Yehowa Nya Ale Si Wòaɖe Eƒe Amewo

“Yehowa nya ale si wòaɖe ame siwo tsɔ wo ɖokui na Mawu la tso tetekpɔ me.”—2 PET. 2:9.

NU KA TAE MÍATE ŊU AKA ÐE EDZI BE:

Yehowa kpɔa egbɔ be nu sia nu si wòɖo la vaa eme ɖe eƒe ɣeyiɣi ɖoɖi dzi?

Yehowa azã eƒe ŋusẽ atsɔ axɔ na eƒe amewo?

Yehowa nya ale si tututu nuwo ava yii le xaxa gã la me?

 1. Aleke nɔnɔmeawo anɔ le “xaxa gã” la me?

TSƆTSRƆ̃ si Mawu ahe ava Satana ƒe xexea dzi la adze egɔme kpata esi amewo manɔ mɔ kpɔm nɛ kura o. (1 Tes. 5:2, 3) Ne “xaxa gã” la dze egɔme eye wòle edzi yim la, nuwo atɔ zi le anyigba dzi. (Zef. 1:14-17) Amewo anɔ nɔnɔme sesẽwo kple hiãkame geɖewo me tom. Anye xaxaɣi aɖe “si tɔgbi meva kpɔ . . . tso xexea ƒe gɔmedzedze va se ɖe fifia o.”—Mixlẽ Mateo 24:21, 22.

2, 3. (a) Nu kae Satana adi be yeawɔ na Mawu ƒe amewo le “xaxa gã” la me? (b) Nu kae ate ŋu ado ŋusẽ kakaɖedzi si le mía si be Yehowa ate ŋu aɖe eƒe amewo la?

² Ne “xaxa gã” la ɖo ta eƒe nuwuwu la, ‘Gog si tso Magog nyigba dzi’ la aɖoe be yeadze Mawu ƒe amewo dzi kple yeƒe ŋusẽ katã. Le amedzidzedze sia me la, akplɔ “aʋakɔ dranyi” aɖe be woadze Mawu ƒe amewo dzi eye woanyè “atsyɔ anyigba la abe alilikpo ene.” (Eze. 38:2, 14-16) Amegbetɔ ƒe habɔbɔ aɖeke mava xɔ na Yehowa ƒe amewo o. Mawu ɖeɖe si me koe woƒe xɔxɔ atso. Aleke Yehowa ƒe amewo awɔ nui ne wokpɔe be yewoƒe futɔwo gbɔna yewo tsrɔ̃ ge?

³ Ne Yehowa subɔlae nènye la, ɖe xɔse le asiwò be Yehowa ate ŋu aɖe eƒe amewo tso xaxa gã la mea? Èxɔe se be aɖe wo ŋutɔŋutɔa? Apostolo Petro ŋlɔ bena: “Yehowa nya ale si wòaɖe ame siwo tsɔ wo ɖokui na Mawu la tso tetekpɔ me, gake wòadzra ame madzɔmadzɔwo ɖo hena ʋɔnudrɔ̃gbe, bene woaɖe wo ɖa.” (2 Pet. 2:9) Ne míede ŋugble tso ale si Yehowa ɖe eƒe amewo le blema ŋu la, ana kakaɖedzi si le mía si be Yehowa ate ŋu aɖe eƒe amewo la me nagasẽ ɖe edzi wu. Mina míadzro esia ƒe kpɔɖeŋu etɔ̃ me kpɔ.

