Yesaya
7 Le Ahaz,+ Yotam vi, Uziya vi, ame si nye Yuda-fia ŋɔli la, Siria-fia Rezin kple Israel-fia Peka,+ Remaliya vi, ho ɖe Yerusalem ŋu be yewoawɔ aʋa kplii, ke mete ŋu* ɖu edzi o.+ 2 Eye wova gblɔ na David ƒe aƒe la be: “Siria ƒe aʋakɔ va wɔ ɖeka kple Efrayim ƒe aʋakɔ.”
Ale Ahaz kple eƒe amewo ƒe dzi ʋuʋu abe ale si avemetiwo ʋuʋuna le ya nu ene.
3 Eye Yehowa gblɔ na Yesaya be: “Meɖe kuku, wò kple viwò Sear-Yasub*+ mido go yi ɖakpe Ahaz le dzigbeta+ la ƒe tɔʋu ƒe mlɔenu le avɔnyala ƒe agblemɔ gã la to. 4 Eye nàgblɔ nɛ be: ‘Lé ɖokuiwò, nànɔ anyi kpoo. Mègavɔ̃ o, eye mègana dzi naɖe le ƒowò le dzoti takpoe eve siawo, siwo le dzudzɔ tum, siwo nye Siria-fia Rezin kple Remaliya vi+ la ƒe dziku ta o. 5 Elabena Siria kple Efrayim kpakple Remaliya vi la ɖo vɔ̃ ɖe ŋuwò gblɔ be, 6 “Mina míaho ɖe Yuda ŋu, míavuvui,* eye míadze edzi* ahaxɔe na mía ɖokui, ne míatsɔ Tabeel vi aɖo fiae ɖe enu.”+
7 “‘Ale Aƒetɔ Dziɖulagã Yehowa gblɔe nye esi:
Madze edzi o,
Eye madzɔ hã o.
8 Elabena Siria ƒe tae nye Damasko,
Eye Damasko ƒe tae nye Rezin.
Le ƒe blaade vɔ atɔ̃ pɛ ko me la,
Woagbã Efrayim gudugudu, eye maganye dukɔ azɔ o.+
Ne miexɔe se o la,
Ekema miali ke o.”’”
10 Eye Yehowa gagblɔ na Ahaz be: 11 Bia dzesi tso Yehowa wò Mawu la gbɔ;+ ate ŋu agoglo abe Tsiẽƒe* ene alo akɔkɔ abe dziƒo ene.” 12 Ke Ahaz gblɔ be: “Nyemabia o, eye nyemado Yehowa kpɔ hã o.”
13 Eye Yesaya gblɔ be: “Oo, David ƒe aƒe, meɖe kuku, misee. Nu tsɛ wònye be miedo amewo ƒe dzigbɔɖi kpɔ hafi miebe yewoado Mawu hã ƒe dzigbɔɖi kpɔa?+ 14 Eya ta Yehowa ŋutɔ ana dzesi mi: Kpɔ ɖa! Ðetugbui afɔ fu adzi ŋutsuvi;+ eye wòana ŋkɔe be Imanuel.*+ 15 Anɔ notsi kpekẽ kple anyitsi nom hafi ava nya vɔ̃tsitsri kple nyuitiatia. 16 Elabena hafi ɖevi la nava nya vɔ̃tsitsri kple nyuitiatia la, fia eve siwo le ŋɔ dzim na wò la ƒe anyigba aɖi gbɔlo.+ 17 Yehowa ahe ɣeyiɣi sesẽ siwo tɔgbi meva kpɔ tso gbe si gbe Efrayim klã ɖa tso Yuda gbɔ+ o la, ava wò ŋutɔ kple wò dukɔ la kpakple fofowò ƒe aƒe la dzi, elabena akplɔ Asiria-fia aƒu wò.+
18 “Le ŋkeke ma dzi la, Yehowa alia aku ayɔ nu dzodzoe siwo le Egipte ƒe Nil-tɔsisi la ƒe alɔdze siwo le adzɔge ke kple anyi siwo le Asiria-nyigba dzi, 19 eye wo katã woava ƒo ɖe tɔʋu globowo, agatowo kple ŋuvewo katã me kple tsiteƒewo katã.
20 “Gbe ma gbe la, Yehowa azã talũhɛ si Ahaz da tso Tɔsisi* la ƒe nuto me, si nye Asiria-fia,+ atsɔ alũ ɖa le ta nɛ, alũ fu le afɔ ŋu nɛ ahaƒlɔ ge nɛ keŋkeŋ.
21 “Gbe ma gbe la, ame ɖeka axɔ nyinɔe kple alẽ eve ɖe agbe. 22 Eye le esi notsi bɔ ta la, ano notsi kpekẽ, elabena notsi kpekẽ kple anyitsi koe ame siwo katã susɔ ɖe anyigba la dzi la ano.
23 “Gbe ma gbe la, afi sia afi si wainka akpe ɖeka le tsã, eye wòxɔa klosalo akpe ɖeka la, ŋùwo kple gbewo amie ɖe wo teƒe. 24 Aŋutrɔ kple da ye amewo atsɔ hafi ayi afi ma, elabena ŋù kple gbe sɔŋ koe axɔ anyigba blibo la katã dzi. 25 Eye miagayi to siwo katã dzi wotsɔa kodzi ŋlɔna tsã la dzi o, le vɔvɔ̃ na ŋùwo kple gbewo ta; eye woazu nyiwo ƒe gbeɖuƒe kple alẽwo toƒe.”