Dɔwɔwɔwo

5 Ke ŋutsu aɖe si ŋkɔe nye Anania kple srɔ̃a Safira dzra woƒe nunɔamesi aɖe. 2 Gake ŋutsua tsɔ ga la ƒe ɖe ɣla, srɔ̃a hã nya nu tso eŋu, eye wòtsɔ eƒe ɖe ko va da ɖe apostoloawo ƒe afɔnu.+ 3 Ke Petro gblɔ be: “Anania, nu ka tae Satana na nèdo dzi da alakpa+ na gbɔgbɔ kɔkɔe la,+ eye nètsɔ anyigbaa ƒe ga la ƒe ɖe ɣla? 4 Zi ale si wòkpɔtɔ le asiwò la, menye tɔwò ko wònye oa? Eye esi nèdzrae vɔ la, ɖe megakpɔtɔ le wò ŋusẽ te oa? Nu ka tae nèɖo nu sia le wò dzi me? Menye amewoe nèda alakpa na o, ke boŋ Mawue.” 5 Esi Anania se nya siawo la, emu dze anyi enumake, eye wòku. Ale vɔvɔ̃ gã aɖe dze ame siwo katã se eŋunya la dzi. 6 Eye ɖekakpuiawo tso, woxatsa avɔ ɖe eŋu, eye wokɔe do go yi ɖaɖi.

7 Anɔ gaƒoƒo etɔ̃ megbe la, srɔ̃a hã va do, gake menya nu si dzɔ o. 8 Petro gblɔ nɛ be: “Gblɔe nam, home siae mi ame evea miedzra anyigba laa?” Egblɔ be: “Ɛ̃, home mae.” 9 Eya ta Petro gblɔ nɛ be: “Nu ka tae mi ame evea miewɔ ɖeka be miado Yehowa* ƒe gbɔgbɔ la kpɔ? Kpɔ ɖa! Ame siwo ɖi srɔ̃wò la ƒe afɔwo le ʋɔtrua nu; woakɔ wò hã ado goe.” 10 Enumake emu dze anyi ɖe eƒe afɔnu, eye wòku. Esi ɖekakpuiawo ge ɖe eme la, wokpɔe be eku, eye wokɔe do go yi ɖaɖi ɖe srɔ̃a xa. 11 Ale vɔvɔ̃ gã aɖe dze hame blibo la kple ame siwo katã se nya siawo la dzi.

12 Wonɔ dzesi kple nukunu geɖewo hã wɔm le dukɔ la dome to apostoloawo dzi;+ eye wo katã wokpea ta le Salomo ƒe Akpata la me kple tame ɖeka.+ 13 Nyateƒee, dzi menɔ ame susɔeawo dometɔ aɖeke ƒo be wòawɔ ɖeka kpli wo o; gake ameawo kafua wo. 14 Gawu la, ame siwo xɔ Aƒetɔ la dzi se la nɔ dzidzim ɖe edzi, wonye ŋutsuwo kple nyɔnuwo ƒe ha gã aɖe.+ 15 Amewo kɔa dɔnɔwo va dana ɖe ablɔwo me gɔ̃ hã, eye wotsɔa wo mlɔa abati suewo kple abawo dzi le afi ma, ale be ne Petro va yina la, eƒe vɔvɔli ya teti nadze wo dometɔ aɖewo dzi.+ 16 Ame gbogbo aɖewo hã tsoa du siwo ƒo xlã Yerusalem me vana, eye wokɔa dɔnɔwo kple ame siwo gbɔgbɔ makɔmakɔwo le fu ɖem na la vanɛ, eye wodaa gbe le wo katã ŋu.

17 Ke nunɔlagã la kple eŋume siwo nye Zadukitɔwo ƒe kɔmama la me tɔ siwo yɔ fũu kple ŋuʋaʋã la, tso. 18 Eye wolé apostoloawo de dua ƒe gaxɔ me.+ 19 Ke le zã me la, Yehowa* ƒe dɔla va ʋu gaxɔ la ƒe ʋɔtruwo,+ eye wòkplɔ wo do goe hegblɔ na wo be: 20 “Miyi ɖatsi tsitre ɖe gbedoxɔa me, ne mianɔ agbe sia ŋu nyawo katã gblɔm na amewo.” 21 Esi wose esia la, woyi gbedoxɔa me ŋdi kanya, eye wode asi nufiafia me.

