Marko
3 Yesu gayi ƒuƒoƒe aɖe, eye ame aɖe si titi* lé asi na la le afi ma.+ 2 Eye Farisitɔwo le ŋku lém ɖe eŋu tututu be yewoakpɔe ɖa be ada gbe le amea ŋu le Sabat dzi hã, ne yewoatsɔ nya ɖe eŋu. 3 Egblɔ na ame si titi* lé asi na la be: “Tso nàva titina.” 4 Ebia wo be: “Ðe se ɖe mɔ be woawɔ nu nyui alo awɔ nu vɔ̃ɖi le Sabat dzia? Be woaɖe agbe* loo alo awu amea?”+ Ke wozi kpi. 5 Esi wòtsa ŋku le wo dzi godoo kple dziku hexa nu vevie le woƒe dzimesesẽ+ la ŋuti vɔ la, egblɔ na amea be: “Mlo asi.” Eye wòmloe, eye eƒe asi la ɖɔ ɖo. 6 Ale Farisitɔwo do go, eye enumake wo kple Herodes habɔbɔ+ me nɔlawo wode adaŋu ɖe eŋu, ne woawui.
7 Ke Yesu kple eƒe nusrɔ̃lawo dzo le afi ma yi ƒuta, eye ameha gã aɖe tso Galilea kple Yudea kplɔ wo ɖo.+ 8 Eye ame gbogbo siwo hã se nu geɖe siwo wɔm wòle la tso Yerusalem, Idumea kple Yordan godo kpakple Tiro kple Sidon nutowo me va egbɔ. 9 Eye wògblɔ na eƒe nusrɔ̃lawo be woadi tɔdziʋu sue aɖe ada ɖi na ye, ale be ameha la nagamimi ye ɖo o. 10 Esi wòda dɔ na ame geɖewo ta la, ame siwo katã ŋu dɔléle sesẽwo le la ƒo zi ɖe eŋu be yewoaka asi eŋu.+ 11 Eye ɣesiaɣi si gbɔgbɔ makɔmakɔwo+ gɔ̃ hã kpɔe la, wotsyɔa mo anyi ɖe eŋkume, eye wodoa ɣli gblɔna be: “Wòe nye Mawu ƒe Vi la.”+ 12 Ke zi geɖe la, edea se na wo vevie be woagana woadze si ye o.+
13 Eyi to aɖe dzi, eye wòyɔ ame siwo wòdi+ la wova egbɔ.+ 14 Eye wòɖo ƒuƒoƒo aɖe si me ame wuieve le, ena ŋkɔ wo be apostolowo, ame siwo anɔ eŋu, siwo wòadɔ woaɖaɖe gbeƒã, 15 eye ŋusẽ nanɔ wo si ne woanya gbɔgbɔ vɔ̃wo ado goe.+
16 Ame wuieve siwo le ƒuƒoƒo+ si wòɖo la me woe nye Simon, si wòna ŋkɔe be Petro,+ 17 Yakobo, Zebedeo vi la, kple Yohanes, Yakobo nɔvi la (ena ŋkɔ ame siawo hã be Boanerges, si gɔmee nye “Dziɖegbeviwo”),+ 18 Andrea, Filipo, Bartolomeo, Mateo, Toma, Yakobo, Alfeo vi la, Tadeo, Simon Veviedola la, 19 kple Yuda Iskariot, ame si va dee asi emegbe.
Azɔ Yesu yi aƒe aɖe me, 20 eye ameha aɖe gaƒo ƒu ake, ale be eya kple eƒe nusrɔ̃lawo mete ŋu ɖu nu gɔ̃ hã o. 21 Ke esi eƒe ƒometɔwo see la, woyi be yewoaɖalée, elabena wole gbɔgblɔm be: “Eƒe tagbɔ le gbegblẽm.”+ 22 Agbalẽfiala siwo tso Yerusalem va hã le gbɔgblɔm be: “Beelzebul* le eme, eye gbɔgbɔ vɔ̃wo ƒe fia dzie wòtona nyaa gbɔgbɔ vɔ̃wo.”+ 23 Eye esi wòyɔ wo va eɖokui gbɔ la, eƒo nu na wo le lododowo me be: “Aleke Satana ate ŋu anya Satana ado goe? 24 Ne fiaɖuƒe aɖe ma ɖe eɖokui ŋu la, fiaɖuƒe ma mate ŋu ali ke o,+ 25 eye ne aƒe aɖe ma ɖe eɖokui ŋu la, aƒe ma mate ŋu ali ke o. 26 Nenema kee ne Satana tsi tsitre ɖe eɖokui ŋuti, eye wòma la, mate ŋu anɔ te o, ke boŋ eƒe nuwuwue nye ema ɖo. 27 Le nyateƒe me la, ame aɖeke mate ŋu age ɖe ŋusẽtɔ aɖe ƒe aƒe me afi eƒe nuwo o, negbe ɖeko wòabla ŋusẽtɔ la gbã hafi ate ŋu aha eƒe aƒe la. 28 Vavãe, mele egblɔm na mi be, Mawu atsɔ nu sia nu ake amegbetɔviwo, eɖanye nu vɔ̃ ka kee wowɔ alo busunya ka kee wogblɔ o. 29 Gake ame si gblɔa busunya ɖe gbɔgbɔ kɔkɔea ŋu la, womatsɔe akee gbeɖegbeɖe o,+ ke boŋ eɖi nu vɔ̃ mavɔmavɔ ƒe fɔ.”+ 30 Yesu gblɔ esia, elabena wole gbɔgblɔm be: “Gbɔgbɔ makɔmakɔ le eme.”+
31 Eye dadaa kple nɔviaŋutsuwo+ va tɔ ɖe xexe, eye wodɔ ame ɖo ɖe egbɔ be woayɔe vɛ.+ 32 Ɣemaɣi la, ameha aɖe nɔ anyi ƒo xlãe, eye wogblɔ nɛ be: “Kpɔ ɖa! Dawò kple nɔviwòwo le xexe le diwòm.”+ 33 Ke eɖo eŋu na wo be: “Ame kawoe nye danye kple nɔvinyewo?” 34 Ekpɔ ame siwo nɔ anyi ƒo xlãe la godoo va kpe, eye wògblɔ be: “Mikpɔ ɖa, danye kple nɔvinyewoe nye esi!+ 35 Ame sia ame si wɔa Mawu ƒe lɔlɔ̃nu la, eyae nye nɔvinyeŋutsu kple nɔvinyenyɔnu kpakple danye.”+