NOA TSI AGBE LE XEXEA ME KATÃ ƑE TƆÐƆÐƆ AÐE ME

 4. Nu ka tae nuwo wɔwɔ ɖe game dzi nɔ vevie hafi Tsiɖɔɖɔa nadze egɔme?

⁴ Gbã la, de ŋugble le Tsiɖɔɖɔ si va le Noa ƒe ŋkekea me ŋu kpɔ. Be Yehowa ƒe tameɖoɖo sia nava eme la, nuwo wɔwɔ ɖe game dzi nɔ vevie ŋutɔ. Ele be woawu aɖakaʋu gã nyadri la kpakpa nu ahakplɔ lãwo katã ayi ɖe eme dedie hafi tsiɖɔɖɔa nadze egɔme. Nuŋlɔɖi si le Mose Ƒe Agbalẽ Gbãtɔ me la ɖee fia be Yehowa melala wokpa aɖakaʋua hafi tso nya me le ɣeyiɣi si dzi Tsiɖɔɖɔa nadze egɔme ŋu o. Yehowa te ŋu tia ŋkekea do ŋgɔ eye metsi dzi be womava kpa aɖakaʋua ɖe game dzi o. Le nyateƒe me la, ɣeyiɣi didi aɖe do ŋgɔ hafi wòagblɔ na Noa be wòakpa aɖakaʋu aɖe la, Mawu ɖo ŋkeke si dzi wòle be Tsiɖɔɖɔa adze egɔme la ɖi. Aleke míewɔ nya?

 5. Le 1 Mose 6:3 ƒe nya nu la, nya kae Yehowa ɖe gbeƒãe le dziƒo, eye ɣekaɣie wògblɔ nya sia?

⁵ Biblia gblɔ na mí be Yehowa wɔ nyametsotso aɖe eye wòɖe gbeƒãe le dziƒo. Le 1 Mose 6:3 ƒe nyaa nu la, Yehowa gblɔ be: “Nye gbɔgbɔ maganɔ amewo me boo o, elabena ŋutilã wonye le woƒe vodada me, eye woƒe agbe me ŋkekewo nanye ƒe alafa ɖeka kple blave!” Menye amegbetɔwo ƒe agbenɔƒe ŋue Yehowa nɔ nu ƒom tsoe le afi sia o. Ke boŋ ɣeyiɣi si me wòaɖe vɔ̃ɖinyenye ɖa le anyigba dzi la gblɔm wònɔ.a Esi wònye be ƒe 2370 D.M.Ŋ. ye Tsiɖɔɖɔa dze egɔme ta la, míekpɔe be ƒe 2490 D.M.Ŋ. mee Mawu ɖe gbeƒã nya sia le dziƒo. Ɣemaɣi la, Noa xɔ ƒe 480. (1 Mose 7:6) Ƒe 20 aɖewo megbe, le ƒe 2470 D.M.Ŋ. me la, Noa te vidzidzi. (1 Mose 5:32) Ɣemaɣi la, esusɔ abe ƒe alafa ɖeka ene hafi Tsiɖɔɖɔa nadze egɔme, gake Yehowa megblɔ nya aɖeke na Noa tso dɔ tɔxɛ si wòawɔ le ameƒomea ta kpɔkpɔ me la ŋu haɖe o. Ɣeyiɣi didi kae Mawu alala ase ɖo hafi agblɔe na Noa?

 6. Ɣekaɣie Yehowa de se na Noa be wòakpa aɖakaʋua?

⁶ Edze ƒãa be Yehowa lala ƒe gbogbo aɖewo va yi hafi wògblɔ nu si wòɖo tame be yeawɔ la na Noa. Nu ka dzie míenɔ te ɖo hafi ƒo nya ta alea? Nuŋlɔɖi si tso gbɔgbɔ me la ɖee fia be esime Mawu de se na Noa be wòakpa aɖakaʋua la, Noa viŋutsuwo tsi heɖe srɔ̃ xoxo. Yehowa gblɔ nɛ be: “Mebla nu kpli wò bena, nàyi ɖe aɖakaʋu la me, wò ŋutɔ, viwòŋutsuwo kple srɔ̃wò hekpe ɖe viwòŋutsuawo srɔ̃wo ŋu.” (1 Mose 6:9-18) Eya ta anɔ eme be ƒe 40 alo 50 koe susɔ ne Tsiɖɔɖɔa nava hafi wòde se na Noa be wòakpa aɖakaʋua.

 7. (a) Aleke Noa kple eƒe ƒomea ɖe xɔse fiae? (b) Ɣekaɣie Mawu gblɔ ɣeyiɣi si tututu Tsiɖɔɖɔa adze egɔme la na Noa?

