Dɔwɔwɔwo
22 “Ŋutsuwo, nɔviwo kple fofowo, azɔ miɖo to ne maɖe ɖokuinye nu miase.”+ 2 Esi wose be ele nu ƒom na wo le Hebrigbe me la, wogazi ɖoɖoe wu tsã, eye wògblɔ be: 3 “Yudatɔe menye,+ wodzim le Tarso le Kilikia,+ gake du sia mee wofia num le, le Gamaliel+ ƒe afɔnu, eye wofia mía tɔgbuiwo ƒe Se+ lam tsitotsito, eye mesubɔ Mawu kple veviedodo abe ale si mi katã miele ewɔm egbe sia ene.+ 4 Meti ame siwo le Mɔ sia dzi la yome hedi woƒe ku gɔ̃ hã, eye meblaa ŋutsuwo kple nyɔnuwo siaa hedea wo gaxɔ me,+ 5 abe ale si nunɔlagã la kple amegãwo katã ate ŋu aɖi ɖase le eŋu ene. Mexɔ agbalẽwo hã tso wo gbɔ na mia nɔvi siwo le Damasko, eye menɔ mɔ dzi yina be mabla ame siwo le afi ma la hã akplɔ ava Yerusalem, be woahe to na wo.
6 “Ke esi mele mɔa dzi hegogo Damasko le ŋdɔ ga wuieve lɔƒo la, kasia kekeli aɖe si nu sẽ ŋutɔ la tso dziƒo klẽ ƒo xlãm,+ 7 medze anyi eye mese gbe aɖe wògblɔ nam be: ‘Saul, Saul, nu ka ŋuti nèle yonyeme tim?’ 8 Meɖo eŋu be: ‘Wò ame kae, Aƒetɔ?’ Eye wògblɔ nam be, ‘Nyee nye Yesu Nazaretetɔ la, ame si yome tim nèle la.’ 9 Ame siwo le ŋunye la kpɔ kekeli la, gake womese ame si nɔ nu ƒom nam la ƒe gbe o. 10 Ale megblɔ be: ‘Nu kae wòle be mawɔ, Aƒetɔ?’ Eye Aƒetɔ la gblɔ nam be: ‘Tso, nàyi Damasko, eye woagblɔ nu sia nu si meɖo be nàwɔ la na wò le afi ma.’+ 11 Ke esi nyemete ŋu nɔ naneke kpɔm o le kekeli la ƒe ŋutikɔkɔe ta la, ame siwo le ŋunye la lé nye alɔnu hafi mete ŋu va ɖo Damasko.
12 “Ke ŋutsu aɖe si ŋkɔe nye Anania, ame si vɔ̃a Mawu le Se la nu, si ŋu Yudatɔ siwo katã le afi ma la ƒo nu nyui le la, 13 va gbɔnye. Etɔ ɖe gbɔnye hegblɔ nam be: ‘Nɔvi Saul, gakpɔ nu!’ Enumake mefɔ mo dzi eye mekpɔe.+ 14 Egblɔ be: ‘Mía tɔgbuiwo ƒe Mawu la tia wò be nàva nya yeƒe lɔlɔ̃nu, nàkpɔ dzɔdzɔetɔ la,+ eye nàse eƒe numegbe, 15 elabena ele be nànye eƒe ɖasefo le amewo katã ŋkume le nu siwo nèkpɔ hese la ŋu.+ 16 Azɔ nu ka tae nèle hehem ɖe megbe? Tso, na woanyrɔ wò, eye nàyɔ eƒe ŋkɔ+ la ne woaklɔ wò nu vɔ̃wo ɖa.’+
17 “Ke esi metrɔ va Yerusalem,+ eye mele gbe dom ɖa le gbedoxɔa me la, mekpɔ ŋutega, 18 eye mekpɔe wòle gbɔgblɔm nam be: ‘Netsɔ, do go le Yerusalem kaba, elabena womalɔ̃ ɖe ɖase si ɖim nèle le ŋunye la dzi o.’+ 19 Eye megblɔ be: ‘Aƒetɔ, woawo ŋutɔwo nyae nyuie be, medea ƒuƒoƒe sia ƒuƒoƒe heléa ame siwo xɔ dziwò se la dea gaxɔ me, eye meƒoa wo;+ 20 eye esi wonɔ wò ɖasefo Stefano ƒe ʋu kɔm ɖi la, nye ŋutɔ hã metɔ ɖe afi ma heda asi ɖe edzi, eye menɔ ame siwo wui la ƒe awudziwuiwo dzi kpɔm.’+ 21 Ke hã, egblɔ nam be, ‘Heyi, elabena madɔ wò ɖe dukɔ siwo le didiƒe ʋĩi la gbɔ.’ ”+
22 Ke woɖo toe va se ɖe nya sia dzi, eye wodo ɣli gblɔ be: “Mibu mo na ame sia, elabena medze anɔ agbe o!” 23 Eye esi wole ɣli dom le woƒe awudziwuiwo dam hele ke hlẽm ɖe yame+ ta la, 24 aʋafiagã la ɖe gbe be woakplɔ Paulo ayi asrafowo nɔƒea, eye wògblɔ be woaƒoe kple atam ne wòato nyateƒe, ne yeanya nu si tututu tae amehaa le ɣli dom ɖe Paulo ta nenema ɖo. 25 Ke esi wobla Paulo be woaƒo la, ebia asrafomegã si tɔ ɖe afi ma la be: “Ðe se ɖe mɔ na mi be miaƒo ame si nye Romatɔ kple atam esime womebu fɔe oa?”*+ 26 Ke esi asrafomegã la se nya sia la, eyi aʋafiagã la gbɔ, eye wògblɔ nɛ be: “Nu kae nèɖo ɖe tame be yeawɔ? Romatɔe ŋutsu sia nye.” 27 Eya ta aʋafiagã la te ɖe eŋu biae be: “Gblɔe nam, Romatɔe nènyea?” Eɖo eŋu be: “Ɛ̃.” 28 Aʋafiagã la gblɔ nɛ be: “Ga gbogbo aɖee metsɔ ƒle dukɔmevinyenye sia.” Paulo gblɔ be: “Gake nye ya ɖe wodzim ɖe eme.”+
29 Eya ta ame siwo di be yewoawɔ fui ne yewoase eƒe numenya la dzo le egbɔ enumake; eye vɔvɔ̃ ɖo aʋafiagã la ŋutɔ, esi wòva nya be Romatɔe wònye hafi yede gae.+
30 Eya ta esi ŋu ke, eye wòdi be yeanya nu si tututu ta Yudatɔwo le enu tsom ɖo la, ena woɖe gae, eye wòɖe gbe be nunɔlawo ƒe tatɔwo kple Sanhedrin blibo la nakpe ta. Eye wòkplɔ Paulo va tɔ ɖe wo ŋkume.+