Dɔwɔwɔwo

16 Ale wòva ɖo Derbe kple Listra hã.+ Eye nusrɔ̃la aɖe le afi ma, si ŋkɔe nye Timoteo,+ dadaa nye Yudatɔ xɔsetɔ, ke fofoa nye Helatɔ, 2 eye nɔvi siwo le Listra kple Ikonio la ƒo nu nyui le eŋu. 3 Paulo gblɔ be yedi be wòayi kpli ye, eye wòxɔe hetso aʋa nɛ le Yudatɔ siwo le teƒe mawo ta,+ elabena wo katã wonya be Helatɔe fofoa nye. 4 Ke esi wole duawo me tom la, wogblɔ ɖoɖo siwo dzi apostoloawo kple hamemetsitsi siwo le Yerusalem ɖo kpee la na wo, be woalé wo me ɖe asi.+ 5 Ale, le nyateƒe me la, hameawo ƒe xɔse nɔ ŋu sẽm ɖe edzi, eye woƒe xexlẽme nɔ dzidzim ɖe edzi gbe sia gbe.

6 Woto Frigia kple Galatia nutowo+ hã me, elabena gbɔgbɔ kɔkɔe la gbe na wo be woagagblɔ nya la le Asia nutoa me o. 7 Eye esi wova ɖo Misia la, wodze agbagba be yewoayi Bitinia,+ ke Yesu ƒe gbɔgbɔ la meɖe mɔ na wo o. 8 Eya ta woto Misia ŋu* yi Troa. 9 Eye Paulo kpɔ ŋutega le zã me—Makedonia ŋutsu aɖe le tsitre le kuku ɖem nɛ vevie be: “Tso ƒu va Makedonia, ne nàkpe ɖe mía ŋu.” 10 Ke esi wòkpɔ ŋutega la teti ko la, míedze mɔ heɖo ta Makedonia, elabena míedze sii be Mawue yɔ mí be míagblɔ nya nyui la na wo.

11 Ale míeɖo tɔdziʋu tso Troa, eye míezɔ mɔ tẽe va Samotrake, ke esi ŋu ke la, míeva Neapolis; 12 eye tso afi ma míeyi Filipi,+ si nye du aɖe si le Roma te, eye wònye Makedonia nutoa ƒe du vevitɔ. Míenɔ du sia me ŋkeke aɖewo. 13 Eye le sabat dzi la, míeto agboa nu do go yi tɔsisi aɖe to, afi si míesusu be gbedoɖaƒe aɖe le, eye míenɔ anyi hete nuƒoƒo na nyɔnu siwo va ƒo ƒu la. 14 Eye nyɔnu aɖe si ŋkɔe nye Lidia, si nye aɖabɛdzrala tso Tiatira+ dua me, eye wònye mawusubɔla la, nɔ to ɖom, eye Yehowa* ʋu eƒe dzi bliboe be wòalé to ɖe nya siwo gblɔm Paulo le la ŋu. 15 Ke esi eya kple eƒemetɔwo xɔ nyɔnyrɔ+ la, eɖe kuku na mí vevie be: “Ne miebum be menye nuteƒewɔla na Yehowa* la, ekema miva dze aƒenye me.” Eye wòƒoe ɖe mía nu míeyi.

16 Esi míeyina gbedoɖaƒea la, dɔlanyɔnuvi aɖe si me gbɔgbɔ vɔ̃ aɖe le si naa wòtea ŋu kaa afa+ la va kpe mí. Etoa eƒe afakaka me nana eƒe aƒetɔwo kpɔa viɖe geɖe. 17 Nyɔnuvi sia dze mía kple Paulo yome, eye wòle ɣli dom le gbɔgblɔm be: “Ame siawo nye Mawu Dziƒoʋĩtɔ+ la ƒe kluviwo, ame siwo le xɔxɔmɔ la gblɔm na mi.” 18 Enɔ esia wɔwɔ dzi ŋkeke geɖe. Mlɔeba eva glo Paulo, eye wòtrɔ hegblɔ na gbɔgbɔ la be: “Mele gbe ɖem na wò le Yesu Kristo ƒe ŋkɔ me be nàdo go le eme.” Eye wòdo go le gaƒoƒo ma tututu dzi.+