⁷ Esime wonɔ aɖakaʋua kpam la, anɔ eme be Noa kple eƒe ƒomea anɔ wo ɖokuiwo biam be aleke Mawu le eƒe tameɖoɖoa dzi wɔ ge, eye ɣekaɣie Tsiɖɔɖɔa adze egɔme mahã. Togbɔ be womenya naneke tso esia ŋu o hã la, mewɔe be wodzudzɔ aɖakaʋua kpakpa o. Ŋɔŋlɔawo gblɔ be: “Noa wɔe; ale si Mawu de se nɛ la, nenema pɛ wòwɔ.” (1 Mose 6:22) Esi wòsusɔ ŋkeke adre hafi tsi nadza aɖe anyigbaa la, Yehowa gblɔ ɣeyiɣi si tututu Tsiɖɔɖɔa adze egɔme la na Noa mlɔeba—emae nye ɣeyiɣi si tututu Noa kple eƒe ƒomea hiã be woatsɔ akplɔ lãwo ayi ɖe aɖakaʋua me. Eya ta nu sia nu sɔ gbe xoxo hafi dziƒo nu ʋu eye tsi te dzadza “esi Noa xɔ ƒe alafa ade, le ɣleti evelia ƒe ŋkeke wuiadrelia dzi tututu.”—1 Mose 7:1-5, 11.

 8. Aleke Tsiɖɔɖɔa ŋuti nuŋlɔɖia ɖo kpe edzi be Yehowa nya ɣeyiɣi si tututu wòaɖe eƒe amewo?

⁸ Tsiɖɔɖɔa ƒe ŋutinyaa ɖo kpe edzi be menye ɖeko ŋutete le Yehowa si be wòawɔ ɖe game dzi tututu ko o, ke eɖo kpe edzi hã be enye Ameɖela. Esi Yehowa le lalam be yeahe nuɖoanyi sia ava nuwuwui la, míate ŋu aka ɖe edzi be nu sia nu si ƒe tame wòɖo la ava eme ɖe eƒe ɣeyiɣi ɖoɖi dzi, le “ŋkeke ma kple gaƒoƒo ma” tututu dzi.—Mat. 24:36; mixlẽ Xabakuk 2:3.

WOÐE ISRAEL VIWO LE ƑUDZĨA ME

9, 10. Aleke Yehowa zã eƒe dukɔa tsɔ tre mɔ na Egipte aʋakɔa?

⁹ Va se ɖe afi sia la, míekpɔe be Yehowa kpɔa egbɔ be nu sia nu si yeɖo ɖe tame la vaa eme ɖe eƒe ɣeyiɣi ɖoɖi dzi. Kpɔɖeŋu evelia si me míadzro la ate gbe ɖe susu bubu si tae míate ŋu aka ɖe Yehowa dzi be aɖe eƒe amewo la dzi: Awɔ eƒe ŋusẽ si seɖoƒe meli na o ŋu dɔ atsɔ akpɔ egbɔ be yeƒe lɔlɔ̃nu nava eme. Kakaɖedzi le ŋutete si le Yehowa si be wòaɖe eƒe amewo la ŋu ale gbegbe be, ɣeaɖewoɣi la, eɖea mɔ eƒe amewo ɖoa afɔku ƒe nɔnɔme aɖe me hetsɔ trea mɔ na eƒe futɔwo. Nenemae wòdzɔ esime wòɖe Israel viwo tso kluvinyenye me le Egipte.

¹⁰ Anɔ eme be Israel vi siwo ʋu tso Egipte la de miliɔn etɔ̃. Yehowa na Mose kplɔ wo to mɔ aɖe dzi si wɔe be Farao susu be wobu mɔ eye wotɔtɔ. (Mixlẽ 2 Mose 14:1-4.) Esi Farao mete ŋu kpɔ mɔ si Yehowa tre nɛ la dze sii o ta la, enɔ ŋgɔ na eƒe aʋakɔa woti ame siwo nye woƒe kluviwo tsã la yome, eye woyi ɖaxaxa wo ɖo le Ƒudzĩ la nu. Edze abe mɔ aɖeke meli Israel viwo nato o ene. (2 Mose 14:5-10) Gake le nyateƒe me la, Israel viwo meɖo afɔku aɖeke me hafi o. Nu ka tae? Elabena esusɔ vie Yehowa naɖe afɔ aɖe axɔ na wo.

