2 Petro
2 Ke aʋatsonyagblɔɖilawo hã nɔ dukɔ la dome, abe ale si ko aʋatsonufialawo anɔ miawo hã mia dome ene.+ Ame siawo atsɔ kɔmama gblẽnuwo ava tra ɖe eme dzaa, eye woagbe nu le aƒetɔ si ƒle wo la gɔ̃ hã gbɔ,+ eye woahe tsɔtsrɔ̃ kpata ava wo ɖokuiwo dzi. 2 Azɔ hã, ame geɖewo adze woƒe dzimesesẽnuwɔnawo*+ yome, eye le ame siawo ta woaƒo nu gbegblẽ tso nyateƒemɔ la ŋu.+ 3 Eye le ŋukeklẽ ta woakpa nyawo atsɔ adi viɖe le mia ŋu. Ke tohehe si li na wo tso blema ke la+ mele hehem ɖe megbe o, eye woƒe tsɔtsrɔ̃ mele akɔlɔ̃e dɔm o.+
4 Vavãe, Mawu mehe ɖe megbe le tohehe na mawudɔla siwo wɔ nu vɔ̃ me o,+ ke boŋ etsɔ wo ƒu gbe ɖe Tartaro,*+ eye wòtsɔ viviti tsiɖitsiɖi ƒe kɔsɔkɔsɔwo bla wo,* ne woadzra wo ɖo ɖi na ʋɔnudɔdrɔ̃.+ 5 Eye mehe ɖe megbe le tohehe na blemaxexe aɖe me o,+ gake wòkpɔ Noa, dzɔdzɔenyenye ƒe gbeƒãɖela,+ kpakple ame adre bubuwo ta dedie+ esime wòhe tsiɖɔɖɔ va ame mavɔ̃mawuwo ƒe xexea dzi.+ 6 Ebu fɔ du siwo nye Sodom kple Gomora hena wozu afi,+ wònye nu siwo ava va la ƒe kpɔɖeŋu na ame mavɔ̃mawuwo.+ 7 Eye wòɖe ame dzɔdzɔe Lot,+ ame si sedzimawɔlawo ƒe ŋukpenanuwɔwɔ dzimesesẽtɔe* ɖe fu na vevie la— 8 elabena sedzimawɔmawɔ si teƒe ame dzɔdzɔe ma kpɔna hesena gbe sia gbe esi wòle wo dome la wɔa fu eƒe luʋɔ* dzɔdzɔe la. 9 Eya ta Yehowa* nya ale si wòaɖe ame siwo tsɔ wo ɖokui na Mawu la tso tetekpɔ me,+ ke wòadzra ame madzɔmadzɔwo ɖo na tsɔtsrɔ̃ le ʋɔnudrɔ̃gbe la,+ 10 vevietɔ ame siwo dzea ŋutilã ƒe dzodzrowo yome heƒoa ɖi ame bubuwo,+ eye wodoa vlo aƒetɔnyenye la.+
Esi woƒe dzi tri eye wonye ɖokuiŋudzelawo ta la, womevɔ̃na ne wole nya vlowo gblɔm ɖe ŋutikɔkɔemewo ŋu o, 11 evɔ mawudɔla siwo nye gã wu le ŋutete kple ŋusẽ me la, metsoa wo nu to nya vlowo gbɔgblɔ ɖe wo ŋu me o, le esi wodea bubu Yehowa* ŋu ta.+ 12 Ke ame siawo, siwo le abe lã manyanu siwo wɔa nu ɖe seselelãme nu, siwo li na léle kple tsɔtsrɔ̃ ene la, gblɔa nya vlowo ɖe nu siwo ŋu womenya naneke le o ŋu.+ Woakpɔ tsɔtsrɔ̃ le woawo ŋutɔwo ƒe tsɔtsrɔ̃mɔ la dzi, 13 eye woakpe fu wòanye woawo ŋutɔwo ƒe mɔ vɔ̃wo ŋuti fetu.
Wobua agbeɖuɖu+ le ŋkeke me gɔ̃ hã abe dzidzɔdonamenu ene. Wonye ame ƒoɖiwo kple ame siwo ŋu mokaka le, eye wònyea dzidzɔ na wo be yewoatsɔ yewoƒe alakpanufiafiawo able mi ne wole nu ɖum kpli mi.+ 14 Ŋku siwo yɔ fũu kple ahasiwɔwɔ li na wo,+ wometea ŋu trɔna le nu vɔ̃ ŋu o, eye woblea ame* malikewo. Wotsɔ ŋukeklẽ mla woƒe dziwo. Fiƒodeviwo wonye. 15 Esi wogblẽ mɔ dzɔdzɔe la ɖi la, wotra mɔ. Woto Bileam, Beor vi ƒe ʋe me,+ ame si lɔ̃ nu vɔ̃ɖi wɔwɔ ƒe fetu,+ 16 gake woka mo nɛ le esi wògbe nu si nyo la wɔwɔ ta.+ Lã maƒonu si tsɔ amegbetɔ ƒe gbe ƒo nu la, xe mɔ na nyagblɔɖila la ƒe aɖaʋanuwɔwɔ.+
17 Ame siawo nye vudo siwo me tsi mele o kple afu siwo ahom sesẽwo lɔ ɖe nu, eye woɖo blukɔ tsiɖitsiɖi ɖi na wo.+ 18 Wogblɔa nya gã nya gã siwo meɖea vi aɖeke o. Eye wotsɔa ŋutilã ƒe nudzodzrowo+ kple woƒe ŋukpenanuwɔwɔwo* blea ame siwo te ŋu si le nu gbegblẽ wɔlawo nu teti koe nye ema la.+ 19 Togbɔ be wole ablɔɖe ŋugbe dom na wo hã la, woawo ŋutɔwo wonye nu gbegblẽ wɔwɔ ƒe kluviwo,+ elabena ne nane ɖu ame aɖe dzi la, amea zu eƒe kluvi.+ 20 Le nyateƒe me la, ne wosi le xexea ƒe ɖiƒoƒowo gbɔ,+ esi Aƒetɔ kple Ðela Yesu Kristo ŋuti sidzedze vavãtɔ su wo si, hafi gaƒo wo ɖokuiwo ɖe nu siawo ke me, eye wona woɖu wo dzi la, ekema woƒe nɔnɔme mlɔetɔwo va gblẽna wu gbãtɔwo.+ 21 Ne ɖe womenya dzɔdzɔenyenye ƒe mɔ la nyuie o la, ne enyo na wo wu be woanyae hafi agatrɔ ɖa le sedede kɔkɔe si wotsɔ de asi na wo la yome.+ 22 Eva eme na wo le nyateƒelododo la nu be: “Avu gbugbɔ yi eya ŋutɔ ƒe xeɖeɖe gbɔ, eye ha si wole tsi na la gale mimlim le ba me.”+