3 Mose
17 Yehowa gagblɔ na Mose be: 2 “Ƒo nu kple Aron kple viaŋutsuwo kpakple Israel-viwo katã nàgblɔ na wo be, ‘Se si Yehowa dee nye esi:
3 “‘“Ne Israel ƒe aƒe la me tɔ aɖe wu nyi, alẽ alo gbɔ̃ le asaɖa la me, alo le asaɖa la godo, 4 le esi wòatsɔe ava takpegbadɔ la nu, be wòatsɔe asa vɔ na Yehowa le avɔgbadɔa nu teƒe la, ke ame ma ɖi ʋufɔ. Ekɔ ʋu ɖi, eya ta woatsrɔ̃ ame ma ɖa le eƒe dukɔ la dome. 5 Ale be Israel-viwo natsɔ woƒe lã siwo woatsɔ asa vɔ le gbe me la avɛ na Yehowa le takpegbadɔa nu, eye woatsɔe ana nunɔla la, be wòatsɔ asa ŋutifafavɔ na Yehowa.+ 6 Nunɔla la nahlẽ ʋu la ɖe Yehowa ƒe vɔsamlekpuia ŋu le takpegbadɔa nu, eye wòatsɔ ami la ado dzudzɔ wòanye ʋeʋẽ lilili na Yehowa.+ 7 Womagasa vɔwo na gbɔgbɔ vɔ̃ siwo ɖi gbɔ̃wo,*+ siwo wosubɔna*+ la azɔ o. Esia anye se na mi ɖaa le miaƒe dzidzimewo katã me.”’
8 “Gblɔ na wo be, ‘Ne Israel ƒe aƒe la me tɔ aɖe alo amedzrovi si le mia dome sa numevɔ alo vɔ bubu aɖe, 9 eye metsɔe va takpegbadɔa nu be wòatsɔ asa vɔ na Yehowa o la, woaɖe ame ma ƒe agbe ɖa le eƒe dukɔ la dome.+
10 “‘Ne Israel ƒe aƒe la me tɔ aɖe alo amedzrovi si le mia dome ɖu ʋu+ aɖe la, maɖe ŋku atɔ ame* si ɖu ʋua, eye matsrɔ̃e ɖa le eƒe dukɔ la dome. 11 Elabena ŋutilã ɖe sia ɖe ƒe agbe* le ʋu+ la me, eya ta metsɔe na be miatsɔ alé avu le vɔsamlekpui+ la dzi ɖe mia ɖokuiwo* ta, elabena ʋu wotsɔ léa avu,+ le agbe* si le eme la ta. 12 Esia tae megblɔ na Israel-viwo be: “Mia dometɔ* aɖeke megaɖu ʋu o, eye amedzrovi siwo le mia dome+ la hã dometɔ aɖeke megaɖu ʋu o.”+
13 “‘Ne Israel-vi aɖe alo amedzrovi aɖe si le mia dome da ade lé gbemelã alo xe si woɖuna la, ekema wòaɖuɖu eƒe ʋu ɖi,+ eye wòaxe ke ɖe edzi. 14 Elabena ŋutilã ɖe sia ɖe ƒe agbee* nye eƒe ʋu, le agbe* si le eme la ta. Esia tae megblɔ na Israel-viwo be: “Migaɖu ŋutilã aɖeke ƒomevi ƒe ʋu o, elabena ŋutilã ɖe sia ɖe ƒe agbee* nye eƒe ʋu. Ame sia ame si ɖui la, woatsrɔ̃e ɖa.”+ 15 Ne ame* aɖe ɖu lã si ku le eɖokui si alo lã si gbemelã+ aɖe vuvu la, ekema eɖanye dumevi alo amedzrovi o, ele be wòanya eƒe awuwo, eye eŋu mekɔ o va se ɖe fiẽ;+ emegbe eŋu akɔ. 16 Ke ne menya eƒe awuwo o, eye mele tsi hã o la, ekema woabia eƒe vodada la ŋuti kɔntae.’”+