1 Korintotɔwo
6 Ne nya ɖo mia dometɔ aɖe kple nɔvia dome la,+ ɖe wòdoa dzi tsɔnɛ yia ʋɔnu le ame madzɔmadzɔwo gbɔ, ke menye le ame kɔkɔewo gbɔ oa? 2 Alo ɖe mienyae be ame kɔkɔewoe adrɔ̃ ʋɔnu xexea oa?+ Eye ne miawoe adrɔ̃ ʋɔnu xexea ɖe, ekema ɖe miedze adrɔ̃ nya suesuewo ya oa? 3 Ðe mienyae be míadrɔ̃ ʋɔnu mawudɔlawo oa?+ Ekema nu ka tae míadrɔ̃ agbe sia me nyawo ya o? 4 Ke ne agbe sia me nyawo li miadrɔ̃ la,+ ame siwo ŋu hamea medea bubui o lae mieɖoa ʋɔnudrɔ̃lawoea? 5 Mele egblɔm ale be ŋu nakpe mi. Ðe nunyala ɖeka hɔ̃ hã mele mia dome, si ate ŋu adrɔ̃ nɔviawo dome nya oa? 6 Ke boŋ nɔvi kplɔa nɔvi yia ʋɔnu le dzimaxɔsetɔwo gbɔ!
7 Le nyateƒe me la, ne miekplɔa mia nɔewo yia ʋɔnu la, ekema miedo kpo nu xoxo. Nu ka ta miena wowɔ vɔ̃ ɖe mia ŋu boŋ o?+ Nu ka ta miena wotafa mi boŋ o? 8 Ke boŋ miewɔa vɔ̃, mietafaa ame, eye miele esia wɔm ɖe mia nɔviwo kekeake ŋu!
9 Ðe mienyae be ame madzɔmadzɔwo manyi Mawu Fiaɖuƒe la dome oa?+ Migana woaflu mi o. Ame siwo ƒoa wo ɖokuiwo ɖe gbɔdɔdɔ manɔsenu* me,+ trɔ̃subɔlawo,+ ahasiwɔlawo,+ ŋutsu siwo gbɔ ŋutsuwo dɔna,+ alo ŋutsu siwo dɔna kple ŋutsuwo,+ 10 kple fiafitɔwo, ŋuklẽlawo,+ ahamulawo,+ amedzulawo kple adzodalawo la, womanyi Mawu Fiaɖuƒe la dome o.+ 11 Gake nenemae mia dometɔ aɖewo nɔ tsã. Ke wole tsi na mi;+ ke wona mia ŋuti kɔ;+ ke wobu mi ame dzɔdzɔewo+ le mía Aƒetɔ Yesu Kristo ƒe ŋkɔ la kple mía Mawu ƒe gbɔgbɔ la me.
12 Woɖe nuwo katã ƒe mɔ nam, ke menye nuwo katãe dea ame dzi o.+ Woɖe nuwo katã ƒe mɔ nam, ke nyemaɖe mɔ be nu sia nu nakpɔ ŋusẽ ɖe dzinye o. 13 Nuɖuɖu li na ƒodo, eye ƒodo hã li na nuɖuɖu, ke Mawu ana esia kple ekemɛa siaa nazu nu gbɔlo.+ Ke ŋutilã meli na gbɔdɔdɔ manɔsenu* o, ke boŋ na Aƒetɔ la,+ eye Aƒetɔ la hã li na ŋutilã la. 14 Ke Mawu fɔ Aƒetɔ la ɖe tsitre,+ eye wòafɔ míawo hã ɖe tsitre tso ame kukuwo dome+ to eƒe ŋusẽ me.+
15 Ðe mienyae be miaƒe ŋutilãwo nye Kristo ƒe ŋutinuwo oa?+ Ekema ɖe maɖe Kristo la ƒe ŋutinuwo ɖa ahatsɔ wo awɔ ɖeka kple gbolo ƒe ŋutinuwoea? Gbeɖe! 16 Ðe mienyae be ame si tsɔ eɖokui lé ɖe gbolo ŋu la, eya kplii wozu ŋutilã ɖeka oa? Elabena egblɔ be: “Wo ame evea woazu ŋutilã ɖeka.”+ 17 Ke ame si tsɔ eɖokui lé ɖe Aƒetɔ la ŋu la, eya kplii wozu gbɔgbɔ ɖeka.+ 18 Misi le gbɔdɔdɔ manɔsenu* nu!+ Nu vɔ̃ bubu ɖe sia ɖe si ame awɔ la, mele eƒe ŋutilã me o, ke ame si ƒoa eɖokui ɖe gbɔdɔdɔ manɔsenu* me la le nu vɔ̃ wɔm ɖe eya ŋutɔ ƒe ŋutilã ŋu.+ 19 Ðe mienyae be miaƒe ŋutilã nye gbɔgbɔ kɔkɔe si le mia me, si miexɔ tso Mawu gbɔ la, ƒe gbedoxɔ oa?+ Eye mienye mia ɖokuiwo tɔ hã o,+ 20 elabena ho gã aɖee wotsɔ ƒle mi.+ Eya ta midze agbagba ɖe sia ɖe miakafu Mawu+ le miaƒe ŋutilã me.+