11, 12. (a) Aleke Yehowa wɔ aʋa ɖe eƒe amewo nu? (b) Nu kae do tso eme, eye nu kae ŋutinya sia fia mí tso Yehowa ŋu?

¹¹ “Alilikpo dodo” si nɔ mɔ fiam Israel viwo la dzo le wo ŋgɔ yi wo megbe, eye wòxe mɔ na Farao ƒe aʋakɔa hedo viviti ɖe wo. Gake nukutɔe la, alilikpoa klẽ na Israel viwo ya. (Mixlẽ 2 Mose 14:19, 20.) Eyome Yehowa na ɣedzeƒeya sesẽ aɖe ƒo hema atsiaƒua me ɖe eve “ale bena ƒu la mie keŋ.” Ðikeke mele eme o be nudzɔdzɔ sia xɔ gaƒoƒo geɖe, elabena nuŋlɔɖia gblɔ be ya la nyama ƒu la “zã blibo la katã” eye emegbe la, “Israel viwo zɔ ƒuƒuiƒe to ƒu la me.” Farao ƒe aʋakɔa ƒe tasiaɖamwo nɔ du dzi sesĩe, gake afɔ ko zɔm Israel viwo ya nɔ. Ke hã Egiptetɔwo mate ŋu atu wo gbeɖe o, elabena Yehowa nɔ aʋa wɔm na Israel viawo. Eye “[Yehowa tɔtɔ] Egiptetɔwo ƒe aʋakɔ la. Eye wòna woƒe tasiaɖamfɔwo gli, ale be ŋgɔyiyi zu dɔ na wo.”—2 Mose 14:21-25.

¹² Esi Israel viwo katã ɖo ƒua ƒe go kemɛ dzi ko la, Yehowa gblɔ na Mose be: “Do wò asi ɖe ƒu la dzi, bena tsi la nagbugbɔ aŋe ɖe Egiptetɔwo, woƒe tasiaɖamwo kple woƒe sɔdolawo dzi.” Esi asrafoawo dze agbagba be yewoasi le atsiaƒutsi siwo mli gbɔna kple ŋusẽ nu la, “Yehowa nyã Egiptetɔwo de ƒu la me.” Sisiƒe aɖeke meli na wo o. “Wo dometɔ ɖeka hɔ̃ hã mesusɔ o.” (2 Mose 14:26-28) To mɔ sia dzi la, Yehowa ɖee fia be ŋusẽ le ye si be yeaɖe yeƒe amewo tso nɔnɔme ɖe sia ɖe ƒomevi me.

AME AÐEWO SI LE YERUSALEM ƑE TSƆTSRƆ̃A NU

13. Mɔfiame kawoe Yesu na, eye nya kae eyomedzelawo anya nɔ wo ɖokuiwo biam?

¹³ Yehowa nya ale si tututu nuwo adzɔe ale be eƒe tameɖoɖo nava eme la nyuie. Esia ƒe vevienyenye dze ƒãa le kpɔɖeŋu etɔ̃lia si me míadzro me, si nye: toɖeɖe ɖe Yerusalem le ƒe alafa gbãtɔ me. Yehowa to Via dzi gblɔ mɔfiame siwo dzi Kristotɔ siwo nɔ Yerusalem kple Yudea do ŋgɔ na dua tsɔtsrɔ̃ le ƒe 70 M.Ŋ. me la azɔ ɖo atsi agbe la ɖi. Yesu gblɔ be: ‘Ne miekpɔ ŋunyɔnu si ahe aƒedozuzu avae, abe ale si wogblɔe to nyagblɔɖila Daniel dzi ene, wòtsi tsitre ɖe kɔkɔeƒe la, . . . ekema ame siwo le Yudea nate sisi ayi towo dzi.’ (Mat. 24:15, 16) Gake alekee Yesu yomedzelawo awɔ ade dzesii ne nyagblɔɖi sia le eme vam?

