1 Samuel
15 Eye Samuel gblɔ na Saul be: “Yehowa dɔm be masi ami na wò nàzu fia ɖe eƒe dukɔ Israel dzi;+ eya ta ɖo to nàse Yehowa ƒe nya.+ 2 Ale aʋakɔwo ƒe Yehowa gblɔe nye esi: ‘Mabia akɔnta Amalektɔwo le nu si wowɔ ɖe Israel ŋu, esi wotso ɖe eŋu le mɔ dzi, esime Israel tso Egipte gbɔna la ta.+ 3 Eya ta yi ɖasi Amalektɔwo,+ eye nàtsrɔ̃ wo+ kple woƒe nuwo katã gbidigbidi. Mègakpɔ nublanui na wo o; ke boŋ nàwu wo:+ ŋutsu kple nyɔnu, ɖevi kple vi nono, nyi kple alẽ, kposɔ kple tedziwo siaa.’”+ 4 Eya ta Saul yɔ dukɔ la ƒo ƒu, eye wòxlẽ wo le Telaim, aʋawɔla afɔzɔlawo le ŋutsu akpe alafa eve, eye Yuda ŋutsuwo le akpe ewo.+
5 Eye Saul va Amalek dua gbɔ hede xa ɖe bali la me. 6 Eye Saul gblɔ na Kenitɔwo+ be: “Midzo, mite ɖa, midzo le Amalektɔwo dome, ne magatsrɔ̃ mi kpe ɖe wo ŋu o.+ Elabena mieve Israel-viwo nu+ esime wotso Egipte gbɔna.” Ale Kenitɔwo te ɖa le Amalektɔwo ŋu. 7 Emegbe Saul yi ɖasi Amalektɔwo+ tso Havila+ va ɖo keke Sur,+ si le Egipte ŋgɔ ke. 8 Elé Amalek-fia Agag+ agbagbee, eye wòtsɔ yi tsrɔ̃ ame bubuawo katã gbidii.+ 9 Ke Saul kple dukɔ la mewɔ naneke Agag o,* wokpɔ alẽ nyuitɔwo, nyiwo kple lã siwo da ami, kpakple agbowo kple nu nyuiwo katã ta.+ Womedi be yewoatsrɔ̃ wo o. Ke nu siwo katã nye nu siwo ŋu viɖe mele o kple esiwo womedi o la koe wotsrɔ̃.
10 Eye Yehowa ƒe gbe va na Samuel be: 11 “Evem be meɖo Saul fiae, elabena etrɔ le yonyeme, eye mewɔ nye nyawo dzi o.”+ Nu sia te ɖe Samuel dzi, ale be wòfa avi na Yehowa zã blibo la katã.+ 12 Esi Samuel fɔ kaba be yeayi aɖakpe Saul le ŋdi la, wogblɔ na Samuel be: “Saul yi Karmel,+ eye wòɖi ŋkuɖodzikpe ɖe afi ma na eɖokui.+ Eye wòtrɔ yi Gilgal.” 13 Esi Samuel va Saul gbɔ mlɔeba la, Saul gblɔ nɛ be: “Yehowa neyra wò. Mewɔ Yehowa ƒe gbe dzi.” 14 Ke Samuel biae be: “Ke alẽwo kple nyiwo ƒe xɔxlɔ̃ kae nye ema sem mele ɖe to me?”+ 15 Saul ɖo eŋu be: “Amalektɔwo gbɔe wokplɔ wo tsoe, elabena dukɔ la kpɔ* alẽ kple nyi nyuitɔwo ta, be woatsɔ wo asa vɔ na Yehowa wò Mawu; ke míetsrɔ̃ nu susɔeawo ya gbidigbidi.” 16 Eye Samuel gblɔ na Saul be: “Tɔ gbɔ! Magblɔ nya si Yehowa gblɔ nam etsɔ zã me la na wò.”+ Eya ta egblɔ nɛ be: “Ƒo nu!”