Ke esi nunɔlagã la kple eŋumewo va ɖo la, woyɔ Sanhedrin blibo la kple Israel-viwo ƒe ametsitsiawo ƒe ha blibo la ƒo ƒu, eye wodɔ amewo ɖe gaxɔa me be woakplɔ apostoloawo vɛ. 22 Ke esi atikplɔtɔawo ɖo afi ma la, womekpɔ wo le gaxɔa me o. Eya ta wotrɔ gbɔ va ka nya la ta 23 be: “Míekpɔ gaxɔ la wòle tutu nyuie, eye dzɔlawo hã le tsitre ɖe ʋɔtruawo nu, ke esi míeʋui la, míekpɔ ame aɖeke le eme o.” 24 Esi gbedoxɔdzikpɔlawo ƒe amegã kple nunɔlawo ƒe tatɔwo se nya siawo la, wotɔtɔ le nya siawo ŋu le nu si ava do tso eme la ŋu. 25 Ke ame aɖe va gblɔ na wo be: “Mikpɔ ɖa! Ŋutsu siwo mielé de gaxɔ me lae nye ema tɔ ɖe gbedoxɔa me le nu fiam amewo.” 26 Ale dzikpɔlawo ƒe amegã la kple eƒe atikplɔtɔawo yi ɖakplɔ wo vɛ, ke menye kple sesẽ o, elabena wole vɔvɔ̃m be dukɔa ava ƒu kpe yewo.+

27 Eya ta wokplɔ wo va tsi tsitre ɖe Sanhedrin la ŋkume. Eye nunɔlagã la bia gbe wo 28 eye wògblɔ be: “Míede se na mi eme kɔ nyuie be miagayi edzi anɔ nu fiam le ŋkɔ sia dzi o,+ gake miena miaƒe nufiafia xɔ Yerusalem katã kpe ɖo, eye mieɖoe kplikpaa be yewoahe ŋutsu sia ƒe ʋu ava mía dzi.”+ 29 Petro kple apostolo bubuawo ɖo eŋu be: “Ele be míaɖo to Mawu abe dziɖula ene wu amewo.+ 30 Mía tɔgbuiwo ƒe Mawu la fɔ Yesu ɖe tsitre, ame si miawo miewu esi miehee ɖe ati ŋu.+ 31 Mawu do ame sia ɖe dzi le eƒe ɖusime+ wòzu Kplɔla Vevitɔ+ kple Ðela,+ be wòana Israel natrɔ dzi me, eye woatsɔ nu vɔ̃wo ake.+ 32 Eye míawoe nye nu siawo ŋuti ɖasefowo,+ eye gbɔgbɔ kɔkɔe+ si Mawu na ame siwo ɖoa toe abe dziɖula ene la hã ɖia ɖase.”

33 Esi wose esia la, eku dzi na wo vevie,* eye wodi be yewoawu wo. 34 Ke Farisitɔ aɖe si ŋkɔe nye Gamaliel,+ eye wònye Sefiala si ŋu ameawo katã dea bubui la, tsi tsitre le Sanhedrin la, eye wòɖe gbe be woakplɔ ŋutsuawo ado goe vie. 35 Eye wògblɔ na etɔwo be: “Israel ŋutsuwo, mikpɔ mia ɖokui dzi nyuie le nu si ɖom miele be yewoawɔ ame siawo la ŋu. 36 Le kpɔɖeŋu me, hafi ŋkeke siawo naɖo la, Teuda va do nɔ gbɔgblɔm be yenye ame aɖe, eye ame siwo anɔ alafa ene ye nɔ eƒe ha la me. Ke wowui, eye ame siwo katã dze eyome la ka hlẽ, eye wo nu va yi. 37 Eya megbe Yuda Galileatɔ la hã va do le ŋkɔŋɔŋlɔ ƒe ŋkekeawo me, eye wòhe amewo ɖe eɖokui ŋu. Ŋutsu ma hã ku, eye ame siwo katã dze eyome la ka hlẽ. 38 Eya ta le ale si nɔnɔmeawo le fifia nu la, mele egblɔm na mi be, migade nu ame siawo ƒe nya me o, ke boŋ miɖe asi le wo ŋu. Elabena ne amewo gbɔe ɖoɖo sia alo dɔ sia tso la, ekema eme ava gblẽ; 39 ke ne Mawu gbɔe wòtso la, miate ŋu agblẽ eme o.+ Ne menye nenema o la, ava dze abe ɖe miele avu wɔm kple Mawu ŋutɔ ene.”+ 40 Ale woxɔ aɖaŋu si wòɖo la, eye woyɔ apostoloawo vɛ, ƒo wo,+ eye wode se na wo be woadzudzɔ nuƒoƒo le Yesu ƒe ŋkɔ me, eye woɖe asi le wo ŋu wodzo.

41 Eya ta wodzo le Sanhedrin la ŋkume, eye wonɔ dzidzɔ kpɔm+ be wobu yewo be yewodze woado vlo yewo le eƒe ŋkɔ la ta. 42 Eye gbe sia gbe woyi edzi nɔ nu fiam henɔ nya nyui la gblɔm le Kristo la, si nye Yesu ŋu+ madzudzɔmadzudzɔe le gbedoxɔa me kple aƒe me yi aƒe me.+