14. Aleke nudzɔdzɔwo na mɔfiame siwo Yesu na la me va kɔ ƒãa?

¹⁴ Nya siwo Yesu gblɔ la me va kɔ nyuie le ƒe geɖe megbe. Le ƒe 66 M.Ŋ. me la, Roma asrafo siwo Cestius Gallus nɔ ŋgɔ na la va Yerusalem be yewoatsi Yudatɔ ƒe aglãdzedze nu. Esi Yudatɔ dzeaglã siwo woyɔna be Zazɛ̃nyahelawo yi ɖadi sitsoƒe le gbedoxɔa me la, Roma asrafowo dze gbedoxɔa ƒe glia te kuku gɔme. Gake Kristotɔ siwo nɔ ŋudzɔ la se nu si nudzɔdzɔ ma fia gɔme nyuie: Trɔ̃subɔlawo ƒe aʋakɔ aɖe tsɔ trɔ̃subɔsubɔ ƒe aflaga (“ŋunyɔnu” la) ɖe asi va keke gbedoxɔa (si nye “kɔkɔeƒe” la) ƒe glia gbɔ ke. Ɣeyiɣia de be Yesu yomedzelawo “nate sisi ayi towo dzi.” Gake aleke woawɔ ado le du si woɖe to ɖo la me? Eteƒe madidi o, nɔnɔmeawo atrɔ kpata.

15, 16. (a) Mɔfiame si me kɔ kae Yesu na, eye nu ka tae wòle vevie be eyomedzelawo nawɔ ɖe edzi? (b) Nu ka dzie míaƒe ɖeɖekpɔkpɔ anɔ te ɖo?

¹⁵ Ame aɖeke menya nu kae dzɔ o, Cestius Gallus kple aʋakɔ si wònɔ ŋgɔ na la trɔ dzo le Yerusalem eye wodze mɔ yina wo de. Zazɛ̃nyahelawo ti wo yome. Esi Romatɔawo kple Yudatɔ dzeaglãwo siaa dzo le dua me la, esia ʋu mɔnukpɔkpɔ si womenɔ mɔ kpɔm na o la ɖi na Yesu yomedzelawo be woasi adzo. Yesu ɖo aɖaŋu na wo eme kɔ nyuie be woagblẽ woƒe nunɔamesiwo ɖi eye woadzo afɔtsɔtsɔe. (Mixlẽ Mateo 24:17, 18.) Ðe wòhiã kokoko be woƒe afɔ natsɔ nenema gbegbea? Eteƒe medidi o, nya sia me va kɔ nyuie. Le ŋkeke ʋɛ aɖewo megbe la, Zazɛ̃nyahelawo trɔ gbɔ eye wote Yerusalem kple Yuda nɔlawo dzi zizi be woawɔ ɖeka kple aglãdzelawo. Nuwo te gbegblẽ le dua me kabakaba le esi Yudatɔ dzeaglãwo ƒe ƒuƒoƒo vovovoawo nɔ agbagba dzem be yewoaɖu amewo dzi ta. Eva nɔ sesẽm ŋutɔ be ame aɖe nasi adzo. Esime Romatɔwo trɔ va le ƒe 70 M.Ŋ. me la, ame aɖeke magate ŋu asi o. (Luka 19:43) Woxaxa ame siwo katã nɔ hehem ɖe megbe la ɖo ɖe dua me! Gake Kristotɔ siwo si yi ɖe towo dzi le Yesu ƒe mɔfiamea dzi wɔwɔ me la ɖe woƒe agbe. Woawo ŋutɔwo kpɔ eteƒe be Yehowa nya ale si wòaɖe eƒe amewo. Nufiame kae le ŋutinya sia me na mí?

