya la ƒe gɔmesese si de blibo la nu, abe alesi nyati si kplɔe ɖo adzro emee ene.—Yakobo 1:22.
Èɖo Ŋku Wo Dzia?
◻ Nukae wòle be “lɔlɔ̃ na Mawu” nafia na mí?
◻ Nukae míesrɔ̃ tso Noa, Mose, kple Yosua ƒe kpɔɖeŋuwo me?
◻ Afikae fia siwo nɔ Israel wɔ Mawu ƒe ‘nya’ la dzi se ɖo?
◻ Aleke Yesu nye míaƒe Kpɔɖeŋuɖola le “nenema pɛ” wɔwɔ me?
[Nɔnɔmetata siwo le axa 15]
Noa, Mose, kple Yosua wɔ “nenema pɛ”