19 Ke esi eƒe aƒetɔwo kpɔ be yewobu yewoƒe gakpɔmɔnu si ŋu yewoɖoa ŋu ɖo la,+ wolé Paulo kple Sila, eye wohe wo yi ablɔ me ɖade wo asi na dziɖulawo.+ 20 Esi wokplɔ wo yi dumegãwo gbɔ la, wogblɔ be: “Ame siawo le zitɔtɔ dem míaƒe dua me.+ Yudatɔwoe wonye, 21 eye wole nu ƒom tso kɔnyinyi siwo se meɖe mɔ na mí be míaxɔ alo awɔ wo dzi o la ŋu, elabena Romatɔwoe míenye.” 22 Ale ameha la tso ɖe wo ŋu, eye dumegãwo vuvu woƒe awuwo le wo ŋu eye woɖe gbe be woaƒo wo kple ati.+ 23 Esi woƒo wo vevie vɔ la, wode wo gaxɔ me, eye wode se na gaxɔdzikpɔla la be wòadzɔ wo ŋu vevie.+ 24 Esi wode se nɛ alea ta la, etsɔ wo de gaxɔ emetɔ la me, eye wòbɔ pã woƒe afɔwo.

25 Ke le zã titina lɔƒo la, Paulo kple Sila le gbe dom ɖa hele ha dzim le Mawu kafum;+ eye gamenɔlawo nɔ wo ŋkɔ sem. 26 Kasia anyigba ʋuʋu sesĩe, ale be gaxɔa ƒe gɔmeɖokpewo ʋuʋu. Ʋɔtruawo katã hã ʋu enumake, eye ameawo katã ƒe gawo tu le wo ŋu.+ 27 Esi gaxɔdzikpɔla la nyɔ eye wòkpɔ be gaxɔa ƒe ʋɔtruwo le ʋuʋu la, eɖe eƒe yi be yeawu ye ɖokui, elabena esusu be gamenɔlaawo si.+ 28 Ke Paulo do ɣli sesĩe be: “Mègawɔ nu vevi ɖokuiwò o, elabena mí katã míele afii!” 29 Eya ta ebia be woatsɔ akaɖiwo vɛ, eye wòƒu du ge ɖe eme, eye wòle ƒoƒom kpakpakpa va tsyɔ mo anyi ɖe Paulo kple Sila ŋkume. 30 Eye wòkplɔ wo do goe gblɔ na wo be: “Aƒetɔwo, nu kae mawɔ be makpɔ ɖeɖe?” 31 Wogblɔ nɛ be: “Xɔ Aƒetɔ Yesu dzi se, eye wò kple wò aƒe la miakpɔ ɖeɖe.”+ 32 Eye wogblɔ Yehowa* ƒe nya la na eya kple eƒemetɔwo katã. 33 Eye wòkplɔ wo le zã ƒe gaƒoƒo ma me heklɔ woƒe abiawo na wo. Enumake wonyrɔ eya kple eƒe ƒome bliboa katã.+ 34 Eyome ekplɔ wo yi eƒe aƒe me heɖo kplɔ̃ na wo, eye esi wòxɔ Mawu dzi se azɔ ta la, eya kple eƒe aƒe blibo la wokpɔ dzidzɔ geɖe.

35 Esi ŋu ke la, dumegãwo dɔ atikplɔtɔwo ɖa be woagblɔ be: “Ðe asi le ame mawo ŋu woadzo.” 36 Eya ta gaxɔdzikpɔla la va gblɔ woƒe nyawo na Paulo be: “Dumegãwo dɔ ame ɖa be woaɖe asi le mi ame evea ŋu. Eya ta mido go miadzo le ŋutifafa me.” 37 Ke Paulo gblɔ na wo be: “Woƒo mí ame siwo nye Romatɔwo le dutoƒo evɔ womedrɔ̃ ʋɔnu mí hebu fɔ mí hafi o,+ eye wode mí gaxɔ me. Ke azɔ ɖe wole asi ɖem le mía ŋu le adzamea? Gbeɖe! Woawo ŋutɔwo koe ava kplɔ mí ado goe.” 38 Eya ta atikplɔtɔawo yi ɖaka nya siawo ta na dumegãwo. Esi wose be Romatɔwoe wonye la, vɔvɔ̃ ɖo wo ŋutɔ.+ 39 Eya ta wova fa dzi na wo, eye wokplɔ wo do goe heɖe kuku na wo be woadzo le dua me. 40 Esi wodo go le gaxɔa me la, woyi Lidia ƒe aƒe me; eye esi wokpɔ nɔviawo la, wode dzi ƒo na wo,+ eye wodzo.