¹⁶ Ne xaxa gãa le edzi yim la, ahiã be Kristotɔwo nawɔ ɖe mɔfiame siwo tso Mawu ƒe Nya la me kple eƒe habɔbɔa gbɔ la dzi. Le kpɔɖeŋu me, Yesu de se na eyomedzelawo be ‘woate sisi ayi towo dzi.’ Le xaxa gãa me la, míawo hã míava xɔ mɔfiame be ‘míate sisi.’ Gake aleke míawo ya míele sisi ge? Míenya ale si tututu wòanɔ haɖe o.b Ke hã míate ŋu aka ɖe edzi be Yehowa ana míase mɔfiame ma gɔme nyuie ne ɣeyiɣia de. Esi wònye be míaƒe ɖeɖekpɔkpɔ nɔ te ɖe toɖoɖo dzi ta la, anyo be míabia mía ɖokuiwo be: ‘Aleke mewɔa nu ɖe mɔfiame siwo Yehowa naa eƒe amewo fifia la ŋui? Ðe mewɔna ɖe wo dzi enumakea, alo ɖe mehena ɖe megbe le wo dzi wɔwɔ mea?’—Yak. 3:17.

WODO ŊUSẼ MÍ BE MÍADO DZI LE NU SIWO GBƆNA DZƆDZƆ GE LA ME

17. Nu kae Xabakuk ƒe nyagblɔɖia ɖe fia ku ɖe Mawu ƒe amewo dzi dzedze si gbɔna ŋu?

¹⁷ Mina míagatrɔ ɖe ale si Gog gbɔna mía dzi dze ge kple eƒe ŋusẽ katã ƒe nyaa ŋu ake. Xabakuk gblɔ le nyagblɔɖi aɖe si do ƒome kple ema me be: “Mesee, eye nye dɔme ʋuʋu, nye nuyiwo le ƒoƒom kokóko, eye ŋudui ɖo ƒuwo me nam; ne metsi tre ɖi la, menɔa dzodzom nyanyanya, elabena mele anyi nɔ ge kpoo akpɔ hiãɣi [si atso Mawu gbɔ], si le dukɔ [aʋakɔ si le ŋɔdzi dom na mí], si xaxa mí ɖo la dzi va ge.” (Xab. 3:16) Esi nyagblɔɖilaa nya se ale si wogbɔna Mawu ƒe amewo dzi dze ge la ŋuti nya ko la, eƒe dɔme ʋuʋu, eƒe nu nɔ ƒoƒom, eye ŋusẽ vɔ le eŋu. Ne Gog kple eyomedzelawo va mía dzi dze ge la, ɖewohĩ míawo hã míavɔ̃ abe Xabakuk ene. Ke hã nyagblɔɖilaa lɔ̃ faa be yealala kpoo akpɔ Yehowa ƒe ŋkeke gã la sinu kple kakaɖedzi be Yehowa aɖe eƒe amewo. Kakaɖedzi ma ke ate ŋu asu míawo hã si.—Xab. 3:18, 19.

18. (a) Nu ka tae mele be míavɔ̃ amedzidzedze si gbɔna la o? (b) Nu ka mee míadzro le nyati si kplɔe ɖo me?

¹⁸ Kpɔɖeŋu etɔ̃ siwo me míedzro la ɖee fia ɖikekemanɔmee be Yehowa nya ale si wòaɖe eƒe amewo. Eƒe tameɖoɖo mado kpo eme vava gbeɖe o; aɖu eƒe futɔwo dzi godoo. Gake hafi míawo hã míakpɔ dzidzɔ ne Yehowa ɖu eƒe futɔwo dzi la, ele be míayi edzi awɔ nuteƒe va se ɖe nuwuwu. Aleke Yehowa kpena ɖe mía ŋu míeléa nuteƒewɔwɔ me ɖe asi fifia? Esia mee míadzro le nyati si kplɔe ɖo me.

[Etenuŋɔŋlɔwo]

[Nɔnɔmetata si le axa 24]

Ðe Israel viwo ɖo afɔku me le Farao ƒe aʋakɔa si me vavã?