17 Eye Samuel gblɔ be: “Ðe menye esime mèbu ɖokuiwò ɖe naneke me o+ ye nèzu Israel-toawo ƒe tatɔ, eye Yehowa si ami na wò nèzu fia ɖe Israel nu oa?+ 18 Emegbe Yehowa dɔ wò ɖe dɔgbe gblɔ be: ‘Heyi, ne nàtsrɔ̃ nu vɔ̃ wɔla siwo nye Amalektɔwo gbidigbidi.+ Wɔ aʋa kpli wo va se ɖe esime nètsrɔ̃ wo vɔ keŋkeŋ.’+ 19 Ekema nu ka tae mèɖo to Yehowa ƒe gbe o? Ke boŋ nètsɔ ŋukeklẽ yi ɖaha aboyonuwo+ hewɔ nu si nye vɔ̃ le Yehowa ŋkume!”
20 Ke Saul gblɔ na Samuel be: “Gake meɖo to Yehowa ƒe gbe ɖe! Mede nu si gbe Yehowa dɔm ɖo, eye mekplɔ Amalek-fia Agag vɛ, ke metsrɔ̃ Amalektɔwo ya gbidigbidi.+ 21 Gake dukɔ la ha alẽwo kple nyi siwo nye aboyonu siwo wòle be woatsrɔ̃ gbidii la ƒe nyuitɔwo be woatsɔ asa vɔ na Yehowa wò Mawu le Gilgal.”+
22 Eye Samuel ɖo eŋu nɛ be: “Ðe numevɔsawo kple vɔsawo dzea Yehowa ŋu wu+ toɖoɖo Yehowa ƒe gbea? Kpɔ ɖa! Toɖoɖo nyo wu vɔsa,+ eye nusese nyo wu agbo ƒe ami;+ 23 elabena aglãdzedze+ kple afakaka+ ƒe nu vɔ̃e sɔ, eye dada kple akunyawɔwɔ kpakple trɔ̃subɔsubɔe* sɔ. Esi nègbe Yehowa ƒe nya ta la,+ eya hã gbe wò be màgaɖu fia o.”+
24 Eye Saul gblɔ na Samuel be: “Mewɔ nu vɔ̃, meda Yehowa ƒe se kple wò nyawo dzi, elabena ɖe mevɔ̃ dukɔ la, eya tae meɖo to woƒe gbe ɖo. 25 Ke azɔ meɖe kuku, tsɔ nye nu vɔ̃ la kem, eye nàgbugbɔ ayi kplim, ne maɖade ta agu na Yehowa.”+ 26 Ke Samuel gblɔ na Saul be: “Nyemagbugbɔ kpli wò o, elabena ègbe Yehowa ƒe nya, eye Yehowa hã gbe wò be màgaɖu fia ɖe Israel dzi o.”+ 27 Esi Samuel trɔ be yeadzo la, Saul lé eƒe awu ʋlaya si ŋu abɔ mele o la toga, eye wòdze. 28 Eye Samuel gblɔ nɛ be: “Yehowa dze Israel ƒe fiaɖuƒe la le asiwò egbea, eye wòatsɔe ana hawòvi si nyo wu wò.+ 29 Hekpe ɖe eŋu la, Israel ƒe Bubutɔ+ la maka aʋatso o,+ eye matrɔ susu o,* elabena menye amegbetɔ wònye, ne wòatrɔ susu o.”*+
30 Eye wògblɔ be: “Mewɔ nu vɔ̃. Ke meɖe kuku, de bubu ŋunye le nye dukɔ la ƒe ametsitsiwo ŋkume kple Israel ŋkume. Gbugbɔ kplim, ne maɖade ta agu na Yehowa wò Mawu la.”+ 31 Eya ta Samuel gbugbɔ kple Saul yi, eye Saul yi ɖade ta agu na Yehowa. 32 Eye Samuel gblɔ be: “Mikplɔ Amalek-fia Agag vɛ nam.” Agag zɔ heheɖemegbetɔe* yi egbɔ, eye Agag gblɔ na eɖokui be: ‘Nyateƒee, ku ƒe vɔvɔ̃* bú.’ 33 Ke Samuel gblɔ be: “Ale si ko wò yi na nyɔnuwo zu konɔe la, nenemae dawò hã azu konɔwo ƒe konɔ le nyɔnuwo dome.” Ale Samuel fli Agag kakɛkakɛe le Yehowa ŋkume le Gilgal.+
34 Emegbe Samuel dzo yi Rama, eye Saul hã yi eƒe me le Saul ƒe Gibea. 35 Eye Samuel megakpɔ Saul kpɔ gbeɖe o va se ɖe eƒe kugbe, ke Samuel xa nu le Saul ta.+ Eve Yehowa be yeɖo Saul fiae ɖe Israel nu.+